Ejemplu stiʼ cani gupa fe

«Rarí nuaa para gune ni na Dios»

GUIZÁʼ bidxagayaa María ora gundisalú ne biiyaʼ guyuu ti hombre ralidxi. Hombre riʼ cadi ziyubi diʼ bixhózebe o jñaabe, sínuque ra nuube nga zeʼ. Nánnabe cadi de Nazaret diʼ hombre riʼ. Purtiʼ ndaaniʼ ti guidxihuiiniʼ casi Nazaret la? nagueendaca ñunibiáʼ binni tuuxa ni cadi de raqué laa, ne hombre zuhuaa nezalube que ratiica ñé ñunibiáʼ binni laa. Yanna, hombre riʼ bigapadiuxi laabe ne na: «Ma ulí Dios lii, María. Dichosa lii lade irá xixé gunaa» (Lucas 1:28).

Zacá nga ruzulú Biblia ruzeeteʼ de María, xiiñiʼ Helí, de guidxi Nazaret ni nuu Galilea. Nabé risaca nga ni chitixhe ique María guni. Laabe maʼ bidii stiidxabe ti carpinteru, láʼ José, para guichaganabe laa, nécapeʼ cadi ricu diʼ hombre riʼ, peru runi ni na Dios. Nga runi, ruluíʼ maʼ nanna María ximodo chiguibani: qué západibe stale cosa risaca, zuninebe xheelabe dxiiñaʼ, ne guirópacabe zusiniisicabe ca xiiñicabe. Peru, málasi yeganna hombre que laabe para gabi laabe gúnibe ti dxiiñaʼ stiʼ Dios, ti dxiiñaʼ ni zuchaa xquendanabánibe stálepeʼ.

Zándaca zadxagayaaluʼ ora gánnaluʼ qué riníʼ diʼ Biblia stale cosa de María. Huaxiéʼ si rieeteʼ de ca binnilídxibe, ne de modo laabe, ne qué liica riníʼ diʼ ni pa gúcabe ti gunaa sicarú. Peru, neca huaxiéʼ ruzeeteʼ Stiidxaʼ Dios de María la? zanda guizíʼdinu stale de laabe.

Para gánnanu ximodo nga María la? primé naquiiñeʼ cueenu de ndaaniʼ íquenu guiráʼ ni rusiidiʼ stale religión de laabe. Gusiáʼndanu modo rutieecabe laabe lu ca cuadru ca, ne guirá bidóʼ de guié ne de yesu ni ruzáʼcabe de laabe. Zaqueca naquiiñeʼ cueenu de ndaaniʼ íquenu guiráʼ ni rusiidiʼ ca xaíque yuʼduʼ de laabe, ne guiráʼ lá ni rudiicabe laabe casi, «Jñaa Dios» ne «Gunaa ni runi mandar Guibáʼ», laandabe qué nudxiibabe laca laabe. Jma galán gudiʼnu lugar Biblia gabi laanu ximódopeʼ nga María, purtiʼ lu ca yaza stini zadxélanu stale cosa risaca ni bíʼnibe ra bisihuínnibe fe stibe ne laaca cusiéneni ximodo zanda gúninu casi bíʼnibe.

Ti ángel yeganna María

Zándaca maʼ nannuʼ cadi tutiisi hombre diʼ nga yeganna María, sínuque ángel Gabriel. Ora gudxi ángel riʼ laabe: «Ma ulí Dios lii, María», laabe «nabé bidxagayaa[be]» ne guníʼ íquebe xiñee gudxi hombre que laabe zaqué (Lucas 1:29). Tuu nga gulí laabe yaʼ. Cadi ti binni diʼ de guidxilayú, sínuque Dios peʼ. Ne nga huaxa guizáʼ risaca ni para laabe. Cadi purtiʼ gúpabe ndaayaʼ stiʼ Dios niníʼ íquebe maʼ qué zúnibe stipa pur gúnirube ni na. Yanna laanu, pa gúninu stipa pur gápanu ndaayaʼ stiʼ Dios ne cadi gudxíʼbanu laanu ora guxuíʼlunu maʼ nápanu ni la? zazíʼdinu ti cosa nabé risaca ni gunna dxichi María dxiqué. Xi laani yaʼ. Rudxii deche Dios cani rudxiibaʼ laca laa, peru nadxiibe ne racanebe cani qué rudxiibaʼ laa (Santiago 4:6).

Cadi caquiiñeʼ diʼ gudxiibaʼ María laca laa, purtiʼ nabé risaca ngue dxiiñaʼ gudxi ángel que laabe zápabe. Ángel que gudxi laabe zápabe ti baʼduhuiiniʼ, ne laa zeeda gaca ti hombre ni jma risaca lade guiráʼ binni huabani ndaaniʼ guidxilayú. Gudxi Gabriel laabe: «Zucuí Dios laabe de rey ra gurí bixhoze gola be David. Zaca be rey sti irá cani za de Israel, ne qué ziuu dxi guiasa be» (Lucas 1:32, 33). María gunna dxiichiʼ guníʼ Dios maʼ raca jma de ti mil iza, qué ziaanadxí de guni mandar cani zá de David (2 Samuel 7:12, 13). ¡Xiiñibe nga Mesías ni cabeza xquidxi Dios maʼ raca gayuaa iza!

Ángel que gúdxiruʼ laabe zaree lá xiiñibe que «Xiiñi Dios ni nuu ibáʼ». Ximodo zanda gapa ti gunaa de guidxilayú ti Xiiñiʼ Dios yaʼ. Ne ximodo gueeda gaca ndiʼ yaʼ. Laabe maʼ bidii stiidxabe José para guichaganabe laa, peru caʼruʼ diʼ guichaganácabe, ngue runi, gunabadiidxabe: «Ximodo zanda gaca ndi yaʼ, purti binni dxaapa naa» (Lucas 1:34). Racá ridúʼyanu qué nituí diʼ lú María niníʼ naca binnidxaapaʼ. Para laabe nabé risaca ngue nácabe binnidxaapaʼ. Ca dxi stinu riʼ, stale hombrehuiiniʼ ne dxaapahuiiniʼ racaláʼdxicaʼ maʼ ñuba ñatanecaʼ tuuxa, ne cani qué runi zacá la? runi búrlacabe laacaʼ. Dxandíʼ nga maʼ bichaa modo riníʼ ique binni, peru Jiobá qué huachaa diʼ (Malaquías 3:6). Cásica dxi bibani María, Dios nadxii ca binni ni runi ni na ca ley stibe (Hebreos 13:4).

Nécapeʼ ruzuubaʼ María stiidxaʼ Dios la? nácabe ti gunaa ni gulené donda. Nga runi, ximodo zanda gápabe ti xiiñiʼ Dios, tobi ni qué gapa donda. Sicaríʼ bisiene Gabriel ni laabe: «Zeeda Espíritu Santu luguiá luʼ ne zutaagu enda nandxóʼ sti Dios lii. Nga runi zaree chu badu huiini ca para Dios, ne zabi cabe laa Xiiñi Dios» (Lucas 1:35). Diidxaʼ «zaree chu» ca riníʼ ni ziuube nayá nezalú Dios, ne qué západibe donda. Ca binni guidxilayú cumu gulenecaʼ donda la? ca xiiñicaʼ laaca ralené donda. Peru, para gale xiiñiʼ María la? Jiobá chiguni ti milagru ni qué huayuu dxi guihuinni. Dede guibáʼ chinduube xquendanabani xiiñibe ndaaniʼ María ne zaquiiñebe espíritu santu stibe, ne «zutaagu enda nandxóʼ sti Dios» María, ti zacá gapaʼ Dios baʼduhuiiniʼ ca para cadi galené nin ti donda. Biʼniʼ cré María ni gudxi ángel que laa la? Xi bicábibe laa yaʼ.

Ni bicabi María

Ca binni ni qué runi cré ca milagru ca ne dede caadxi de cani ruundaʼ de religión, raca nagana para laaca guni crecaʼ gaca xiiñiʼ ti binnidxaapaʼ. Nécapeʼ maʼ biindacabe stale, qué randa diʼ riénecabe ni guníʼ Gabriel, ora na: «Purti para Dios gasti ni nagana» (Lucas 1:37). María nanna dxandíʼ nga ni gudxi Gabriel laa, purtiʼ gúpabe stale fe. Ne bisihuínnibe dxandíʼ fe stibe. Cásica guiráʼ binni caquiiñeʼ guluíʼcabe laa xiixa para guiene chaahuiʼ ni cayábicabe laa la? zacaca nga caquiiñeʼ gabi ángel que María xiixa para iguidxi fe stiʼ. Ne Gabriel maʼ nuu listu para guicabi laabe. Ángel que gudxi laabe nacaxiiñiʼ Elisabet, tobi de ca xfamíliabe, pur ti milagru, jma ndaʼ huaniisi para laabe, ne ruluíʼ qué zanda gapa xiiñiʼ.

Xi biʼniʼ María óraque yaʼ. Nápabe ti dxiiñaʼ risaca ni naquiiñeʼ gúnibe, ne nápabe stale razón para guni crebe zuni Dios guiráʼ ni gudxi Gabriel laabe. Cadi naquiiñeʼ guiníʼ íquenu qué ñapa María guendanagana pur ndaayaʼ bidii Dios laa. Primé la? guníʼ íquebe maʼ bidii stiidxabe José para guichaganabe laa. Yanna, zaná José guichaganáʼ laabe ora ganna maʼ nacaxiiñibe la? Ne stobi, zándaca bidxíbibe pur dxiiñaʼ gucuaabe riʼ. Ndaanibe nga chichuu Xiiñiʼ Dios, ni jma risaca ne nadxii, baʼduʼ primé stiʼ. De racá la? naquiiñeʼ gápabe baʼduhuiiniʼ riʼ para cadi guizaaca xiixa ndaaniʼ guidxilayú malu riʼ. Nga runi, ti dxiiñaʼ naroʼbaʼ nga ni gucuaabe.

Biblia rusihuinni ximodo dede ca hombre ni nabé bizuubaʼ stiidxaʼ Dios qué ninágacaʼ ñúnicaʼ xiixa dxiiñaʼ nagana ni bidiibe laacaʼ. Casi Moisés na qué zanda guni dxiiñaʼ bidii Dios laa purtiʼ qué riníʼ jneza (Éxodo 4:10). Jeremías guníʼ nahuiiniruʼ para guni dxiiñaʼ ni bidii Dios laa (Jeremías 1:6). ¡Ne Jonás dede bixooñeʼ para cadi ñé ra gudxi Dios laa! (Jonás 1:3.) Yanna, xi bicabi María yaʼ.

Ma gudiʼdiʼ gayuaa iza, ne dede yanna nabé rietenalaʼdxiʼ binni ca diidxaʼ guníʼ María, purtiʼ cani guniʼbe que rusihuínnicani ruzuubabe diidxaʼ ne qué rudxiibabe laabe. Laabe gúdxibe Gabriel: «Rarí nuaa para gune ni na Dios. Zaa gaca casi nouʼ ca» (Lucas 1:38). Ca baʼdudxaapaʼ ni guyuu de criada dxiqué, bíʼnicaʼ guiráʼ ni gudxi xpixuaanacaʼ laacaʼ. Zacaca nga biʼniʼ María purtiʼ biiyabe Jiobá casi Xpixuaanabe. María nanna qué rusaana diʼ Jiobá cani ruzuubaʼ stiidxaʼ, ne nanna zaguu ndaayaʼ laabe pa gúnibe biaʼ gándatiʼ para gaca dxiiñaʼ ni bisaanané laabe que jneza. Ngue runi, María nanna zapa Jiobá laa (Salmo 18:25).

Nuu biaje, Dios rinabaʼ laanu xiixa ni ruluíʼ nagana para gúninu o ruluíʼ qué zanda gúninu. Peru, Stiidxabe rudii laanu stale razón para gusaananu cani lu naʼ Jiobá, cásica biʼniʼ María (Proverbios 3: 5, 6). Zúninu modo bíʼnibe la? Pa gúninu casi bíʼnibe zaguu ndaayaʼ Dios laanu ne jmaruʼ si zaguidxi fe stinu.

María yeganna Elisabet

Ni guníʼ Gabriel de Elisabet que nabé bisaca ni stale para María. De lade guiráʼ gunaa ni nuu ndaaniʼ guidxilayú, Elisabet nga jma zanda guiene María. Ngue runi, María gudixhe ique chiganna laabe ndaaniʼ ti guidxi stiʼ Judá, nuu lade dani, zándaca yenebe chonna o tapa gubidxa para yendabe. Ora biuube ndaaniʼ lidxi Elisabet ne Zacarías ni ruzaaquiʼ guʼxhuʼ que la? Jiobá biʼniʼ xiixa ni biquidxi fe stibe. Ora binadiaga Elisabet bigapadiúxibe laa la? biniibi dxacha baʼduhuiiniʼ nuu ndaanibe que purtiʼ guizáʼ biecheʼ, ne biaba espíritu santu luguiáʼ Elisabet, para gúdxibe María «Jñaa Señor stinne». Dios maca gudxi laabe, xiiñiʼ María nga gaca Señor stibe, ni gulibe. Ne Dios bicaa laabe gusisácabe María pur bizuubaʼ diidxaʼ. Guniʼbe: «Dichosa lii ti bini cre luʼ» (Lucas 1:39-45). Ya, guiráʼ ni gudxi Jiobá María que gúcani.

Ca diidxaʼ ni guníʼ María que biaana cani dede nagasi ne cá cani lu Lucas 1: 46-55. Ne lu ca versículo riʼ, jma stale ni guníʼ María, ne laani rusiidini laanu stale de laabe. Casi, ra bisisácabe Jiobá pur ndaayaʼ bidii laabe de gácabe jñaa Mesías la? bihuinni gúcabe ti baʼdudxaapaʼ ni nabé bidii xquíxepeʼ Dios. Zaqueca bisihuinni ca diidxaʼ guniʼbe pabiáʼ naroʼbaʼ fe stibe, casi ra guniʼbe runi Jiobá biaritiʼ cani rudxiibaʼ laca laa, peru racanebe ca pobre ni cuyubi guni ni nabe ne cani qué rudxiibaʼ laa. Ca stiidxabe laaca rusihuinni cani pabiáʼ nánnabe de lu Stiidxaʼ Dios, purtiʼ bizeetebe biaʼ gande textu ni zeeda lu Stiidxa Dios ni gucuá hebreu.

Dxandíʼ nga maʼ biaa María guiníʼ ique de lu Stiidxa Dios. Peru, lugar de niniʼbe ni na si íquebe la? bisihuínnibe qué rudxiibabe laca laabe ra guniʼbe ni na Stiidxaʼ Dios. Cásica guníʼ ique María, zaqueca zaníʼ ique baʼduhuiiniʼ caniisi ndaanibe ca despué, ne zaníʼ: «Cadi naa diaʼ gudixhe ni rusiideʼ, sínuque rusiide ni gudixhe ni biseenda naa» (Juan 7:16). Nga runi, galán guinabadiidxanu: «Rusisacaʼ ne runeʼ respetar Stiidxaʼ Dios la? O, rusiideʼ ni na si iqueʼ». Modo bicabi María ca, rusihuínnini xi naquiiñeʼ gúninu.

María biaanané Elisabet chonna beeu, ne nanna dxíchinu pabiáʼ guluu saacabe gana laacabe (Lucas 1:56). Ndiʼ rusietenalaʼdxiʼ laanu pabiáʼ risaca gánnanu tu clase binni guidxaaganu. Pa guyúbinu binni ni dxandíʼ nadxii Jiobá Dios para gaca xhamígunu la? zaniisinu lu stiidxaʼ Dios ne ziuʼnu jma gaxha de laabe (Proverbios 13:20). De raqué maʼ bedandá dxi guibiguetaʼ María ralidxi. Xi guiníʼ José ora ganna nacaxiiñibe yaʼ.

María ne José

María qué nibeza diʼ nihuinni ndaaniʼ para niniʼné José. Ante gábibe ni laa, zándaca guníʼ íquebe xi guiníʼ José, hombre ridxibi Dios riʼ, ora ganna ni. Neca zaqué la? María gudxi laabe guiráʼ ni bizaaca. José nabé biuu xizaa. Racaláʼdxibe guni crebe María, purtiʼ nadxiibe laa, peru qué huayuu dxi guizaaca xiixa zaqué. Biblia qué ruzeeteʼ diʼ xi gudiʼdiʼ ndaaniʼ ique José ora gunna ni gudxi María laa, peru ni cayabi Biblia laanu nga gudixhe íquebe gaca divorciarbe de laa, purtiʼ dxiqué ca binni ni maʼ bidii stiidxaʼ para guichaganáʼ biiyacabe laacaʼ casi ora maʼ bichaganacaʼ. Peru, José qué niná diʼ nusituí lube nezalú binni o nusabanácabe laabe, ngue runi, na gusaana laabe nagaʼchiʼ (Mateo 1:18, 19). María qué ñuu diʼ triste purtiʼ qué ñuni cré José laa, sínuque biuubaʼ ladxidoʼbe biiyabe modo gucaná hombre chaʼhuiʼ riʼ pur ni bizaaca que.

Jiobá qué nudii diʼ lugar ñuni José ni guníʼ ique. Ángel stiʼ Dios gudxi laabe lu ti bacaandaʼ, dxandíʼ nga nacaxiiñiʼ María pur ti milagru. Ne ni guníʼ ángel riʼ gutadxí ladxidoʼbe, ngue runi, yenándabe modo maca gudixhe Jiobá guni, cásica maca cayuni María. Bichaganabe María ne guyuube listu para gannaxhiibe Xiiñiʼ Jiobá, dxiiñaʼ naroʼbaʼ ni gucuaabe (Mateo 1: 20-24).

Cásica cani maʼ bichaganáʼ zaqueca cani maʼ caníʼ ique guichaganáʼ zanda guiziidicaʼ stale de guendaxheelaʼ ni bibani maʼ raca chupa mil iza riʼ. Ora biiyaʼ José cusiniisi María xiiñiʼ jneza la? biéchebe purtiʼ bíʼnibe ni gudxi ángel stiʼ Jiobá laabe. Zaqueca biiyabe pabiáʼ riquiiñeʼ guni crebe zacané Dios laabe ora cuaquiʼ íquebe gúnibe xiixa ni nabé risaca (Salmo 37:5; Proverbios 18:13). Ne nanna dxíchinu guiráʼ ni bíʼnibe casi xaíque stiʼ binnilídxibe bisihuínnibe riénebe xfamíliabe ne gúcabe nadóʼ.

Yanna, xi rizíʼdinu ora guná María guichaganáʼ José yaʼ. Nécapeʼ primé que guca nagana para José guni cré ni gudxi María laa, María qué niree diʼ gana, sínuque biʼniʼ crebe ziuu ti dxi gueeda gaca José xaíque stiʼ ca binnilídxibe. Bidiibe cuenta risaca nga cuézabe, ne nga naca ti ejemplu galán para guiráʼ gunaa ni zinanda Cristu yanna. Guiráʼ ni bizaaca que la? bisiidiʼ ni María ne José risaca nga güicaʼ diidxaʼ de guidubi ladxidoʼcaʼ sin gucaachicaʼ xiixa.

Dxandíʼ, José ne María jneza modo bizulucaʼ xquendaxheelacaʼ. Guirópacabe gunnaxhiicabe Jiobá jma que stiʼ cosa, ne guyuuláʼdxicabe gusiéchecabe laabe, nga runi, jneza modo bisiniisicabe xiiñicabe ne gunnaxhiicabe laacaʼ. Ya, gúpacabe stale ndaayaʼ, peru zaqueca stale guendanagana. Dxiiñaʼ gúpacabe nga gusiniisicabe Jesús, ni beeda gaca hombre jma risaca ni huayuu ndaaniʼ guidxilayú riʼ.

[Dibuju/foto ni zeeda lu yaza 17]

Ora nadxii binni Dios la? guizáʼ sicarú riuu xquendaxheelaʼ