Gudáʼ dananda naa
«Tu gacalaʼdxi gaca xpinne la? gusiaanda laca laa, ne cadi lica guiá xpida sínuque usaana ni lu naya irá dxi ne gueda nanda naa.» (LUC. 9:23)
1, 2. 1) Xi invitación biʼniʼ Jesús. 2) Xi maʼ gudixhe íqueluʼ
DXI mayaca guiluxe Jesús dxiiñaʼ biseendaʼ Dios laa gueeda guni que, nuube Perea, ti lugar ni nuu ladu guiá de guidxi Judea, deche guiiguʼ Jordán. Raqué, bidxiña ti hombre laabe ne gunabadiidxaʼ xi caquiiñeʼ guni para guicaa guendanabani ni qué zaluxe. Ora biʼyaʼ Jesús cayuni hombre que guiráʼ ni cá lu Ley ni gucuaa Moisés, gudxi laabe ca diidxaʼ riʼ: «Guyé bitoo irá ni napuʼ, bidii ca pobre, ne zapu stale ni risaca ibáʼ. Ne ma cadi lica guiá lu xpida luʼ, ne dananda naa» (Mar. 10:21). ¡Guníʼ ique si nga: Jesús, tobi lucha Xiiñiʼ Dios, cayabi laabe sanándabe laa!
2 Neca qué niná hombre que ñuni ni gudxi Jesús laa, peru guyuu tu yenanda Jesús. Dxi nacubi bizulube cucheechebe diidxaʼ gúdxibe Felipe: «Dananda naa» (Juan 1:43). Felipe yenanda laabe ne despué beeda gaca tobi de ca apóstol stibe. Ngueca invitación bidiibe Mateu, ne laaca yenanda laabe (Mat. 9:9; 10:2-4). Jesús laaca guníʼ: «Tu gacalaʼdxi gaca xpinne la? gusiaanda laca laa, ne cadi lica guiá xpida sínuque usaana ni lu naya irá dxi ne gueda nanda naa» (Luc. 9:23). Nga runi, guiráʼ cani riuulaʼdxiʼ guni ni jneza zanda sanándacaʼ Jesús pa racaláʼdxicaʼ. Yanna lii yaʼ, ñuuláʼdxiluʼ ninándaluʼ Cristu la? Stale de laanu maʼ gudixhe íquenu chinándanu Cristu, ne laaca rábinu xcaadxi binni gácacaʼ xpínnibe ora maʼ cucheechenu diidxaʼ.
3. Xi zanda gúninu para cadi gusaana de chinándanu Jesús.
3 Nabé triste nga guininu ni, peru stale binni ni maʼ nanna caadxi de ni rusiidiʼ Biblia qué ruyúbicaʼ guiziidicaʼ jma ne chinándacaʼ Jesús, sínuque chaahuiʼ chaahuiʼ rixélecaʼ de ni maʼ biziidicaʼ (Heb. 2:1). Yanna laanu yaʼ, xi zanda gúninu para cadi gusaana de chinándanu Jesús. Ni zacané laanu nga guinabadiidxanu laca laanu: «Xi bicaa naa chinanda Jesús dxi nacubi caziideʼ. Xi caquiiñeʼ guneʼ para gusihuinneʼ dxandíʼ zinanda Cristu». Ora guicábinu ca guendarinabadiidxaʼ ca zacanécani laanu cadi gusaana de sanu lu neza ni maʼ gulinu ne gacanenu xcaadxi binni sananda Jesús.
Xiñee zinándanu Jesús
4, 5. Xiñee rininu Jesús si nga zanda gacané laanu.
4 Ti hombre ni riguixhená ni láʼ Jeremías guníʼ: «Nannaʼ dxicheʼ Jiobá, binni guidxilayú cadi lu náʼ diʼ nuu neza stiʼ. Cadi lu náʼ diʼ binni nuu guni mandar ra guzuhuaa ñee» (Jer. 10:23). Biaʼ dxi maʼ huabani binni huahuinni dxandíʼ ni na ca diidxaʼ ca. Zeʼ dxi jma rihuinni qué zanda diʼ guireendú guiráʼ ni riguixhe ique ca gobiernu ca gúnicaʼ, purtiʼ binni ruchee laacaʼ. Nga runi zinándanu Jesús purtiʼ laasibe nga ni zanda guni mandar ne ni zanda gacané laanu. Xiñee nánnanu laasibe nga zanda gacanebe laanu yaʼ.
5 Primé la? purtiʼ Jiobá peʼ nga gulí laabe para gácabe Xaíque stinu. Jiobá si nga zanda guni ni, purtiʼ laa bizáʼ laanu. Guiropa nga purtiʼ Jesús napa stale guenda sicarú ni rucaa laanu chinándanu laa (biindaʼ Isaías 11:2, 3). Ejemplu si stibe nga zanda chinándanu (1 Ped. 2:21). Ne guionna la? purtiʼ rizaalaʼdxiʼ Jesús ca xpinni ne bisihuínnibe ni dxi gútibe pur laacaʼ (biindaʼ Juan 10:14, 15). Laabe nácabe ti pastor ni rizaalaʼdxiʼ ca dendxuʼ stiʼ, racanebe laanu guibáninu nayecheʼ ne zacanebe laanu gápanu guendanabani ni qué zaluxe (Juan 10:10, 11; Apo. 7:16, 17). Ca razón ni maʼ bizéʼtenu ca ne xcaadxi casi laacani nga bicaa laanu chinándanu laabe. Yanna, xi caquiiñeʼ guni binni para gaca xpinni Cristu yaʼ.
6. Xi caquiiñeʼ gúninu para gusihuínninu nácanu xpinni Cristu.
6 Para gácanu xpinni Cristu la? caquiiñeʼ gusihuínninu ni lu xquendanabáninu. Ndaaniʼ Guidxilayú riʼ, nuu biaʼ chupa mil millón de binni ni riníʼ naca xpinni Cristu, peru cani rúnicabe rusihuinni cadi dxandíʼ ni (biindaʼ Mateo 7:21-23). Ora tuuxa gacalaʼdxiʼ guicaa invitación de chinanda Cristu, rusiénenu laacaʼ caquiiñeʼ gúnicaʼ stipa pur gúnicaʼ guiráʼ ni bisiidibe lu xquendanabánicaʼ ne chinándacaʼ ejemplu stibe. Yanna guidúʼyanu chupa chonna cosa ni jma bisihuinni Jesús dxi bibani ne ximodo zanda chinándanu ejemplu stibe.
Gácanu binni nuu xpiaaniʼ cásica Jesús
7, 8. 1) Xiñee guca Jesús ti binni nuu xpiaaniʼ. 2) Ximodo bisihuinni Jesús guizáʼ nuu xpiaaniʼ, ne ximodo zanda chinándanu ejemplu stibe.
7 Neca napa Jesús stale guenda ni zanda gusihuínninu, peru lu tema riʼ zazíʼdinu tapa si de laacani: pabiáʼ nuu xpiaanibe, qué nudxiibabe laca laabe, bicheechebe diidxaʼ ne stale gana, ne nabé gunnaxhiibe binni. Primé la? guininu pabiáʼ nuu xpiaanibe. Guenda ca gucané laabe para gunda biénebe ximodo iquiiñebe guiráʼ ni nánnabe. Apóstol Pablu bicaa: «Lu ná be nuu irá enda biaani ne enda riene» (Col. 2:3). Ximodo beeda gaca Jesús ti binni ni nuu xpiaaniʼ yaʼ. Laca laabe guniʼbe: «Rinié ni bisiidi Bixhoze naa» (Juan 8:28). Jiobá nga bidii laabe guendabiaaniʼ, nga runi qué ridxagayaadinu ora gánnanu jneza bíʼnibe guiráʼ ni gudixhe íquebe gúnibe.
8 Zacá bisihuinni Jesús ni dxi gudixhe ique xi guniné xquendanabani. Jma gucuá íquebe gúnibe ni na Bixhózebe que nuyúbibe cosa risaca para laabe. Ne biquiiñebe tiempu ne stipa stibe jneza para bíʼnibe jma lu xhiiñaʼ Dios. Para ganda chinándanu ejemplu stibe, caquiiñeʼ gúninu stipa pur gúʼyanu ni jneza si, ne cadi guicá íquenu gápanu ca cosa ni zucaa laanu gunítinu tiempu ne gusidxaga laanu (Mat. 6:22). Stale de ca xpinni Cristu huaguixhe chaahuicaʼ modo nabánicaʼ para ganda gucheechecaʼ diidxaʼ jma ne nuu de laacaʼ dede huayácacaʼ precursor. Pa lii nga tobi de ca xpinni Cristu ni cayuni zacá la? galanpeʼ nga ni cayúniluʼ. Gástiruʼ sti cosa ni jma rusiecheʼ binni que guyubi primeru Reinu stiʼ Dios lu xquendanabani (Mat. 6:33).
Gácanu casi Jesús ra qué gudxíʼbanu laca laanu
9, 10. Ximodo bisihuinni Jesús qué nudxiibaʼ laca laa.
9 Yanna guidúʼyanu guiropa guenda bisihuinni Jesús lu xquendanabani: qué nudxiibaʼ laca laa. Cumu nácanu binni ruchee la? qué raca nagana para laanu gudxíʼbanu laca laanu ora guicaanu xiixa dxiiñaʼ risaca. ¡Peru Jesús qué ñuni zacá! Nécapeʼ risaca dxiiñaʼ bíʼnibe para guca ni gudixhe ique Jiobá, qué ñuu dxi nudxiibabe laca laabe. Biblia cayabi laanu chinándanu ejemplu stibe. Apóstol Pablu bicaa: «Laguietenalaʼdxi pabiáʼ nadóʼ uca Cristu Jesús dxi uzá ndaani guidxilayú, ne lachinanda ejemplu stiʼ. Neca [casi] Dios laabe peru qué ña be tu naca be, sínuque bisaana [de gácabe casi] Dios que para beda gaca be casi ti mozo ra gule be ndaani guidxilayú» (Fili. 2:5-7). Xi rusiidiʼ ca diidxaʼ riʼ laanu de Jesús.
10 Ti ndaayaʼ naroʼbaʼ nga gupa Jesús, purtiʼ guyuu ra nuu Bixhoze ni nuu guibáʼ. Peru de laabe biale gusaanabe guiráʼ ni gúpabe guibáʼ. Dios guluu xquendanabani Jesús ndaaniʼ ti binnidxaapaʼ gaʼ beeu para biniisi ne zaqué gúlebe casi ti baʼduhuiiniʼ. Bibánibe ra lidxi ti carpinteru pobre, biziidibe sabe ne raqué biniisibe dede gúcabe ti hombrehuiiniʼ. Neca gúcabe ti binni ni qué ruchee bizuubabe stiidxaʼ bixhózebe ne jñaabe dxi nahuiinibe neca binni ruchee laacaʼ (Luc. 2:51, 52). ¡Nabé ridxagayaanu ora gánnanu qué nudxiibaʼ Jesús laca laa!
11. Ximodo zanda gácanu casi Jesús ra qué gudxíʼbanu laca laanu.
11 Ora de guidubi ladxidoʼno gúninu xiixa dxiiñaʼ ni ruluíʼ huaxiéʼ risaca la? cusihuínninu zinándanu ejemplu stiʼ Jesús. Casi ora gucheechenu diidxaʼ la? nuu tu laa ruuyaʼ ni casi ti cosa ni qué risaca, jmaruʼ si ora qué riná binni gucaadiaga laanu, sanándacaʼ laanu ne ora gácacaʼ naduxhuʼ ne laanu. Peru ora gucheechenu diidxaʼ racanenu guilá binni. Nga runi, cadi gusaana de gacanenu ca xpesínunu para chinándacaʼ Cristu (biindaʼ 2 Timoteo 4:1-5). Sti ejemplu nápanu nga ora gacanenu guiá ndaaniʼ Yoo stiʼ Reinu, casi gutópanu guixi, gundúʼbanu ne quíʼbinu bañu. Nánnanu ndaaniʼ Yoo stiʼ Reinu ca nga runi adorarnu Jiobá, nga runi ora gusianu ni cayuni adorarnu laabe. Ora gúninu ca dxiiñaʼ ca de guidubi ladxidoʼno rusihuínninu qué rudxíʼbanu laca laanu ne laaca rusihuínninu zinándanu Cristu.
Gucheechenu diidxaʼ ne stale gana cásica biʼniʼ Jesús
12, 13. 1) Ximodo bisihuinni Jesús bicheeche diidxaʼ ne stale gana, ne xi bicaa laabe gúnibe ni. 2) Xi rucaa laanu gucheechenu diidxaʼ ne stale gana.
12 Sti cosa ni nabé risaca biʼniʼ Jesús nga bicheeche diidxaʼ ne stale gana. Laabe bíʼnibe stale cosa dxi guyuube lu Guidxilayú riʼ. Dxi nahuiinibe zándaca bíʼninebe bixhózebe José dxiiñaʼ de carpinteru. Ne biaʼ dxi bicheechebe diidxaʼ bíʼnibe stale milagru: bisiándabe binni ne bisibánibe gueʼtuʼ. Peru dxiiñaʼ ni jma risaca bíʼnibe nga bisiidibe binni ca diidxaʼ nacubi ne galán stiʼ Reinu (Mat. 4:23). Laanu laaca naquiiñeʼ gúninu dxiiñaʼ ni bíʼnibe ca, purtiʼ xpínnibe laanu. Xi zacané laanu gúninu dxiiñaʼ ca ne stale gana casi bíʼnibe ni yaʼ. Primé la? caquiiñeʼ gánnanu xi bicaa Jesús gucheeche diidxaʼ.
13 Cumu nadxiibe Dios la? ngue runi bicheechebe diidxaʼ ne bisiidibe binni. Laaca bíʼnibe dxiiñaʼ ca purtiʼ risaca ni para laabe. Para Jesús beeda gácani ti cosa ni jma risaca ne guyuuláʼdxibe gusiidibe ni binni. Laanu laaca riuuláʼdxinu gusíʼdinu casi bisiidibe, purtiʼ laaca maestru laanu. Guiníʼ íquenu de ca cosa nabé risaca ni maʼ bizíʼdinu lu Biblia. Maʼ nánnanu napa Dios derechu de guni mandar guibáʼ ne lu guidubi naca Guidxilayú ne ximodo zahuinni nápabe derechu ca. Laaca nánnanu ximodo nuu ca gueʼtuʼ ca, ne xi ndaayaʼ zacaanu ora guibáninu ndaaniʼ guidxilayú cubi ni chigudii Dios laanu. Nabé risaca ca cosa riʼ, neca deruʼ o maʼ xadxí de bizíʼdinu cani. Dxandipeʼ nga risaca guiráʼ cani maʼ bizíʼdinu ca ne gastiʼ zanda guchaaganu cani (biindaʼ Mateo 23:34). Pa gucheechenu diidxaʼ ne stale gana la? zudii binni cuenta pabiáʼ rusisácanu cani maʼ bisiidiʼ Dios laanu.
14. Ximodo zanda gúninu casi biʼniʼ Jesús ora gusíʼdinu binni.
14 Yanna guidúʼyanu ximodo bisiidiʼ Jesús. Cada gusiidibe guniʼbe cani cá lu Stiidxaʼ Dios. Ora ruzeetebe xiixa ni nabé risaca riniʼbe: «Cá ni lu Xquiʼchi Dios» (Mat. 4:4; 21:13). Jesús guníʼ cásipeʼ modo cá lu Stiidxaʼ Dios, ne stale biaje bizeetebe ni cá lu ca libru ni gucuá lu diidxaʼ hebreu. Laanu laaca rúninu casi bíʼnibe, riquiiñenu ni zeeda lu Biblia para gusíʼdinu binni ne laaca riquiiñenu ni ora maʼ zigucheechenu diidxaʼ. Pa gúninu zacá la? zudii binni cuenta cusíʼdinu laacaʼ modo riníʼ ique Dios ne cadi modo riníʼ íquenu. Nabé riéchenu ora gudii binni lugar gúʼndanenu laa de lu Biblia ne gusiénenu laa ximodo racaneni laanu. Ne pa gácabe xpinni Jesús la? jmaruʼ si riéchenu.
Cani zinanda Jesús nadxiicaʼ binni
15. Gunáʼ nga tobi de ca guenda ni jma bisihuinni Jesús, ne xi runi sentirnu ora guiníʼ íquenu de laani.
15 Últimu guenda ni zazíʼdinu de Jesús nga modo gunnaxhiibe binni. Apóstol Pablu bicaa: «Intiica guni du, runi du ni purti nadxii [...] Cristu [laadu]» (2 Cor 5:14). Ora guiníʼ íquenu pabiáʼ nadxii Jesús binni guidxilayú, ne cada tobi de laanu la? rucaani laanu chinándanu ejemplu stibe de guidubi ladxidoʼno.
16, 17. Ximodo bisihuinni Jesús nadxii binni.
16 Ximodo bisihuinni Jesús nadxii binni yaʼ. Ra jma bisihuínnibe ni nga dxi bidiibe xquendanabánibe pur binni guidxilayú (Juan 15:13). Peru laaca nuu xcaadxi modo bisihuínnibe ni dxi bicheechebe diidxaʼ. Biabe binni ni cayuubaʼ ladxidóʼ. Casi dxi bíʼyabe cayuunaʼ María ne xcaadxi binni dxi guti Lázaro, laaca gucaná ladxidoʼbe. Neca nánnabe zandísabe Lázaro, guyuube triste dede biinabe (Juan 11:32-35).
17 Dxi nacubi bizulú Jesús cucheeche diidxaʼ, bidxiña ti hombre napa lepra ra nuube ne gudxi laabe: «Pa na lu la? zanda usianda lu naa». Xi bicabi Jesús hombre que yaʼ. Biblia na «biá be laa», ne óraque bíʼnibe ti cosa ni nabé bidxagayaa binni: «Udixhe ná be luguiáʼ ne rabi be laa: Zusianda lii. Ne zia ladi luʼ. Ne casi biluxe uníʼ be, oraqueca binitilú ca guiʼdxu que ladi ne bianda». Jesús nanna xi cá lu Ley gucuaa Moisés que. Ley que na qué zanda diʼ chuʼ binni ni napa lepra lade binni ni nazaaca. Ne ñanda nusiándabe hombre que sin nigáʼnabe laa. Peru cadi bisiándasibe laa, sínuque gudáʼnabe laa ne zándaca maʼ stale iza guirutiʼ tu huagaʼnaʼ laa. ¡Pabiáʼ galán modo biá Jesús hombre que! (Mar. 1:40-42.)
18. Xi zanda gúninu para guiénenu xi runi sentir ca bíʼchinu ne ca bizáʼnanu.
18 Laanu, ca xpinni Cristu, naquiiñeʼ gannaxhiinu ca bíʼchinu ne ca bizáʼnanu, ne zanda gusihuínninu ni ora gúninu stipa pur guiénenu laacabe pur ni cadíʼdicabe (1 Ped. 3:8). Zándaca gaca nagana para laanu guiénenu xi runi sentir ti xpinni Cristu ni napa guendahuará ni láʼ depresión o xiixa guendahuará ni qué rianda, jmaruʼ si pa qué huayuu dxi gápanu clase guendahuará ca. Neca qué ñuu dxi ñaca huará Jesús, gunda biénebe ca binni huará. Ximodo zanda gúninu casi biʼniʼ Jesús ca yaʼ. Ora cueenu tiempu para gucaadiáganu ti bíʼchinu o bizáʼnanu ni gabi laanu xi guendanagana cadiʼdiʼ. Zanda guinabadiidxanu laca laanu: «Ximodo ñuneʼ sentir pa nizaaca ni cazaacabe ca yaʼ». Pa gúninu stipa pur guiénenu xi runi sentir xcaadxi binni, qué zaca nagana para laanu gacanenu cani cayuubaʼ ladxidóʼ (1 Tes. 5:14). Pa gúninu zacá, zusihuínninu cayúninu casi biʼniʼ Jesús.
19. Xi rucaa ejemplu stiʼ Jesús laanu gúninu.
19 ¡Pabiáʼ galán nga gúʼndanu ca diidxaʼ stiʼ Jesús ne cani bíʼnibe! Ra jma gánnanu de laabe, jma racaláʼdxinu gácanu casi laabe ne gacanenu xcaadxi binni guni zacaca. Nga runi, galán quixhe íquenu chinándanu Jesucristu, Rey stinu, biaʼ dxi nabáninu.
Zanda gusiéneluʼ ni la?
• Ximodo zanda gácanu binni nuu xpiaaniʼ cásica Jesús.
• Ximodo zanda gusihuínninu qué rudxíʼbanu laca laanu.
• Xi zanda gacané laanu gucheechenu diidxaʼ ne stale gana.
• Ximodo zanda gannaxhiinu binni cásica biʼniʼ Jesús.
[Cuadro ne dibuju/foto ni zeeda lu yaza 5]
Ti Libru Ni Racane Laanu Chinandanu Ejemplu Stiʼ cristu
Lu guendaridagulisaa roʼ ni gúpanu lu iza 2007, biree ti libru ni napa 192 yaza ni láʼ “Ven, sé mi seguidor” lu diidxastiá. Libru riʼ guca ni para gacaneni ca xpinni Cristu gunibiáʼ chaahuicaʼ ximodo nga Jesús ne gánnacaʼ xi guiráʼ bíʼnibe. Lu primé ndaa ni zeeda despué de primé ne guiropa capítulo stiʼ libru ca cuzeeteni de ca guenda sicarú stiʼ Cristu, casi pabiáʼ nuu xpiaanibe, gúcabe nadxibalú, qué nudxiibabe laca laabe, bizuubabe diidxaʼ ne pabiáʼ biʼniʼ huantarbe.
Guiropa ne guionna ndaa stiʼ libru ca cuzeetecani ximodo bisiidibe ne bicheechebe diidxaʼ ne ximodo bisihuínnibe pabiáʼ nadxiibe binni. Lu guidubi naca libru ca zeeda ximodo zanda chinándanu ejemplu stiʼ Jesús.
Nanna dxíchinu zacané libru ca laanu gánnanu ximodo nuunu ne guiníʼ íquenu pa dxandíʼ zinándanu Jesús ne xi caquiiñeʼ gúninu para chinándanu ejemplu stibe. Laaca zacaneni cani «maʼ nuu listu para icaa guendanabani ni qué zaluxe» chinándacaʼ Cristu (Hech. 13:48).
[Dibuju/foto ni zeeda lu yaza 4]
Xi guenda bisihuinni Jesús dxi guná beeda lu Guidxilayú riʼ ne beeda gale casi ti baʼduhuiiniʼ
[Dibuju/foto ni zeeda lu yaza 6]
Xi rucaa laanu gucheechenu diidxaʼ ne stale gana