Maca gucuá ni chiguizaaca Mesías

GUIDXI stiʼ ca judíu ni guyuu dxiqué maca nánnacaʼ ni bicaa Isaías ne xcaadxi ni riguixhená, ngue runi maʼ xadxí ngue cabézacabe gueeda Mesías que. Dede ca judíu ni bibani ca dxi stiʼ Jesús que maʼ nuucaʼ «guiuba ganna ca» padxí gueedabe (Lucas 3:15). Ca diidxaʼ riguixhená zeeda lu Stiidxaʼ Dios que cuzeetecani ximódopeʼ nga zabani Mesías, ne cani gucuá de laabe riʼ nin ti binni guidxilayú qué ñanda diʼ ñanna cani de laasi, o nucaa Jesús ñuni cani. Guidúʼyanu caadxi ejemplu.

Modo gule Mesías. Isaías guníʼ zale Mesías, o Cristu que, de ti binnidxaapaʼ. Nga runi, despué de guníʼ apóstol Mateo de milagru ni guca para gule Jesús la? bicaa sicaríʼ: «Ne cayaca ni sicarí ti iree ni modo uníʼ Dios de ruaa dxa profeta ni uníʼ dxiqué: Laguuyaʼ ni chi gaca riʼ: Ti binni dxaapa zaca xiiñi ne zapa ti badu huiiniʼ» (Mateo 1:22, 23; Isaías 7:14). Isaías laaca bicaa zeeda gale Cristu lade ca xiiñiʼ David, purtiʼ bizeetebe lá Jesé, bixhoze David. Ne dxandipeʼ nga beeda gale Jesús lade ca xiiñiʼ David (Mateo 1:6, 16; Lucas 3:23, 31, 32). Nga runi, ante gapa María baʼduhuiiniʼ que la? ángel Gabriel gudxi laabe xi zaca de Jesús ora guiniisi: «Ne zucuí Dios laabe de rey ra gurí bixhoze gola be David» (Lucas 1:32, 33; Isaías 11:1-5, 10; Romanos 15:12).

Modo bibani Mesías. Ti biaje, ora nuu Jesús ndaaniʼ yuʼduʼ stiʼ Nazaret, biindabe nezalú guiráʼ binni ni nuu raqué ca diidxaʼ ni bicaa Isaías riʼ: «Nuu né Espíritu sti Dios naa, purti ma ulí naa güe nia ca pobre diidxa ni usieche laacaʼ». Despué guniʼbe luguiabe cayaca ca diidxaʼ que, nabe: «Yanadxí pe cayaca ni cá lu Xquiʼchi Dios ni bina diaga tu nagasi ca» (Lucas 4:17-21; Isaías 61:1, 2). Isaías laaca guníʼ zácabe nachaʼhuiʼ ne binni huará ne qué zúnibe xiixa para si guidxagayaa binni laabe. Lu Evangeliu stiʼ Mateo caníʼ zaquepeʼ gúcani, nani: «Yenanda stale binni laabe para bisianda be laacaʼ. Ne biinda be lú caʼ cadi uzeete ca tu laabe. Ne zacá guca ni ti iree ni modo uníʼ profeta Isaías dxi bizeete de laabe, na: [...] Qué zucaa lú be ne qué zucaa be ridxi, ne [...] qué zusaba chaahui be cani ziyaba, cani ruluíʼ ti gueere ni ma caluuza» (Mateo 8:16, 17; 12:10-21; Isaías 42:1-4; 53:4, 5).

Modo gucaná Mesías. Isaías laaca bicaa sti diidxaʼ riguixhená ra caníʼ zudxiideche stale israelita Mesías que, peru cadi nguesi, sínuque laaca zuuyacabe laabe «casi ti guie ni irenda ñee cabe para guiaba cabe» (1 Pedro 2:6-8; Isaías 8:14, 15). Ne zaquepeʼ gúcani. Neca biiyaʼ ca judíu que guiráʼ milagru biʼniʼ Jesús, «peru qué ñuni cre ca laabe. Ne uca ni zacá para iree ni casi pe uníʼ profeta Isaías chiqué ra na: [Jiobá] iruti cayuni cre ni cayuí du» (Juan 12:37, 38; Isaías 53:1). Neca qué ñuni cré ca judíu Mesías que la? gulézacaʼ nibeebe laacaʼ de lu náʼ ca romanu ne nudxiguétabe Reinu ni zeeda de David que ndaaniʼ Guidxilayú. Yanna, cumu gudiʼdiʼ Jesús stale yuubaʼ ne dede guti la? ngue runi stale de laacaʼ qué ñuuyadicaʼ laabe casi Mesías. Maca nda cá lu libru stiʼ Isaías que zuninácabe Mesías ante gaca Rey.

Lu libru stiʼ Isaías cá xi guníʼ Mesías zuni: «Bidiéʼ lugar uguucabe golpe decheʼ [...] Qué nuchiee luaʼ ora caníʼcabe mal de naa ne ora bichá xhínnicabe luaʼ», ne ngapeʼ nga ni guca ora biʼniʼ juzgárcabe Jesús. Mateo guníʼ: «Óraque bichá xhinni cabe lú be ne gudiñe cabe laabe ne udapa cabe ruaa be» (Isaías 50:6; Mateo 26:67). Isaías laaca bicaa: «Bidiibe lugar guninácabe laabe; nin ne ngue qué nicábibe laacaʼ». Ne ora gudxi Pilatu laabe xi guiráʼ cugaaniʼ ca judíu que luguiabe la? «qué nicabi be laa nin ti diidxaʼ. Ne nabé bidxagayaa gobernador que» (Isaías 53:7; Mateo 27:12-14; Hechos 8:28, 32-35).

Modo guti Mesías. Modo guti Jesús ne xcaadxi cosa ni bizaacabe maca gucuácani lu ca diidxaʼ riguixhená stiʼ Isaías. Ni riguixhená que guníʼ: «Zuuticabe laabe casi binni qué iquiiñeʼ, peru zucaachicabe laabe casi binni ricu» (Isaías 53:9). Ximodo zanda gueeda gaca ni na ca diidxaʼ riguixhená riʼ yaʼ. Primé la? gucuá Jesús lu ti yaga cueʼ chupa gubaanaʼ (Mateo 27:38). Peru despué bicaachiʼ José de Arimatea, ti hombre ricu laabe ndaaniʼ ti baʼ ra rigaachiʼ binni napa bidxichi, baʼ riʼ cadi xadxipeʼ de bíʼnicabe ni (Mateo 27:57-60). Ne guendaguti stiʼ Jesús que guca ni na stobi de ca diidxaʼ riguixhená jma risaca ni bicaa Isaías. Isaías guníʼ de Mesías sicaríʼ: «Siervu stinneʼ, ni runi ni jneza, pur laabe stale binni ziuu nayá; ne laca laabe zuaʼbe stóndacaʼ». Ne zaqué gúcani, ora guti Jesús que gudíxebe donda stiʼ ca siervu chaʼhuiʼ stiʼ Dios (Isaías 53:8, 11; Romanos 4:25).

Xcaadxi diidxaʼ riguixhená ni guca ne ni chigaca

Para gusihuinni Jesús ne ca apóstol stiʼ tuu nga Mesías que la? jma nga biquiiñecabe libru stiʼ Isaías que xcaadxi libru. Peru cadi libru si stiʼ Isaías nga caníʼ de ca diidxaʼ riguixhená ni chigácaruʼ. Lu Stiidxaʼ Dios ni gucuá lu diidxaʼ hebreu laaca nuu jma diidxaʼ riguixhená ni caníʼ de Jesús, de Reinu stibe ne guiráʼ cosa sicarú ni chigúnibe ora maʼ guni mandarbe lu gobiernu ca (Hechos 28:23; Apocalipsis 19:10).a Ximodo nánnanu zácacani yaʼ. Jesús peʼ nga guníʼ nezalú ca judíu ni cucaadiaga laabe que sicaríʼ: «Cadi zácaxa tu zeda uchiaya ley ni bidii Dios Moisés, ne ni bicaa ca profeta lu Xquiʼchi Dios, purti cadi nga zeda guneʼ sínuque zeda gune cumplir irá xixé ni bicaa cabe que. Peru gabe caʼ laatu, laga nuu ru ibáʼ ne guidxilayú, qué ziaana nin tindaa lu ley sin gaca cumplir, nin ti letra ne nin ti puntu» (Mateo 5:17, 18).

Jesús laaca guníʼ de xcaadxi diidxaʼ riguixhená ni zeeda lu Biblia ni guca ca dxi bibánibe ne despué (Daniel 9:27; Mateo 15:7-9; 24:15). Ca discípulo stibe laaca guniʼcaʼ de xcaadxi cosa ni chiguizaaca, ne stale de laacani cadúʼyanu cayaca ca dxi stinu riʼ. Lu sti tema ca zadúʼndanu de xcaadxi diidxaʼ riguixhená ni cayaca yanna ne cani maʼ qué zandaa zaca.

[Cani cá ñee yaza]

[Dibuju/foto ni zeeda lu yaza 4]

«Ti binni dxaapa [...] zapa ti badu huiiniʼ»

[Dibuju/foto ni zeeda lu yaza 5]

«Qué nuchiee luaʼ ora caníʼcabe mal de naa»