Guiranu casi ñácanu tobi si gusisácanu lá Jiobá

«Lacuuné naa naróʼ stiʼ Jiobá, ne guiranu casi ñácanu tobi si gusisácanu labe.» (SALMO 34:3.)

1. Xi ejemplu bisaana Jesús para laanu dxi biʼniʼ xhiiñaʼ Dios ndaaniʼ guidxilayú riʼ.

GUEELAʼ 14 stiʼ nisán stiʼ iza 33 que, Jesús ne ca apóstol stiʼ biindacaʼ para Jiobá ndaaniʼ ti cuartu huiiniʼ ni nuu luguiáʼ stiʼ ti yoo de guidxi Jerusalén (Mateo 26:30). Cumu ngue nga últimu gueelaʼ nuucabe tobi si la? jnézapeʼ nga bilúxecabe zaqué guendaridagulisaa ni gúpacabe que. Dede dxi bizulú Jesús bicheeche diidxaʼ ne dede ora biluxe la? bisisácabe Bixhózebe ne bisiidibe binni tu láʼ Bixhózebe ne bíʼnibe ni ne stale gana (Mateo 4:10; 6:9; 22:37, 38; Juan 12:28; 17:6). Zacá nga rihuinni biʼniʼ Jesús cásica biʼniʼ hombre ni bicaa salmo riʼ: «Lacuuné naa naróʼ stiʼ Jiobá, ne guiranu casi ñácanu tobi si gusisácanu labe» (Salmo 34:3). ¡Guizáʼ sicarú ejemplu bisaana Jesús ca para chinándanu!

2, 3. 1) Ximodo nánnanu laaca diidxaʼ riguixhená nga ni cá lu Salmo 34. 2) Xi chiguidúʼndanu lu tema riʼ ne lu stobi ca.

² Gudiʼdiʼ si chupa chonna hora de biindané apóstol Juan Jesús la? biiyabe maʼ gadxé ni cayaca: biiyabe modo cayati Maestru stibe ne xhupa hombre lu yaga. Ca soldadu romanu que gulúzacaʼ ñee guiropaʼ hombre que ti guiuba gáticaʼ. Peru ora bidxíñacabe ra nuu Jesús la? biiyacabe maʼ gútibe, ngue runi maʼ qué niguzadícabe ñeebe. Juan na gúcani zacá ti gaca ni na sti ndaa stiʼ Salmo 34: «Qué zaluuza nin ti dxita ládibe» (Juan 19:32-36; Salmo 34:20).

³ Lu Salmo 34 ca laaca zeeda xcaadxi cosa ni nabé risaca para ca xpinni Cristu. Nga runi, lu tema riʼ ne lu stobi ca chiguidúʼyanu ximodo nuu David ora bicaa ca diidxaʼ zeeda luni ne pabiáʼ zacané cani laanu.

Bixooñeʼ David de Saúl

4. 1) Xiñee gulí Dios David para gaca rey lugar stiʼ Saúl ndaaniʼ guidxi Israel. 2) Xiñee guizáʼ gunnaxhii Saúl David.

⁴ Nahuiiniruʼ David dxi biʼniʼ mandar Saúl ndaaniʼ guidxi Israel; peru dxi maʼ qué nuzuubaʼ Saúl stiidxaʼ Dios la? maʼ qué niguu ndaayaʼ diʼ laabe. Ngue runi gudxi Samuel ni riguixhená que laabe: «Yannadxí maʼ guxha Jiobá lii derechu de guni mandarluʼ Israel, ne zudiibe ni sti binni casi lii ni jma sicarú modo laa» (1 Samuel 15:28). Qué nindaa biseendaʼ Jiobá Samuel para cuí David, xiiñiʼ Jesé ni jma nahuiiniʼ, para gaca rey stiʼ Israel. Espíritu stiʼ Dios maʼ qué ñuu diʼ ni luguiáʼ Saúl, ngue runi nabé guyuube triste. Pur ngue la? yenécabe David ra nuube para chuʼ casi mozo stibe ndaaniʼ guidxi Guibeah purtiʼ laa guizáʼ nanna guxhidxi saa. Saa ni bixhidxi David que guizáʼ gudixhedxini ladxidóʼ Saúl, ne laa nabé gunnaxhii laabe (1 Samuel 16:11, 13, 21, 23).

5. Xiñee gucananalaʼdxiʼ Saúl David, ne xi biʼniʼ David pur ngue.

⁵ David gupa ndaayaʼ stiʼ Jiobá, ne gupa si dxi bihuinni zaqué ni. Gucané Jiobá laabe para biitibe Goliat, filisteu que, ne guizáʼ gucané laabe dede guluu ca binni Israel naróʼ stibe purtiʼ nabé biʼniʼ ganarbe guiráʼ ra yetíndebe. Ora biiyaʼ Saúl pabiáʼ caguu Dios ndaayaʼ David la? bidxiichi dede gucananalaʼdxiʼ laabe. Chupa biaje bisindaa Saúl lanza laabe laga zúbabe cuxhídxibe arpa para gucaadiaga, peru guiropaʼ tiru ca guca David nagueenda, ngue runi qué nigaa diʼ. Lu guionna biaje gucalaʼdxiʼ Saúl ñuuti laabe la? maʼ biiyabe naquiiñeʼ guxooñebe de Saúl ti cadi guuti laabe. Yanna, cumu nisi cuyubi Saúl modo guinaazeʼ laabe para guuti laabe la? bireebe de Israel ne biyúbibe sti guidxi ra guilabe (1 Samuel 18:11; 19:9, 10).

6. Xiñee biʼniʼ mandar Saúl gati ca binni de guidxi Nob.

⁶ Ora zeʼ David neza ra dxaaga Israel sti guidxi la? biuube ndaaniʼ guidxi Nob, ra nuu tabernáculo stiʼ Jiobá. Ndaaniʼ guidxi que nga yenábabe ni gobe ne ni go xcaadxi hombre huiiniʼ ni bidaagucaʼ laabe dede dxi bixooñebe de Saúl que. Ora gunna Saúl bidii xaíque stiʼ ca binni ruzaaquiʼ guʼxhuʼ que ni gócabe ne laaca bidii laacabe espada ni guxha David Goliat que la? guizáʼ bidxiichi ne biʼniʼ mandar gati guiráʼ binni de guidxi que, dede ne 85 binni ni ruzaaquiʼ guʼxhuʼ nuu raqué (1 Samuel 21:1, 2; 22:12, 13, 18, 19; Mateo 12:3, 4).

Bilabe sti biaje

7. Xiñee zándaca guizaaca David xiixa guidxi Gad.

⁷ Bixooñeʼ David de guidxi Nob ne guyebe xquidxi ca filisteu ne gunábabe gacané rey Akís de guidxi Gat laabe, guidxi ra gule Goliat que, riaanani biaʼ 40 kilómetru de Nob neza ra riaaziʼ gubidxa. Zándaca guníʼ íquebe guizáʼ nagana para chiyubi Saúl laabe raqué. Peru, qué nindaa binibiáʼ ca xpinni rey que laabe. Ora gunna David ni la? guizáʼ bidxibi purtiʼ zándaca guni rey Akís laabe xiixa (1 Samuel 21:10-12).

8. 1) Xiná Salmo 56 bizaaca David ndaaniʼ guidxi Gat. 2) Ximodo gunda bilá David sti biaje.

⁸ Óraque gunaazeʼ ca filisteu que David. Zándaca dxi que nga bicaabe salmo riʼ, ra gunábabe Jiobá: «Gudaa ca nisa rieeteʼ luaʼ ora ruunaʼ [...] ndaaniʼ rii stiluʼ» (Salmo 56:8 ne ni cá ra ruzulú capítulo ca). Lu ca diidxaʼ ca nga rihuinni nánnabe zacané Jiobá laabe ne qué zusiaandaʼ ni cadíʼdibe que, sínuque zapa laabe ne guendarannaxhii. Ne laaca biyúbibe ximodo gusiguiibe rey que: bíʼnibe casi ora cadxé íquebe. Ora biiyaʼ Akís zaqué nuube la? gudindené ca xpinni xiñee yenecaʼ tobi ni cadxé ique ra nuu. Racá nga rihuinni gucané Jiobá laabe pur ni bíʼnibe ca, ne guleecabe laabe de guidxi que. Dxi ca nga bilá David sti biaje (1 Samuel 21:13-15).

9, 10. Xiñee bicaa David cani cá lu Salmo 34, ne tuu nga cani zándaca guníʼ íquebe ora bicaabe cani.

⁹ Biblia cadi caníʼ diʼ pa yenanda ca xpinni David laa Gat o pa biaanacaʼ ndaaniʼ ca guidxi huiiniʼ ni nuu gaxha de Israel para gápacaʼ laabe. Peru, zándaca biéchecabe ora biiyacabe laabe sti biaje ne gúdxibe laacaʼ ximodo bilá Jiobá laabe sti tiru. Ni guca ca nga bicaa David guiníʼ ca diidxaʼ ni cá lu Salmo 34 ca, casi na ra ruzulú capítulo ca. Lu gadxe versículo ni zeeda primé ca la? David cusisaca Jiobá purtiʼ bilá laabe ne cayábibe ca xpínnibe gusisacanecaʼ laabe Jiobá, purtiʼ laa nga ni jma nadipaʼ para gulá xquidxi (Salmo 34:3, 4, 7).

¹⁰ Ndaaniʼ cueva ni nuu Adulam que nga ra bilá David ne ca xpinni, nuuni biaʼ 15 kilómetru de guidxi Gat neza ra rindani gubidxa, ndaaniʼ tobi de ca guiʼxhiʼ roʼ stiʼ Israel. Raqué bidaaguʼ xcaadxi israelita laacabe purtiʼ cadi cayuuláʼdxicaʼ modo cayuni mandar Saúl (1 Samuel 22:1, 2). Zándaca ora caníʼ ique David ca hombre ca nga bicaa cani zeeda lu versículo 8 dede 22 stiʼ Salmo 34. Cani cá lu ca versículo ca laaca risaca cani para laanu, nga runi zacanécani laanu stale ra guiduʼndaʼ chaahuinu xiná cani.

Ñee laaca racaláʼdxinu gúninu cásica biʼniʼ David ca la?

11, 12. Xi razón nápanu para cadi gusaana de gusisácanu Jiobá.

¹¹ «Dxandipeʼ zaguaa naróʼ stiʼ Jiobá guiráʼ ora; ruaa qué zusaana de gusisaca laabe.» (Salmo 34:1.) Guyuu stale cosa ni qué ñapa David neca biquiiñebe cani dxi bixooñebe de Saúl. Ne lu cani bicaabe ca culuíʼ cani qué nudiidibe lugar nucueeza guiráʼ nga laabe de nusisácabe Jiobá. ¡Guizáʼ galán ejemplu ca para chinándanu ora tiidinu lu guendanagana! Ratiica nuunu la? ni jma naquiiñeʼ gúninu nga gusisácanu Jiobá, casi pa nuunu ra scuela o ra dxiiñaʼ, pa nuunu ne ca bíʼchinu o ca bizáʼnanu ne ora canagucheechenu diidxaʼ. Guiníʼ íquenu pabiáʼ stale nga ca razón ni nápanu para gusisácanu Jiobá, ridúʼyanu guiráʼ cani bizaʼbe ca ne rusiidicani laanu, o guiráʼ modo huayacanebe xquídxibe para guni ni nabe lu Guidxilayú riʼ. Neca binni gulené donda nga ca xpinni Jiobá la? riquiiñebe laacaʼ lu stale cosa risaca ni cayúnibe yanna riʼ. Guiráʼ ni huayuni Dios ca qué zanda diʼ guchaaganu cani ne cani runi ca binni ni risaca nuu ndaaniʼ Guidxilayú riʼ. Ñee cadi laaca rininu casi guníʼ David riʼ la?: «Gastiʼ stobi casi lii lade ca dios ca, Jiobá, ne gastiʼ dxiiñaʼ casi cani rúniluʼ» (Salmo 86:8).

¹² Cásica hombre ni bicaa Salmo ca, laanu laaca rinabaʼ ladxidoʼno gusisácanu Jiobá guiráʼ ora pur guiráʼ xixé ni huayuni. Ne laaca guizáʼ nayecheʼ riuʼnuʼ gánnanu qué ziuu dxi guiree Reinu ca de lu naʼ Jesucristu, ni zá de David que (Apocalipsis 11:15). Nga culuíʼ maʼ gaxha nuu dxi guinitilú guiráʼ cosa malu nuu yanna riʼ. Jma de xhoopaʼ mil millón binni zándaca gueeda gati ne maʼ qué ziuu dxi guibánicaʼ sin qué chuʼ dxi gáticaʼ. Nga runi, yanna nga jma caquiiñeʼ gábinu binni maʼ cadi candaa chigacané Reinu stiʼ Dios binni ne caquiiñeʼ gacanenu laacabe gusisacanécabe laanu Jiobá. Laaca naquiiñeʼ gacanenu binni ganna de «stiidxa Dios» ora tiica si, ante guedandá dxi ca (Mateo 24:14).

13. 1) Tu pur ngue na David zuni sentir naróʼ, ne tu binni bicaabe gusisaca Jiobá. 2) Xi rucaa ca binni nachaʼhuiʼ ca guidxíñacaʼ ra nuu ca xpinni Cristu yanna riʼ.

¹³ «Zuneʼ sentir naa naróʼ pur Jiobá; cani nadóʼ zucaadiágacaʼ ne ziéchecaʼ.» (Salmo 34:2.) Qué ñuni sentir diʼ David naróʼ pur xiixa ni biʼniʼ, casi dxi bisiguiibe rey de Gat que, sínuque gúnnabe Jiobá ngue bilá laabe ne gucané laabe bireebe de raqué (Proverbios 21:1). Ngue runi, guluube naróʼ stiʼ Jiobá ne cadi stibe, ne ngue nga ni bicaa xcaadxi binni nachaʼhuiʼ guidxíñacaʼ Jiobá. Stobi ni bisisaca lá Jiobá nga Jesús, ne pur nga bidxiña ca binni ni nachaʼhuiʼ ne ni racalaʼdxiʼ guiziidiʼ ra nuu Dios. Yanna riʼ laaca cadxiña stale binni nachaʼhuiʼ de guiráʼ guidxi ra nuu ca xpinni Cristu ni bibí ni nápacaʼ Jesús casi Xaíque sticaʼ (Colosenses 1:18). Guizáʼ riecheʼ ladxidóʼcabe ora rucaadiágacabe ca xpinni Dios cusisácacaʼ labe ne ora rucaadiágacabe cani zeeda lu Biblia ni racané espíritu santu stiʼ Dios laacabe guiénecabe (Juan 6:44; Hechos 16:14).

Ca guendaridagulisaa ca racanécani iguidxi fe stinu

14. 1) Ñee stubi si David bisisaca Jiobá la? 2) Xi ejemplu bisaana Jesús de modo guni adorarnu Dios nezalú stale binni.

¹⁴ «Lacuuné naa naróʼ stiʼ Jiobá, ne guiranu casi ñácanu tobi si gusisácanu labe.» (Salmo 34:3.) David bisisaca Jiobá ora guyuu stubi, peru laaca gúdxibe ca xcompañérube gusisacanecaʼ laabe lá Jiobá. Jesucristu, David ni jma risaca, laaca guizáʼ guyuulaʼdxiʼ gusisaca Jiobá nezalú stale binni. Bíʼnibe ni ra sinagoga ni nuu xquídxibe, ora guca saa ndaaniʼ yuʼduʼ stiʼ Jerusalén ne ora guyuunebe ca discípulo stibe (Lucas 2:49; 4:16-19; 10:21; Juan 18:20). Laanu laaca nayecheʼ ziuʼnu pa chinándanu casi biʼniʼ Jesús, ra gusisácanenu ca bíʼchinu ne ca bizáʼnanu Jiobá ora tiica, «ne jma rusi yanna purti caduʼya nu ma zeda dxiña dxi» que (Hebreos 10:24, 25).

15. 1) Ximodo gucané cani bizaaca David que ca binni ni guzané laa. 2) Ximodo racané ca guendaridagulisaa ca laanu.

¹⁵ «Gunabadiidxaʼ Jiobá, ne laabe bicábibe naa, ne bilabe naa de guiráʼ ni ruchibi naa.» (Salmo 34:4.) Para David guizáʼ risaca ngue ni bizaacabe ca, sicaríʼ guniʼbe: «Ni cayacaná riʼ bicaa ridxi, ne Jiobá peʼ bicaadiaga. Ne lu guiráʼ guendananá stiʼ bilabe laa» (Salmo 34:6). Ora ridagulisaanu la? stale biaje randa rininu ximodo huayacané Jiobá laanu guni huantarnu ca guendanagana stinu. Ora guininu cani zacanenu xcaadxi bíʼchinu ne bizáʼnanu iguidxi fe sticaʼ, cásica gucané ni bizaaca David que iguidxi fe stiʼ cani guzané laabe. Laacabe «biiyadxícabe [Jiobá] ne nayecheʼ guyuucabe, ne qué ñuu xi pur nituí lúcabe» (Salmo 34:5). Neca cuxooñelúcabe de rey Saúl la? qué nituí diʼ lúcabe purtiʼ nánnacabe nuuné Dios David ne nayecheʼ guyuucabe. Cásica cani deruʼ cayuu ndaaniʼ xquidxi Dios ne zaqueca cani maʼ xadxí de naca xpinni Cristu la? ruyúbicaʼ gacané Jiobá laacaʼ. Ora racané Jiobá laacabe la? nayecheʼ riuucabe ne nga rusihuinni cadi cá íquecabe guixélecabe de laabe.

Rudiʼnu xquíxepeʼ Dios pur racané ca ángel ca laanu

16. Ximodo huaquiiñeʼ Jiobá ca ángel stiʼ para gulá laanu.

¹⁶ «Ángel stiʼ Jiobá naguu leʼ cani ridxibi laabe, ne rulabe laacaʼ.» (Salmo 34:7.) David qué niníʼ ique diʼ laa si nga naquiiñeʼ gulá Dios. Nécapeʼ laabe nga ni gulí Jiobá para gácabe rey stiʼ guidxi Israel la? nánnabe riquiiñeʼ Jiobá ca ángel stiʼ para gapa guiráʼ ca xpinni ni ruzuubaʼ stiidxaʼ, neca para binni huaxiéʼ risácacabe. Yanna riʼ, cani cayuni adorar Dios jneza la? laaca cayapa Dios laacaʼ. Casi dxi gudíxhecabe nunduuxecabe ca testigu stiʼ Jiobá ndaaniʼ guidxi Alemania la? qué ñanda diʼ ñúnicabe ni, ne ngaca racaláʼdxicabe gúnicabe ndaaniʼ stale guidxi roʼ, casi ndaaniʼ guidxi Angola, Malaui ne Mozambique. Peru laaca gastiʼ ganda gúnicabe. Laga caroobaʼ xquidxi Dios ndaaniʼ ca guidxi ca ne cusisácacaʼ labe. Xiñee gastiʼ qué ganda guni ca binni ca laacabe yaʼ. Purtiʼ Jiobá caquiiñeʼ ca ángel stiʼ para gapa laacabe ne gabi laacabe xi gúnicabe (Hebreos 1:14).

17. Ximodo racané ca ángel stiʼ Dios laanu.

¹⁷ Ca ángel ca laaca racanecaʼ guiree de ndaaniʼ xquidxi Jiobá cani cucaa xcaadxi xpínnibe guchee (Mateo 13:41; 18:6, 10). Ne neca qué gudiʼnu cuenta ora racanécabe laanu la? ribeecabe cani cucá laanu gúninu ni na Jiobá ne rápacabe laanu de cani racalaʼdxiʼ guxheleʼ laanu de Dios. Ne sti dxiiñaʼ ni jma risaca cayúnicabe nga, culuíʼcabe laanu modo chindanu ra nuu guiráʼ binni para guinínenu laacaʼ «stiidxa Cristu ni qué ziuu dxi initilú», ne dede para chindanu ca lugar ra ruluíʼ nagana para gucheechenu diidxaʼ (Apocalipsis 14:6). Lu ca libru ne ca revista ca zeeda caadxi ejemplu ni bizaaca ra culuíʼ dxandíʼ racané ca ángel ca laanu, ne cumu stale nga ni culuíʼ zacá ni la? qué zanda diʼ guininu cadi cayacané ca ángel ca laanu.a

18. 1) Xi naquiiñeʼ gúninu ti cadi gusaana de gacané ca ángel ca laanu. 2) Xi chiguidúʼndanu lu sti tema ca.

¹⁸ Naquiiñeʼ gusisácanu lá Jiobá neca tiidinu ra jma nagana ti gapa ca ángel ca laanu. Guietenaláʼdxinu naguu ca ángel sti Jiobá leʼ cani ridxibi si laabe. Xi riníʼ ca diidxaʼ ca yaʼ. Xii nga guidxíbinu Dios, ne ximodo zanda guidxíbinu laabe. Xiñee racalaʼdxiʼ ti Dios ni nadxii laanu guidxíbinu laa yaʼ. Sti tema ca zacabi ca guendarinabadiidxaʼ ca.

[Cani cá ñee yaza]

Xi nicábiluʼ

• Xi guendanagana gudiʼdiʼ David dxi nahuiiniʼ.

• Cásica David, gunáʼ nga ni jma rusisácanu lu xquendanabáninu.

• Ximodo ridúʼyanu ca guendaridagulisaa ca.

• Ximodo riquiiñeʼ Jiobá ca ángel stiʼ para gacanecaʼ laanu.

[Mapa ni zeeda lu yaza 23]

Ramá

Gat

Ziqlag

Guibeah

Jerusalén

Adulam

Queilá

Hebrón

Zif

Hores

Maón

Nob

Belén

En-guedí

Carmelo

Mar Salado

[Dibuju/foto ni zeeda lu yaza 25]

Lu ca guendaridagulisaa ca nabé riguidxi fe stinu ora riníʼ ca bíʼchinu ne ca bizáʼnanu ni bizaacacaʼ

[Dibuju/foto ni zeeda lu yaza 23]

Mapa: bireeni lu ca mapa stiʼ Pictorial Archive (Near Eastern History) Est. and Survey of Israel

[Dibuju/foto ni zeeda lu yaza 23]

Neca canaguxooñe David de Saúl que la? bisisácabe lá Jiobá