Runi Reinu guiráʼ ni racalaʼdxiʼ Dios lu Guidxilayú

1, 2. 1) Xiñee nuu tiru raca nagana para laanu guiníʼ íquenu dxandíʼ zeeda Paraísu ni cabézanu. 2) Xi zacané laanu gaca fe stinu jma naguidxi ti ganda cuézanu gaca guiráʼ ni maʼ guníʼ Dios.

BIXUIʼLÚ cayuuyuʼ beeda ti hermanu ra Yoo stiʼ Reinu, guizáʼ maʼ bidxágabe purtiʼ nabé bíʼnibe dxiiñaʼ yannadxí. Nabé ruquiichináʼ jefe stibe laabe, nabé nadipaʼ rúnibe dxiiñaʼ para gudiibe ni caquiiñeʼ familia stibe ne nuu tiru dede maʼ qué ridxélabe xi gúnibe purtiʼ huará xheelabe. Peru, ora runadiágabe ca primé nota stiʼ ti diidxaʼ riuundaʼ ra salón que la? dede ricaaláʼdxibe, purtiʼ riéchebe maʼ nuunebe ca hermanu stibe. Lu diidxaʼ riuundaʼ riʼ riete ximodo zabani binni ndaaniʼ Paraísu, ne rucaa letra stini laabe guxuíʼlube mápeca nuube raqué. Nabé riuulaʼdxiʼ hermanu riʼ diidxaʼ riuundaʼ riʼ, ne laga cayuundanebe ni familia stibe, runi sentirbe rusiécheni ladxidoʼbe, neca cadíʼdibe ra nagana.

² Ñee huayuu dxi guni sentirluʼ guendanayecheʼ cásica ni biʼniʼ sentir hermanu riʼ la? Stale de laanu huayuni sentirnu ni. Peru, cumu nabé nagana modo nabáninu la? nuu tiru raca nagana para laanu guiníʼ íquenu dxandíʼ mayaca gueeda Paraísu ni cabézanu. Yanna riʼ nuunu lu ca tiempu «jma nagana» stiʼ ti guidxilayú malu ne qué lica ruluíʼ pa zadxiña dxi gaca ni ti paraísu (2 Tim. 3:1). Yanna, xi zanda gacané laanu para guiníʼ íquenu dxandíʼ zeeda Paraísu riʼ yaʼ. Ximodo nánnanu maʼ cadi candaa zuni mandar Reinu stiʼ Dios lu guidubi Guidxilayú. Para ganda guicábinu ca guendarinabadiidxaʼ riʼ, galán guidúʼndanu caadxi profecía stiʼ Jiobá ni biʼyaʼ caadxi xpínnibe guca cumplir dxiqué. De racá zadúʼyanu ximodo cayaca cumplir ca profecía ni bizéʼtenu riʼ tiempu stinu ne laaca zadúʼyanu ximodo cayaca cumplir xcaadxi profecía cásica laacani. Nabé zacanécani laanu gaca fe stinu jma naguidxi, nga runi, últimu la? zadúʼyanu ximodo chigaca cumplir cani huidxegá si.

 3. Xi promesa gudixhedxí ladxidóʼ ca judíu guyuu de esclavu Babilonia.

³ Bixuiʼlú si ximodo bibani ca judíu ni ruzuubaʼ diidxaʼ dxi guyuucaʼ de esclavu ndaaniʼ guidxi Babilonia lu siglu VI ante de ca dxi stiʼ Jesús. Raqué nga biniisi stale de laacabe, cásica biniisi bixhózecabe, nabé nagana modo nabánicabe, purtiʼ runi burla ca binni de Babilonia laacabe pur runi crécabe Jiobá (Sal. 137:1-3). Peru pur stale iza qué nusiaandacabe ti promesa biʼniʼ Jiobá: zabiguétacabe xquídxicabe, Judá, ne jma galán zabánicabe raqué. Dede guníʼ Jiobá zahuinni layú stícabe casi jardín de Edén. ¡Zaca ni casi ti paraísu! (Biindaʼ Isaías 51:3.) Guníʼ Jiobá zuni ca cosa riʼ para xquidxi, ti gacaneni laacabe gaca fe stícabe jma naguidxi ne gatadxí ladxidóʼcabe pur modo nabánicabe. Guzéʼtenu caadxi ejemplu.

 4. Ximodo guníʼ Jiobá zabani ca judíu ora maʼ chibiʼcaʼ lu layú stiʼ Judá.

⁴ Guendariuudxi. Cadi ndaaniʼ ti paraísu diʼ nga guibiguetaʼ ca judíu ni nuu de esclavu, sínuque ziécabe ti guidxi ra maʼ gudiʼdiʼ setenta iza de cadi nabeza binni, ne huaxiéʼ si de laacabe runibiáʼcabe ni. Dxi gucuá relatu riʼ lu Biblia la? nuu stale lión, lobo, beedxeʼ ne xcaadxi maniʼ duxhuʼ lu layú stícabe. Nga runi, zándaca gunabadiidxaʼ stale hombre ni napa familia: «Xi zanda guneʼ para cadi chuʼ tu guniná xheelaʼ ne ca xiiñeʼ. Ximodo gapaʼ ca dendxuʼ ne ca vaca stinneʼ yaʼ». Zacá nga riníʼ ique binni ni rizaalaʼdxiʼ familia stiʼ. Peru guníʼ ique si pabiáʼ gutadxí ladxidóʼcabe ora binadiágacabe promesa stiʼ Dios ni zeeda lu Isaías 11:6-9 (biindaʼ ni). Bisihuinni ca diidxaʼ stiʼ poesía riʼ ziuu tu zapa ca judíu ni ruzuubaʼ diidxaʼ ne guirutiʼ qué zuniná maniʼ stícabe. Ora guníʼ Dios zó lión guixi la? caníʼ qué ziuu nin ti maniʼ duxhuʼ gó dendxuʼ ne yuze stícabe; maʼ qué zadxíbicabe laacame. Ne ora maʼ nuu xquidxi Dios lu layú stiʼ Judá, laaca guníʼ Jiobá ziuucabe nazaaca ne zapa laacabe, cásica ndaaniʼ guiʼxhiʼ ne lu desiertu stini (Ezeq. 34:25).

 5. Xi profecía gucané ca judíu ni nuu de esclavu gánnacaʼ zudii Jiobá guiráʼ ni caquiiñecaʼ.

⁵ Ziuu guendaró. Laaca guyuuruʼ xcaadxi cosa ni guluu xizaa laacabe. Zándaca gunabadiidxaʼ ca judíu que laca laacaʼ: «Ñee zanda gudieeʼ ni gó familia stinneʼ ora maʼ nuudu xquídxidu la? Paraa cuézadu yaʼ. Ziuu dxiiñaʼ guneʼ la? Ñee jneza nga guibiguetaʼ raqué la? o jma galán guiaanaʼ de esclavu raríʼ». Guníʼ Jiobá caadxi profecía para gudixhedxí ladxidóʼcabe. Gúdxibe ca xpínnibe ni ruzuubaʼ diidxaʼ guizáʼ ziaba nisaguié ne zudii layú sticaʼ stale guendaró (Is. 30:23). Peru, ñee zápacabe lídxicabe ne dxiiñaʼ gúnicabe la? Jiobá guníʼ: «Zucuícabe yoo, ne zabézacabe ndaaniʼ ni; ne dxandipeʼ zuzuhuaacabe lubáʼ uva ne zócabe cuananaxhi stini. Qué zucuícabe yoo ne gadxé tu cueza ndaaniʼ ni; qué zúnicabe dxiiñaʼ layú ne gadxé tu gó guiráʼ ni gudiini» (Is. 65:21, 22). Racá ridúʼyanu ti cosa: jma galán zabánicabe lu layú stiʼ Judá que modo nabánicabe Babilonia, ti guidxi ra runi adorar binni stale bidóʼ. Peru cadi guiaandaʼ laanu gadxé guendanagana nga gúpacabe para guyécabe de esclavu Babilonia. Ñee zanda gaca chaahuiʼ cani yanna la?

 6. 1) Xi guendahuará ngue gupa ca israelita. 2) Xi gudxi Jiobá ca judíu ni bibiguetaʼ xquidxi.

⁶ Guendanazaaca en sentidu espiritual. Guca huará xquidxi Dios en sentidu espiritual stale iza ante checaʼ de esclavu Babilonia. Biquiiñeʼ Jiobá profeta Isaías para guníʼ ca diidxaʼ riʼ: «Maʼ huará guidubi íqueluʼ [xquidxeʼ], ne maʼ cadi nazaaca nuu guidubi ladxidoʼloʼ» (Is. 1:5). Beeda gaca ca judíu casi binni ni nacuaataʼ diaga, purtiʼ qué nucaadiágacaʼ conseju stiʼ Jiobá, ne gúcacaʼ casi binni ni nacheepaʼ lú, purtiʼ qué nudiicaʼ lugar nuluíʼ Dios laacaʼ neza naquiiñeʼ sacaʼ (Is. 6:10; Jer. 5:21; Ezeq. 12:2). Yanna, pa qué guchaacabe modo laacabe ora guibiguétacabe xquídxicabe, ñee ziuuruʼ tu gapa laacabe la? Ñee qué zusaana Dios laacabe sti biaje la? Guidúʼyanu ti promesa bidii Jiobá laacabe ni gudixhedxí ladxidóʼcabe: «Ne tiempu que la? dxandipeʼ zunadiaga guiráʼ diagacuaataʼ ca diidxaʼ stiʼ libru que, ne laaca zaree ca binni ni nacheepaʼ lú lu gueelacahui sticaʼ» (Is. 29:18). Zacá nga laani, zusianda Jiobá xquidxi en sentidu espiritual purtiʼ maʼ guca arrepentir. Biaʼ dxi guzuubacabe diidxaʼ la? zusiidibe laacaʼ ne zuluiʼbe laacaʼ neza ra naquiiñeʼ sacaʼ.

 7. Ximodo biʼniʼ Dios guiráʼ ni guníʼ para ca judíu ni guyuu de esclavu, ne xiñee racaneni laanu gaca fe stinu jma naguidxi.

⁷ Ñee biʼniʼ Jiobá guiráʼ ni guníʼ la? Zánnanu ni ora guidúʼndanu historia stiʼ xquidxi. Gupa Dios ca judíu ni bibiguetaʼ xquidxi, qué ñaadxaʼ ni ñocaʼ ne guyuucaʼ nazaaca en sentidu espiritual. Gaxha de raqué laaca nuu guidxi jma naroʼbaʼ ne jma nadipaʼ que laacabe, peru qué nudii Jiobá lugar ñuniná ca binni que xquidxi, ne laaca gúpabe dendxuʼ ne yuze sticaʼ para cadi gó maniʼ duxhuʼ laacame. Dxandíʼ qué ñuuyaʼ diʼ ca judíu que ñaca cumplir guiráʼ ca profecía stiʼ paraísu ni bizeeteʼ Isaías, Jeremías, Ezequiel ne xcaadxi profeta. Peru guyuucabe nayecheʼ pur ni bíʼyacabe ne biaʼsi nguepeʼ nga ni caquiiñecabe tiempu que. Galán guiníʼ íquenu guiráʼ ni biʼniʼ Jiobá pur xquidxi dxiqué, purtiʼ zacaneni gaca fe stinu jma naguidxi. Pa nabé bidxagayaa binni ora biʼyaʼ guca cumplir caadxi si de ca profecía stiʼ Jiobá, ¡bixuiʼlú si pabiáʼ guidxagayaa binni ora guʼyaʼ gaca guiráʼ ni! Guidúʼyanu xi maʼ biʼniʼ Jiobá pur laanu tiempu riʼ.

 8. Paraa nabeza xquidxi Dios tiempu riʼ.

⁸ Xquidxi Jiobá ni nuu yanna riʼ, cadi ti guidxi diʼ casi guidxi Israel laacabe ne laaca cadi nabezadícabe ndaaniʼ ti guidxi si. Ca ungidu la? nuucaʼ ndaaniʼ ti guidxi espiritual ni láʼ «Israel stiʼ Dios» (Gál. 6:16, TNM). Ne nabezané ca binni ni zeeda gaca casi «xcaadxi dendxu» laacabe ndaaniʼ ti guidxi simbólicu, ti paraísu espiritual ra runi adorárcabe Jiobá ne rúnicabe ni nabe primé lu xquendanabánicabe (Juan 10:16; Is. 66:8). Ndaaniʼ paraísu riʼ nabáninu cásica bibánicabe ndaaniʼ jardín de Edén, purtiʼ cadúʼyanu cayaca cumplir ca promesa stiʼ Dios en sentidu espiritual. Guidúʼyanu caadxi ejemplu.

9, 10. 1) Ximodo cayaca cumplir profecía stiʼ Isaías 11:6-9. 2) Xi razón rusihuinni napa xquidxi Dios guendariuudxi.

⁹ Guendariuudxi. Profecía stiʼ Isaías 11:6-9 racané laanu guxuíʼlunu pabiáʼ galán rihuinni modo nuu guirá maniʼ duxhuʼ tobi si né guiráʼ maniʼ nadóʼ ne laaca galán rihuinni modo nuu binni tobi si né laacame. Ñee cayaca cumplir profecía riʼ yanna la? Cayaca pue... peru en sentidu espiritual. Lu versículo 9 zeeda razón ni rusihuinni xiñee maʼ qué zuniná ca maniʼ duxhuʼ riʼ binni. Racá na sicaríʼ: «Purtiʼ guidxilayú riʼ zadxá típani de guiráʼ ni rusiidiʼ Jiobá cásica dxátipa nisadóʼ». Zanda xa guiziidiʼ ti maniʼ duxhuʼ «ni rusiidiʼ Jiobá» ti guchaa modo laa. Coʼ, xa. Binni nga ruchaa modo laa ora gunibiáʼ Dios ni jma nandxóʼ ne ora gaca nadóʼ cásica laabe. Zacá nga cayaca cumplir profecía riʼ ndaaniʼ paraísu espiritual stinu. Raríʼ nga cusiidiʼ Reinu ca cristianu gácacaʼ binni nadóʼ ne chuʼcaʼ tobi si né guiráʼ hermanu sticaʼ.

¹⁰ Lu libru riʼ maʼ bidúʼyanu gunáʼ nga ca razón rudii Biblia laanu casi cristianu para gácanu neutral ne xi naquiiñeʼ gúninu ora sanándacabe laanu pur laani. Nabé nuu binni naduxhuʼ ndaaniʼ guidxilayú malu riʼ, nga runi, ti milagru nga chuʼ ti guidxi ra nuu ti grupu de binni nadóʼ ni qué riná gucaalú stobi, dede né ora guiníʼcabe zuuticabe laacaʼ. Cadi ndiʼ nga razón ni rusihuinni napa ca xpinni Reinu guendariuudxi ni guníʼ profeta Isaías la? Jesús guníʼ zunibiáʼ binni tuu nga ca discípulo stiʼ purtiʼ zannaxhiisaacaʼ (Juan 13:34, 35). Ne riquiiñebe «mozo ni nuu xpiaaniʼ ne ni runi jneza» para gusiidiʼ laanu ra ridagulisaanu ti gácanu nadóʼ ne gannaxhiinu binni (Mat. 24:45-47).

11, 12. 1) Ximodo nuu stale binni guidxilayú tiempu riʼ. 2) Xi cayuni Jiobá para cadi gatizíʼ xquidxi.

¹¹ Ziuu guendaró. Nabé candaana binni en sentidu espiritual tiempu riʼ, casi na Biblia: «¡Laguuyaʼ! Zadxiña dxi —na Jiobá Señor ni jma nandxóʼ—, zusindaanaʼ ca binni ni nuu ndaaniʼ guidxi roʼ riʼ, peru qué zandaanadícabe purtiʼ si gastiʼ ni gócabe, ne qué záticabe nisa, purtiʼ si gastiʼ nisa guécabe, sínuque zandaanacabe ne záticabe nisa, purtiʼ maʼ qué zunadiágacabe stiidxaʼ Jiobá» (Amós 8:11). Peru, ximodo nuu ca xpinni Reinu yaʼ. Ñee laaca cayatizicaʼ la? Coʼ. Maca guníʼ Jiobá ximodo ziuu ca xpinni ne ximodo ziuu ca xhenemigu: «Ca xpinneʼ zocaʼ, peru laatu zandaanatu. ¡Laguuyaʼ! Ca xpinneʼ zeʼcaʼ, peru laatu zátitu nisa. ¡Laguuyaʼ! Ca xpinneʼ ziéchecaʼ, peru laatu zatuí lutu» (Is. 65:13). Ñee maʼ biiyuʼ ximodo cayaca cumplir ca diidxaʼ riʼ la?

¹² Yanna riʼ nápanu stale guendaró espiritual: nuu publicación, grabación de audio ne videu, guendaridagulisaa, asamblea ne nápanu ti sitiu lu Internet ra nuu stale cosa ni zanda guizíʼdinu, guiráʼ cani bizéʼtenu riʼ zeeda gaca cani casi ti guiiguʼ roʼ ra daʼ ziáʼ nisa. Dxandíʼ cayatizíʼ binni guidxilayú en sentidu espiritual, peru laanu nápanu stale guendaró ni rusibani laanu (Ezeq. 47:1-12; Joel 3:18). Maca guníʼ Jiobá zudii guendaró espiritual laanu guiráʼ dxi, yanna, ñee riécheluʼ ora ruuyaluʼ modo cayúnibe ni guniʼbe la? Ñee ribeeuʼ tiempu guiráʼ dxi para goloʼ guendaró ni caguíxhebe lu mexaʼ stiuʼ la?

13. Ximodo cayaca ni guníʼ Jiobá ora bizeeteʼ zuuyaʼ ca binni nacheepaʼ lú ne zunadiaga cani nacuaataʼ diaga.

¹³ Guendanazaaca en sentidu espiritual. Yanna riʼ nuu ti epidemia lu guidubi Guidxilayú: nuu stale binni ni nacuaataʼ diaga ne nacheepaʼ lú en sentidu espiritual (2 Cor. 4:4). Peru laaca maʼ cusianda Cristu stale binni ni nacheepaʼ lú ne ni nacuaataʼ diaga en sentidu espiritual. Ximodo yaʼ. Cumu maʼ caziidicabe ni dxandíʼ zeeda lu Stiidxaʼ Dios la? racaneni laacabe gudiicabe cuenta cadi jneza stale cosa ni rusiidiʼ ca religión nuu yanna riʼ. Ñee runibiaʼluʼ tuuxa ni maʼ bisianda Cristu zacá la? Cadi dxandíʼ rusihuínnini cayaca ni guníʼ profeta Isaías la? Laa bizeeteʼ: «Ne tiempu que la? dxandipeʼ zunadiaga guiráʼ diagacuaataʼ ca diidxaʼ stiʼ libru que, ne laaca zaree ca binni ni nacheepaʼ lú lu gueelacahui sticaʼ» (Is. 29:18). Guiráʼ iza cadxela gayuaa mil binni remediu ni gusianda laa en sentidu espiritual. Cada biaje guidúʼyanu guiree ti binni de Babilonia guidxi roʼ ne guiuu ndaaniʼ paraísu espiritual stinu para guni adorar Dios, racaneni laanu gudiʼnu cuenta cayaca cumplir ca promesa biʼniʼ Jiobá.

14. Xi naquiiñeʼ gúninu ti gaca fe stinu jma naguidxi, ne xiñee.

¹⁴ Lu guiráʼ capítulo stiʼ libru riʼ zeeda stale razón ni rusihuinni maʼ bitagulisaa Cristu ca discípulo stiʼ ndaaniʼ ti paraísu espiritual lu ca últimu dxi riʼ. Guiníʼ íquenu guiráʼ modo caguucabe ndaayaʼ laanu ndaaniʼ paraísu riʼ; pa gúninu ni la? zacaneni laanu gaca fe stinu jma naguidxi ti ganda cuézanu gaca cumplir xcaadxi promesa stiʼ Dios.

15. Xiñee zanda cuézanu guidxiña dxi gaca Guidxilayú riʼ ti paraísu.

¹⁵ Ni naguixhe ique Jiobá dede dxiqué nga gaca guidubi Guidxilayú riʼ ti paraísu. Dxi bizaʼbe Adán ne Eva la? guluube laacaʼ ti lugar sicarú ra zanda guibánicaʼ ne biʼniʼ mandarbe laacaʼ gápacaʼ xiiñicaʼ ne gúʼyacaʼ guiráʼ maniʼ nuu luni (Gén. 1:28). Peru, bicaalúcabe Dios, cásica biʼniʼ Binidxabaʼ, ngue runi bisaanacabe familia stícabe lu náʼ guendaruchee, lu náʼ pecadu ne guendaguti. Neca zaqué, qué nuchaa ni naguixhe ique Dios guni. Cadi guiaandaʼ laanu raca guiráʼ ni riniʼbe (biindaʼ Isaías 55:10, 11). Nga runi, zanda cuézanu guidxiña dxi guibani ca xiiñiʼ Adán ne Eva lu Guidxilayú, gúnicaʼ ni ti paraísu, gannaxhiicaʼ ne gápacaʼ guiráʼ ni bizáʼ Jiobá. Dxi ca nga gaca cumplir guiráʼ xixé profecía gucuaa ca judíu ni guyuu de esclavu: zabani guiráʼ binni ndaaniʼ ti paraísu lu Guidxilayú. Guidúʼyanu caadxi ejemplu.

16. Ximodo na Biblia zabani binni lu Guidxilayú ora maʼ gaca ni ti paraísu.

¹⁶ Guendariuudxi. Últimu la? zadúʼyanu ximodo gaca cumplir dede primé ne últimu diidxaʼ ni zeeda lu profecía stiʼ Isaías 11:6-9. Cásica hombre, gunaa ne baʼduhuiiniʼ, qué ziuu gastiʼ ni guchibi laacaʼ ladu tiica checaʼ. Maʼ qué ziuu maniʼ duxhuʼ ne maʼ qué ziuu binni guniná stobi. Óraca la? ladu tiica cheluʼ lu Guidxilayú riʼ zuni sentirluʼ casi ora ñuuluʼ ra liʼdxuʼ. Zanda chigazuʼ ndaaniʼ guiiguʼ, ndaaniʼ ti lago, ndaaniʼ nisadóʼ; zanda quíbaluʼ guiráʼ dani gapuʼ gana ne saluʼ guiráʼ lugar ra nuu guixi gáʼ. Ne ora guixhinni la? gastiʼ qué zuchibi lii. Óraca nga gaca ni na Ezequiel 34:25: zabani ca xpinni Dios «lu desiertu ne qué ziuu tu guchibi» laacaʼ ne zásicaʼ «ndaaniʼ guiʼxhiʼ».

17. Xiñee zanda guni crenu zápanu stale guendaró ora maʼ guni mandar Reinu stiʼ Dios.

¹⁷ Ziuu guendaró. Bixuiʼlú guibániluʼ ndaaniʼ ti Guidxilayú ra maʼ gastiʼ guendapobre ne ra qué chuʼ binni ni gaca huará pur gastiʼ ni gó; ti guidxilayú ra qué zanabaʼ binni gacané gobiernu laa. Guiráʼ ndaayaʼ napa xquidxi Dios tiempu riʼ, rusihuínnicani zanda guyaanaʼ Jesús, Rey stinu, ca xpinni en sentidu espiritual ne laaca zanda gudiibe ni gocaʼ ti qué chuʼ dxi gáticaʼ. Dxi guyuu Jesús lu Guidxilayú riʼ bisihuinni zanda gudii ni gó binni, purtiʼ biquiiñeʼ chupa chonna pan ne chupa chonna si benda para biyaanaʼ mil binni (Mat. 14:17, 18; 15:34-36; Mar. 8:19, 20). Ora maʼ guni mandar Reinu lu Guidxilayú riʼ, zaca cumplir profecía casi ndiʼ: «Ne laabe dxandipeʼ zusábabe nisaguié ti ganda guindani biidxiʼ ni gudxiibaluʼ lu layú, ne zudii layú stiluʼ stale guendaró. Ne dxi que laaca ziuu ti lugar xilaga ra nagáʼ para gó guiráʼ maniʼ napuʼ» (Is. 30:23).

18, 19. 1) Ximodo chigaca ni na profecía stiʼ Isaías 65:20-22. 2) Ximodo zanda guiénenu ca diidxaʼ ra na: «Cásica xadxí ribani ti yaga, zacaca nga xadxí zabani ca binni xquidxeʼ».

¹⁸ Yanna riʼ raca nagana para stale binni guxuiʼlú zadxiña dxi cueza ndaaniʼ ti yoo sicarú o gapa ti dxiiñaʼ ni gusiecheʼ laa. Cumu qué raca ni jneza ndaaniʼ guidxilayú riʼ la? stale binni rudii cuenta nabé runi dxiiñaʼ ne qué rugaanda ni runi ganar para gudii ni caquiiñeʼ familia stiʼ, peru ruuyacabe ximodo zidale bidxichi stiʼ ca ricu ne stiʼ cani qué ridxá. Yanna guníʼ ique ximodo zabani binni lu guidubi Guidxilayú ora maʼ gaca cumplir profecía riʼ: «Ne dxandipeʼ zucuícabe yoo, ne zabézacabe ndaaniʼ ni; ne dxandipeʼ zuzuhuaacabe lubáʼ uva ne zócabe cuananaxhi stini. Qué zucuícabe yoo ne gadxé tu cueza ndaaniʼ ni; qué zúnicabe dxiiñaʼ layú ne gadxé tu gó guiráʼ ni gudiini. Purtiʼ cásica xadxí ribani ti yaga, zacaca nga xadxí zabani ca binni xquidxeʼ, ne ziecheʼ ca binni ni maʼ gulieeʼ ora guireendú guiráʼ dxiiñaʼ gúnicaʼ» (Is. 65:20-22).

¹⁹ Yanna, ximodo zanda guiénenu ca diidxaʼ ra na: «Cásica xadxí ribani ti yaga, zacaca nga xadxí zabani ca binni xquidxeʼ» yaʼ. Guzéʼtenu ti ejemplu. Ñee maʼ huayuu biaje guzuhuaaluʼ cueʼ ti yaga roʼ la? Cadi dxandíʼ guizáʼ ridxagayaaluʼ ora guiníʼ íqueluʼ panda iza napa yaga ca la? Zándaca maca nuuni ante gale bixhozebiidaʼ bixhozebiidaluʼ, ne pa gueeda gátiluʼ la? zabániruʼ yaga que jma iza. Ne zuzuhuaruʼ ni raqué xadxí sin guchiiñaʼ gastiʼ ni, neca maʼ gudiʼdiʼ stale iza de gúcaluʼ yu. Zacá nga na Jiobá zabáninu ndaaniʼ Paraísu ni chigúnibe, zabáninu xadxí ne qué ziuu gastiʼ ni guchiiñaʼ laanu (Sal. 37:11, 29). Cumu xadxí nga zabáninu la? zadúʼyanu ca yaga ni ribani mil iza riʼ casi ti guieʼ ni rieleʼ siadóʼ ne sti dxi maʼ bibidxi. Zacá nga laani, ¡qué ziuu dxi gátinu!

20. Xi chiguni Jesús para gaca guiráʼ xpinni Reinu binni nazaaca.

²⁰ Guendanazaaca. Yanna riʼ nabé ridxibi binni, purtiʼ nanna zadxiña dxi gaca huará o gatiʼ. Ne zacá ni purtiʼ guiranu nápanu ti guendahuará ni ruuti laanu. Laani nga pecadu, ne guendaguti si stiʼ Jesús nga zanda gusiaandaʼ ni (Rom. 3:23; 6:23). Ora maʼ guni mandar Reinu stiʼ Dios ti mil iza, zacaa guiráʼ ca xpinni Dios ni ruzuubaʼ diidxaʼ ca ndaayaʼ stiʼ guendaguti que: chaahuiʼ chaahuiʼ zabee Jesús ne 144,000 binni cayuni mandarné laa pecadu nápanu. Dxi ca nga últimu biaje gaca cumplir profecía stiʼ Isaías ra na: «Guirutiʼ tu cueza racá zaníʼ: “Huaraʼyaʼ”. Guiráʼ binni cueza lu guidxilayú riʼ nga cani maʼ bitiidiláʼdxibe stonda» (Is. 33:24). Zadxiña dxi maʼ qué ziuu binni ni nacheepaʼ lú ne binni ni nacuaataʼ diaga, laaca maʼ qué ziuu nin sti clase guendahuará (biindaʼ Isaías 35:5, 6). Zusianda Jesús guiráʼ clase guendahuará, dede né cani ruluíʼ qué gapa remediu. ¡Zaca guiráʼ xpinni Reinu binni nazaaca!

21. 1) Xi chiguni Jiobá né guendaguti. 2) Xiñee ratadxí ladxidoʼno ora gánnanu de laani.

²¹ Yanna, xi gaca xa né guendaguti, ra rindá guiráʼ binni pur raca huará ne pur pecadu stiʼ yaʼ. Laani nga «últimu» enemigu stinu ne ridxiña dxi riábanu ndaaniʼ nani (1 Cor. 15:26). Peru, ñee jma nadipaʼ poder stiʼ guendaguti que stiʼ Jiobá la? Guidúʼyanu xi guníʼ Isaías: «Dxandipeʼ zábibe guendaguti ne maʼ qué ziuuruʼ ni, ne Jiobá, Señor ni jma nandxóʼ, zuchaa nisa rieeteʼ lú guiráʼ binni» (Is. 25:8). ¡Bixuiʼlú si nga! Maʼ qué ziuuruʼ dxi cheʼ binni ra gutiʼ tuuxa, maʼ qué ziuu pantión ne maʼ qué zuunaʼ binni pur ti gueʼtuʼ. Zuunaʼ binni óraca, purtiʼ ziecheʼ ora guʼyaʼ guni Jiobá ni naguixhe ique: gusibani guiráʼ binni ni maʼ guti (biindaʼ Isaías 26:19). Dxicaruʼ nga gusiaandaʼ binni guiráʼ yuubaʼ napa pur guti ti binnilidxi.

22. Xi zazaaca ora guiluxe guni Reinu guiráʼ ni racalaʼdxiʼ Dios gaca lu Guidxilayú.

²² Ora guizaa ti mil iza que nga guiluxe guni Reinu guiráʼ ni racalaʼdxiʼ Dios gaca lu Guidxilayú, de racá maʼ zudii Cristu gobiernu riʼ Bixhoze (1 Cor. 15:25-28). Maʼ qué zapa binni donda ne pecadu ne ziuu listu para tiidiʼ últimu guendanagana ora guiree Binidxabaʼ ra deguyoo. De racá maʼ gunitilú Cristu beendaʼ qué iquiiñeʼ riʼ ne guiráʼ ca xpinni (Gén. 3:15; Apoc. 20:3, 7-10). Peru, cani gannaxhii Jiobá ne qué guixeleʼ de laabe, maʼ qué ziuuruʼ dxi gáticaʼ. Ne lu Biblia si nga zeeda caadxi diidxaʼ ni rusihuinni pabiáʼ sicarú ndaayaʼ riʼ. Laani nga promesa na Biblia cabeza stale hombre ne gunaa ni ruzuubaʼ stiidxaʼ Dios: dxi guixegueʼ «ca xiiñi [Dios] lu ná» pecadu ne guendaguti (Rom. 8:21).

23, 24. 1) Xiñee rininu dxandíʼ zaca guiráʼ ni racalaʼdxiʼ Dios. 2) Xi maʼ gudixhe íqueluʼ gúniluʼ.

²³ Cadi ti bacaandaʼ si nga ca promesa stiʼ Dios ne cadi cuentu si stiʼ binni cani. Xiñee rininu zacá yaʼ. Bietenalaʼdxiʼ ca diidxaʼ guníʼ Jesús ni bidúʼndanu lu primé capítulo stiʼ libru riʼ. Bisiidibe ca discípulo stibe guni orarcaʼ Jiobá sicaríʼ: «Biseendaʼ reinu stiluʼ. Gaca ni naluʼ ndaaniʼ guidxilayú, cásica raca ni guibáʼ» (Mat. 6:9, 10, TNM). Cadi ti cuentu si nga Reinu stiʼ Dios, sínuque dxandíʼ nuu ni. Ne maʼ cayuni mandarni guibáʼ tiempu riʼ. Maʼ bisaa ti gayuaa iza de cayúnini guiráʼ ni guníʼ Dios, ne ndaaniʼ xquidxi Dios nga rihuinni ximodo cayaca ni. Zaca guiráʼ ni naguixhe ique Jiobá lu Guidxilayú riʼ ora maʼ guni mandar Reinu stiʼ Dios. Cadi guiaandaʼ ndiʼ lii: ¡dxandíʼ zaca ni!

²⁴ Dxandíʼ zeeda Reinu stiʼ Dios ne dxandíʼ zaca guiráʼ ni maʼ guníʼ Jiobá. Xiñee nánnanu dxandíʼ zaca cani yaʼ. ¡Purtiʼ maʼ cayuni mandar Reinu stiʼ Dios yanna! Nga runi, galán guinabadiidxanu laca laanu: «Ñee cudieeʼ lugar guni mandar Reinu naa la?». Dede nagasi naquiiñeʼ gúninu stipa para cadi guixélenu de Reinu. Pa gúninu ni la? qué ziuu dxi gusaana de guicaanu ca ndaayaʼ gueedaneni.