«Laché ra nuu binni de guiráʼ guidxi, lagusiidiʼ laacaʼ gácacaʼ discípulo»

1, 2. Ora guidúʼndanu ni na Mateo 24:14, xi zándaca guinabadiidxanu.

JESÚS guníʼ zareeche ca diidxaʼ nacubi ne galán stiʼ Reinu lu guidubi Guidxilayú lu ca últimu dxi riʼ (Mateo 24:14). Laanu, ca testigu stiʼ Jiobá, nabé runibiáʼ binni laanu lu guidubi Guidxilayú, purtiʼ rucheechenu diidxaʼ. Nuu binni riuulaʼdxiʼ gucaadiaga ni rusíʼdinu. Xcaadxi qué riuulaʼdxiʼ, neca zacá, runi respetarcaʼ laanu pur dxiiñaʼ ni rúninu. Xiñee rininu ca Testigu si nga cayúnicaʼ dxiiñaʼ ni guníʼ Jesús chigaca que yaʼ. Xiñee nanna dxíchinu zacá ni yaʼ.

² Laaca riníʼ stale religión cusiidicaʼ ni guníʼ Jesús. Para ca religión riʼ la? gucheechecaʼ diidxaʼ nga gudiicaʼ ti libana ndaaniʼ yuʼduʼ, lu televisión o pur Internet. Para caadxi binni la? gucheechecaʼ diidxaʼ nga gábicaʼ sti binni ximodo binibiaʼcaʼ Jesús. Ne para xcaadxi binni la? gucheechecaʼ diidxaʼ nga gacanecaʼ tuuxa ni caquiiñeʼ xiixa o gúnicaʼ xcaadxi dxiiñaʼ sin guiáxacaʼ casi ni runi de doctor, de enfermera o de maestru. Peru, ñee zacá nga guníʼ Jesús naquiiñeʼ gucheeche ca discípulo stiʼ diidxaʼ la?

 3. Xi tapa cosa naquiiñeʼ guni ca xpinni Jesús casi na Mateo 28:19, 20.

³ Ñee racalaʼdxiʼ Jesús cueza ca discípulo stiʼ gueeda binni dede ra nuucaʼ la? Coʼ, purtiʼ biásasibe lade gueʼtuʼ, gúdxibe chupa chonna gayuaa de ca discípulo stibe: «Laché ra nuu binni de guiráʼ guidxi, lagusiidiʼ laacaʼ gácacaʼ discípulo, lacuunisa laacaʼ [...], lagusiidiʼ laacaʼ gúnicaʼ guiráʼ ni maʼ bineʼ mandar laatu» (Mateo 28:19, 20, TNM). Racá ridúʼyanu naquiiñeʼ cheʼ ca xpinni Jesús ne gacanecaʼ binni gaca discípulo, uguunísacaʼ laacabe ne gusiidicaʼ laacabe. Peru primeru naquiiñeʼ chécabe ne chiyúbicabe binni. Ti binni ni nabé nanna de tema riʼ caníʼ napa xidé cheʼ cada xpinni Cristu ra nuu binni, ne pa caquiiñeʼ tiidibe ti calle o chebe chericaʼ nisadóʼ para laani la? napa xidé gúnibe ni (Mateo 10:7; Lucas 10:3).

 4. Xi caquiiñeʼ guni ca xpinni Jesús para gacanecaʼ binni gaca discípulo.

⁴ Ñee laaca guníʼ Jesús cada discípulo stiʼ nga guʼyaʼ modo ganda gucheeche diidxaʼ la? O racaláʼdxibe gucheechecaʼ diidxaʼ tobi si ne gata chaahuiʼ modo gaca dxiiñaʼ riʼ. Nanna dxíchinu qué zanda diʼ gucheeche ti xpinni si Cristu diidxaʼ ra nuu «binni de guiráʼ guidxi». Nga runi, naquiiñeʼ gata chaahuiʼ modo guni ca xpinni Jesús dxiiñaʼ. Ngapeʼ nga ni caníʼ Jesús ora gudxi ca discípulo stiʼ zácacaʼ casi binni runi guuzeʼ, peru para chiyúbicaʼ binni guedanecaʼ ra nuube (biindaʼ Mateo 4:18-22). Xii ndiʼ caniʼbe yaʼ. Cadi caníʼdibe zaca cada discípulo stibe casi ti hombre ni rié guuzeʼ stubi ne maʼ cabeza guicá benda lu anzuelu stiʼ. Laabe caniʼbe de ca binni ni riquiiñeʼ chin o tarraya para guinaazeʼ benda. Para gaca clase dxiiñaʼ riʼ caquiiñeʼ chuʼ stale binni ni guni dxiiñaʼ nadipaʼ, chuʼcaʼ tobi si ne gata chaahuiʼ modo gaca xhiiñacaʼ (Lucas 5:1-11).

 5. Gunáʼ nga guidapaʼ guendarinabadiidxaʼ naquiiñeʼ guicábinu, ne xiñee.

⁵ Pa racaláʼdxinu gánnanu tuu nga cani cucheecheʼ stiidxaʼ Reinu la? naquiiñeʼ guicábinu ca guendarinabadiidxaʼ riʼ:

• Xi naquiiñeʼ gusiidiʼ ca xpinni Cristu ora gucheechecaʼ diidxaʼ.

• Xi naquiiñeʼ gucaa laacabe gúnicabe ni.

• Xi método nga iquiiñecabe.

• Pa guidubi naquiiñeʼ gucheechecabe diidxaʼ, ne pabiáʼ tiempu zandaa dxiiñaʼ riʼ.

Ora guicábinu ca guendarinabadiidxaʼ riʼ zánnanu tuu nga cani cayuni ti dxiiñaʼ ni chigulá binni. Ne zaguu ni gana laanu para cadi gusaana de gucheechenu diidxaʼ (1 Timoteo 4:16).

 6. Xiñee nánnanu ca testigu stiʼ Jiobá si nga cani cusiidicaʼ ni biʼniʼ mandar Jesús gusiidiʼ ca xpinni.

⁶ (Biindaʼ Lucas 4:43). Bisiidiʼ Jesús binni «modo runi mandar Dios», o de Reinu stiʼ Dios. Ne ngaca nga ni racaláʼdxibe gusiidiʼ ca discípulo stibe. Yanna, gunáʼ nga religión ni cusiidiʼ guiráʼ binni de Reinu stiʼ Dios yaʼ. Ca testigu stiʼ Jiobá si nga cayúnicaʼ ni. Dede ca binni ni qué riuulaʼdxiʼ dxiiñaʼ rúninu rudiicaʼ cuenta dxandíʼ ni. Guidúʼyanu xi gudxi ti hombre ni guca misioneru ne sacerdote ti Testigu. Guníʼ hombre riʼ maʼ guleza ndaaniʼ stale guidxi roʼ ne ndaaniʼ cada guidxi guyuube gunabadiidxabe ca Testigu xi rusiidicaʼ binni. Hombre que guníʼ: «Aque nahuati guiráʼ ca Testigu que purtiʼ ngueca si ni ricábicaʼ: “Rusíʼdidu binni ca diidxaʼ nacubi ne galán stiʼ Reinu”». Qué rusihuinni diʼ ni guníʼ hombre riʼ nácanu binni nahuati, sínuque nuunu tobi si purtiʼ dxandíʼ xpinni Cristu laanu (1 Corintios 1:10). Laaca de Reinu stiʼ Dios nga ni jma rusiidiʼ revista Torre stiʼ ni rapa. Ni caníʼ de Reinu stiʼ Jiobá. Riree ni lu 254 idioma, ne cada númeru stiʼ revista riʼ raca imprimir biaʼ 59 millón. Laasi ni nga revista ni jma ruundaʼ binni lu guidubi Guidxilayú.

 7. Xiñee rininu qué rusiidiʼ ca xaíque stiʼ ca religión ni na zinanda Cristu ni guníʼ Jesús.

⁷ Ca xaíque stiʼ ca religión ni na zinanda Cristu qué rusiidicaʼ binni de Reinu stiʼ Dios. Ne pa guiníʼcabe de Reinu la? stale de laacabe riníʼ laani nga ti cosa ni runi sentir binni ndaaniʼ ladxidóʼ (Lucas 17:21). Qué rusiidicabe naca Reinu riʼ ti gobiernu ni nuu guibáʼ ne laaca qué rusiidicabe naca Jesús Rey stiʼ Reinu riʼ. Riníʼcabe de Jesús ora si gaca Navidad ne tiempu raca Nabaana. Qué rusiidicabe zuni chaahuiʼ Reinu riʼ guiráʼ guendanagana napa binni ne maʼ cadi candaa para cuee ni guiráʼ cosa malu nuu lu Guidxilayú (Apocalipsis 19:11-21). Rihuinni dxíchica qué gánnacabe xi chiguni Jesús casi Rey lu Reinu stiʼ Dios. Ne cumu qué riénecabe xi guníʼ Jesús naquiiñeʼ gusiidicabe binni la? laaca qué riénecabe xiñee naquiiñeʼ gucheechecabe diidxaʼ.

 8. Xi cadi naquiiñeʼ guiníʼ íquenu ora chigucheechenu diidxaʼ.

⁸ Cadi naquiiñeʼ diʼ gucheeche ca discípulo stiʼ Jesús diidxaʼ para guni ganarcaʼ bueltu o para gucuicaʼ yoo ni chuulaʼdxiʼ binni. Jesús gudxi ca discípulo stiʼ: «Qué niguixe tu saca gudixhe irá ndi lu ná tu guni tu. Yanna laguni cani sin guiaxa tu» (Mateo 10:8). Nga runi, cadi naquiiñeʼ diʼ guʼyaʼ binni dxiiñaʼ riʼ casi ti negocio (2 Corintios 2:17). Cadi naquiiñeʼ guinabaʼ ca discípulo stiʼ Jesús quíxecabe laacaʼ purtiʼ rucheechecaʼ diidxaʼ (biindaʼ Hechos 20:33-35). Neca bisiene chaahuiʼ Jesús ximodo gaca dxiiñaʼ riʼ, stale religión guizáʼ rinábacaʼ bueltu para guiá ne gaca chaahuiʼ ca yuʼduʼ sticaʼ ne para guiaxa ca xaíque sticaʼ o xcaadxi binni runi xhiiñacaʼ. Nga runi, nabé maʼ ricu stale de ca xaíque stiʼ ca religión ni na zinanda Cristu (Apocalipsis 17:4, 5).

 9. Ximodo rusihuinni ca Testigu rucheechecaʼ diidxaʼ purtiʼ nadxiicaʼ binni.

⁹ Yanna, xi zanda guininu de ca testigu stiʼ Jiobá yaʼ. Ñee rinábacabe bueltu ndaaniʼ ca Yoo stiʼ Reinu o ra raca ca asamblea stícabe la? Coʼ. Riaxa guiráʼ gastu stícabe né ca donación ni rudii binni de guidubi ladxidóʼ (2 Corintios 9:7). Neca qué riáxacabe pur rusiidicabe binni de Biblia, udubiza bicheechecabe diidxaʼ biaʼ 2,000 millón de hora ne guiráʼ beeu bisiidicabe jma de gaʼ millón binni de Biblia. Riéchecabe iquiiñecabe xpuéltucabe para gúnicabe dxiiñaʼ riʼ. Ti investigador guníʼ nabé risaca para ca Testigu gucheechecaʼ diidxaʼ ne gusiidicaʼ binni. Ne laaca guniʼbe qué gápacaʼ nin ti xaíque ni naquiiñeʼ guiaxa pur dxiiñaʼ ni cayuni. Yanna, pa qué rucheechenu diidxaʼ para guni ganarnu bueltu, xi rucaa laanu gúninu ni yaʼ. Rúninu dxiiñaʼ riʼ purtiʼ nadxiinu Jiobá ne nadxiinu binni. Zacá nga cayaca cumplir profecía stiʼ Salmo 110:3, ra na: «Xquídxiluʼ zeeda né stale gana dxi chitíndeneluʼ ca binni nanda guiibaʼ stiluʼ. Nápaluʼ stale hombrehuiiniʼ ne dxaapahuiiniʼ sicarú casi gota nisa ni rusaana gupa stiʼ siadóʼ».

10. Gunáʼ nga ca método biquiiñeʼ Jesús ne ca discípulo stiʼ dxi bicheechecaʼ diidxaʼ.

¹⁰ Xi método biquiiñeʼ Jesús ne ca discípulo stiʼ dxi bicheechecaʼ diidxaʼ yaʼ. Guyécabe guiráʼ ra nuu binni. Bicheechecabe diidxaʼ lu calle ne ndaaniʼ luguiaa. Ne laaca guyécabe de yoo pur yoo (Mateo 10:11; Lucas 8:1; Hechos 5:42; 20:20). Cumu bicheechecabe diidxaʼ de yoo pur yoo la? gunda guniʼnécabe guiráʼ clase binni.

11, 12. Xi ridúʼyanu ora ruchaaganu guiráʼ ni cayuni ca testigu stiʼ Jiobá para gucheechecaʼ diidxaʼ né ni cayuni xcaadxi religión.

¹¹ Yanna, xi runi ca religión ni na zinanda Cristu yaʼ. Ñee rusiidiʼ ca religión riʼ ca diidxaʼ nacubi ne galán stiʼ Reinu casi guníʼ Jesús la? Stale de ca religión riʼ jma riuuláʼdxicaʼ quíxecaʼ ca xaíque sticaʼ para gusiidiʼ ca xpínnicaʼ. Peru qué rusiidicabe binni para gaca discípulo stiʼ Jesús. Rabisícabe ca xpínnicabe caadxi diidxaʼ para cadi gusaana de checaʼ ra yuʼduʼ. Huayuu biaje huayábicabe ca xpínnicabe chigucheeche diidxaʼ. Guzéʼtenu ti ejemplu. Lu iza 2001 que, bicaa papa Juan Pablo II ti carta ra nuu ca católicu ra cayábibe laacaʼ naquiiñeʼ gusiidicaʼ binni de Evangeliu, cásica biʼniʼ apóstol Pablu, purtiʼ laa guníʼ: «Pa qué güe ni la? nanna xi gueda iree xaʼ yaʼ». Laaca guníʼ Papa que cadi chupa chonna si binni ni maʼ bisiidicabe nga naquiiñeʼ gucheeche diidxaʼ, sínuque guiráʼ binni rié yuʼduʼ. Peru huaxiéʼ tu biʼniʼ ni gúdxibe laa.

¹² Ca testigu stiʼ Jiobá si nga cani cusiidicaʼ binni maʼ cayuni mandar Jesús casi Rey dede 1914. Ni jma risaca lu xquendanabánicabe nga gucheechecabe diidxaʼ, casi biʼniʼ mandar Jesús gaca ni (Marcos 13:10). Ti libru ni riníʼ de religión guníʼ nabé risaca para ca testigu stiʼ Jiobá gucheechecaʼ diidxaʼ. Bizeeteʼ libru que runi ca Testigu stipa pur gacanecaʼ binni ni qué gapa ni gó, ni nuu stubi o ni huará, peru qué riaandaʼ laacabe gunáʼ nga dxiiñaʼ ni jma risaca naquiiñeʼ gúnicabe: gusiidicabe binni mayaca guinitilú guiráʼ cosa malu nuu lu Guidxilayú ne xi naquiiñeʼ gúnicaʼ ti ganda guilacaʼ. Ne zacá nga laani. Laanu, ca Testigu, dede nagasi cusíʼdinu binni ni guníʼ Jesús ne laaca caquiiñenu ca método ni biquiiñeʼ Jesús ne ca discípulo stiʼ.

13. Pa guidubi naquiiñeʼ guireeche diidxaʼ.

¹³ Jesús guníʼ zucheeche ca discípulo stiʼ diidxaʼ ne zusiidicaʼ binni ca cosa galán chiguni Reinu riʼ lu «idubi naca guidxilayú». Laabe biʼniʼ mandarbe laacaʼ gusiidicaʼ binni de «guiráʼ guidxi» gaca discípulo (Mateo 24:14; 28:19, 20, TNM). Nga runi, naquiiñeʼ gucheeche ca xpinni Cristu stiidxaʼ Reinu lu guidubi Guidxilayú.

14, 15. Xiñee rininu cucheeche ca testigu stiʼ Jiobá diidxaʼ lu guidubi Guidxilayú casi guníʼ Jesús gaca ni. (Biiyaʼ ca foto ni zeeda ra ruzulú tema riʼ).

¹⁴ Maʼ bidúʼyanu guníʼ Jesús zareeche stiidxaʼ Reinu lu guidubi Guidxilayú. Yanna, xiñee rininu cayaca cumplir profecía riʼ né dxiiñaʼ ni cayuni ca Testigu yaʼ. Ndaaniʼ guidxi Estados Unidos, napa ca religión ni na zinanda Cristu biaʼ 600,000 xaíque. Peru ndaaniʼ guidxi riʼ nuu jma de 1,200,000 Testigu ni cusiidiʼ binni ni racalaʼdxiʼ Jesús gánnacaʼ. Ne lu guidubi Guidxilayú napa ca católicu biaʼ 400,000 sacerdote, peru nuu jma de xhono millón Testigu ni cucheeche diidxaʼ ndaaniʼ 240 guidxi roʼ. Rihuinni dxíchica cucheeche ca testigu stiʼ Jiobá diidxaʼ lu guidubi Guidxilayú. Cadi dxandíʼ rusisaca dxiiñaʼ riʼ Jiobá la? (Salmo 34:1; 51:15).

¹⁵ Laanu, ca testigu stiʼ Jiobá, racaláʼdxinu gucheechenu diidxaʼ ra nuu biaʼ gándatiʼ binni ante gueeda fin. Ne para ganda gúninu ni la? runi traducirnu ne runi imprimirnu millón de libru, revista, tratadu ne invitación lu jma de 700 idioma. Ne qué rutoʼno ca publicación rusaananenu binni. Udubiza bisaananenu binni 4,500 millón de publicación ni rusiidiʼ de Biblia. Laaca maʼ bisaananenu binni jma de 200 millón de versión stiʼ Biblia ni láʼ Traducción del Nuevo Mundo de las Santas Escrituras lu jma de 130 idioma. Ne nuu publicación lu jma de 750 idioma lu sitiu ni nápanu lu Internet. Ca testigu stiʼ Jiobá si nga cayúnicaʼ dxiiñaʼ naroʼbaʼ riʼ.

16. Xiñee nánnanu napa ca testigu stiʼ Jiobá espíritu stiʼ Dios.

¹⁶ Pabiáʼ tiempu zareeche ca diidxaʼ guníʼ Jesús riʼ yaʼ. Laabe guniʼbe zaca ni dede ora gueeda fin. Lu ca últimu dxi riʼ, laanu, ca testigu stiʼ Jiobá, cayándaruʼ cucheechenu diidxaʼ purtiʼ nápanu espíritu santu stiʼ Dios (Hechos 1:8; 1 Pedro 4:14). Laaca nuu binni de xcaadxi religión ni riníʼ nápacaʼ espíritu santu. Peru, ñee cayanda cucheeche ca binni riʼ diidxaʼ cásica cayuni ca testigu stiʼ Jiobá lu ca últimu dxi riʼ la? Nuu de laacabe huayacalaʼdxiʼ gucheeche diidxaʼ casi rúninu, peru qué huayanda diʼ. Xcaadxi riuulaʼdxiʼ gucheeche diidxaʼ, peru ti tiempu si rúnicaʼ ni. Xcaadxi rié de yoo pur yoo, peru qué rusiidicaʼ binni de stiidxaʼ Reinu. Nga runi, cadi cayúnicabe dxiiñaʼ bizulú Jesús que.

17, 18. a) Xiñee nuunu seguru ca testigu stiʼ Jiobá nga cani cucheeche ca diidxaʼ nacubi ne galán stiʼ Reinu. b) Xiñee randa rúninu dxiiñaʼ riʼ.

¹⁷ Yanna, tuu nga cani cucheeche ca diidxaʼ nacubi ne galán stiʼ Reinu tiempu riʼ yaʼ. Ca testigu stiʼ Jiobá si. Xiñee nuunu seguru yaʼ. Primé la? purtiʼ cusíʼdinu binni ni naquiiñeʼ gánnacaʼ, ca diidxaʼ nacubi ne galán stiʼ Reinu. Guiropa, purtiʼ jneza ca método ni caquiiñenu, riyúbinu binni. Guionna, ni rucaa laanu gúninu ni nga nadxiinu Jiobá ne nadxiinu binni. Guidapa, purtiʼ rugaanda dxiiñaʼ stinu stale lugar, cucheechenu diidxaʼ ra nuu binni de guiráʼ guidxi ne ni riníʼ guiráʼ idioma. Ne gaayuʼ, purtiʼ zucheecherunu diidxaʼ dede ora gueeda fin.

¹⁸ Guizáʼ ridxagayaanu ora ridúʼyanu guiráʼ ni cayuni xquidxi Jiobá para ganda gucheeche stiidxaʼ Reinu lu ca últimu dxi riʼ. Xiñee randa rúninu ni yaʼ. Apóstol Pablu guníʼ purtiʼ racané Dios laanu chuuláʼdxinu gúninu ni ne rudiibe stipa laanu (Filipenses 2:13). Nga runi, rinábanu Jiobá gudii stipa laanu para cadi gusaana de gucheechenu diidxaʼ biaʼ gándatiʼ (2 Timoteo 4:5).