Xiñee naquiiñeʼ chinándanu ni na espíritu stiʼ Dios

«Lii nga Dios stinneʼ. Nabé nachaʼhuiʼ espíritu stiluʼ; guluiʼni naa guneʼ ni jneza.» (SAL. 143:10)

 1. Bisiene né ti ejemplu ximodo zanda gacané ti stipa ni qué ridúʼyanu laanu.

ÑEE huayuu dxi iquiiñeluʼ ti brújula para gánnaluʼ paraa nuuluʼ la? Ti brújula nga ti cosa ni napa ti aguxaʼ ni napa imán, ne laani ruluiʼni binni paneza riaana ladu guiaʼ. Xiñee puru ladu guiaʼ rudxiilú aguxaʼ ca yaʼ. Purtiʼ nuu ti stipa ni rigubayú ni. Ne stipa ca nga rucaani aguxaʼ ca gudxiilú ladu guiaʼ. Maʼ stale siglu ca explorador ne xcaadxi binni ni runi biaje bidiicabe cuenta paraa nuucabe purtiʼ biquiiñecabe ti brújula neca nuucabe lu nisadóʼ o sti lugar.

2, 3. 1) Xi ti stipa biquiiñeʼ Jiobá raca stale millón de iza. 2) Ximodo nánnanu zanda gacané espíritu santu laanu.

² Peru nuu sti stipa ni jma risaca ni zanda gacané laanu gánnanu ximodo guibáninu, stipa riʼ qué rihuinni ni. Xi laani yaʼ. Laani nga ni riníʼ ca primé versículo stiʼ Biblia. Libru stiʼ Génesis cayabi laanu xi biʼniʼ Jiobá maʼ raca stale iza, relatu riʼ na: «Primé que Dios bizáʼ guibáʼ ne guidxilayú». Laanu nánnanu biquiiñebe ti cosa guizáʼ nadipaʼ para bizaʼbe cani. Biblia na: «Stipa ni riquiiñeʼ Dios biniibi ni cheríʼ chericaʼ lu nisa que» (Gén. 1:1, 2). Xi stipa nga biquiiñeʼ Jiobá yaʼ. Laani nga espíritu santu, stipa stibe. Ne laanu rudiʼnu xquíxepeʼ Dios pur biquiiñeʼ stipa stiʼ para bizáʼ laanu ne para bíʼnibe xcaadxi cosa (Job 33:4; Sal. 104:30).

³ Cadi naquiiñeʼ gánnasinu riquiiñeʼ Jiobá stipa stiʼ para guicaanu bi ne guibáninu galán. Naquiiñeʼ gudiʼnu lugar gacaneni laanu lu xcaadxi cosa. Jesús peʼ gudxi ca discípulo stiʼ sicaríʼ: «Espíritu [...] zusiene laatu irá ni dxandíʼ» (Juan 16:13). Yanna, xipeʼ nga espíritu santu ne ximodo zanda gacaneni laanu yaʼ.

Xii nga espíritu santu

4, 5. 1) Cani runi cré Trinidad, xi riníʼcabe de espíritu santu neca cadi dxandíʼ ni. 2) Ximodo zanda gusiénenu xii nga espíritu santu.

⁴ Ora maʼ zigucheechenu diidxaʼ ridxélanu hombre ne gunaa ni runi cré de Trinidad. Nga runi, riníʼ íquecabe naca espíritu santu ti binni cásica Dios ne Xiiñiʼ, neca cadi dxandíʼ ni (1 Cor. 8:6). Cumu zacá nga runi cré binni la? nga runi ridúʼyanu riquiiñeʼ stale Biblia letra mayúscula para gucaa: Espíritu Santu. Peru ti profesor ni rusiidiʼ diidxaʼ griegu, ni láʼ Joan F. Mira, bicaa ti libru ra zeeda ca Evangeliu, ne libru stiʼ Hechos ne Apocalipsis ra bicaabe espíritu santu ne letra minúscula, bíʼnibe ni lu iza 2006 ndaaniʼ guidxi España. Ne bíʼnibe ni purtiʼ nánnabe Biblia qué riníʼ diʼ naca espíritu ti binni.

⁵ Yanna, paraa nga biasastí guni cré binni Trinidad yaʼ. Traducción del Nuevo Mundo de las Santas Escrituras (con referencias) cusiene lu ti nota stiʼ Génesis 1:2: «Cadi bibíʼxhisini “espíritu”, [lu diidxaʼ hebreu] rú aj, sínuque laaca ribíʼxhini “bi” ne xcaadxi diidxaʼ riníʼ nácani ti stipa ni qué rihuinni» (zanda guchaagatu ni né ca nota stiʼ Génesis 3:8 ne 8:1). Cásica qué ridúʼyanu bi peru nánnanu nadipaʼ ni, zacaca nga espíritu santu, neca qué ridúʼyanu ni, peru rudiʼnu cuenta nuuni. Ne laani nga ti stipa ni rudii Dios binni o ca cosa para gaca ni maʼ gudixhe ique Jiobá. Ñee raca nagana para laanu guni crenu de Dios ni jma nandxóʼ ne nayá nga zeeda espíritu riʼ la? Coʼ xa (biindaʼ Romanos 1:20).a[2]

 6. Xi gunabaʼ David Jiobá lu ti oración.

⁶ Dxandíʼ, zanda iquiiñeʼ Jiobá espíritu stiʼ para gabi laanu xi naquiiñeʼ gúninu lu xquendanabáninu. Nga nga ni gúdxibe David: «Zudieeʼ lii guendariene, ne zusiideʼ lii saluʼ lu neza ni naquiiñeʼ cheluʼ» (Sal. 32:8). Yanna, ñee gucalaʼdxiʼ hombre riʼ guluíʼ Jiobá laa xi guni lu xquendanabani la? Gucalaʼdxiʼ, laabe gunábabe Dios: «Bisiidiʼ naa guneʼ ni naluʼ, purtiʼ lii nga Dios stinneʼ. Nabé nachaʼhuiʼ espíritu stiluʼ; guluiʼni naa guneʼ ni jneza» (Sal. 143:10). Laanu laaca naquiiñeʼ gusihuínninu riuuláʼdxinu guluíʼ espíritu santu laanu xi naquiiñeʼ gúninu lu xquendanabáninu. Xiñee yaʼ. Guidúʼyanu tapa razón.

Qué zanda uguu jnézanu laca laanu

7, 8. 1) Xiñee qué zanda uguu jnézanu laca laanu. 2) Xi ejemplu rusihuinni cadi jneza nga guiníʼ ique binni zanda guibani lu guidxilayú malu riʼ laasi.

⁷ Primé razón nápanu para gudiʼnu lugar gacané espíritu santu laanu nga purtiʼ qué zanda gúninu ni laasinu. Diidxaʼ guluíʼ ca riniʼni «guluiʼni tuuxa ti neza» ne laaca riniʼni «uguu jneza», «gudii conseju» (Diccionario Anaya de la Lengua). Dxandíʼ, cadi guyáʼ diʼ binni para uguu jneza laca laa, ne jma naxoo gúcani purtiʼ gulenenu donda. Zacapeʼ nga bicaa Jeremías: «¡Nannaʼ dxicheʼ Jiobá, binni guidxilayú cadi lu náʼ diʼ nuu neza stiʼ. Cadi lu náʼ diʼ binni nuu guni mandar ra guzuhuaa ñee!» (Jer. 10:23). Xiñee guníʼ Jeremías zacá yaʼ. Jiobá bisiene laabe xi pur né ca diidxaʼ riʼ: «Ladxidóʼ binni nga ni jma riguite laa que intiica si cosa, ne qué ridxélani xi gúnini. Tu zanda gunibiáʼ ni yaʼ» (Jer. 17:9; Mat. 15:19).

⁸ Guiníʼ íquenu de ti binni ni zigunibiáʼ sti lugar ra qué liica huayé ne cadi ziné ti mapa. Pa chebe lugar ca ne cadi chinebe tuuxa ni runibiáʼ chaahuiʼ raqué ne cadi zinebe ti brújula la? zanítibe. Ne pa qué gánnabe ximodo guibánibe raqué la? zándaca gueeda gátibe. Zacaca nga rizaaca ti binni ni riníʼ ique zanda guibani ndaaniʼ guidxilayú malu riʼ pa qué guyubi gacané Dios laa. Yanna laanu yaʼ. Ximodo zanda guibáninu ndaaniʼ Guidxilayú riʼ sin gátinu yaʼ. Guinábanu Jiobá laaca ni gunabaʼ David laabe: «Gucané naa cadi guireeʼ cueʼyaʼ de lu neza stiluʼ, purtiʼ luni qué zuxooñeʼ ñeeʼ» (Sal. 17:5; 23:3). Xi zanda gúninu para cadi guireecueʼnu de lu neza ni culuíʼ Dios laanu sanu yaʼ.

 9. Casi modo cá ni lu yaza 17, ximodo zanda gacané espíritu stiʼ Dios laanu ti gánnanu xi gúninu lu xquendanabáninu.

⁹ Pa qué rudxíʼbanu laca laanu ne runi crenu Jiobá la? zudiibe laanu espíritu stibe ne zuluiʼbe laanu paneza sanu. Peru ximodo racané stipa ca laanu yaʼ. Sicaríʼ bisiene Jesús ni ca discípulo stiʼ: «Peru espíritu santu, ni chiguseendaʼ bixhozeʼ, casi ñaca naa nuseendaʼ laa, zusiidini laatu guiráʼ cosa ne zusietenaláʼdxini laatu guiráʼ ni maʼ gudxeʼ laatu» (Juan 14:26, NM). Guiráʼ ora naquiiñeʼ guinábanu Dios gusiene laanu ni guidúʼndanu lu Biblia, ra zeeda cani bisiidiʼ Cristu. Pa gúninu zacá, zacané espíritu santu laanu guiénenu pabiáʼ nuu xpiaaniʼ Jiobá, ne zacá zanda chinándanu ca mandamientu stibe (1 Cor. 2:10). Ne ora guizaacanu xiixa ni cadi cabézanu la? espíritu ca zacané laanu gánnanu xi gúninu. Zacaneni laanu guietenaláʼdxinu ca conseju zeeda lu Biblia ne zacaneni laanu guiene chaahuinu ximodo chinándanu ca conseju ca lu guiráʼ ni guidxaagalunu.

Bidii Jesús lugar gacané espíritu santu laa

10, 11. Xii nga ni guyuulaʼdxiʼ Xiiñiʼ Dios, ne ximodo gucané espíritu santu laabe.

¹⁰ Guiropa razón nápanu para guininu caquiiñenu gacané espíritu santu laanu nga purtiʼ laani biquiiñeʼ Dios para gucané tobi lucha Xiiñiʼ. Ante gueeda Jesús lu Guidxilayú maca nánnabe ca diidxaʼ riguixhená riʼ: «Luguiabe ziuu espíritu stiʼ Jiobá, espíritu stiʼ guendanuuxpiaaniʼ ne guendariene, espíritu stiʼ conseju ne stiʼ poder, espíritu stiʼ guendananna ne stiʼ guendaridxibi Jiobá» (Isa. 11:2). Nabé guyuulaʼdxiʼ Jesús gacané espíritu santu laa, purtiʼ bidxaagalube guendanagana lu Guidxilayú riʼ.

¹¹ Biiyaʼ Jesús dxandíʼ guca ca diidxaʼ ni guníʼ Jiobá. Ca Evangeliu ca riníʼcani xi bizaaca despué de guyuunisa Jesús: «Yanna, biree si Jesús de ra guiiguʼ Jordán, bidxá tipa ladxidóʼ de espíritu santu, ne yené espíritu que laabe cheríʼ chericaʼ lu desiertu que» (Luc. 4:1, NM). Raqué biaanabe sin gobe, biʼniʼ orarbe Dios ne zándaca gudxi Dios laabe xi guiráʼ dxiiñaʼ chigúnibe. Espíritu ca gucaneni Jesús para ganna xii nga ni jma jneza guiníʼ ique ne laaca gucaneni ladxidóʼ para ganna xii nga ni jma jneza guni. Ngue runi, nánnabe xi gúnibe lu guiráʼ cosa ne bíʼnibe cásipeʼ modo na Bixhózebe.

12. Xiñee naquiiñeʼ guinábanu Dios gacané espíritu stiʼ laanu.

¹² Cumu nanna Jesús nabé risaca espíritu santu lu xquendanabani la? gúdxibe ca discípulo stibe guinábacaʼ ni Dios ne gudiicaʼ lugar gacaneni laacaʼ (biindaʼ Lucas 11:9-13). Xiñee nabé risaca gúninu casi bíʼnibe yaʼ. Purtiʼ stipa stiʼ Dios ca zanda gacaneni laanu guchaʼnu modo riníʼ íquenu ti guiníʼ íquenu cásica riníʼ ique Cristu (Rom. 12:2; 1 Cor. 2:16). Pa gudiʼnu lugar gacaneni laanu lu xquendanabáninu la? zaníʼ íquenu casi Cristu ne zúninu stipa pur guibáninu casi modo bibánibe (1 Ped. 2:21).

Zanda cueechú espíritu stiʼ guidxilayú riʼ laanu

13. Xii nga espíritu stiʼ binni guidxilayú, ne xi guiráʼ rucaani binni guni.

¹³ Guionna razón ni nápanu para iquiiñenu espíritu santu nga purtiʼ racaneni laanu cadi guicá espíritu stiʼ binni guidxilayú laanu. Nuu ti stipa cucaa ca binni nuu luni gúnicaʼ stale cosa ni qué riuulaʼdxiʼ espíritu stiʼ Dios. Lugar de ñacaneni laacabe niníʼ íquecabe casi modo riníʼ ique Cristu laga rucaani laacabe guiníʼ íquecabe casi modo riníʼ ique Binidxabaʼ ne gúnicabe guiráʼ ni runi, purtiʼ laa nga ni runi mandar guidxilayú riʼ (biindaʼ Efesios 2:1-3 ne Tito 3:3). Guiráʼ ni gudii lugar guicá modo riníʼ ique binni guidxilayú laa ne guni ni na ique nabé naná modo guiabanáʼ. Qué ziuucaʼ ra guni mandar Reinu stiʼ Dios (Gál. 5:19-21).

14, 15. Ximodo zanda gudxíʼlunu espíritu stiʼ guidxilayú riʼ.

¹⁴ Jiobá rudii laanu guiráʼ cosa ni zanda gacané laanu gudxíʼlunu espíritu stiʼ binni guidxilayú. Ngue runi, apóstol Pablu bidii conseju riʼ: «Lachuu né Señor tobi si, ti uzuhuaa chaahui tu, purti nabé nandxóʼ be ne zacané be laatu [...] ora ucaa lú ni nadxaba laatu» (Efe. 6:10, 13). Jiobá riquiiñeʼ espíritu stiʼ para gacané laanu gudxíʼlunu guiráʼ ni gulaa Binidxabaʼ luguianu (Apo. 12:9). Dxandíʼ nadipaʼ espíritu stiʼ guidxilayú riʼ ne qué zanda diʼ gucáʼnanu guiráʼ ni nuu luni, peru zanda gudxíʼlunu ni purtiʼ jma nadipaʼ espíritu stiʼ Dios ne racaneni laanu.

¹⁵ Ora bizeeteʼ Pedru de ca binni ni bisaana de gaca xpinni Cristu lu primé siglu que guniʼbe sicaríʼ: «Cananiti cabe purti bisaana cabe neza chaʼhui sti Dios» (2 Ped. 2:15). ¡Nabé rudiʼnu xquíxepeʼ purtiʼ «cadi espíritu sti binni guidxilayú ucuaa nu, sínuque [...] ni zeeda de Dios»! (1 Cor. 2:12.) Pa gudiʼnu lugar gacaneni laanu ne guicaanu guiráʼ ni cudii Jiobá laanu la? ziuʼnu lu neza stibe ne zanda gudxíʼlunu espíritu stiʼ Binidxabaʼ (Gál. 5:16).

Racané espíritu santu binni gapa guenda sicarú

16. Xi guiráʼ guenda zacané espíritu santu laanu gápanu.

¹⁶ Caquiiñenu gacané espíritu stiʼ Dios laanu purtiʼ zanda gacaneni laanu gápanu caadxi guenda, ne nga nga guidapa razón nápanu (biindaʼ Gálatas 5:22, 23). Cadi dxandíʼ guiráʼ xpinni Cristu ñuuláʼdxicaʼ ñannaxhiicaʼ jma, ñuucaʼ nayecheʼ ne ñácacaʼ nadóʼ la? Ñee cadi dxandíʼ guiranu caquiiñeʼ gácanu jma nachaʼhuiʼ, cadi guninanu binni ne cadi guixhacaláʼdxinu laacaʼ la? Tu laa cadi caquiiñeʼ gapa jma fe, gaca nachaʼhuiʼ ne gucueeza laca laa yaʼ. Guiráʼ ca guenda ca racanécani laanu, ca binnilídxinu ne ca xpinni Cristu. Nga runi, naquiiñeʼ gúninu stipa pur gápanu ca guenda ca lu xquendanabáninu.

17. Ximodo zanda gápanu ca guenda ni rudii espíritu santu.

¹⁷ Galán guinabadiidxanu laca laanu: Ñee rusihuinni cani riniéʼ ne cani runeʼ cudieeʼ lugar gacané espíritu santu naa ne gapaʼ ca guenda stini la? (2 Cor. 13:5; Gál. 5:25). Zándaca gudiʼnu cuenta caquiiñeʼ gúninu stipa pur gápanu xcaadxi guenda lu xquendanabáninu. Xi caquiiñeʼ gúninu yaʼ. Caquiiñeʼ gacanenu espíritu ca para ganda gápanu ca guenda ca. Ximodo yaʼ. Ora guidúʼndanu Biblia ne xcaadxi libru ne revista, ne guyúbinu ximodo gúninu cani lu xquendanabáninu ne gúninu stipa pur gácani jma jneza.b Ora guidúʼyanu xi guiráʼ ribeendunu pur espíritu santu ne xi guiráʼ ribeendú ca xpinni Cristu la? ziénenu xiñee caquiiñeʼ gacané espíritu santu laanu.

Ñee cudiʼnu lugar gacané espíritu stiʼ Dios laanu la?

18. Xi zanda guizíʼdinu de Jesús purtiʼ bidii lugar gacané espíritu santu laa.

¹⁸ Dxi bizáʼ Jiobá guibáʼ ne guidxilayú biquiiñebe Jesús «casi tobi ni runi xhiiñabe jnézapeʼ». Ngue runi runibiáʼ chaahuiʼ Jesús campo magnético stiʼ Guidxilayú, ne laani nga riquiiñeʼ binni para ganna paneza nga ladu guiaʼ ne ladu gueteʼ, paneza rindani gubidxa ne paneza riaaziʼ ni (Pro. 8:30; Juan 1:3). Guirutiʼ ganna pa biquiiñeʼ Jesús ni maʼ bizéʼtenu ca para ganna paladu nuu. Peru Biblia ruzeeteʼ gucané espíritu santu Jesús lu xquendanabani. Laabe bidiibe lugar gacaneni laabe, ngue runi, ora chigúnibe xiixa la? bínibe ni de guidubi ladxidoʼbe (Mar. 1:12, 13; Luc. 4:14). Ñee rúninu casi bíʼnibe ca la?

19. Xi caquiiñeʼ gúninu para gacané espíritu santu laanu.

¹⁹ Ca dxi stinu riʼ racaneruʼ espíritu santu binni ni gudii lugar. Xi zanda gúninu para gacaneni laanu yaʼ. Ora guinábanu Jiobá gudii laanu stipa ca ne gudiʼnu lugar gacaneni laanu (biindaʼ Efesios 3:14-16). Naquiiñeʼ gúninu casi modo biʼniʼ orarnu Dios ne guyúbinu conseju ni zeeda lu Biblia, ni gucané espíritu santu guicá (2 Tim. 3:16, 17). Naquiiñeʼ chinándanu cani cayabi Stiidxaʼ Dios laanu ne gudiʼnu lugar gacané espíritu santu laanu. Pa gúninu zacá la? zusihuínninu runi crenu zanda gacané Jiobá laanu sanu ndaaniʼ guidxilayú malu riʼ.

[Cani cá ñee yaza]

Biéneluʼ cani maʼ bizíʼdinu ca la?

• Ximodo racané espíritu santu laanu.

• Xi tapa razón nápanu para gudiʼnu lugar gacané espíritu santu laanu.

• Xi caquiiñeʼ gúninu para cueendunu ni galán pur guiráʼ ni rudii espíritu stiʼ Dios.

[Dibuju/foto ni zeeda lu yaza 15]

Biʼniʼ Jesús casi modo na espíritu stiʼ Dios

[Dibuju/foto ni zeeda lu yaza 17]

Ora gudiʼnu lugar gacané espíritu santu laanu rucaani laanu gúninu ni jneza