Ti oración ni runi stale binni

GUNÍʼ ique caniʼné millón de binni Dios ni jma nandxóʼ guibaʼ ne lu guidubi naca Guidxilayú ne tobi si ni canábacaʼ lu oración sticaʼ. Lu oración riʼ riete xii nga canábacabe, peru huaxiéʼ si tu laa nanna xii nga canabaʼ. Ñee zanda gaca xiixa zacá la? Zanda pue, guiráʼ dxi raca nga. Peru, xii nga canábacabe yaʼ. Gueeda Reinu stiʼ Dios.

Zándaca nuu biaʼ treinta y siete mil religión ni nacaʼ zinándacaʼ Cristu, ne biaʼ chupa mil millón de binni runi cré ni rusiidicaʼ. Stale de ca binni ca rúnicaʼ oración ni rábicabe padrenuestro para guiníʼnecaʼ Dios. Zándaca runibiaʼluʼ oración ca. Sicaríʼ nga bisiidiʼ Jesús ni ca discípulo stiʼ: «Bixhózedu ni nuu guibáʼ guisácapeʼ laluʼ. Biseendaʼ reinu stiluʼ. Gaca ni naluʼ cásica guibáʼ zaqueca lu guidxilayú» (Mateo 6:9, 10, NM).

Maʼ raca gayuaa iza, huayuni stale binni ni runi adorar Dios oración riʼ de memoria, ne cadi ndaaniʼ si ca yuʼduʼ ca rácani, sínuque laaca huayúnicabe ni ne ca binnilídxicabe ne ora nuucabe stúbicabe. Nuu tu huayuni oración riʼ de guidubi ladxidóʼ, ora nuucaʼ galán ne ora cadíʼdicaʼ ra nagana. Xcaadxi binni runi oración riʼ de memoria peru qué gánnadicaʼ xi canábacaʼ. Peru ni dxandíʼ nga cadi ca binni si ni rié ndaaniʼ ca religión ni nacaʼ zinanda Cristu nga cabézacaʼ ne canábacaʼ gueeda Reinu stiʼ Dios.

Ti oración ni runi stale religión

Qaddish ca nga láʼ ti oración ni runi ca judíu ora gati tuuxa binnilídxicaʼ. Nécapeʼ qué rieeteʼ diʼ de guendaguti ne pabiáʼ naná rusaana ni binni la? rúnicabe ni ora gati tuuxa. Ti ndaa de laani na sicaríʼ: «Uguube [Dios] Reinu stibe ca dxi stinu [...] ne nagueendaca».a Ne sti oración ni maʼ xadxí de runi binni ndaaniʼ ca sinagoga ca ruzeeteʼ ni cabézacabe ni chiguni Reinu stiʼ Mesías ni za de David.

Stale binni ni nuu ndaaniʼ ca religión ni qué runi cré cani bisiidiʼ Cristu racaláʼdxicaʼ gueeda Reinu stiʼ Dios. Periódicu ni láʼ The Times of India, bizeeteʼ ni guníʼ ti xaíque stiʼ ti religión de guidxi India ni bibani lu siglu XIX. Hombre riʼ gucalaʼdxiʼ nuluíʼ ngueca nga ni runi cré religión hinduismo, islam ne cani zinanda Cristu ora guníʼ sicaríʼ: «Reinu stiʼ Dios ca zeedani ora chuʼ ca binni nabeza neza rindani gubidxa ne cani nabeza neza ra riaaziʼ gubidxa ca tobi si». Ne cadi xadxí diʼ bicaa directora stiʼ ti universidad de islam ni nuu guidxi Strathfield (Australia) ca diidxaʼ riʼ lu ti periódicu: «Cásica guiráʼ ca musulmán, naa laaca runeʼ cré zabiguetaʼ Jesús stiʼ biaje ne zedanebe ni dxandíʼ Reinu stiʼ Dios ca».

Millón de binni cabézacaʼ ne canábacaʼ gueeda Reinu stiʼ Dios. Peru ni ridúʼyanu nga qué gánnacaʼ xi canábacaʼ.

Zándaca nánnaluʼ testigu stiʼ Jiobá laadu ne laadu nga rúnidu revista cayuundaluʼ riʼ. Laadu riuudu de yoo pur yoo neza raliʼdxuʼ para guinínedu binni de lu Biblia. Ne cayúnidu dxiiñaʼ riʼ lu guidubi naca guidxilayú lu chupa gayuaa treinta y seis guidxi, ne rúnidu ni lu jma de tapa gayuaa diidxaʼ riníʼ binni. Tema ni jma rinínedu binni nga de Reinu stiʼ Dios. Ne zándaca maʼ biiyaluʼ lá revista riʼ nga Torre stiʼ ni rapa. Ni caníʼ de Reinu stiʼ Jiobá. Gatigá rinabadiidxadu binni pa rinábacaʼ gueeda Reinu stiʼ Dios ora runi orarcaʼ, ne stale de laacaʼ nacaʼ rúnicaʼ ni. Peru ora rinabadiidxadu laacaʼ xii nga Reinu ca la? stale tu na qué ganna xi laani o cadi jneza ni ricábicaʼ de laani.

Xiñee rinabaʼ stale binni gueeda Reinu stiʼ Dios pa qué ganna xii laani yaʼ. Ñee nagana para guiénecabe xii nga Reinu stiʼ Dios la? Coʼ, purtiʼ Biblia cusiene chaahuipeʼ xii nga Reinu ca, ne zanda quixhedxí ni rusiidiʼ Biblia de Reinu ca ladxidoʼloʼ ca dxi jma nagana nabáninu riʼ. Lu sti tema ca zadúʼyanu ximodo cusiene Biblia ni chiguni Reinu ca, ne de racá zadúʼyanu padxí guicabi Dios ni canabaʼ binni laabe lu oración bisiidiʼ Jesús ra na gueeda Reinu ca.

[Cani cá ñee yaza]