Xii nga ni jma risaca

TI DXI, guyé ti hombre ra nuu Jesús purtiʼ gúnnabe nabé nanna Jesús stálepeʼ, ne gúdxibe laa: Maestru, gudxi bicheʼ gudii naa ti ndaa de ni bisaanané bixhozeʼ laadu. Hombre que na laaca zanda guicaa ti ndaa de laani.

Pa ñácaluʼ Maestru Ni Jma Nanna Gusiidiʼ que, xi ñábiluʼ laabe yaʼ.... Jesús biene xi cayaca hombre que: cadi purtiʼ caquiiñebe herencia stiʼ bíʼchibe que, sínuque qué gánnadibe gunáʼ nga ni jma risaca lu xquendanabani binni.

Guiníʼ íquenu: xii nga ni jma risaca para laanu yaʼ. Gápanu stale juguete ni riuláʼdxinu o lari cubi ne stuudxi cosa la?... Coʼ. Jesús nuu gusiidiʼ xiixa ni jma risaca. Ngue runi guniʼbe ni guca ti hombre ni biaandaʼ laa pa nuu Dios. Ñee riulaʼdxuʼ gunadiágaluʼ ni la?...

Caníʼ ni de ti hombre guizáʼ gupa bidxichi ne gupa stale layú ne stale troja. Bidii layú stibe stálepeʼ ne maʼ qué gápabe paraa guchabe cani. Xi guníʼ íquebe gúnibe yaʼ. Nabe: «Zuxhaya ca troja stinneʼ. Zucué cani jma naroʼba para idxá irá niza riʼ ne irá stinneʼ».

Hombre ricu que na jma jneza nga guni zaqué, ne na nuu xpiaaniʼ purtiʼ chinduu chaahuiʼ guiráʼ ni napa. Nabe: «Yanna huaxa ma chi iziiladxeʼ ne ma chi guiecheʼ, purti ma napa stale ni gahua ne ni gueeʼ, ne ma naguaa chaahue ni iquiiñe stale iza». Peru modo guníʼ íquebe que cadi jneza diʼ ni. Nannuʼ xiñee la?... Purtiʼ guníʼ íquebe puru para laasibe ne modo guiéchebe, ne biaandaʼ laabe pa nuu Dios.

Ngue runi, Dios guniʼné laabe ne gudxi laabe: «Binni huati. Yanna gueela ca zati luʼ. Ne tu guiaana né irá ni naguu chaahui lu ca yaʼ». Zanda iquiiñeʼ ricu que guiráʼ ni guluu chaahuiʼ que ora maʼ guti la?... Coʼ, gadxé binni ziaanané cani. Jesús guníʼ: «Zacá nga cani rutopa lú para laca laa, peru qué gapa gasti ni risaca nezalú Dios» (Lucas 12:13-21).

Lii qué riulaʼdxuʼ gacuʼ casi hombre ricu que njaʼ.... Para laabe la? jma bisaca nga gápabe bidxichi. Racá nga ra bicheebe, nabé guyuuláʼdxibe gápabe jma, «peru qué gapa[be] gasti ni risaca nezalú Dios».

Stale binni nácacaʼ casi hombre que, nabé riuláʼdxicaʼ gápacaʼ jma bueltu. Peru zándaca uguu ni laacabe lu stale guendanagana. Casi lii, nápaluʼ juguete njaʼ.... Zanda gábiluʼ naa xi laacani la?... Xi gácaxa pa tobi de ca xhamíguluʼ napa ti pelota, ti muñeca o sti cosa ni qué gápaluʼ yaʼ. Ñee galán nga gábiluʼ bixhózeluʼ cada ratu síʼ tobi casi laani la?...

Nuu tiru, ruluíʼ jma risaca nga gapa binni ti juguete. Peru, xi rácani gapa si dxi yaʼ.... Rixiiñeni. Zándaca guilaani o guióʼxhoni ne óraque maʼ qué chuláʼdxiluʼ ni. Ni dxandíʼ nga la? lii nápaluʼ xiixa ni jma risaca que ca juguete ca. Nannuʼ xi laani la?...

Guendanabani stiluʼ. Guendanabani ca nga ni jma risaca purtiʼ sin laani qué zanda diʼ gúniluʼ gastiʼ. Peru, lii zápaluʼ guendanabani ca pa gúniluʼ ni riulaʼdxiʼ Dios, cadi dxandíʼ la?... Nga runi cadi naquiiñeʼ gácanu casi ricu huati ni biaandaʼ laa pa nuu Dios que.

Cadi cani nahuiiniʼ casi nga rúnicaʼ xiixa sin guiníʼ íquecaʼ casi hombre ricu que. Stale binni huaniisi laaca rúnicaʼ ni. Caadxi de laacaʼ riuláʼdxicaʼ gápacaʼ stale bueltu. Zándaca gápacabe ni gócabe guiráʼ dxi, lari ni cuáquicabe ne ra chúʼcabe. Peru cadi nga si diʼ nácabe: riuláʼdxicabe gápacabe jma lari ne stale yoo naroʼbaʼ. Guiráʼ ndiʼ risaca cani stale bueltu. Pur nga rúnicabe stale dxiiñaʼ para guni ganárcabe ni, ne laga ziyápacabe jma bueltu la? jma racaláʼdxicabe gápacabe.

Nuu stale binni nabé runi dxiiñaʼ ti gapa jma bueltu, peru maʼ qué rápacaʼ tiempu para binnilídxicaʼ ne para Dios. Nouʼ zanda gusibani bueltu ca laacabe la?... Coʼ xa. Ñee zanda iquiiñecabe bueltu stícabe ora maʼ gúticabe la?... Laaca coʼ, purtiʼ ca gueʼtuʼ ca maʼ qué liica zanda gúnicaʼ gastiʼ (Eclesiastés 9:5, 10).

Riníʼ nga malu gapa binni bueltu la?... Coʼ xa, ne bueltu ca zanda sinu guendaró ne lari. Biblia na rulá ni laanu (Eclesiastés 7:12). Peru pa gannaxhiinu bueltu la? zápanu stale guendanagana. Zácanu casi hombre ricu ni guluu chaahuiʼ guiráʼ ni risaca para laa, peru qué ñaca ricu ne Dios.

Xi riníʼ gácanu ricu ne Dios yaʼ.... Gúninu primé ca ni na Dios lu xquendanabáninu. Nuu binni na runi cré nuu Dios ne riníʼ ique nga si nga laani. Peru, nouʼ dxandíʼ ricu laacabe ne Dios la?... Coʼ, nácacabe casi ricu ni biaandaʼ laa pa nuu Dios que.

Jesús qué ñuu dxi nusiaandaʼ Bixhoze ni nuu guibáʼ. Qué nuyúbibe ñápabe bueltu ne qué ñápadibe stale cosa ni risaca. Jesús nanna xii nga ni jma risaca lu xquendanabani binni. Nannuʼ xi laani la?... Gácanu ricu ne Dios.

Ximodo raʼbuʼ zanda gácanu ricu ne Dios yaʼ.... Zácanu ni ora gúninu ni riuláʼdxibe. Jesús guníʼ: «Qué riaana dxie de gune ni riulaʼdxi be» (Juan 8:29). Ne nga nga ni riulaʼdxiʼ Dios. Yanna, gudxi naa, xi zanda gúniluʼ para guiechené Dios lii yaʼ.... Gúʼndaluʼ Biblia, cheluʼ ca ra riziidicabe de Dios, guni orarluʼ ne gacaneluʼ xtuudxi binni guiziidicaʼ de laabe. Nga nga cani jma risaca lu xquendanabáninu.

Jesús gúcabe ricu ne Dios, pur nga runi gupa Jiobá laabe. Ne bisigaʼdeʼ laabe ti guendanabani ni qué zaluxe. Pa gácanu casi Jesús la? Jiobá zannaxhii laanu ne zápabe laanu. Nga runi, gúninu casi biʼniʼ Jesús, ne cadi casi hombre ricu ni biaandaʼ laa pa nuu Dios que.