Cabézacabe Mesías

«Guirácabe cabézacabe gueeda Mesías que nagueenda, ne nuucabe gánnacabe pa Juan nga Mesías que.» (LUC. 3:15, NUEVA TRADUCCIÓN VIVIENTE)

 1. Xi gudxi ti ángel caadxi pastor.

TI GUEELAʼ nuu caadxi pastor lu layú cayápacaʼ dendxuʼ. Málasi biiyacabe ti ángel stiʼ Jiobá bizaaniʼ laacabe dede bidxíbicabe. Ndiʼ nga ca diidxaʼ gudxi ángel que laacabe: «Cadi idxibi tu. Nia caadxi diidxa cubi gabe laatu, ni gusieche de irá xixé binni guidxilayú. Yanadxí gule tobi ni ulá laatu [...], ne laabe nga Cristu Señor». Ca diidxaʼ ca rusihuínnicani gule ti baʼduhuiiniʼ ni zeeda gaca Mesías. Ángel que gudxi ca pastor que zanda guidxélacabe baʼduhuiiniʼ que ndaaniʼ ti currá ni nuu ndaaniʼ ti guidxi huiiniʼ nuu gaxha de ra nuucabe. Sicaríʼ na Biblia: «Mala bihuinni jma ángel ra nuu ángel que, cayuunda caʼ, cusisaca ca Dios, na caʼ: Diuxquixe Dios ni nuu ibáʼ, ne ndaani guidxilayú gata dxí ladxidóʼ cani guni ni na be» (Luc. 2:8-14).

 2. Xi riníʼ diidxaʼ «Mesías», ne ximodo zanda ganna binni tuu nga ni bibí para gaca «Mesías».

² Cumu judíu ca pastor que la? nánnacabe riníʼ diidxaʼ hebreu «Mesías» o «Cristu» tobi ni «Bibí» pur Jiobá para guni ti dxiiñaʼ nabé risaca (Éxo. 29:5-7). Yanna, ximodo zanda ganna ca pastor que jma de «Mesías» ne gacanécabe xcaadxi binni guni cré baʼduhuiiniʼ que nga ni gulí Dios, casi guníʼ ángel que yaʼ. Ora gúʼndacabe ca diidxaʼ riguixhená ni zeeda lu Stiidxaʼ Dios ni gucuá lu hebreu ne gúʼyacabe pa cayaca ca diidxaʼ que luguiáʼ baʼduhuiiniʼ que.

Xiñee cabeza lélecabe laabe

3, 4. Ximodo zanda guiénenu Daniel 9:24, 25.

³ Gudiʼdiʼ si caadxi iza despué, bizulú bicheeche Juan ni Riguunisa diidxaʼ. Cani guniʼbe ne cani bíʼnibe bicaani stale binni guiníʼ ique pa laabe nga Mesías (biindaʼ Lucas 3:15). Yanna, xiñee stale tu guníʼ ique maʼ cadxiña dxi guedandá Cristu yaʼ. Purtiʼ zándaca jneza modo biénecabe ca diidxaʼ riguixhená ni caníʼ de «setenta semana», ne luni na sicaríʼ: «Nuu setenta semana ni maca nexheʼ para xquídxiluʼ [...]. Ne naquiiñeʼ gánnaluʼ [...] dede dxi guiree diidxaʼ para guibiguetaʼ gaca chaahuiʼ ne cuí Jerusalén sti biaje dede dxi gueeda Mesías Xaíque que, zadiʼdiʼ gadxe semana, ne laaca zadiʼdiʼ sesenta y dos semana» (Dan. 9:24, 25). Stale libru ruzeeteʼ nácacani semana de iza. Casi La Palabra de Dios para Todos rusiene lu ti nota ca diidxaʼ riʼ: «Setenta semana de iza, nga nga tapa gayuaa noventa iza».

⁴ Ca dxi stinu riʼ, ca xpinni Jiobá nánnanu bizulú 69 semana ni bieeteʼ lu Daniel 9:25 que lu iza 455 ante de ca dxi stiʼ Jesús, dxi biʼniʼ mandar Artajerjes rey stiʼ Persia Nehemías chigucuí lindaa stiʼ Jerusalén sti biaje (Neh. 2:1-8). Pa ugábanu 69 semana o 483 iza, biaʼsi zindanu lu iza 29 despué de ca dxi stiʼ Jesús, ízapeʼ guyuunísabe. Óraque nga gulí Dios laabe pur espíritu santu ne beeda gácabe Mesías (Mat. 3:13-17).a

 5. Gunáʼ nga ca diidxaʼ riguixhená ni chiguidúʼndanu.

⁵ Yanna guidúʼndanu caadxi diidxaʼ riguixhená ni caníʼ de dxi gule Mesías, ca primé iza bibani, ne ora bicheeche diidxaʼ. Ora guidúʼyanu modo guca ni na ca diidxaʼ ca lu xquendanabani Jesús, jma zuni crenu cani zeeda lu Biblia ne laaca zuni crenu Jesús nga Mesías ni nexheʼ gueeda.

Cani maca bieeteʼ zazaaca dxi nahuiinibe

 6. Ximodo guca ni na Génesis 49:10.

⁶ Zeedabe de tribu stiʼ Judá. Dxi mayaca gati Jacob guníʼ zacaa ca xiiñiʼ stale ndaayaʼ. Lu tobi de laacani guniʼbe: «Vara ca qué zaxéleni de Judá, nin bastón ni runi mandárnebe qué zareeni lade ñeebe, dede ora gueeda Siló; ne zuzuubaʼ guiráʼ guidxi stiidxaʼ» (Gén. 49:10). Casi guníʼ stale de ca judíu ni nabé ruundaʼ de Biblia, guca ni na ca diidxaʼ ca lu xquendanabani Mesías. Xii nga vara ne bastón ni zuni mandarnebe yaʼ. Laani nga derechu ne poder ni nápabe para guni mandarbe. Ca diidxaʼ riguixhená ca rusihuínnicani puru si de tribu stiʼ Judá nga gueeda guiráʼ rey, ne zacá bizaaca ni dede dxi guca David rey. Xi riníʼ diidxaʼ Siló yaʼ. Diidxaʼ ca riniʼni «Ni stini», o «Ni naquiiñeʼ guicaani». Siló nga ti binni ni zeeda lade ca rey de Judá ne qué ziuu dxi gusaana de guni mandar. Ni zacané laanu gánnanu zacá ni nga ni gudxi Dios Sedequías, últimu rey ni guyuu Jerusalén. Dios gudxi laabe zeeda tobi ni napa derechu para cuíʼ lu trono ne zucuí Dios laa lugar ca (Eze. 21:26, 27). Despué de Sedequías, binni si ni za de David ni guníʼ Dios zacaa ti reinu nga Jesús. Ne zacá gúcani, chupa chonna beeu ante gálebe, ángel Gabriel gudxi María ca diidxaʼ riʼ: «Zucuí [Jiobá] laabe de rey ra gurí bixhoze gola be David. Zaca be rey sti irá cani za de Israel, ne qué ziuu dxi guiasa be. Qué ziuu dxi guiaana dxí be de guni mandar be» (Luc. 1:32, 33). Ca diidxaʼ ca rusihuínnicani Jesús nga Siló, ni za de tribu stiʼ Judá ne stiʼ David (Mat. 1:1-3, 6; Luc. 3:23, 31-34).

 7. Paraa gule Mesías, ne xiñee guendaridxagayaa modo gúcani.

⁷ Zálebe Belén. Miqueas bicaa: «Lii, Belén Efrata, guidxi ni jma nahuiiniʼ para guiráʼ cani nuu Judá, de lii zaree ni guni mandar guidxi Israel, ni maʼ xadxí de nuu» (Miq. 5:2). Casi maʼ bidúʼyanu ca, zale Mesías que Belén, ti guidxi ni zándaca biree lá Efrata dxiqué. María ne xheelabe José, cadi nabezadícabe Judá, sínuque Nazaret. Peru cumu guyécabe Belén para guicá lácabe lu censu ni gunabaʼ ca romanu la? biaʼsi raqué nuucabe ora gule Jesús lu iza 2 ante de ca dxi stiʼ Jesús (Mat. 2:1, 5, 6). ¡Nabé sicarú modo guca ni na ca diidxaʼ riguixhená ca!

8, 9. Tu lade familia na ca diidxaʼ riguixhená que zale Mesías, ne xi desgracia zazaaca despué de gálebe.

⁸ Zálebe de ti binnidxaapaʼ. Isaías guníʼ: «Zaca xiiñiʼ doncella ca». Biblia na: «Nga runi, Jiobá peʼ zudii laatu ti seña: ¡Laguuyaʼ! Dxandipeʼ zaca xiiñiʼ doncella ca, ne zápabe ti hombrehuiiniʼ, ne zabee labe laa Emmanuel» (Isaías 7:14). Lu versículo riʼ qué niquiiñeʼ diidxapeʼ (bethuláh) ni riníʼ binnidxaapaʼ lu hebreu, sínuque biquiiñecabe diidxaʼ (ʽalmáh) ni riníʼ «doncella». Peru diidxaʼ riʼ laaca riquiiñeni ora ruzeetecabe de ca gunaa ni caʼruʼ guichaganáʼ ne qué huayatané ti hombre, casi Rebeca (Gén. 24:16, 43). Ne laaca pur espíritu stiʼ Dios bicaa Mateo lu diidxaʼ griegu diidxaʼ ni riquiiñecabe ora riníʼcabe de ti «binnidxaapaʼ» (parthénos) ora cusiénebe gule Jesús de ti binnidxaapaʼ casi na Isaías 7:14. Ne Evangeliu stiʼ Mateo ne Lucas rusihuinni guca xiiñiʼ María pur espíritu santu ne cadi pur gutané ti hombre (Mat. 1:18-25; Luc. 1:26-35).

⁹ Zuuticabe stale baʼduhuiiniʼ despué de gálebe. Caadxi siglu ante de ca dxi stiʼ Jesús, dxi nabeza ca hebreu Egipto, biʼniʼ mandar Faraón gulaacabe guiráʼ hombrehuiiniʼ gale ndaaniʼ guiiguʼ Nilo (Éxo. 1:22). Gudiʼdiʼ si stale iza despué, Jeremías 31:15, 16 bizeeteʼ laaca zuuticabe stale baʼduhuiiniʼ. Ca diidxaʼ riguixhená ca cuzeetecani «cayuunaʼ Raquel pur ca xiiñiʼ», purtiʼ zinécabe laacaʼ «xquidxi ca xhenemígucabe». Nabé nadipaʼ zuunabe dede zunadiágacabe laabe Ramá, ti guidxi ni nuu zitu, lu ca layú stiʼ Benjamín, ni nuu ladu guiaʼ de Jerusalén. Mateo rusihuinni guca ni na ca diidxaʼ ca ora biʼniʼ mandar rey Herodes gati ca hombrehuiiniʼ ni caʼruʼ gusaa chupa iza ni nuu Belén ne xcaadxi guidxi huiiniʼ nuu gaxha de laani (biindaʼ Mateo 2:16-18). ¡Nabé naná yuubaʼ biʼniʼ sentir ca binni ni nabeza neza raqué!

10. Ximodo guca ni na Oseas 11:1 lu xquendanabani Jesús.

¹⁰ Cásica gulee Dios guidxi Israel de Egipto, zaqueca zabee Dios laabe de Egipto (Ose. 11:1). Ante guiníʼ Herodes guuticabe ca baʼduhuiiniʼ que, gudixhená ti ángel José para guireené María ne Jesús de ra nuucaʼ ne checaʼ Egipto. Guti si Herodes bireecabe de raqué «ti iree ni modo pe uníʼ Dios de ruaa [...] profeta [Oseas] que ra na Dios: “De ndaani guidxi Egipto bisenda caa Xiiñeʼ”.» (Mat. 2:13-15). Nánnanu qué liica ñuni Jesús xiixa para niguixhe xi guiráʼ ñaca ante gale ne guiráʼ ni bizaaca lu ca primé iza ni bibani.

Bizulú bicheechebe diidxaʼ

11. Tu guzániruʼ nezalú Cristu.

¹¹ Zazanírucabe lube para guxhélecabe ti neza para laabe. Malaquías guníʼ zeeda «Elías ni riguixhená» para ucuudxi ladxidóʼ guidxi que ante guedandá Mesías. Biblia na: «¡Laguuyaʼ! Chiguseendaʼ Elías ni riguixhená ante gueeda dxi stiʼ Jiobá, ti dxi naroʼbaʼ ni zadxibi binni. Ne zudxiguétabe ladxidóʼ bixhoze binni ra nuu ca xiiñiʼ, ne zudxiguétabe ladxidóʼ xiiñiʼ binni ra nuu bixhoze; ti cadi gunenaʼyaʼ guidxilayú ora guendaʼ ne guniteluáʼ ni» (Malaquías 4:5, 6). Jesús peʼ guníʼ «Elías» nga Juan ni Riguunisa (Mat. 11:12-14). Ne laaca guníʼ Marcos guca ni na ti diidxaʼ riguixhená stiʼ Isaías ora bicheeche Juan diidxaʼ (Isa. 40:3; Mar. 1:1-4). Qué ninabaʼ diʼ Jesús Juan nizániruʼ lube ne ñuni ti dxiiñaʼ cásica biʼniʼ Elías. Jiobá nga bidii dxiiñaʼ que Juan ne ora gúnibe ni zacanebe ca judíu gunibiaʼcaʼ tuu nga Mesías.

12. Xi dxiiñaʼ biʼniʼ Jesús ni bisihuinni laa nga Mesías.

¹² Zánnacabe tu laabe pur dxiiñaʼ bidii Dios laabe gúnibe. Ti biaje guyé Jesús ndaaniʼ sinagoga nuu Nazaret, guidxi ra biniisibe. Gucuaabe rollo stiʼ Isaías ne biindabe ca diidxaʼ riʼ: «Nuu né Espíritu sti [Jiobá] naa, purti ma ulí naa güe nia ca pobre diidxa ni usieche laacaʼ. Biseenda be naa gueda ndee yuuba ladxidóʼ binni, ne gabe cani nundiibi pecadu laa ximodo zanda iree ca de laani, ne usinaya cani nacheepa lú, ne ulaʼya cani cuxhii cabe laa, ne gabe binni ma bidxiña dxi gudixhe [Jiobá] para ilá caʼ». Rihuinni dxíchica laabe nga Mesías, ngue runi guniʼbe cayaca ca diidxaʼ que luguiabe ora bizeetebe xhupa diidxaʼ riʼ: «Yanadxí pe cayaca ni cá lu Xquiʼchi Dios ni bina diaga tu nagasi ca» (Luc. 4:16-21).

13. Xi guníʼ Isaías zuni Cristu ora guzulú gucheeche diidxaʼ.

¹³ Zuzulú zucheechebe diidxaʼ Galilea. Ora bizeeteʼ Isaías de «Galilea, xquidxi cani qué ñunibiáʼ gá Dios», ni nuu «xquidxi Zabulón ne [...] Neftalí» la? guníʼ: «Guidxi ni guzá lu gueelacahui que maʼ biiyacaʼ ti biaaniʼ roʼ. Ne ca binni ni nuu lu gueelacahui que laaca biaaniʼ roʼ que bizaaniʼ ra nuucaʼ» (Isa. 9:1, 2). Yanna, paraa bizulú Jesús dxiiñaʼ stiʼ yaʼ. Ndaanipeʼ guidxi Galilea. Bibánibe ndaaniʼ tobi de ca guidxi stini, Capernaum. Ngue runi gunda gucanebe ca binni de Zabulón ne de Neftalí para gánnacaʼ ni dxandíʼ ti guireecaʼ de lu gueelacahui nuucaʼ (Mat. 4:12-16). Ne laaca Galilea nga bidii Jesús libana lu ti dani, raqué gulibe ca apóstol stibe ne bíʼnibe primé milagru. Ne zándaca laaca raqué nga bihuínnibe nezalú jma de gaayuʼ gayuaa discípulo stibe despué de biásabe de lade gueʼtuʼ (Mat. 5:1–7:27; 28:16-20; Mar. 3:13, 14; Juan 2:8-11; 1 Cor. 15:6). Racá ridúʼyanu bíʼnibe ni na ca diidxaʼ riguixhená stiʼ Isaías ora bicheechebe diidxaʼ «xquidxi Zabulón ne [...] Neftalí». Peru laaca bicheechebe stiidxaʼ Reinu guidubi Israel.

Bieeteruʼ xcaadxi cosa ni zúnibe

14. Ximodo biʼniʼ Jesús ni na Salmo 78:2.

¹⁴ Zaquiiñebe ejemplu ne zuchaagabe ti cosa né stobi ora gusiidibe. Salmista Asaf biindaʼ sicaríʼ: «Ne ora guxheleruaaʼ zaniéʼ ti dichu [o «ejemplu»]» (Sal. 78:2; Reina-Valera Actualizada). Xiñee zanda guininu guca ni na ca diidxaʼ ca luguiáʼ Jesús yaʼ. Purtiʼ zacá cayabi Mateo ni laanu. Bizeetesibe ca ejemplu ra bichaaga Jesús Reinu stiʼ Dios né ti biidxiʼ mostaza ne levadura ni racané pan, guniʼbe: «Qué nusiidi di be laaca sin ejemplu. Biʼni be zacá ti iree ni modo pe uníʼ Dios de ruaa ti profeta chiqué, ra na: Zaguixhe stale ejemplu ra güe nia laacabe diidxaʼ. Zabe laacabe ni gaʼ chi dede dxi bizáʼ Dios guidxilayú» (Mat. 13:31-35). Dxandíʼ, nabé sicarú modo bisiidiʼ Jesús né ca ejemplu ni biquiiñeʼ ne ora bichaagabe ti cosa né sti cosa.

15. Ximodo guca ni na Isaías 53:4.

¹⁵ Zúnibe milagru para gusiándabe binni. Zacá guníʼ Isaías zúnibe ni né ca diidxaʼ riʼ: «Zinebe ca guendahuará stinu; ne zacaabe ca yuubaʼ stinu» (Isa. 53:4). Mateo guníʼ bisianda si Cristu suegra Pedru, laaca bisiándabe xcaadxi binni «ti iree ni modo pe uníʼ Dios de ruaa profeta Isaías chiqué: Gucuaa be irá yuuba stinu ne ziné be ca enda huará» (Mat. 8:14-17). Ne ndiʼ nga tobi de ca relatu ra rieeteʼ bisianda Jesús binni huará.

16. Ximodo bisihuinni apóstol Juan guca ni na ca diidxaʼ zeeda lu Isaías 53:1 luguiáʼ Jesús.

¹⁶ Zaca nanalaʼdxiʼ stale binni laabe, neca gúnibe stale dxiiñaʼ sicarú. Biblia na: «Tu maʼ biʼniʼ cré cani binadiágadu yaʼ. Ne tu maʼ nanna pabiáʼ nadipaʼ naʼ Jiobá yaʼ» (Isaías 53:1). Apóstol Juan guníʼ dxandíʼ guca ni na ca diidxaʼ riʼ luguiáʼ Jesús ora guníʼ: «Neca biʼni be stale milagru nezalú caʼ peru qué ñuni cre ca laabe. Ne uca ni zacá para iree ni casi pe uníʼ profeta Isaías chiqué ra na: [Jiobá,] iruti cayuni cre ni cayuí du ne iruti cayuuya pabiáʼ nandxoʼ[loʼ]» (Juan 12:37, 38). Gúcaruʼ ni na ca diidxaʼ ca stale iza despué, purtiʼ dxi canagucheeche Pablu diidxaʼ, stáleruʼ binni qué náʼ guni cré Cristu (Rom. 10:16, 17).

17. Ximodo guca ni na Salmo 69:4.

¹⁷ Zaca nanaláʼdxicabe laabe sin guzaabibe gastiʼ (Sal. 69:4). Juan guníʼ ca diidxaʼ ni maca guníʼ Jesús riʼ: «Pa qué ñune milagru ni iruti huayuni lade cabe la? qué ñapa cabe donda, peru neca ma biiya cabe irá ni peru uca nanalaʼdxi cabe naa ne Bixhozeʼ. Peru caree ni zacá para gaca ni casi cá lu Xquiʼchi Dios ra na: “Guca nanalaʼdxi cabe naa sin nuzaabe gastiʼ”.» (Juan 15:24, 25). Ca Evangeliu ca rusihuínnicaʼ dxandíʼ gupa Jesús stale enemigu, ne jmaruʼ guyuu tu guca nanalaʼdxiʼ laabe lade ca xaíque stiʼ ca judíu. Laapebe gúdxibe ca discípulo stibe ca diidxaʼ riʼ: «Purti qué [gapa binni guidxilayú razón para gaca] nanalaʼdxi [...] laatu, peru naa la? raca nanalaʼdxi cabe naa, purti rabe laacabe cadi jneza ni runi cabe» (Juan 7:7).

18. Xi zacané laanu guni crenu Jesús nga Mesías.

¹⁸ Ca discípulo ni bibani lu primé siglu biʼniʼ crecaʼ dxandíʼ guca Jesús de Nazaret Mesías, purtiʼ guca guiráʼ ni na ca diidxaʼ riguixhená zeeda lu Stiidxaʼ Dios ni gucuá hebreu luguiabe (Mat. 16:16). Casi maʼ bidúʼyanu ca, guca ni na caadxi de ca diidxaʼ riguixhená que luguiáʼ Jesús dxi nahuiiniʼ ne xcaadxi de laacani guca dxi bicheechebe diidxaʼ. Lu sti tema ca zadúʼndanu jma de xcaadxi diidxaʼ riguixhená ni caníʼ de Jesús. Galán gúninu guiníʼ íquenu de laacani, purtiʼ zacá jma zuni crenu Jesús nga binni ni gulí Jiobá.

[Cani cá ñee yaza]

Xi nicábinu

• Gunáʼ nga ca diidxaʼ riguixhená ni guca dxi gule Jesús.

• Tu bixhele neza stiʼ Mesías ante guedandá.

• Ximodo guca ni na capítulo 53 stiʼ Isaías luguiáʼ Jesús.