Gúninu cani bizeeteʼ Jesús lu oración ni biʼniʼ

1, 2. Xi biʼniʼ Jesús despué de biʼniné ca apóstol stiʼ Pascua lu iza 33.

CASI biluxe Jesús ne ca apóstol stiʼ de bíʼnicaʼ Pascua gueelaʼ 14 stiʼ nisán iza 33. Ni bíʼnicabe riʼ, rusietenalaʼdxiʼ ni laacabe dxi bilá Jiobá ca israelita Egipto dxi guyuucaʼ de esclavu. Peru maʼ cadi candaa zalá ca discípulo que de sti cosa jma naroʼbaʼ: lu náʼ pecadu ne guendaguti. Purtiʼ sti dxi que (nuurúcabe 14 stiʼ beeu nisán lu calendariu stiʼ ca judíu), zuuti ca xhenemigu Jesús laa. Peru ni gúnicabe laabe riʼ, zeeda gácani ti ndaayaʼ para ca discípulo stibe: ra gudiibe xquendanabánibe sin donda la? zulabe binni de pecadu ne guendaguti (Heb. 9:12-14).

² Para cadi guiaandaʼ laanu pabiáʼ nadxii Dios laanu la? gudixhestí Jesús guietenaláʼdxinu guendaguti stiʼ ti biaje lu ti iza, ne maʼ ngue nga naquiiñeʼ gúnicabe lugar stiʼ Pascua. Ximodo bíʼnibe ni yaʼ. Gundaabe pan ni qué gapa levadura que, ne bitiidibe ni lu náʼ ca 11 apóstol stibe ne rábibe laacaʼ: «Ndi nga cuerpu stinne ni chi udiee pur laatu. Laguni casi cayuni nu riʼ para guietenaladxi tu naa». Laaca bidiibe laacaʼ ti copa ni daʼ vinu tintu ne gúdxibe laacaʼ: «Copa ri nga rini stinne ni chi ixii pur laatu. Ne ra ixii ni zaguixhe Bixhoze ti modo cubi chuʼ né binni laa tobi si» (Luc. 22:19, 20).

 3. 1) Xi bizaaca guti si Jesús. 2) Xi zanda guinabadiidxanu de oración ni zeeda lu capítulo 17 stiʼ Juan.

³ Mayaca guiluxe pactu stiʼ Ley ni biʼniné Dios guidxi Israel. Ne lugar stini ziaana ti pactu nacubi ni chiguniné Jiobá ca discípulo stiʼ Jesús ni bibí pur espíritu santu. Qué racalaʼdxiʼ Jesús gaca ca xpinni casi guca guidxi Israel. Ca israelita que maʼ qué nusisácacabe lá Dios, purtiʼ gadxé gadxé religión gúpacabe (Juan 7:45-49; Hech. 23:6-9). Ni racalaʼdxiʼ Jesús nga chuʼ ca xpinni tobi si ti gusisácacabe lá Dios. Xi bíʼnibe yaʼ. Bíʼnibe ti oración nabé sicarú ni zanda guʼndaʼ binni (Juan 17:1-26; biiyaʼ dibuju ni cá ra bizulú tema riʼ). Laga cadúʼndanu ni, galán guinabadiidxanu laca laanu: «Ñee bicabi Dios oración biʼniʼ Xiiñiʼ la? Ñee cayuneʼ guiráʼ ni rieeteʼ lu oración ca la?».

4, 5. 1) Xi rizíʼdinu pur ca diidxaʼ ni bizuluné Jesús oración stiʼ. 2) Ximodo bicabi Jiobá ni gunabaʼ Jesús laa.

⁴ Dede bixhinni caniʼné Jesús ca discípulo stiʼ, ne cayábibe laacaʼ stale cosa ni qué gánnacaʼ de Dios. Óraque gundisalube guibáʼ ne biʼniʼ orarbe: «Bixhozeʼ, ma bidxiña hora. Bisisaca Xiiñi lu yanna, ti laca usisaca Xiiñi lu lii, purti gudixhe lu irá binni ladxi ná Xiiñi luʼ ti gudii enda nabani ni qué zaluxe irá ni uchiña lu ra nuu. [...] Ma bisisaca lii ndaani guidxilayú riʼ, ne ma binduuxe ni biseendu naa beda guneʼ. Yanna la? Bixhozeʼ, bisisaca naa ra nuu luʼ casi bisaca raqué dxi caʼru uzáʼ lu guidxilayú» (Juan 17:1-5).

⁵ Ñee bidiiluʼ cuenta xii nga ni jma risaca para Jesús lu ca primé versículo ca la? Ni jma risaca para laabe nga guisaca lá Bixhózebe ni nuu guibáʼ. Ni gunábabe riʼ, zeeda gácani casi oración ni runibiáʼcabe casi padrenuestro ni biʼniʼ Jesús primé, ora guníʼ: «Bixhoze du ni nuu ibáʼ, rinaba du gusisaca irá binni lii» (Luc. 11:2). Despué, guníʼ ique Jesús xi caquiiñeʼ ca discípulo stiʼ; ngue runi racaláʼdxibe gudiibe laacaʼ guendanabani ni qué zaluxe. De raqué gunábabe ti cosa para laabe. Xi laani yaʼ. Laabe guniʼbe: «Bisisaca naa ra nuu luʼ casi bisaca raqué dxi caʼru uzáʼ lu guidxilayú». Ximodo bicabi Jiobá oración stiʼ Xiiñiʼ yaʼ. Bicábibe laa ra bidiibe Xiiñibe jma que ni gunabaʼ laabe: bisisaca Dios lá Jesús jma que lá ca ángel (Heb. 1:4).

 6. Xi caquiiñeʼ guni ca apóstol que para gápacaʼ guendanabani ni qué zaluxe, ne xiñee nánnanu bíʼnicabe ni.

⁶ Lu oración ni biʼniʼ Jesús que laaca bizeetebe xi naquiiñeʼ gúninu para ganda gápanu guendanabani ni qué zaluxe neca nácanu binni ruchee (biindaʼ Juan 17:3). Laabe guniʼbe naquiiñeʼ gunibiaʼnu Dios ne Cristu. Ximodo zanda gúninu nga yaʼ. Cadi caquiiñeʼ si guizíʼdinu de Dios ne de Xiiñiʼ, sínuque laaca naquiiñeʼ gúninu cani guizíʼdinu lu xquendanabáninu. Ca apóstol que maʼ bizulú cayúnicaʼ cani bizéʼtenu ca, ngue runi gudxi Jesús Bixhoze: «Ma byue nia laacabe stiidxa luʼ ne ma ucuaa cabe ni» (Juan 17:8). Peru pa racaláʼdxicabe gápacabe guendanabani ni qué zaluxe la? caquiiñeʼ guiníʼ íquecabe ca conseju stiʼ Dios ne gúnicabe ni nani guiráʼ dxi biaʼ dxi guibánicabe. Peru ñee bíʼnicabe ni la? Nánnanu bíʼnicabe ni, purtiʼ cá lácabe lu 12 guié ra zuba Jerusalén Cubi ni nuu guibáʼ (Apoc. 21:14).

 7. Xi riníʼ gunibiaʼnu Dios, ne xiñee nabé risaca gúninu ni.

⁷ Chupa chonna de ca binni ni ruundaʼ diidxaʼ griegu nacaʼ ñanda nibiʼxhiʼ ca diidxaʼ «gunibiáʼ cabe» casi «cadi gusaana de guiziidicabe». Tobi si ni riníʼ guiropaʼ diidxaʼ riʼ, purtiʼ guiropaʼ cani nabé risaca cani. Ca diidxaʼ riʼ rusiene cani laanu cadi naquiiñeʼ gusaana de guizíʼdinu de Dios. Peru para ganda gunibiaʼnu Dios ni jma nandxóʼ lu guidubi naca guibáʼ ne Guidxilayú la? cadi caquiiñeʼ si gunibiaʼnu ca guenda stibe ne gánnanu xi naguixhe íquebe gúnibe. Xiruʼ naquiiñeʼ gúninu yaʼ. Naquiiñeʼ chuʼnu gaxha de laabe ne gannaxhiinu xcaadxi xpinni Cristu. Ngue runi, biaʼsi nga ni na Biblia: «Ni cadi nadxii stobi la? qué huayuu dxi gunibiáʼ Dios» (1 Juan 4:8). Gunibiaʼnu laabe laaca riníʼ ni guzúʼbanu stiidxabe (biindaʼ 1 Juan 2:3-5). ¡Guizáʼ galán nga nuunu lade ca binni ni runibiáʼ Jiobá! Peru laaca zanda guixélenu de Dios casi bizaaca Judas Iscariote. Nga runi, naquiiñeʼ gúninu stipa pur cadi guixélenu de laabe. Zacá zanda gápanu guendanabani ni qué zaluxe (Mat. 24:13).

8, 9. Xii nga ni jma bisisaca Jesús dxi bicheeche diidxaʼ, ne xiñee qué ñuuláʼdxibe ni bisiidiʼ ca judíu que.

⁸ Ora guidúʼndanu oración ni cá lu capítulo 17 stiʼ Juan, rihuínnica nabé gunnaxhii Jesús ca apóstol stiʼ ne laaca nadxiibe laanu (Juan 17:20). Nánnanu beeda gulá Jesús binni, peru cadi nga diʼ nga ni jma risaca beeda gúnibe, biaʼ dxi bibánibe lu Guidxilayú jma gucuá íquebe gusisácabe lá Dios. Guzéʼtenu dxi guniʼbe nezalú stale binni ni nuu ndaaniʼ sinagoga stiʼ Nazaret xi pur beedabe lu Guidxilayú, biindabe ni cá lu rollo stiʼ Isaías: «Nuu né Espíritu sti [Jiobá] naa, purti ma ulí naa güe nia ca pobre diidxa ni usieche laacaʼ». Nanna dxíchinu ora biindaʼ Jesús ca diidxaʼ riʼ guniʼbe lá Bixhózebe (Luc. 4:16-21).

⁹ Ante gueeda Jesús lu Guidxilayú riʼ, ca maestru stiʼ ca religión que bicaacaʼ binni gusaana de iquiiñecaʼ lá Dios. Zanda guininu qué liica ñuulaʼdxiʼ Jesús ni biʼniʼ ca binni que. Gúdxibe ca xhenemígube ca diidxaʼ riʼ: «[Naa zendaʼ lu lá Bixhozeʼ, TNM] peru cadi culabi tu naa. Pa ñeeda stobi ni iruti nuseenda laa la? ngue huaxa nulabi tu laa» (Juan 5:43). Ne dxi mayaca gátibe guniʼbe xii nga ni jma risaca para laabe, ora gúdxibe Bixhózebe ca diidxaʼ riʼ: «Bixhozeʼ, bisisaca lá lu jma» (Juan 12:28). Ne qué ridxagayaanu gánnanu nabé bizeeteʼ Jesús ni lu oración ni cadúʼndanu lu tema riʼ.

10, 11. 1) Xi biʼniʼ Jesús para bisiidiʼ lá Bixhoze ca discípulo stiʼ. 2) Xiñee cusiidiʼ ca xpinni Jesús lá Jiobá ca dxi riʼ.

¹⁰ Jesús biʼniʼ orar sicaríʼ: «Cani ulee chu lu lade binni guidxilayú bidii lu naa la? ma bisiide laaca ximodo lii. Stilu laacabe, peru bidii lu laacabe naa ne ma cuzuuba cabe stiidxa luʼ». Laaca guniʼbe: «Naa ma chaa ra nuu luʼ, ma qué ziaana ndaani guidxilayú riʼ, peru laacabe ziaana cabe raríʼ. Bixhoze ni nachaʼhuiʼ, cani bidiiu naa ca rinaba lii gapa lu [laacabe pur laluʼ, TNM] ti gaca cabe tobi si casi laanu» (Juan 17:6, 11).

¹¹ Dxi bisiidiʼ Jesús ca discípulo stiʼ lá Bixhoze la? cadi guníʼsibe ni, sínuque laaca bisiidibe laacaʼ guiénecaʼ tuu nga Jiobá, xi ca guenda nápabe ne pabiáʼ nadxiibe laanu (Éx. 34:5-7). Yanna, maʼ naca Jesús rey guibáʼ ne dede racá cayacanebe ca xpínnibe tiempu riʼ para gusiidicaʼ lá Jiobá lu guidubi naca Guidxilayú. Xiñee cayúnicabe dxiiñaʼ riʼ yaʼ. Para ganda gacanécabe stale binni guiziidiʼ de Jiobá ante guinitilú guidxilayú malu riʼ. Ora guidxiña dxi gulabe ca Testigu stibe, zanna binni laabe nga Jiobá (Ezeq. 36:23).

12. Xi chonna cosa naquiiñeʼ gúninu para ganda gúninu dxiiñaʼ ni bisaanané Jesús laanu.

¹² Biʼniʼ mandar Jesús ca discípulo stiʼ gunduuxecaʼ dxiiñaʼ ni bizulú. Laabe biʼniʼ orarbe sicaríʼ: «Cásica biseenda lu naa ndaani guidxilayú ri la? zacaca ma biseenda laacabe». Jesús gucané laacabe para guchaacabe modo laacabe ti ganda gúnicabe dxiiñaʼ ni biaananécabe. Ne lu oración stiʼ Jesús gunabaʼ Bixhoze gacané ca discípulo stiʼ gúnicaʼ chonna cosa risaca. Primé, gunábabe cadi gúnicaʼ cani runi binni guidxilayú ni nuu lu náʼ Binidxabaʼ. Guiropa, guzuubacabe Stiidxaʼ Dios ne chúʼcabe nayá nezalú. Guionna, stale biaje gunábabe Bixhózebe chuʼ ca discípulo stibe tobi si cásica laabe ne Bixhózebe. Pur cani maʼ bizéʼtenu ca, cada tobi de laanu naquiiñeʼ guiníʼ ique: «Ñee cayuneʼ guionnaʼ cosa ni gunabaʼ Jesús ca la? Nanna Jesús pa gúnicabe stipa pur gúnicabe ni ná cani la? zuni cré binni Dios biseendaʼ laa (biindaʼ Juan 17:15-21).

13. Ximodo bicabi Jiobá oración stiʼ Jesús lu primé siglu que.

¹³ Ñee bicabi Jiobá oración stiʼ Jesús la? Bicábibe ni, ne zacapeʼ nga na libru stiʼ Hechos. Pa guiníʼ ique chaahuinu ni, nagana nga ñuu ca discípulo stiʼ Jesús ni bibani lu primé siglu que tobi si pa qué nicabi Jiobá oración stiʼ Jesús. Xiñee yaʼ. Purtiʼ ládecabe nuu judíu ne ni cadi judíu, ricu ne pobre, esclavu ne xpixuaanaʼ ca esclavu. Peru guirácabe guyuucabe tobi si casi ti cuerpu ne ique ca nga Jesús (Efes. 4:15, 16). ¡Ti guendaridxagayaa ngue nuucabe tobi si lade ca binni ni nuu lu náʼ Binidxabaʼ! Ne gunda guyuucabe zacá pur espíritu stiʼ Jiobá (1 Cor. 3:5-7).

14. Ximodo maʼ bicabi Dios oración stiʼ Jesús ca dxi stinu riʼ.

¹⁴ Triste guininu ni, peru guti si ca apóstol que maʼ qué ñuucabe tobi si. Laga stale binni bidxiideche Jiobá cásica maca bieeteʼ ni, ne de raqué biree ca religión ni qué rusiidiʼ ni dxandíʼ (Hech. 20:29, 30). Peru lu iza 1919, gulee Jesús ca discípulo ni bibí pur espíritu santu lu náʼ ca religión ni qué rusiidiʼ ni dxandíʼ ne bitagulisaabe laacaʼ para chuʼcaʼ «tobi si» (Col. 3:14). Cumu nabé rucheeche grupuhuiiniʼ riʼ diidxaʼ la? cayacanécabe jma de gadxe millón de «xcaadxi dendxu» ni zá «de irá guidxi ne irá idioma riníʼ binni» ne laacaʼ bidaagucaʼ grupuhuiiniʼ riʼ para beeda gácacaʼ tobi si (Juan 10:16; Apoc. 7:9). Zanda guininu, nabé sicarú modo bicabi Jiobá oración stiʼ Jesús, ora guniʼbe ca diidxaʼ riʼ: «Ne zacá ganna binni lii biseenda lu naa ne nadxiiu laacabe casi nadxiiu naa» (Juan 17:23).

15. Xi gunabaʼ Jesús lu oración stiʼ pur ca discípulo ni bibí pur espíritu santu.

¹⁵ Gueelaʼ 14 stiʼ beeu nisán, chupa chonna hora ante guni Jesús oración stiʼ, bisisácabe ca apóstol stibe. Ximodo bíʼnibe ni yaʼ. Ra bíʼninebe laacaʼ ti pactu para guni mandarnebe laacaʼ lu Reinu stibe (Luc. 22:28-30; Juan 17:22). De raqué gunábabe pur cani gueeda gaca xpínnibe ni bibí pur espíritu santu, sicaríʼ guniʼbe: «Bixhozeʼ, racaladxe chuʼ cani bidiiu naa que ra chuaaʼ, ti gu ya cabe enda risaca stinneʼ. Bisisaca lu naa purti gunaxhii lu naa dede dxi caʼru chá guidxilayú» (Juan 17:24). Lugar de nidxiichi ca xcaadxi dendxuʼ, laga riéchecaʼ guninecaʼ cani bibí dxiiñaʼ. Ndiʼ nga sti cosa ni rusihuinni nuu ca xpinni Cristu tobi si.

16, 17. 1) Ora biluxe Jesús oración stiʼ, xi guniʼbe qué zusaana de gúnibe. 2) Xi cadi naquiiñeʼ gusaana de gúninu.

¹⁶ Pur ni rusiidiʼ guiráʼ ca religión ni nuu yanna riʼ, stale binni qué naʼ gudii cuenta pa napa Jiobá ti guidxi ni nuu tobi si ne dxandíʼ runibiaʼcaʼ laabe. Ne ngaca nga bizaaca ca dxi stiʼ Jesús, ngue runi bilúxebe oración stibe né ca diidxaʼ riʼ: «Bixhozeʼ, lii ruʼnu jneza. Neca qué runibiáʼ binni lii, peru naa runebiaʼya lii, ne ma nanna ca xpinne lii biseenda lu naa. Ma bisiene laacabe tu naca luʼ ne zusiene ruaʼ laacabe ti gapa cabe naa ndaani ladxidóʼ cabe para ganaxhii saa cabe casi nadxii lu naa» (Juan 17:25, 26).

¹⁷ Guirutiʼ zanda guiníʼ qué ñuni Jesús cani gunabaʼ lu oración stiʼ. Laabe nga zanírube lu ca neza binni ridagulisaa ne cadi cusaanabe de gacanebe laanu gusíʼdinu binni lá Bixhózebe ne cani naguixhe ique guni. Cadi gusaana de gúninu ni gábibe laanu, gucheechenu diidxaʼ né stale gana ne gacanenu binni gácacaʼ xpinni Cristu (Mat. 28:19, 20; Hech. 10:42). Laaca naquiiñeʼ gúninu stipa ti cadi gusaana de chuʼnu tobi si. Zacá zúninu ni gunabaʼ Jesús lu oración stiʼ, zusisácanu lá Jiobá ne qué zusaana de chuʼnu nayecheʼ.