Espíritu santu gucané para guyáʼ guiráʼ xixé ni nuu

«Pur stiidxaʼ Jiobá guyáʼ guibáʼ, ne pur espíritu stibe guyáʼ guiráʼ xixé ni nuu guibáʼ.» (SAL. 33:6)

1, 2. 1) Ximodo ziyanna binni jma de ca cosa nuu lu Guidxilayú ne guibáʼ. 2) Xi cosa risaca naquiiñeʼ guinabadiidxanu laca laanu.

LU IZA 1905, guyuu ti científicu láʼ Albert Einstein, hombre riʼ nabé runibiáʼ binni laa. Laabe ne xcaadxi científicu ni bibani tiempu stibe que biʼniʼ crécabe nuu ti galaxia si ni láʼ Vía Láctea. ¡Rihuínnica huaxiéʼ nánnacabe pabiáʼ nga naroʼbaʼ guibáʼ ne guiráʼ ni nuu luni! Ca dxi stinu riʼ runi cré binni nuu jma de ti gayuaa mil millón de galaxia, ne ndaaniʼ cada tobi de laacani nuu mil millón de beleguí. Ne ora riquiiñecabe ca cosa ni zanda guʼyanécabe ca beleguí ca ne ora ruseendacabe telescopio para gúʼyacabe jma zitu la? jmaruʼ si stale beleguí ridxélacabe.

² Ra biuʼnu lu siglu XX que huaxiéʼ si nga cani nanna binni de guiráʼ cosa ni nuu guibáʼ, peru laaca huaxiéʼ nga ni nánnacabe de Guidxilayú ra nabáninu riʼ. Dxandíʼ nga jma gunna ca científicu ni bibani lu siglu XX ca que cani guyuu ante de laacaʼ, peru yanna jma maʼ ridúʼyanu pabiáʼ sicarú ne pabiáʼ nagana modo guyáʼ guiráʼ cosa que laacabe ne modo rusibani Guidxilayú riʼ cani. Ne despué zánnanu jma cosa de guibáʼ ne de Guidxilayú. Peru yanna naquiiñeʼ guinabadiidxanu laca laanu: ximodo guyáʼ guiráʼ xixé cosa nuu yanna. Binni si ni zanda gabi laanu ximodo guyáʼ cani nga Dios, purtiʼ laabe bizaʼbe cani, ne cayábibe ni laanu lu Stiidxabe.

Ti milagru nga modo guca guiráʼ ni nuu

3, 4. Ximodo guyáʼ guibáʼ ne Guidxilayú, ne ximodo rusisácacani Dios.

³ Ca diidxaʼ ruzuluné Biblia, cusiénecani laanu ximodo guyáʼ guiráʼ ni nuu guibáʼ ne lu Guidxilayú: «Primé que Dios bizáʼ guibáʼ ne guidxilayú» (Gén. 1:1). Gastiʼ nin ti cosa dxi gudixhe ique Jiobá guzáʼ cani nuu, nga runi biquiiñebe espíritu santu stibe para bizaʼbe «guibáʼ ne guidxilayú», ne guiráʼ ni nuu guibáʼ. Biquiiñeʼ Dios espíritu santu stiʼ para bizáʼ guiráʼ cosa naroʼbaʼ, cásica riquiiñeʼ binni náʼ ne ca herramienta stiʼ para guzáʼ xiixa cosa nabé sicarú.

⁴ Stiidxaʼ Dios na zeeda gaca espíritu santu casi «bicuinináʼ Dios» (Luc. 11:20, NM; Mat. 12:28, NM). Ne guiráʼ ni maʼ biʼniʼ Jiobá pur stipa ca —«guiráʼ ni bizaʼbe ne nabe»— casi ora ñuundaʼ cani pabiáʼ nandxoʼbe. Salmista que biindaʼ sicaríʼ: «Guibáʼ caníʼ pabiáʼ nandxóʼ Dios; ne de guiráʼ ni bizaʼbe ne nabe guibáʼ ca caníʼ de laacani» (Sal. 19:1). Casi maʼ bidúʼyanu ca, guiráʼ ni bizáʼ Jiobá rusihuínnicani pabiáʼ nandxóʼ espíritu stibe (Rom. 1:20). Guidúʼyanu caadxi ejemplu.

Poder stiʼ Dios ni qué gapa ra guiluxe

 5. Bizeeteʼ ti ejemplu ni rusihuinni pabiáʼ nandxóʼ espíritu stiʼ Jiobá.

⁵ Pur modo naroʼbaʼ guibáʼ ca rihuinni qué ziuu dxi guirá poder ne stipa stiʼ Jiobá. Biblia na: «Laguindisalú luguiáʼ ne laguuyaʼ. Tu bizáʼ cani. [Laabe nga] ni ribee cani jneza casi ñaca cani soldadu ne ribídxibe cani pur lá cani. Pur stale stipa nápabe, [ne] purtiʼ laaca nápabe stale poder la? nin tobi cani cadi cayaadxaʼ» (Isaías 40:26). Guiníʼ íquenu de Gubidxa. Gubidxa ca nga ti beleguí ni nuu biaʼ ti gayuaa cincuenta kilómetru de Guidxilayú ne nápani 15 millón de gradu de nandáʼ. Nécapeʼ nabé nandáʼ ni la? biáʼsipeʼ lugar ra nuuni, purtiʼ redandá xtuxhu si ni caquiiñeʼ lu Guidxilayú riʼ para ganda chuʼ guendanabani. Racá ridúʼyanu biquiiñeʼ stale poder ne stipa para guyáʼ Gubidxa ca, peru cadi ngasi, sínuque laaca biquiiñeʼ ni para guyáʼ guiráʼ ca millón de beleguí. Jiobá napa stale poder ne stipa para bizáʼ guiráʼ cani.

6, 7. 1) Xiñee zanda guininu biquiiñeʼ Dios espíritu para bizáʼ guiráʼ cosa. 2) Ximodo nánnanu cadi málasi bihuinni guibáʼ.

⁶ Ndaaniʼ Guidxilayú riʼ nuu stale cosa ni rusihuinni biquiiñeʼ Dios espíritu stiʼ para bizáʼ cani ne jneza modo bíʼnibe cani. Quíxhenu ti ejemplu. Bixuiʼlú niguuluʼ caadxi bola huiiniʼ de gadxé gadxé color ndaaniʼ ti caja, de racá maʼ nuguuchaluʼ cani ne despué nusábaluʼ cani layú. Ñee rábiluʼ zuyubi ca bola huiiniʼ de ti clase color si ti lugar si la? Ñee zié ca azul ca ti lugar ne ca naguchi ca sti lugar ne zacá gaca né xcaadxi la? ¡Coʼ xa! Ca cosa ni qué ratachaahuiʼ ximodo gaca la? qué racadícani jneza. Ne nga nga ti cosa ni maca nanna binni.a

⁷ Yanna, xi huadxela ca hombre ca ora riquiiñecaʼ telescopio sticaʼ para gúʼyacaʼ xi guiráʼ nuu guibáʼ yaʼ. Ruuyacabe stale galaxia, beleguí ne planeta ne ruuyacabe nexhechaahuiʼ modo riniibi cada tobi de laacani. Ñee zanda guininu málasi bihuinni cani o gúcacani purtiʼ gucuaguí xiixa ne zacá guyáʼcani la? Qué zanda diʼ gácani zacá. Yanna, xi stipa nga biquiiñeʼ para guyáʼcani ne gutachaahuiʼ cani yaʼ. Nin ti cosa ni guzáʼ ca científicu ca qué zanda iquiiñeʼ cani para gúʼyacaʼ stipa ca. Peru Biblia na laani nga espíritu santu, stipa ni jma nandxóʼ ni nuu guibáʼ ne lu Guidxilayú. Nga runi jneza nga ni guníʼ salmista que: «Pur stiidxaʼ Jiobá guyáʼ guibáʼ, ne pur espíritu stibe guyáʼ guiráʼ xixé ni nuu guibáʼ» (Sal. 33:6). Stale nga beleguí bizáʼ Jiobá, peru caadxi si de laacani nga ridúʼyanu ora guindisalunu guibáʼ ti huaxhinni.

Espíritu santu ne Guidxilayú stinu

 8. Pabiáʼ nga nánnanu de ca cosa ni bizáʼ Jiobá.

⁸ Pa guchaaganu cani nánnanu né cani cayaadxaʼ guizíʼdinu la? gastiʼ nga nánnanu. Job, ti hombre ni bizuubaʼ diidxaʼ guníʼ sicaríʼ, «ruaa ca neza» si stiʼ Dios nga nanna binni, ni riníʼ ca diidxaʼ ca nga caadxi huiiniʼ si de ca cosa ni bizaʼbe nga runibiaʼcaʼ. Ne despué guniʼbe ca diidxaʼ riʼ: «¡Ne ti cosa huiiniʼ si nga ni huayunadiáganu de laabe!» (Job 26:14). Gudiʼdiʼ si caadxi siglu despué rey Salomón, ti hombre ni nabé guyuulaʼdxiʼ ca cosa ni bizáʼ Dios guníʼ ca diidxaʼ riʼ de Jiobá: «Guiráʼ ca cosa ca bizaʼbe cani galán ne bíʼnibe cani tiempu naquiiñeʼ gácacani. Guluube ndaaniʼ ladxidoʼcaʼ tiempu ni qué gapa ra riluxe, zacá qué ziuu dxi ganna binni guidxilayú guiráʼ ni bizáʼ Dios ni dxandíʼ dede dxi bizulú guiráʼ cosa dede ra bilúxecani» (Ecl. 3:11; 8:17).

9, 10. Xi biquiiñeʼ Jiobá para bizáʼ Guidxilayú, ne xii nga ca cosa ni guca lu ca primé guionnaʼ gubidxa.

⁹ Neca zacá, Jiobá maʼ bisiidiʼ laanu stale cosa risaca ni nuu lu guiráʼ cani bizáʼ. Stiidxaʼ Dios na biʼniʼ espíritu santu dxiiñaʼ lu Guidxilayú riʼ maʼ raca stálepeʼ iza. Biblia na: «Qué nihuinni gastiʼ lu guidxilayú riʼ ne casi ñaca ti desiertu ni ne nacahui luni. Ne stipa ni riquiiñeʼ Dios biniibi ni cheríʼ chericaʼ lu nisa que» (Génesis 1:2). Qué nihuinni ra nabidxi tiempu que, gastiʼ biaaniʼ, ne ruluíʼ laaca gastiʼ bi.

¹⁰ Biblia ruzeeteʼ bizulú biʼniʼ Dios dxiiñaʼ lu caadxi dxi ra bizaʼbe stale cosa, peru cadi ti dxi de veinticuatro hora cani, sínuque gúcacani dxi de stale tiempu. Lu primé dxi que bisihuinni Jiobá ti xtuxhu biaaniʼ lu Guidxilayú riʼ. Zacá bizulú bíʼnibe caadxi cosa ni bihuinni despué, dxi maʼ gunda bihuinni Gubidxa ne Beeu dede lu Guidxilayú riʼ (Gén. 1:3, 14). Lu guiropa dxi que bizulú bizaʼbe ti capahuiiniʼ ni nuu guidubi naca Guidxilayú ne rábicabe ni atmósfera (Gén. 1:6). Pur nga gunda guyuu nisa, biaaniʼ ne bi lu Guidxilayú, peru qué rihuinni ra nabidxi. Ra bizulú guionna gubidxa que, biquiiñeʼ Jiobá espíritu stiʼ para bizáʼ ca continente ca. Ximodo bíʼnibe ni yaʼ. Zándaca laaca stipa stiʼ Guidxilayú ca nga biquiiñebe para guleebe ni de ndaaniʼ nisa ni nexheʼ luni, zacá maʼ gunda bihuinni ra nabidxi (Gén. 1:9). Cásica dxi que ne xcaadxi dxi ni gudiʼdiʼ, bíʼnibe xcaadxi cosa naroʼbaʼ.

Espíritu santu né cani nabani

11. Xi rihuinni de Dios pur modo bizaʼbe guiráʼ cosa.

¹¹ Espíritu santu ca laaca biʼniʼ stale cosa ni nabani lu Guidxilayú riʼ. Dede lu guionna gubidxa hasta ra bizaa xhoopaʼ gubidxa, biquiiñeʼ Dios espíritu santu stiʼ para bizáʼ guiráʼ clase maniʼ ne yaga (Gén. 1:11, 20-25). Lade cani bizaʼbe ca nuu stale cosa ni rusihuinni gutachaahuiʼ cani, rihuinni bireebiáʼ módopeʼ guca cani ne nabé sicarú modo guyáʼ cani, nga rusihuinni pabiáʼ nuu xpiaaniʼ Dios ni bizáʼ cani.

12. 1) Xi dxiiñaʼ runi ADN. 2) Xi rihuinni pur modo runi ADN ca dxiiñaʼ.

¹² Guininu de ADN (ácido desoxirribonucleico). ADN ca riquiiñeni para ganda guidale guiráʼ cosa ni nabani lu Guidxilayú riʼ ne gaca cani modo nexheʼ chaahuiʼ cani lu ADN ca. Né ADN ca randa ridale guiráʼ cosa ni nabani, ca cosa ni zanda guʼyaʼ binni casi, guixi, binni, elefante, ballena azul dede né ca cosa ni zanda si guʼyaʼ binni ne microscopio. Nécapeʼ gadxé gadxé cani la? ADN ni napa cada tobi de laacani riquiiñeʼ para gácacani zaqueca sti biaje. Laani nga huayacaneni para ganda guiaana guiráʼ clase cosa ni nabani de ti modo si neca maʼ gudiʼdiʼ stale tiempu. Ne casi modo gudixhe Dios gácani, cada tobi de ca cosa ni nabani cayuni dxiiñaʼ ni naquiiñeʼ guni lade guiráʼ cosa ni nabani (Sal. 139:16). Modo guyáʼ ca cosa ca rusihuinni espíritu santu nga bizáʼ cani, o «bucuinináʼ Dios».

Ni jma sicarú guyáʼ lu Guidxilayú

13. Ximodo bizáʼ Dios binni.

¹³ Biquiiñeʼ Jiobá stale mil de iza para bizáʼ stale cosa, cásica ni nabani zaqueca ni cadi nabani. Pur nga maʼ guca Guidxilayú riʼ ti lugar sicarú ne maʼ qué nihuinni ni casi «ti desiertu». Peru cayaadxaruʼ ni gúnibe para guilúxebe ne zaquiiñebe espíritu stibe para laacani. Ra maʼ ziluxe xhoopaʼ gubidxa que biquiiñebe espíritu stibe para bizaʼbe binni ne biquiiñebe yú ne ca cosa ni nápani para bíʼnibe laacaʼ. Ra biluxe bizaʼbe binni bihuinni laacaʼ nga ti dxiiñaʼ jma sicarú ni biʼniʼ Dios (Gén. 2:7).

14. Xiñee gadxé binni de ca maniʼ ca.

¹⁴ Génesis 1:27 na: «Bizulú bizáʼ Dios binni casi laa, casi Dios bizáʼ laacabe; hombre ne gunaa bizaʼbe laacaʼ». Cumu bizáʼ Dios laanu casi laa la? nga runi zanda gannaxhiinu sti binni ne zanda cuinu xi gúninu dede zándapeca gaca xhamígunu Dios. Nga runi qué ridxagayaadinu gadxé modo runi cerebru stinu dxiiñaʼ ne gadxé modo runi cerebru stiʼ ca maniʼ ca dxiiñaʼ. Guyaʼni para ganda guizíʼdinu de Jiobá ne de cani bizaʼbe, ne zanda guizíʼdinu de laacani pur stale iza.

15. Ximodo gudixhe Dios nibani Adán ne Eva.

¹⁵ Ora bizulú guyuu binni lu Guidxilayú, bisaana Dios lu náʼ Adán ne Eva Guidxilayú riʼ para gunibiáʼ cani ne para chuuláʼdxicaʼ guiráʼ cosa sicarú nuu luni (Gén. 1:28). Bidii Jiobá laacabe stale cosa para gócabe ne ti paraísu ra guibánicabe. Ne laaca gudxi laacabe zanda guibánicabe sin gáticabe ne chúʼcabe nayecheʼ ne ca millón de xiiñicabe ni gale sin donda. Triste guininu ni, peru qué niree diʼ ca cosa ca casi modo gudixhe Dios gaca cani.

Guiénenu xi dxiiñaʼ runi espíritu santu

16. Xi cabézanu guni Dios neca bicaalú primé bixhózenu ne jñaanu laabe.

¹⁶ Adán ne Eva bíʼnicaʼ ti cosa nabé feu, bicaalúcabe Dios ni bizáʼ laacabe, zacá bisihuínnicabe qué rudiicabe xquíxepeʼ laabe ne ruyúbicabe puru para laasicabe. Nga runi, cumu xiiñicabe guiranu la? ralenenu donda ne rápanu stale yuubaʼ. Peru Biblia rusiidiʼ zuni chaahuiʼ Dios guiráʼ guendananá ni rápanu pur donda stiʼ primé bixhózenu ne jñaanu ne zúnibe ni gudixhe íquebe para Guidxilayú riʼ. Zúnibe Guidxilayú riʼ ti paraísu ra guibani puru si binni ni nazaaca ne qué ziuu dxi gusaana de chuʼcaʼ nayecheʼ (Gén. 3:15). Guiranu qué racaláʼdxinu gusiáʼndanu ni maʼ guníʼ Dios chiguni, ne para nga caquiiñenu espíritu santu.

17. Xi riníʼ ique binni yanna ni cadi naquiiñeʼ gulábinu.

¹⁷ Para ganda guicaanu espíritu santu la? naquiiñeʼ guinábanu ni ora guni orarnu (Luc. 11:13). Zacá zaca fe stinu jma naguidxi ne jmaruʼ si zuni crenu Jiobá nga bizáʼ guibáʼ ne Guidxilayú. Ca dxi nabáninu riʼ nabé runadiáganu riníʼ binni ziúpanu de ti maniʼ o gastiʼ Dios. Qué zanda diʼ gudiʼnu lugar guchibi cani ne quítecani laanu, purtiʼ gastiʼ razón para laacani. Guiranu naquiiñeʼ chuʼnu listu para gudxíʼlunu ni riníʼ ca binni ca ne para cadi gudiʼnu lugar gucaacabe laanu guni crenu cani (biindaʼ Colosenses 2:8).

18. Xiñee cadi jneza guiníʼ íquenu qué ñuu ti Dios ni nuu xpiaaniʼ ni bizáʼ guiráʼ cosa.

¹⁸ Fe ni nápanu Dios ne ni nápanu Biblia zácani jma naguidxi pa guidúʼndanu ca razón risaca ni rusihuinni dxandíʼ nuu ti Dios ni bizáʼ ca cosa ca. Nuu tu laa ora gacalaʼdxiʼ guiene ximodo guyáʼ guibáʼ, Guidxilayú ne binni qué liica riuuláʼdxicaʼ guiníʼ íquecaʼ pa nuu tuuxa nandxóʼ ni bizáʼ cani. Peru cadi jneza diʼ guiníʼ íquecabe zacá, purtiʼ ora riníʼ íquecabe zacá qué ruuyacabe guiráʼ ca razón ni rusihuinni dxandíʼ guyuu tu bizáʼ guiráʼ cosa. Ne cumu riníʼ íquecabe gastiʼ Dios la? rusihuínnicabe qué ñuu tuuxa ni gudixhe chaahuiʼ modo gaca ca cosa ca ne rucaani laacabe guiníʼ íquecabe pur gana si guca guiráʼ cosa sicarú ni nuu guibáʼ (Job 9:10; Sal. 104:25). Laanu ca xpinni Cristu runi crenu de guidubi ladxidoʼno biquiiñeʼ Jiobá espíritu santu stiʼ para bizáʼ guiráʼ ni nuu.

Espíritu santu ne fe ni nápanu Dios

19. Xi rucaa lii guni creluʼ nuu Dios ne cayuni espíritu stibe dxiiñaʼ.

¹⁹ Dxandíʼ nga cadi caquiiñeʼ gánnanu xi guiráʼ nuu lu ca cosa ni biʼniʼ Dios para gápanu fe laabe, gannaxhiinu laabe ne guni respetarnu laabe de guidubi ladxidoʼno. Para ganda guiale de laanu gápanu fe laabe cadi caquiiñeʼ gánnasinu stale cosa. Cásica jma raca xhamigu chupa binni ora jma maʼ ziyunibiáʼ chaahuicaʼ la? zacaca nga riguidxi fe stinu ora jma maʼ zizíʼdinu ximodo nga Dios. Dxandíʼ, jma runi crenu nuube ora ridúʼyanu ximodo ricábibe ca oración stinu ne ora guiénenu ribeendunu ni galán ora chinándanu ca conseju stibe. Ne jma raca xhamígunu Jiobá ora gúʼyanu ruluiʼbe laanu ximodo sanu guiráʼ dxi, rápabe laanu, rudiibe ni caquiiñenu ne riguube ndaayaʼ ca stipa ni cayúninu pur guni adorarnu laabe. Guiráʼ nga rusihuinni dxandíʼ nuube ne cayuni espíritu stibe dxiiñaʼ.

20. 1) Xiñee bizáʼ Dios guibáʼ, Guidxilayú ne binni. 2) Xi zabeendunu pa gudiʼnu lugar gabi espíritu santu laanu xi gúninu guiráʼ dxi.

²⁰ Sti ejemplu galán ni rusihuinni ximodo riquiiñeʼ Jiobá espíritu stiʼ nga Biblia. Xiñee yaʼ. Sicaríʼ caníʼ Biblia de ca binni ni bicaani: «Uníʼ ca ni na Dios casi gudxi Espíritu Santu ni laacaʼ» (2 Ped. 1:21). Pa gúninu stipa pur guidúʼndanu ni ne guiénenu ni la? jmaruʼ si zuni crenu Jiobá nga bizáʼ guiráʼ ni nuu (Apo. 4:11). Guendarannaxhii ni nápabe nga bicaa laabe guzaʼbe guiráʼ cosa ne laani nga guenda ni jma riuuláʼdxinu (1 Juan 4:8). Nga runi gúninu stipa biaʼ gándatiʼ pur gacanenu binni gunibiáʼ Bixhózenu ni nuu guibáʼ ne Xhamígunu ni jma nadxii laanu. Ne gudiʼnu lugar gabi espíritu stibe laanu xi gúninu guiráʼ dxi, zacá qué ziuu dxi gusaana de guizíʼdinu de Jiobá ne nabé sicarú ndaayaʼ ca (Gál. 5:16, 25). Gúninu stipa guiráʼ dxi pur gunibiáʼ chaahuinu ximodo laabe ne ca cosa sicarú ni bizaʼbe, ne gannaxhiinu stobi cásica bisihuínnibe ni ora biquiiñebe espíritu stibe para bizaʼbe guibáʼ, Guidxilayú ne binni.

[Cani cá ñee yaza]

Ñanda nusiéneluʼ ni la?

• Xi rusiidiʼ guibáʼ ne Guidxilayú laanu de modo riquiiñeʼ Dios espíritu stiʼ.

• Xii nga cani zanda gúninu pur bizáʼ Dios laanu casi laa.

• Xiñee naquiiñeʼ guidúʼndanu gatigá ca razón ni rusihuinni nuu tu bizáʼ guiráʼ ni nuu.

• Xi zanda gúninu para jma gaca xhamígunu Jiobá.

[Dibuju/foto ni zeeda lu yaza 7]

Xi rizíʼdinu ora ridúʼyanu modo nexheʼ chaahuiʼ guiráʼ ni nuu guibáʼ

[Ra gucuaacabe dibuju o foto]

Beleguí: Anglo-Australian Observatory/David Malin Images

[Ca dibuju/foto ni zeeda lu yaza 8]

Runi ADN ca dxiiñaʼ lu guiráʼ ca cosa ni nabani riʼ

[Dibuju/foto ni zeeda lu yaza 10]

Ñee nuunu listu para gusihuínninu dxandíʼ nápanu fe la?