5. Tuu nga binni ni nanalaʼdxiʼ Jesús que, ne tuu nga zeeda gaca casi yagahuiiniʼ napa venenu que.

⁵ Tuu nga binni ni nanalaʼdxiʼ Jesús ca yaʼ. Jesús guníʼ laabe nga «Binidxabaʼ». Yanna, tuu nga zeeda gaca baladxiʼ ca yaʼ. Nga nga ca «xiiñiʼ Binidxabaʼ» (Mat. 13:25, 38, 39, NM). Ora guníʼ Jesús ejemplu que zándaca caníʼ íquebe de ti yagahuiiniʼ napa venenu ne ora nahuiiniʼ ni ruluiʼni trigu. Biáʼsipeʼ nga ejemplu gudixhe Jesús riʼ, purtiʼ nuu tu na xiiñiʼ Reinu laa peru qué runi guiráʼ ni runi ti binni ni dxandíʼ xpinni Cristu. Ni dxandíʼ nga riníʼsicabe xiiñiʼ Reinu laacabe, peru zeeda gácacabe casi yagahuiiniʼ napa venenu ni bidxiibaʼ hombre que o «ni za de» Binidxabaʼ (Gén. 3:15).

7. Ñee beeda gaca caadxi de trigu ca baladxiʼ la? Bisiene ni guicábiluʼ.

⁷ Jesús qué niníʼ diʼ zeeda gaca trigu ca baladxiʼ, sínuque guniʼbe zudxiibacabe baladxiʼ ca lade trigu. Nga runi, ejemplu ni biquiiñeʼ Jesús riʼ cadi caníʼdibe zusaana cani dxandíʼ xpinni Cristu de gúnicaʼ ni na Dios. Ni caniʼbe raríʼ nga stipa guni Binidxabaʼ para cuʼ binni qué iquiiñeʼ ndaaniʼ neza binni ridagulisaa ti guicá modo laacaʼ xcaadxi xpinni Cristu. Ne ante gati apóstol Juan, últimu apóstol stiʼ Jesús, maʼ nuu stale maestru ni cusiidiʼ ni cadi jneza ndaaniʼ xquidxi Dios (2 Ped. 2:1-3; 1 Juan 2:18).

Bedandá dxi guidopa cosecha

10, 11. 1) Padxí bizulú biasa cosecha. 2) Ximodo cadopa trigu ca ndaaniʼ troja stiʼ Jiobá.

¹⁰ Jesús guniʼruʼ: «Dxi iruugu [trigu] que nga iluxe guidxilayú, ne cani chi uchuugu ca [trigu] que nga ca ángel» (Mat. 13:39). Lu ca últimu dxi stiʼ guidxilayú malu riʼ zaxeleʼ ca xiiñiʼ Reinu de ca binni ni nacaʼ xpinni Cristu laacaʼ, cani zeeda gaca casi baladxiʼ. Apóstol Pedru guníʼ: «Ma bidxiña hora cuʼ biaʼ Dios stonda xpinni, ne pa uzulú né be laanu la? xi gaca xa de cani qué rizaalaʼdxi stiidxa be yaʼ» (1 Ped. 4:17).

¹¹ Qué nindaa de bizulú ca últimu dxi nabáninu riʼ, bizulú cayaca juzgar ca binni ni riníʼ dxandíʼ xpinni Cristu laacaʼ: ca «xiiñiʼ reinu» ne ca «xiiñiʼ Binidxabaʼ». Casi bieeteʼ lu ejemplu ca, xi bizaaca dxi bizulú cayasa cosecha que yaʼ. Primeru biaba Babilonia guidxi roʼ, oraqueruʼ bizulú cadopa ca xiiñiʼ Reinu (Mat. 13:30). Ximodo nga cadopa trigu ni zeeda gaca ca xpinni Cristu ca ndaaniʼ troja stiʼ Jiobá yaʼ. Ora reeda gácacabe de xquidxi Jiobá ni cayuni ni jneza ricaacabe ndaayaʼ stiʼ Dios ne rapa laacabe. Laaca riuucabe ndaaniʼ troja ca ora ricaacabe premiu stícabe guibáʼ.

12. Pabiáʼ zandaa cosecha ca yaʼ.

¹² Pabiáʼ tiempu zandaa juiciu ca. Lu ejemplu bizeeteʼ Jesús que guníʼ dede «ora maʼ gula [trigu, o «tiempu riasa cosecha», NM]». Nga rusihuinni naquiiñeʼ tiidiʼ ti tiempu (Apo. 14:15, 16). Ne zaca juzgar ca binni ni bibí pur espíritu santu ca biaʼ dxi guindaa ca dxi jma nagana nabáninu riʼ ne zaluxe gaca juzgárcabe dede ora guiluxe guicácabe sellu (Apo. 7:1-4).