Ñee caquiiñeʼ ca xpinni Cristu ti santuariu para guni adorarcaʼ Dios la?

GUIRÁʼ iza rié jma de xhoopaʼ millón binni ti lugar ra zuhuaa stale yaga cedru ni nuu lu península stiʼ Shima, guidxi Japón. Riécabe ra nuu Gran Santuariu stiʼ Ise, ra runi adorar binni Amaterasu Omikami, diosa stiʼ Gubidxa ni napa religión sintoísta, maʼ raca biaʼ chupa mil iza. Ora chindá binni lugar riʼ riguiibináʼ ne laaca riguiibiruaa para chuʼ nayá. Despué, ora maʼ zuhuaacabe ti lugar ra raca orar (haiden), runirúcabe xcaadxi ritual: rindete íquecabe, rigapa nácabe ne runi orárcabe diosa que.a Religión sintoísmo ca rudiini lugar cheʼ ca xpinni ni lade sti religión. Nuu budista, ni na xpinni Cristu laa ne binni ni napa sti religión, para laacaʼ gastiʼ naca gúnicaʼ ni rúnicabe ndaaniʼ santuariu stiʼ religión sintoísta.

Stale de ca religión naroʼbaʼ ca nápacaʼ santuariu sticaʼ, ne rié millón binni riganna cani.b Ndaaniʼ ca guidxi ra nuu binni ni na zinanda Cristu laacaʼ nuu stale yuʼduʼ ne yoo ni bizáʼcabe para Jesús, María ne para ca bidóʼ ca. Laaca nuu santuariu ca lugar ra nácabe guca xiixa ni zeeda lu Biblia o ra nacubi guca ti milagru, ne zaqueca ca lugar ra nápacabe ca bidóʼ stícabe. Stale binni rié ra nuu ca santuariu riʼ purtiʼ runi crecaʼ jma zucaadiaga Dios oración sticaʼ pa checaʼ ca lugar risaca riʼ. Nuu tu laa nabé zitu rizá para chindá ra nuu ti santuariu ti zacá gusihuinni pabiáʼ naroʼbaʼ fe napa.

Ñee caquiiñepeʼ chuunu ndaaniʼ ti santuariu para gucaadiaga Dios oración stinu ne guicabi laanu la? Ñee riuuláʼdxibe cheʼ binni ca lugar riʼ la? Peru ni jma risaca, ñee caquiiñeʼ guni adorar ca xpinni Cristu Dios ndaaniʼ ti santuariu la? Respuesta stiʼ ca guendarinabadiidxaʼ riʼ zuluíʼ cani laanu ximodo guidúʼyanu guni adorar binni ndaaniʼ santuariu ne ximodo racalaʼdxiʼ Dios guni adorarnu laa.

Modo byuiʼné Jesús ti gunaa de Samaria diidxaʼ rusihuínnini xi riníʼ ique Dios guni adorárcabe ca lugar risaca o ca santuariu ca. Ti dxi zebe neza Samaria, gulezadxibe ti ratu cueʼ ti bizé gaxha de guidxi Sicar para guiziiláʼdxibe. Bizulube guníʼnebe ti gunaa zicaa nisa raqué. Ra cayuíʼcabe diidxaʼ que, gudxi gunaa que laabe xi runi ca judíu gadxepeʼ de ni runi ca Samaritanu: «Ca bixhoze gola du la? lu dani ri bisisaca ca Dios, peru laatu na tu Jerusalén nga usisaca binni Dios» (Juan 4:5-9, 20).

Dani Guerizim nga ni caníʼ gunaa que, ni nuu biaʼ 50 kilómetru ladu guiaʼ stiʼ Jerusalén. Raqué nga gupa ca samaritanu ti yuʼduʼ ra bíʼnicaʼ saa casi Pascua. Peru lugar de ñabi Jesús laabe xiñee zaqué rúnicabe la? gudxi laabe sicaríʼ: «Señora, bini cre ni chi tidxe lii riʼ. Zadxiña dxi nin ca lu dani riʼ, nin ca Jerusalén qué zusisaca cabe Dios Padre» (Juan 4:21). ¡Nabé bidxagayaa gunaa que modo bicábibe, jmaruʼ si purtiʼ judíu laabe! Xiñee maʼ qué zuni adorárcabe Dios ndaaniʼ yuʼduʼ stiʼ yaʼ.

Ne laaca gudxi Jesús laabe: «Peru zadxiña dxi, ne yanna nga laani, cani dxandíʼ runi adorar Bixhozeʼ zúnicaʼ ni né espíritu ne ni dxandíʼ, ne Bixhozeʼ cuyubi binni ni guni adorar laa zacá» (Juan 4:23, Traducción del Nuevo Mundo). Stale siglu yuʼduʼ stiʼ Jerusalén que nga lugar ra biʼniʼ adorar ca judíu que Dios. Riécabe raqué chonna biaje lu ti iza para gúnicabe sacrificiu para Dios stícabe, Jiobá (Éxodo 23:14-17). Guníʼ Jesús zuchaa modo cayuni adorárcabe Dios, cani dxandíʼ xpínnibe zuni adorarcaʼ laabe «né espíritu ne ni dxandíʼ».

Yuʼduʼ que gurí ni ti lugar ra biʼyaʼ binni ni. Peru espíritu ne ni dxandíʼ ca cadi naca cani cosa ni zanda canaʼ binni ne cadi caquiiñeʼ chuʼ cani ti lugar ni ruuyaʼ binni. Nga runi Jesús guníʼ cadi caquiiñeʼ diʼ ti lugar casi dani Guerizim, yuʼduʼ nuu Jerusalén o sti lugar ni risaca para gaca adorar Dios jneza.

Ra caniʼné Jesús gunaa samaritana que gúdxibe laa «zadxiña dxi» zadxaa modo raca adorar Dios. Dxi que bedandá ni ra gútibe, raqué nga biluxe ley gucuaa Moisés ra ca ximodo guni adorar ca judíu (Romanos 10:4). Peru, xiñee guníʼ Jesús «yanna nga laani» yaʼ. Purtiʼ ra gúcabe Mesías, gulibe ca discípulo stibe ni nánnabe zuni ni na ca diidxaʼ riʼ: «Dios espíritu laa, ne cani runi adorar laabe naquiiñeʼ gúnicaʼ ni né espíritu ne ni dxandíʼ» (Juan 4:24, TNM). Yanna, xi riníʼ ca diidxaʼ guni adorarnu Dios né espíritu ne ni dxandíʼ ca yaʼ.

Ora guníʼ Jesús guni adorarnu né espíritu cadi caniʼbe gúninu ni modo riuuláʼdxinu, sínuque caniʼbe chinándanu ni na ni bidii Dios laanu para gacané laanu ne laani nga espíritu santu stiʼ, tobi de ca cosa ni racané ni laanu nga rusiene ni laanu Stiidxaʼ Dios (1 Corintios 2:9-12). Ne ni dxandíʼ ni bizeetebe ca nga cani rusiidiʼ Biblia. Nga runi cadi lugar diʼ ra guni adorarnu Dios ca nga ni risaca. Pa laanu guni adorarnu laabe modo na Biblia ne chinándanu modo na espíritu santu stibe, nga nga ni ziuuláʼdxibe.

Ximodo naquiiñeʼ guʼyaʼ ca xpinni Cristu cheʼ binni ra nuu ca santuariu riʼ ne modo runi adorárcabe ndaaniʼ cani yaʼ. Pur modo guníʼ Jesús naquiiñeʼ guni adorar cani dxandíʼ xpinni Dios, rihuinni qué risaca diʼ para Dios guni adorar binni ndaaniʼ ti santuariu o ti lugar ni para laacaʼ nabé risaca. Biblia cayabi laanu ximodo ruuyaʼ Dios guni adorar binni bidóʼ, sicaríʼ nani: «Lausaana bidóʼ» ne «cadi ucuí tu stobi jlugar Dios» (1 Corintios 10:14; 1 Juan 5:21). Nga runi cani dxandíʼ xpinni Cristu cadi naquiiñeʼ guni adorarcaʼ Dios xiixa lugar ra na binni risaca o ti lugar ni gucaa binni guiníʼ ique raqué nga jma risaca guni adorar. Cumu ngapeʼ nga ni runi ca santuariu ca la? cani dxandíʼ xpinni Cristu qué runi adorarcaʼ Dios ndaaniʼ cani.

Peru ndiʼ qué riníʼ diʼ ni rucueeza Biblia binni de gapa ti lugar ra chuulaʼdxiʼ para guni orar, guʼndaʼ o guiníʼ ique. Riquiiñeʼ ti lugar galán ne ra nuu dxi para guidagulisaa binni ne guiziidicaʼ de Dios. Laaca cadi malu nga gucuí binni ti baʼ stiʼ tuuxa binnilidxi ora gatiʼ. Zándaca guni binni ni purtiʼ nadxii laabe ne racalaʼdxiʼ guietenalaʼdxiʼ laabe. Peru gusisaca binni lugar ca, o guni adorar binni bidóʼ o xiixa cosa lugar ca, nga nga malu ne cadi nga diʼ nga ni bisiidiʼ Jesús.

Nga runi lii cadi caquiiñeʼ cheluʼ dede ra nuu ti santuariu para gucaadiaga Dios ca oración stiluʼ. Laaca qué zacaadiouʼ jma ndaayaʼ purtiʼ si sá xibiluʼ dede ra nuu tobi de laacani. Biblia cusiidiʼ «qué ribeza [Jiobá] ndaani yoo rucuí binni purti laabe nga xpixuaana ibáʼ ne guidxilayú». Peru cadi guiníʼ íqueluʼ zitu nuube de laanu. Zanda guni orarnu laabe, ne laabe zucaadiagabe laanu ra tiica nuunu «purti cadi zitu nuu be, sínuque gaxha doʼ nuu be de cada tobi de laanu» (Hechos 17:24-27).