Ñee rusisácaluʼ guendaxheelaʼ bisigaʼdeʼ Dios lii la?

«Ribezaʼ gusigaʼdeʼ Jiobá laatu xiixa, ne dxandipeʼ guidxélatu ra cuézatu, ne cada tobi chuʼ ralidxi hombre ni gueeda guichaganáʼ.» (RUT 1:9)

BIYUBI XI GUICÁBILUʼ:

Xiñee zanda guininu bisisaca ca xpinni Dios ni bibani dxiqué guendaxheelaʼ bidiibe laacaʼ.

Xiñee zanda guininu risaca para Jiobá tu binni cuinu para guichagananu.

Xi conseju rudii Biblia para guendaxheelaʼ caníʼ íqueluʼ chinándaluʼ.

 1. Xi biʼniʼ sentir Adán ora bidii Jiobá laa xheelaʼ.

«NDIʼ huaxa naca de dxita stiʼ ca dxita ladeʼ ne beela de beela ladeʼ. Ne zaree labe Gunaa, purtiʼ de hombre bireebe.» (Gén. 2:23.) ¡Nabé biecheʼ Adán, primé hombre que, purtiʼ maʼ napa xheelaʼ! Nga runi, qué ridxagayaanu guniʼbe caadxi diidxaʼ casi ti poesía. Ximodo biʼniʼ Jiobá xheelabe yaʼ. Primeru bisisiaasiʼ laabe, de raqué gucuaa ti biní xcustiabe para bizáʼ ti gunaa sicarú. Gulee lá Adán laabe Eva, ne bicheelaʼ Dios laacabe para guibánicabe nayecheʼ. Cumu ti biní xcustiá Adán nga biquiiñeʼ Dios para bizáʼ Eva la? jma guyuucabe tobi si que intiica guendaxheelaʼ nuu yanna.

 2. Xiñee randa riuuláʼdxisaa ti hombre ne ti gunaa.

² Nabé nuu xpiaaniʼ Jiobá, nga runi, gunda bizaʼbe binni para ganda chuuláʼdxisaacaʼ. Racá ridúʼyanu xiñee randa rannaxhiisaa ti hombre ne ti gunaa. Sicaríʼ caníʼ ti enciclopedia: «Ora maʼ bichaganáʼ ti hombre ne ti gunaa la? cada tobi de laacaʼ ribeza qué chuʼ dxi gusaana xheelaʼ de chuulaʼdxiʼ laa ne laaca ribeza cadi gusaana xheelaʼ de gatané laa» (The World Book Encyclopedia). Ne ngapeʼ nga ni huayuni ca binni ni runi adorar Jiobá.

BISISÁCACABE GUENDAXHEELAʼ BISIGAʼDEʼ DIOS LAACABE

 3. Ximodo bidxela xheelaʼ Isaac.

³ Guca Abrahán ti hombre ni bizuubaʼ stiidxaʼ Dios ne nabé bisisaca guendaxheelaʼ. Ngue runi, biseendabe mozo ni jma huaniisi stibe Mesopotamia para chiyubi ti gunaa ni ridxibi Dios guichaganáʼ xiiñibe Isaac. Biʼniʼ orar mozo riʼ Dios ne bicabi Dios oración stibe. Bidxélabe Rebeca, ti gunaa ridxibi Dios para guichaganáʼ Isaac. Ne pur Rebeca gunda bidale ca xiiñiʼ Abrahán casi maca gudxi Dios ni laa (Gén. 22:18; 24:12-14, 67). Xi rusiidiʼ ejemplu riʼ laanu yaʼ. Neca ruluíʼ jneza ni cá ique tuuxa la? cadi galán guiníʼ ique zanda gacané sti binni para guidxela xheelaʼ. Ca dxi riʼ, laaca binni nga ribí tu guichaganáʼ. Ne neca qué riguixhe Dios tu guichaganáʼ binni la? rudiibe conseju ca xpínnibe ora maʼ caníʼ íquecaʼ guichaganacaʼ, ne laaca rudiibe conseju laacaʼ lu xcaadxi cosa pa guni orarcaʼ laabe ne pa chinándacaʼ ni na espíritu stibe (Gál. 5:18, 25).

4, 5. Xiñee nánnanu dxandíʼ gunnaxhiisaa sulamita ne pastor que.

⁴ Dxiqué bibani ti sulamita nabé sicarú, laa qué nudii lugar nucaa ca xhamiga laa ñaca tobi de ca xheelaʼ rey Salomón. Laabe guniʼbe: «Maʼ bidieeʼ stiidxaʼ laatu, ca xiiñidxaapaʼ Jerusalén, cadi gucaatu naa gannaxhieeʼ tuuxa, sínuque lagudii lugar guiáleni de naa» (Cant. de Cant. 8:4). Xiñee guniʼbe zacá yaʼ. Purtiʼ nabé nadxiibe ti pastor ne laaca nadxii pastor que laabe. Laaca guniʼruʼ sulamita riʼ: «Naa nacaʼ casi ti azafrán ni rindani guriá nisadóʼ ra napampa, ti liriu ni rindani ra napampa». Yanna guidúʼyanu xi bicabi pastor que laabe: «Casi ti liriu ni nuu lade yaga guichi, zacá nga zeeda gaca xcompañeraʼ lade guiráʼ baʼdudxaapaʼ» (Cant. de Cant. 2:1, 2). Rihuínnica nabé nadxiisaacabe.

⁵ Sulamita riʼ ne pastor que jma nadxiicaʼ Dios, ngue runi, ora gueeda guichaganácabe, nabé naguidxi ziuu xquendaxheelacabe. Dede gúdxibe hombre ni nabé riuuláʼdxibe que: «Guluu naa casi ti sellu ndaaniʼ ladxidoʼloʼ, casi ti sellu lu naluʼ; purtiʼ nadipaʼ guendarannaxhii casi guendaguti. Ne ti binni ni nadxii rinabaʼ gannaxhiicabe laasi cásica rinabaʼ Seol binni ora maʼ guti. Ca bele stini nga ti bele naroʼbaʼ, bele stiʼ Jah [purtiʼ de laabe zeeda ni]. Nin nisa jma ziáʼ qué zanda gusuíʼ guendarannaxhii, ne qué zanda chiné ca guiiguʼ ni» (Cant. de Cant. 8:6, 7). Ñee cadi laaca zacá nga naquiiñeʼ guiníʼ ique ti xpinni Jiobá ni maʼ racalaʼdxiʼ guichaganáʼ la?

NABÉ RISACA PARA DIOS TU BINNI CUILUʼ

6, 7. Ximodo nánnanu risaca para Dios tu binni cuinu para guichagananu.

⁶ Para Dios nabé risaca tu binni cuiluʼ para guichaganaluʼ. Guidúʼyanu xi biʼniʼ mandar Dios ca israelita ora guniʼbe de ca binni ni nabeza Canaán: «Cadi gucheelaluʼ ca xiiñiluʼ ne ca xiiñicabe. Cadi gudiiluʼ xiiñidxaapaluʼ para xiiñibe, ne cadi guicaaluʼ ti xiiñidxaapabe para xiiñiluʼ. Purtiʼ laabe zuxhélebe xiiñiluʼ de sananda naa, ne zúnicabe ni na xcaadxi dios; ne xiana stiʼ Jiobá dxandipeʼ ziaba luguiatu, ne nagueenda zunitilube laatu» (Deu. 7:3, 4). Gudiʼdiʼ si stale siglu, Esdras ni ruzaaquiʼ guʼxhuʼ guníʼ: «Maʼ bidxiidéchetu Jiobá purtiʼ maʼ bichaganatu gunaa de sti guidxi, ne pur nga jma maʼ bidale donda napa Israel» (Esd. 10:10). Ne apóstol Pablu bicaa ra nuu ca xpinni Cristu: «Ora ma bichaganá ti gunaa la? qué zanda gapa stobi laga nabani xheelaʼ, purti zacá na ley. Peru ora ma guti xheela be la? ma zanda ichaganá be tutiisi acalaʼdxi be, peru gaca ni ti xpinni Señor» (1 Cor. 7:39).

⁷ Ora guichaganáʼ ti xpinni Cristu ni maʼ guyuunisa tuuxa ni qué runi adorar Jiobá la? cusihuinni qué ruzuubaʼ stiidxaʼ Dios. Ca israelita ni bibani ca dxi stiʼ Esdras bichaganacaʼ «gunaa de sti guidxi», zaqué bisihuínnicaʼ qué ruzuubacaʼ stiidxaʼ Dios. Stiidxaʼ Dios laaca ruzeeteʼ tuu nga naquiiñeʼ guichaganáʼ ti xpinni Cristu, ne cadi jneza gacalaʼdxiʼ tuuxa guireecueʼ de conseju riʼ (Esd. 10:10; 2 Cor. 6:14, 15). Ti Testigu ni guichaganáʼ ti binni ni qué runi adorar Jiobá, qué zanda gaca ejemplu para ca xpinni Cristu ne laaca rusihuinni qué runi respetar guendaxheelaʼ. Pa guni ti xpinni Cristu ni maʼ guyuunisa zacá la? zándaca gueeda guniti caadxi de ca dxiiñaʼ risaca napa ndaaniʼ xquidxi Dios. Ne pur gana si cuézabe uguu Dios ndaayaʼ laabe ora guni orarbe: «Jiobá, naapiaʼ nga guníʼ iqueʼ qué zuzuubaʼ stiidxaluʼ, peru neca zacá, rinabaʼ lii uguuluʼ ndaayaʼ naa».

JMA NANNA BIXHÓZENU NI NUU GUIBÁʼ QUE LAANU

 8. Bisiene xiñee naquiiñeʼ chinándanu ca conseju ni rudii Jiobá para ti guendaxheelaʼ.

⁸ Ti ingenieru ni ruzáʼ ti máquina nanna ximodo rúnini dxiiñaʼ. Pa chiguquíʼdinu ni la? laabe zanda gábibe laanu ximodo gúninu ni. Peru xi zazaaca pa qué guzúʼbanu stiidxabe ne gúninu ni modo gápanu gana yaʼ. Zándaca qué zácani jneza, laani ngue pa guicaguí ni. Yanna, pa racaláʼdxinu guibáninu nayecheʼ lu xquendaxheelanu la? naquiiñeʼ chinándanu ca conseju stiʼ Jiobá, Dios ni gudixhestí ni.

 9. Xiñee zanda guininu riene Jiobá modo runi sentir binni ora nuu stubi ne riénebe pabiáʼ nayecheʼ riuu ti guendaxheelaʼ.

⁹ Jiobá nanna guiráʼ cosa de guendaxheelaʼ ne laaca nanna guiráʼ cosa de binni. Laabe nga gudíxhebe chuulaʼdxiʼ binni gatané xheelaʼ para gaca ni na mandatu riʼ: «Lagapa xiiñitu ne lagaca stale» (Gén. 1:28). Ne laaca nánnabe xi runi sentir tuuxa ora nuu stubi, purtiʼ ante guzaʼbe primé gunaa guniʼbe: «Cadi galán diʼ chuʼ hombre stubi si. Chiguneʼ tobi ni gacané laabe, biáʼsipeʼ para laabe» (Gén. 2:18). Laaca nanna Jiobá pabiáʼ nayecheʼ riuu cani maʼ bichaganáʼ. Biblia na: «Güeʼ nisa ni riree ndaaniʼ cisterna stiluʼ, chorrohuiiniʼ ni riree ndaaniʼ bizé stiluʼ. Xiñee ndiʼ guixii nisa ni riree ndaaniʼ manantial stiluʼ sti ladu, ne xiñee cheʼ ca corriente nisa [stiluʼ] lu calle yaʼ. Para lii si nga ca nisa ca, ne cadi para binni ni qué runibiaʼluʼ. Gaca ra ridá nisa ni riquiiñeluʼ ti ndaayaʼ, ne biechené xheelaluʼ ni bichaganaluʼ dxi nahuiiniluʼ» (Proverbios 5:15-18).

10. Xi naquiiñeʼ ganna cani maʼ bichaganáʼ ora maʼ nexhenecaʼ xheelacaʼ.

¹⁰ Cumu ralenenu donda bisaanané Adán laanu la? nga runi, nin ti guendaxheelaʼ qué zanda guiníʼ qué rapa guendanagana. Peru ca xpinni Jiobá ni maʼ bichaganáʼ zanda guibánicaʼ nayecheʼ pa chinándacaʼ ni na Stiidxaʼ Dios. Guidúʼyanu xi conseju bidii Pablu cani maʼ bichaganáʼ de ora gatanecaʼ xheelacaʼ (biindaʼ 1 Corintios 7:1-5). Stiidxaʼ Dios qué riníʼ naquiiñeʼ gatané binni xheelaʼ para si gapa xiiñiʼ, sínuque laaca zanda gúnicabe ni para guni sentírcabe galán ne chúʼcabe nayecheʼ. Peru qué riuulaʼdxiʼ Dios gúnicabe cosa dxabaʼ ni cadi jneza guni cani maʼ bichaganáʼ. Ca xpinni Cristu ni maʼ bichaganáʼ naquiiñeʼ gusihuínnicaʼ dxandíʼ nadxiisaacaʼ dede né ora maʼ nexhenecaʼ xheelacaʼ. Nga runi, qué zúnicabe nin ti cosa feu ni qué riuulaʼdxiʼ Jiobá.

11. Xi ndaayaʼ gucuaa Rut pur biʼniʼ ni na Dios.

¹¹ Richaganáʼ binni para chuʼ nayecheʼ ne guibani galán, cadi para chuʼ binni triste ne guiníʼ cadi jneza ni biʼniʼ. Ralidxi ti xpinni Cristu naquiiñeʼ gácani casi ti lugar ra zanda guiziiláʼdxicaʼ ne guibánicaʼ nayecheʼ. Guzéʼtenu ni bizaaca raca biaʼ chonna mil iza. Guyuu ti binnigola láʼ Noemí, laa gupa chupa xuaalidxi, Orpá ne Rut, peru guiónnacabe maʼ viuda laacabe. Dxi bireecabe de Moab para chécabe Judá, gunabaʼ Noemí laacabe guibiguétacabe xquídxicabe. Peru xi biʼniʼ Rut yaʼ. Biaananebe Noemí, biʼniʼ adorarbe Dios ne pur ngue bidii Jiobá, Dios stiʼ Israel laabe ni naquiiñeʼ guicaabe, purtiʼ biyúbibe guilabe ra nuu Dios (Rut 1:9; 2:12). Bisihuínnibe pabiáʼ rusisácabe guendaxheelaʼ casi xiixa ni bisigaʼdeʼ Dios laabe, ngue runi bichaganabe ti binnigola láʼ Boaz, ti hombre ni runi adorar Dios. Ora guiasa Rut de lade gueʼtuʼ lu guidxilayú cubi, ziecheʼ ora ganna guca tobi de ca jñaabiidaʼ Jesucristu (Mat. 1:1, 5, 6; Luc. 3:23, 32). ¡Nabé stale ndaayaʼ gucuaabe purtiʼ bíʼnibe ni na Dios!

CAADXI CONSEJU GALÁN PARA CHUʼ TI GUENDAXHEELAʼ NAYECHEʼ

12. Paraa zanda guidxélanu conseju galán para ti guendaxheelaʼ.

¹² Jiobá rabi cani maʼ bichaganáʼ xi naquiiñeʼ gúnicaʼ para chuʼcaʼ nayecheʼ, purtiʼ laabe nga gudixhestibe guendaxheelaʼ. Nin ti binni qué ganna biaʼ nánnabe. Qué ruchee ca conseju stiʼ Biblia, nga runi para gudii binni conseju galán ti guendaxheelaʼ naquiiñeʼ chinanda cani zeeda luni. Guidúʼyanu ti conseju gudxi Dios apóstol Pablu gucaa: «Naquiiñe ganaxhii hombre xheela casi nadxii laca laa, ne irá gunaa guni ni na xheelaʼ» (Efe. 5:33). Nayaguieʼ ca conseju riʼ, ne zanda guiene guiráʼ ca xpinni Cristu ni. Peru zúnibe ni nani la? Zúnibe ni pa rusisácabe guendaxheelaʼ casi xiixa ni bisigaʼdeʼ Dios laabe.a

13. Xi zazaaca pa qué chinanda binni conseju ni zeeda lu 1 Pedro 3:7.

¹³ Ti xpinni Cristu ni maʼ bichaganáʼ naquiiñeʼ gannaxhii xheelaʼ. Sicaríʼ bicaa apóstol Pedru: «Zacaca laatu, hermanu caʼ, lauyubi modo guiene tu xheela tu. Lagaca nachaʼhui ne laacabe, cadi purti si jma nadá cabe que laatu, sínuque ne laca purti ma bidii Dios laacabe enda nabani ni qué zaluxe, cásica bidii ni laatu pur enda nachaʼhui stiʼ. Zacá laguni ti cadi uchiiña gasti laatu ora iníʼ né tu Dios» (1 Ped. 3:7). Pa qué chinanda ti hombre ca conseju riʼ, zándaca qué zucaadiaga Jiobá ca oración stiʼ. Ne ora maʼ nuucabe zacá, chaahuiʼ chaahuiʼ zaxélecabe de Dios ne despué maʼ qué ziuucabe galán, zadíndecabe ne zaníʼcabe diidxaʼ ni guniná laacabe.

14. Ximodo zabani ti familia ora nuu xpiaaniʼ ti gunaa.

¹⁴ Pa chinanda ti gunaa ni maʼ bichaganáʼ ni na Stiidxaʼ Dios ne gudii lugar gabi espíritu santu laa xi guni la? zanda gacané para gaca ralidxi ti lugar ra chuʼcaʼ tobi si ne nayecheʼ. Ti hombre ni ridxibi Dios zanda gannaxhii xheelaʼ, gapa laabe ne gusiidiʼ laabe de Dios. Yanna, cumu riuulaʼdxiʼ ti gunaa gannaxhiicabe laa la? runi stipa para gapa ca guenda ni gucaa xheelaʼ gannaxhii laa jma. Proverbios 14:1 na: «Ti gunaa ni nuu xpiaaniʼ nga ni rindisaʼ lidxi, peru ti gunaa nahuati la? runitilú ni né naʼ». Ti gunaa nuu xpiaaniʼ ne nachaʼhuiʼ racané para cueendú binnilidxi ni galán ne guibánicaʼ nayecheʼ. Ne laaca rusihuínnibe rusisácabe guendaxheelaʼ casi ti cosa ni bisigaʼdeʼ Dios.

15. Xi conseju ridxélanu lu Efesios 5:22-25.

¹⁵ Cani maʼ bichaganáʼ ni rusisaca guendaxheelaʼ casi ti cosa ni bisigaʼdeʼ Dios, rannaxhiicaʼ xheelacaʼ cásica gunnaxhii Jesús ca binni ridagulisaa (biindaʼ Efesios 5:22-25). Ne ricaacabe stale ndaayaʼ ora nadxiisaacabe de guidubi ladxidóʼcabe. Laaca qué rudxiibacabe laca laacabe ne qué rúnicabe xcaadxi cosa ni qué runi ti xpinni Cristu, casi runi ti xcuidi ora qué riná guiniʼné tuuxa ni biʼniʼ laa xiixa. Xiñee yaʼ. Purtiʼ zándaca gueeda guchiani guendaxheelaʼ stícabe.

CADI GUXHELEʼ GUIRUTIʼ LAATU

16. Xiñee qué richaganáʼ caadxi xpinni Cristu.

¹⁶ Stale binni ridxiña dxi guiníʼ ique guichaganáʼ, peru nuu caadxi xpinni Jiobá riaanacaʼ sin guichaganacaʼ, purtiʼ qué ganda guidxélacaʼ ti binni ni riuuláʼdxicaʼ ne ni riuulaʼdxiʼ Dios guichaganacaʼ. Xcaadxi na zanda guiaana sin guichaganáʼ, zacá randa rúnicaʼ jma lu xhiiñaʼ Jiobá purtiʼ qué gápacaʼ ca dxiiñaʼ ni napa cani maʼ bichaganáʼ. Peru naquiiñeʼ chinándacabe conseju ni maʼ gudixhe Jiobá para cani caʼruʼ guichaganáʼ ti chúʼcabe nayecheʼ (Mat. 19:10-12; 1 Cor. 7:1, 6, 7, 17).

17. 1) Xi guníʼ Jesús de guendaxheelaʼ ni cadi naquiiñeʼ guiaandaʼ laanu. 2) Xi naquiiñeʼ guni ti xpinni Cristu nagueendaca pa guzulú chuulaʼdxiʼ xheelaʼ sti binni.

¹⁷ Pa maʼ bichaganaluʼ o pa coʼ, cadi naquiiñeʼ guiaandaʼ lii ca diidxaʼ guníʼ Jesús riʼ: «Qué xa huayuunda tu ra cá xi biʼni Dios dxi bizulú bizáʼ binni. Bizáʼ be hombre ne gunaa, ne na be: “Pur nga runi zusaana hombre bixhoze ne jñaa, ne zadxaaga xheela ne zaca ca tobi si.” Ne zacá ma cadi chupa cabe sínuque tobi si laacabe. Pur nga runi ni ma bichaaga Dios la? ma cadi indaa binni guidxilayú» (Mat. 19:4-6). Ti pecadu nga gacalaʼdxiʼ binni chuʼné xheelaʼ stobi (Deu. 5:21). Ti xpinni Cristu ni guni zacá la? naquiiñeʼ cuee guendahuati ca de ndaaniʼ ique nagueendaca, neca gácani nagana para laa pur bidii lugar gucaa ladxidóʼ laa chuulaʼdxiʼ xheelaʼ stobi (Mat. 5:27-30). Naquiiñeʼ cueebe cosa dxabaʼ ca de ndaaniʼ íquebe ne gucueezabe laabe ti cadi gucaa ladxidoʼbe laabe gúnibe xiixa ni cadi jneza (Jer. 17:9).

18. Ximodo naquiiñeʼ guni sentirnu pur guendaxheelaʼ bisigaʼdeʼ Dios binni.

¹⁸ Dede stale binni ni huaxiéʼ nanna de Dios o ni qué liica ganna de laabe, rusihuínnicaʼ pabiáʼ risaca guendaxheelaʼ sticaʼ casi ti cosa ni bisigaʼdeʼ Dios laacaʼ. Peru laanu maʼ bidiʼnu laanu Jiobá, «ti Dios nayecheʼ» (1 Tim. 1:11, NM). Nga runi, ¡jmaruʼ si naquiiñeʼ guiéchenu pur guiráʼ ni maʼ bisigaʼdeʼ Dios laanu ne gusihuínninu rusisácanu guendaxheelaʼ!

[Nota]

[Ni caníʼ yaza 6]

Ti guendaxheelaʼ nuu galán, rusisaca Jiobá ne rusiecheʼ binnilidxi

[Imagen ni zeeda lu yaza 5]

Bisihuinni Rut bisisaca guendaxheelaʼ casi ti cosa ni bisigaʼdeʼ Dios binni

[Imagen ni zeeda lu yaza 7]

Ñee rusihuínniluʼ dxandíʼ rusisácaluʼ guendaxheelaʼ casi ti cosa ni zeeda de Dios la?