Ñee zanda guchaʼnu modo rucheechenu diidxaʼ la?

 1. Xi caquiiñeʼ gúninu purtiʼ cuchaa stale cosa lu guidxilayú ra nabáninu riʼ yaʼ.

¹ Lu 1 Corintios 7:31 ruchaaga Biblia ca binni guidxilayú riʼ ne ca binni ni runi dxiiñaʼ lu ti teatru ne luni riguiʼbaʼ gadxé gadxé artista ne ruchaacabe guiráʼ ca cosa ni rididinécabe. Guiráʼ ca cosa ni cuchaa lu Guidxilayú riʼ rinabaʼ cani laanu guchaʼnu modo rucheechenu diidxaʼ, ca tema rininenu binni ne hora rúninu ni. Yanna, ñee zanda guchaʼnu modo rucheechenu diidxaʼ la?

 2. Xi caquiiñeʼ gúninu para chuunu biaʼ zeʼ xquidxi Jiobá.

² Modo rucheechenu diidxaʼ. Ca xpinni Cristu nabé rinacaʼ guchaacaʼ modo rucheechecaʼ diidxaʼ ora gabi xquidxi Dios laacaʼ naquiiñeʼ gúnicaʼ ni. Ora biseendaʼ Jesús ca discípulo stiʼ chigucheechecaʼ diidxaʼ, gúdxibe laacaʼ cadi naquiiñeʼ chineca ixhiapa nin bueltu (Mat. 10:9, 10). Peru cumu nánnabe ziuu tu zucaalú ca xpínnibe ne zucheechecaʼ diidxaʼ ndaaniʼ stale guidxi la? bichaabe modo gúdxibe laacaʼ gúnicaʼ (Luc. 22:36). Nabé bichaa xquidxi Jiobá modo rucheechecaʼ diidxaʼ lu siglu gudiʼdiʼ ca, ne bizulú biquiiñecaʼ caadxi guiʼchiʼ huiiniʼ para gucheechecabe diidxaʼ (tarjeta de testimonio), estación de radiu ne carru ni napa aparatu de sonidu. Ca dxi nabáninu riʼ nabé stale lugar raca nagana para laanu guidxélanu binni ra lidxi, nécapeʼ dxiiñaʼ ni jma rúninu nga gucheechenu diidxaʼ de yoo pur yoo la? xquidxi Dios laaca rabi laanu nabé risaca gucheechenu diidxaʼ ratiica nuunu ne ca lugar ra nuu stale binni. Para ganda guidxélanu ca binni ni runi dxiiñaʼ guidubi dxi la? caquiiñeʼ gucheechenu diidxaʼ huaxhinni, ne ngapeʼ nga ni rabi xquidxi Jiobá laanu gúninu. Rihuínnica ziguchaa xcarru Jiobá ladu zeʼ. Ñee zinándanu ni ladu zeni ne ziuunu biaʼca zeni la? (Ezeq. 1:20, 21.)

 3. Xi naquiiñeʼ gúninu para cueendunu ni galán ora gucheechenu diidxaʼ.

³ Ca tema ni rinínenu binni. Xii nga ni jma riguu xizaa ca binni ni nabeza neza ra rucheechenu diidxaʼ. Ñee nuucabe xizaa purtiʼ qué gápacabe bueltu la? Ñee nuucabe xizaa pur binnilídxicabe o pur ca guerra ni raca la? Pa laanu gúninu stipa pur gánnanu xi cazaaca binni ne xii nga ni jma riguu xizaa laacabe la? zacaneni laanu guinínenu laacabe de ni riuuláʼdxicabe (1 Cor. 9:20-23). Ora guiníʼ binni ni nuu ndaaniʼ ladxidóʼ, lugar de guicábinu laacabe ne guininu ni maca naguíxhenu guinínenu laacabe la? ni jma galán gúninu nga gucaadiáganu xi naguu xizaa laacabe ne guininu de laani.

 4. Xiñee nagueendaca naquiiñeʼ guchaʼnu modo rucheechenu diidxaʼ.

⁴ Mayaca guiluxe guiráʼ ni nuu lu Guidxilayú riʼ ne zuzulú ca dxi jma nagana. Biblia na: «Ma huaxiéʼ dxi riaadxa laanu» (1 Cor. 7:29). Nga runi, nagueendaca naquiiñeʼ guchaʼnu modo rucheechenu diidxaʼ. Zacatiʼ zanda gúninu jma lu xhiiñaʼ Dios lu xcaadxi dxi ni nápanu riʼ.