Maestru Ni Jma Nanna Gusiidiʼ que gucané stuudxi binni

ÑEE riulaʼdxuʼ ora gacané tuuxa lii la?... Cadi lii si; guiranu nga riuláʼdxinu chuʼ tu gacané laanu. Maestru Ni Jma Nanna Gusiidiʼ que gúnnabe xi riuláʼdxinu, ngue runi nabé bíʼnibe ni galán para stuudxi binni. Laabe guniʼbe: Cadi bendadiáʼ para gacanécabe naa, sínuque para gacaniáʼ (Mateo 20:28).

Nga runi, pa racaláʼdxinu gácanu casi Maestru Ni Jma Nanna Gusiidiʼ ca, xi riquiiñeʼ gúninu yaʼ.... Naquiiñeʼ gacanenu stuudxi binni. Peru cadi stale diʼ tu runi zacá. Ya, ni dxandíʼ nga stale binni riulaʼdxiʼ gacané stuudxi laacaʼ. Ti biaje, dede cani zinanda Jesús que guníʼ íquecaʼ zacá. Guiracaʼ gucaláʼdxicaʼ guisácacaʼ jma que stobi.

Ti dxi, biree Jesús ne ca discípulo stiʼ zécabe guidxi Capernaum, gaxha de nisadóʼ stiʼ Galilea. Yendásicabe raqué la? guyuucabe ndaaniʼ ti yoo. Óraque gunabadiidxaʼ Jesús laacabe: «Xi diidxa zeda yuiʼ[tu] neza». Nin tu nicabi laabe purtiʼ ora zeedacabe neza que la? zeedadinde diidxacabe de tuu nga jma risaca ládecabe (Marcos 9:33, 34).

Jesús nanna cadi galán diʼ nga guiníʼ ique ca discípulo stiʼ jma risácacaʼ que stuudxi. Ngue runi, casi bíʼndanu lu primé capítulo stiʼ libru riʼ, guluube ti baʼduʼ galaa de laacaʼ ne guniʼbe naquiiñeʼ gácacaʼ casi baʼduʼ que ne cadi guni crecaʼ laca laacaʼ. Peru, qué ñénedicaʼ. Ngue runi, gueelaʼ ante gátibe bisiidibe laacaʼ xiixa ni qué liica zusiaandacaʼ. Xi bíʼnibe yaʼ....

Laga cayoxhiné Jesús ca discípulo stiʼ, biásabe de ruaa mexaʼ que ne bixhiibe ti tualla ndaanibe. Óraque gudaabe nisa ndaaniʼ ti bandeja. Ca discípulo que caniʼcaʼ xi chigúnibe. Laga cayuuyacaʼ xi cayúnibe la? bizuxíbibe ne gudiibibe ñee cada tóbicaʼ ne bicuiidxibe ni ne tualla que. ¡Guníʼ ique si nga!... Pa ñuuluʼ raqué, xi ñuni sentirluʼ yaʼ....

Qué ñulaʼdxiʼ ca discípulo stiʼ Maestru Ni Jma Nanna Gusiidiʼ que niguiibibe ñeecaʼ ne pur ngue bituilúcabe. Pedru qué niná gá diʼ ñuni Jesús dxiiñahuiiniʼ que pur laa. Peru para Jesús la? nabé risaca ni, ne zaqué bisiénebe ni Pedru.

Neca yanna maʼ qué riguiibiʼ binni ñee stobi, peru ca dxi stiʼ Jesús que bíʼnicabe ni. Ñee nannuʼ xiñee la?... Purtiʼ ca binni xquidxi Jesús ne cani zinanda laa que, puru elaguidi bicaa ñeecaʼ. Ne cumu nuu stale yudé lu ca neza que la? nabé racabiidiʼ ñeecabe. Ngue runi riguiibicabe ñee ca binni ni ziganna laacabe ralídxicabe ne zaqué rusihuínnicabe nacháʼhuicabe.

Peru dxi que, nin tobi de ca discípulo stibe qué ñúnicaʼ dxiiñahuiiniʼ que. Pur ngue biʼniʼ Jesús ni. Zaqué bisiidibe cani zinanda laabe que xiixa ni risaca stale ni caquiiñeʼ gánnacaʼ. Laanu laaca riquiiñeʼ guizíʼdinu ni.

Ñee nannuʼ xi bisiidibe la?... Ora gurí Jesús ruaa mexaʼ que sti biaje, bisiénebe ni laacaʼ sicaríʼ: «Ñee biene tu ni bine laatu ca la? Laatu rabi tu naa Ma[e]stru ne Señor, ne jneza runi tu purti nga nga nacaʼ. [Nga runi, pa] naa, naca Señor ne Ma[e]stru stitu ne gudiibe ñee tu la? lágaxa laatu qué quiʼbi saa tu ñee tu» (Juan 13:2-14).

Maestru Ni Jma Nanna Gusiidiʼ que biluiʼbe ca discípulo stibe racaláʼdxibe gacanecaʼ stobi. Qué ninádibe niníʼ íquecaʼ puru para laasicaʼ ne guni crecaʼ jma risácacaʼ ne naquiiñeʼ gacané stuudxi laacaʼ. Ni racaláʼdxibe nga chúʼcabe listu para gacanécabe stuudxi binni.

Cadi dxandíʼ nga sicarú ni bisiidibe riʼ la?... Lii yaʼ, zácaluʼ casi Maestru Ni Jma Nanna Gusiidiʼ que ne zacaneluʼ stuudxi binni la?... Guiranu zanda gúninu xiixa ni galán para stobi. Nga zusiecheʼ laacabe. Peru ni jma risaca nga zusiéchenu Jesús ne Bixhoze.

Cadi nagana diʼ nga gacanenu stuudxi binni. Pa lii guʼyuʼ la? nuu stale cosa ra zanda gacaneluʼ. Guníʼ ique: Nuu xiixa ra zanda gacaneluʼ jñaaluʼ la? Lii nannuʼ stale nga ni rúnibe pur lii ne pur binnilídxiluʼ. Yanna, ñee zanda gacaneluʼ laabe la?... Xiñee qué guinabadiidxaluʼ laabe.

Zándaca gacaneluʼ laabe para guindísaluʼ ca bladuʼ biidiʼ nuu lu mexaʼ ora maʼ biluxe gudoto ne quiibiluʼ cani. Nuu hombrehuiiniʼ risáʼbicaʼ guixi guiráʼ dxi. Pa gúniluʼ ca ndiʼ la? maʼ cayacaneluʼ stuudxi binni, cásica biʼniʼ Jesús.

Ñee nápaluʼ bíʼchiluʼ o bizáʼnaluʼ jma nahuiiniʼ que lii ni ganda gacaneluʼ laa la? Bietenalaʼdxiʼ, Jesús, Maestru Ni Jma Nanna Gusiidiʼ que, gucanebe dede ca discípulo stibe. Pa gacaneluʼ ca bíʼchiluʼ o bizáʼnaluʼ ni jma nahuiiniʼ la? zúniluʼ casi biʼniʼ Jesús. Ximodo zanda gacaneluʼ laacabe yaʼ.... Zanda guindísaneluʼ laacabe cani gudxítecabe ora maʼ bilúxecabe, gacaneluʼ laacabe gácucabe lari o cuaquichaahuicabe xcámacabe o guindétecabe xquíxhecabe. Caníʼ íqueruluʼ xiruʼ zanda guʼnuʼ la?... Laacabe zannaxhiicabe lii pur laani, cásica ca discípulo que gunnaxhiicabe Jesús pur ca cosa galán biʼniʼ pur laacabe.

Ne laaca zanda gácaluʼ nachaʼhuiʼ ra scuela ne ca xcompañéruluʼ o maestru stiluʼ. Pa guiaba libru stiʼ tuuxa la? guizáʼ galán guʼnuʼ pa guindísaluʼ ni. Ne laaca galán nga pa gusialuʼ lu pizarrón o gacaneluʼ ca maestru stiluʼ ra caquiiñecaʼ lii. Dede zanda gacaneluʼ guiá salón stitu.

Nuu tiru ca binni ca qué zudiicabe xquíxepeʼ laanu ora gacanenu laacabe. Ñee raʼbuʼ pur nga zusaananu de gúninu ni la?... Coʼ xa. Stale binni qué nudiicabe xquíxepeʼ Jesús pur cani galán ni biʼniʼ, peru qué nibeedini gana laabe.

Nga runi, cadi chuʼ dxi gusaananu de gacanenu sti binni. Guietenaláʼdxinu Jesús, Maestru Ni Jma Nanna Gusiidiʼ que, ne gúninu stipa pur gúninu cásipeʼ modo bíʼnibe.