«Nabé nadxiee cani rusietenalaʼdxuʼ naa»

«Irá ni ucuá lu Xquiʼchi Dios ucuá para usiidi laanu.» (ROMANOS 15:4.)

1. Ximodo rusietenalaʼdxiʼ Jiobá laanu cani naquiiñeʼ gúninu, ne xiñee caquiiñeʼ chuʼ tu gusietenalaʼdxiʼ cani laanu.

JIOBÁ rusietenalaʼdxiʼ laanu xi naquiiñeʼ gúninu ti ganda gudxíʼlunu ca guendanagana ni cadídinu ca dxi stinu riʼ. Rietenaláʼdxinu chupa chonna de laani ora ridúʼndanu Biblia stúbinu, ne xcaadxi ora runadiáganu xi ricábicabe ra ridagulisaanu ne lu ca libana ni ridiʼdiʼ racá. Stale de ni ridúʼndanu o de ni runadiáganu cadi deruʼ cayeeteʼ cani, zándaca maʼ nánnanu cani. Peru cumu laanu nabé nayaʼndaʼ íquenu la? nga runi caquiiñeʼ chuʼ tu gusietenalaʼdxiʼ laanu cani naguixhe Dios guni, ca ley stibe ne cani rizíʼdinu de ca ley ca. Nabé rudiʼnu xquíxepeʼ pur cani rusietenalaʼdxiʼ Dios laanu, purtiʼ rudii cani stipa ne racané cani laanu para cadi guiaandaʼ laanu xiñee gudixhe íquenu gúninu ni na Dios. Nga runi, hombre bicaa salmo riʼ biindabe sicaríʼ para Jiobá: «Nabé nadxiee cani rusietenalaʼdxuʼ naa» (Salmo 119:24).

2, 3. 1) Xiñee guníʼ Jiobá guicá historia stiʼ ca binni ni bibani dxiqué lu Biblia. 2) Xi chonna historia ni zeeda lu Biblia chiguidúʼyanu lu tema riʼ.

² Neca maʼ raca stale siglu de gucuá Stiidxaʼ Dios, racanéruni binni guchaa xquendanabani (Hebreos 4:12). Luni zeeda historia stiʼ stale binni ni bibani dxiqué. Neca nabé maʼ gadxé modo bibani ne modo guníʼ ique ca binni ni ruzeeteʼ Biblia la? ca guendanagana bidxagalúcabe dxiqué zaqueca nga cani cadxagalunu yanna. Stale de ca historia ni zeeda lu Biblia, gucuá cani para gacané cani laanu, ne ruluíʼ cani laanu ejemplu sicarú stiʼ ca hombre ne ca gunaa ni gunnaxhii Dios ne bizuubacaʼ stiidxabe neca gudíʼdicaʼ ra nagana. Lu xcaadxi de laacani rihuinni rixhacalaʼdxiʼ Jiobá ca cosa malu runi binni. Laabe guniʼbe guicá lu Biblia ca historia stiʼ ca binni ni biʼniʼ ni jneza ne cani qué ñuni ni jneza, ti guietenaláʼdxinu ximodo na Dios guibáninu. Zacapeʼ guníʼ apóstol Pablu ne ca diidxaʼ riʼ: «Irá ni ucuá lu Xquiʼchi Dios ucuá para usiidi laanu, ti pur laani gata dxí ladxidóʼ no ne cadi ixhacalaʼdxi nu. Ne zacá cadi guiaana nu de icá lú nu Dios» (Romanos 15:4).

³ Guidúʼyanu chonna historia ni zeeda lu Biblia: ni biʼniʼ David rey Saúl, ni bizaaca Ananías ne Safira, ne ni bizaaca José ne xheelaʼ Potifar. Lu cada tobi de laacani zazíʼdinu xiixa nabé risaca.

Cadi gusaananu Dios

4, 5. 1) Xi guendanagana gupa rey Saúl ne David. 2) Xi biʼniʼ David ora guzánanda Saúl laa.

⁴ Dxi rey Saúl bicheené Dios la? Dios biiyaʼ maʼ qué zanda diʼ guni mandarbe ndaaniʼ xquidxi. Jiobá bidxiideche Saúl ne biseendabe ti ni riguixhená stibe ni láʼ Samuel para cuibe David ti gueeda gaca rey stiʼ guidxi Israel. Dxi bihuinni nabé nadxibalú David para tinde la? guidxi que nabé guluu naróʼ stibe, ngue runi Saúl biiyaʼ laabe casi ti xhenemigu. Dede gucalaʼdxiʼ ñuuti laabe stale biaje, peru qué ñanda ñúnibe ni purtiʼ Jiobá gupa David (1 Samuel 18:6-12, 25; 19:10, 11).

⁵ David gupa xidé bicaachilú de Saúl stale iza. Ora guyuu modo ñuuti David laabe la? ca xpínnibe gúdxicaʼ laabe nunduuxebe Saúl oraqueca, purtiʼ nacaʼ Jiobá ngue cudii lugar guutibe hombre que. Neca zaqué David qué ñuuti diʼ Saúl. Qué ñúnibe ni purtiʼ bizuubabe stiidxaʼ Jiobá ne pur respetu gúpabe Saúl, purtiʼ Jiobá gulí laa para gaca rey. Ñee cadi Jiobá gulí Saúl para gaca rey stiʼ guidxi Israel la? Nga runi, Jiobá nga cuee laabe de rey ora naʼ. David gunna dxíchica Jiobá nga gúnini ne cadi laa diʼ. Bíʼnisibe guiráʼ ni gunda para maʼ qué nizá nanda Saúl laabe la? guniʼbe: «Jiobá zuniná laabe; o zedandá dxi stibe ne zátibe, o ra chitíndebe racá gunduuxecabe laabe. ¡Naa qué zanda diʼ gusigaanayaʼ para gunenayaʼ ni gulí Jiobá purtiʼ cadi jneza diʼ ruuyabe ni!» (1 Samuel 24:3-15; 26:7-20).

6. Xiñee nabé risaca gánnanu historia stiʼ Saúl ne David.

⁶ Historia riʼ rusiidiʼ ni laanu xiixa nabé risaca. Ñee huayuu dxi guinabadiidxaluʼ xiñee riuu guendanagana lade ca binni ridagulisaa la? Zándaca nuu tuuxa cayuni xiixa ni cadi jneza, ne neca cadi málupeʼ ni peru cuchiichi ni laanu. Xi naquiiñeʼ gúninu yaʼ. Cumu racaláʼdxinu gusihuínninu rizaaláʼdxinu ca bíʼchinu ne ca bizáʼnanu ne qué racaláʼdxinu gusaananu Jiobá la? galán nga guinínenu laabe ne diidxaʼ nadóʼ ti ganda gaca chaahuiʼ guendanagana stinu. Peru, pa qué gaca chaahuiʼ ni yaʼ. Ni jma jneza nga gúninu casi biʼniʼ David, gusaananu ni lu naʼ Jiobá pa maʼ qué ganda guidxélanu modo gaca chaahuiʼ ni.

7. Cásica biʼniʼ David, xi naquiiñeʼ gúninu pa guninácabe laanu pur modo nabáninu o pur nuunu lade ti religión.

⁷ Zándaca pur modo nabáninu o pur nuunu lade ti religión gacalaʼdxiʼ binni guniná laanu, ne qué ganda gúninu gastiʼ. Zaca nagana guni huantarnu ora gúnicabe laanu xiixa zacá, peru ni biʼniʼ David zusiidiʼ laanu xi zanda gúninu. Lu ca salmo guizáʼ sicarú ni bicaa David, rihuinni gunabaruaabe de guidubi ladxidoʼbe gulá Dios laabe de lu naʼ Saúl. Peru cadi ngasi diʼ, laaca bihuinni qué nusaanabe Dios ne bizaaládxibe gusisácabe lá (Salmo 18:1-6, 25-27, 30-32, 48-50; 57:1-11). David qué nusaana Jiobá, neca pur stale iza gucalaʼdxiʼ Saúl ñuniná laabe. Laanu laaca cadi naquiiñeʼ gusaananu Jiobá ne xquidxi neca tiidinu lu guendanagana o gacalaʼdxiʼ tuuxa guniná laanu. Nanna dxíchinu cayuuyaʼ Dios guiráʼ ni cazaacanu (Salmo 86:2).

8. Xi biʼniʼ ca Testigu de Mozambique ora gúpacaʼ guendanagana pur fe sticaʼ.

⁸ Ca xpinni Cristu de guidxi Mozambique nácacabe ti ejemplu para laanu yanna, purtiʼ neca nabé gudíʼdicabe lu guendanagana qué nusaanacabe Jiobá. Lu iza 1984, ti grupu de binni nanda guiibaʼ guyuucaʼ ra lídxicabe stale biaje, guláʼnacaʼ, bizaaquicaʼ jma yoo ne biiticaʼ jma binni. Laacabe qué ñanda ñúnicabe gastiʼ para nudxiilúcabe laacaʼ. Ca binni nanda guiibaʼ que bicaacabe ca binni de ca guidxi que gacanecaʼ laacabe para gucaalúcabe gobiernu stiʼ guidxi que. Ca testigu stiʼ Jiobá qué ninacaʼ ñúnicaʼ ni purtiʼ cadi nga diʼ nga naquiiñeʼ guni ti xpinni Cristu. Cumu qué ninácabe la? ca binni nanda guiibaʼ que nabé bininacaʼ laacabe. Ca dxi cadinde ca binni que biiticaʼ treinta Testigu, hombre ne gunaa, neca guníʼ ca binni que zuuticaʼ laacabe, peru laacabe qué nusaanacabe Dios.a Cásica biʼniʼ David, ca xpinni Cristu de Mozambique biʼniʼ huantárcabe ca cosa malu ni gudíʼdicabe ne qué nusaacabe Jiobá.

Ti ejemplu ni naquiiñeʼ quixhená laanu

9, 10. 1) Xi rizíʼdinu de chupa chonna ejemplu ni zeeda lu Biblia. 2) Xiñee cadi jneza ni biʼniʼ Ananías ne Safira.

⁹ Lu Biblia ridxélanu stale ejemplu ni ruluíʼ cadi naquiiñeʼ gúninu ca cosa malu runi binni. Zeeda stale historia stiʼ binni luni, dede ne stiʼ ca xpinni Dios ni bíʼnicaʼ ni cadi jneza ne gucanacaʼ pur laani (1 Corintios 10:11). Tobi de laacani nga stiʼ Ananías ne Safira, ti guendaxheelaʼ ni guyuu lade ca xpinni Cristu ni bibani ndaaniʼ guidxi Jerusalén lu primé siglu.

¹⁰ Biluxe si saa stiʼ Pentecostés ni guca iza 33 que la? ca binni ridagulisaa de Jerusalén bidiicabe ni iquiiñeʼ stale de ca binni ni nacubi guca xpinni Cristu que, para guiaanarucaʼ raqué ne gusiidiʼ ca apóstol que laacaʼ jma. Caadxi de ca xpinni Cristu bitoocaʼ ni nápacaʼ ti gapa cani nuu raqué ni guibaninecaʼ (Hechos 2:41-45). Ananías ne Safira bitoocaʼ ti layú sticaʼ, neca qué nudiicaʼ guiráʼ bueltu bidoo layú que ca apóstol que la? peru guniʼcaʼ cudiicaʼ guirani. Nécapeʼ cadi nexheʼ pabiáʼ nga gudii Ananías ne Safira bihuinni cadi dxandíʼ rápacabe gana gacanécabe ora bidiicabe ni, purtiʼ qué nudiicabe guirani. Gucaláʼdxicabe nuluíʼcabe ca apóstol que galán nga ni cayúnicabe ne nuluíʼcabe cayúnicabe jma de ni cadi dxandíʼ. Espíritu santu gucané apóstol Pedru para bisihuinni cusiguiicabe ne cabáʼnacabe, ngue runi biiti Jiobá laacabe (Hechos 5:1-10).

11, 12. 1) Ximodo rusietenalaʼdxiʼ Stiidxaʼ Dios laanu pabiáʼ nga risaca cadi gusiguiinu. 2) Xi ribeendunu ora qué rusiguiinu.

¹¹ Pa chuʼ dxi uquiinde laanu gusiguiinu para guʼyaʼ binni cayúninu ni jneza la? ni bizaaca Ananías ne Safira naquiiñeʼ gusietenaláʼdxini laanu cadi jneza diʼ gúninu ni. Zándaca quítenu binni, peru qué ziuu dxi quítenu Dios (Hebreos 4:13). Nabé rabi Stiidxaʼ Dios laanu cadi gácanu binni rusiguii, purtiʼ qué ziuu cani rusiguii lu guidxilayú cubi ra guibani binni ni riníʼ puru si ni dxandíʼ (Proverbios 14:2; Apocalipsis 21:8; 22:15). Guiranu naquiiñeʼ guiene chaahuinu xiñee risaca guininu puru si ni dxandíʼ, purtiʼ Binidxabaʼ nga rucaa binni gusiguii (Juan 8:44).

¹² Zabeendunu stale cosa galán pa qué gusiguiinu, zápanu ti guendabiaaniʼ nayá ne ziuʼnu nayecheʼ purtiʼ zaná binni gaca xhamigu laanu pur rininu dxandíʼ. Stale de ca xpinni Cristu huadxélacaʼ dxiiñaʼ o qué huabeecabe laacaʼ ra nuucaʼ purtiʼ qué rusiguiicaʼ. Neca galán ca ndaayaʼ riʼ, ni jma risaca para laanu nga gaca xhamígunu Dios ni jma nandxóʼ (Salmo 15:1, 2).

Guibáninu nayá

13. Xi guendanagana gupa José, ne xi bíʼnibe.

¹³ José, xiiñiʼ Jacob, bitoocabe laa para gaca esclavu dxi napa 17 iza ne biʼniʼ dxiiñaʼ ndaaniʼ lidxi Potifar, ti xaíque stiʼ ca soldadu de guidxi Egipto. Xheelaʼ Potifar guyuulaʼdxiʼ hombrehuiiniʼ galán riʼ, ne cumu racalaʼdxiʼ chuʼné laabe la? guiráʼ dxi maʼ cayabi laabe: «Gutané naa». Zitu nuu José de binnilidxi ne guirutiʼ runibiáʼ laabe ndaaniʼ guidxi ra nuube que. Ñanda ñuunebe gunaa riʼ ne guirutiʼ tu ñanna. Peru ora biruxhayú gunaa que xhábabe la? biree uxooñebe de raqué (Génesis 37:2, 18-28; 39:1-12).

14, 15. 1) Xiñee galán gánnanu historia stiʼ José. 2) Xiñee rudii Jenny xquixe Dios pur guiráʼ ni rusietenaláʼdxibe laanu.

¹⁴ José biniisi ndaaniʼ ti familia ni runi adorar Dios ne nánnacabe cadi jneza diʼ nga gatané ti hombre ti gunaa ni cadi xheelaʼ. Laabe guniʼbe: «Qué zanda diʼ guneʼ guendaquéiquiiñeʼ riʼ ne gucheeniáʼ Dios pur laani». Zándaca guniʼbe zacá purtiʼ nánnabe guníʼ Dios ndaaniʼ jardín ni guyuu Edén que ti xheelaʼ si binni nga naquiiñeʼ gapa (Génesis 2:24). Xquidxi Dios ni nuu yanna riʼ zanda cueendú ni galán ra guiníʼ ique de ni biʼniʼ José ora gucalaʼdxiʼ gunaa que ñatané laabe. Nuu stale lugar nabé rucaacabe ca hombrehuiiniʼ ne ca dxaapahuiiniʼ chúʼnecaʼ stobi ne pa qué gúnicaʼ ni runi búrlacabe laacaʼ. Ne yanna riʼ nuu stale binni huaniisi riuulaʼdxiʼ gapa jnadxii. Nga runi, ni bizaaca José rusietenaláʼdxini laanu ti cosa ni risaca stale. Caʼruʼ guchaa diʼ ley stiʼ Dios ni na: ti pecadu nga chuʼné binni ni cadi xheelaʼ ne gapa jnadxii (Hebreos 13:4). Stale binni ni huayaba lu pecadu riʼ huayuuyaʼ pabiáʼ naná ca yuubaʼ rápacaʼ pur laani. Caadxi de laacani nga maʼ qué rapa binni respetu laacabe, maʼ qué riuudxí xquendabiaanicabe, riníʼ íquecabe laaca napa xheelacabe jnadxii, ricá xiixa guendahuará malu laacabe ne nuu gunaa raca xiiñiʼ. Cásipeʼ modo na Stiidxaʼ Dios, binni ni chuʼné ni cadi xheelaʼ «cuchee ne cuerpu stiʼ» (1 Corintios 5:9-12; 6:18; Proverbios 6:23-29, 32).

¹⁵ Ti baʼdudxaapaʼ testigu stiʼ Jiobá ni chindee lanu Jenny la? napa stale razón para gudii xquixe Dios pur cani rusietenalaʼdxiʼ laanu. Tobi de ca hombre ni runinebe dxiiñaʼ guyuulaʼdxiʼ laabe. Ora biʼyaʼ hombre riʼ qué nulábibe laa la? biyúbiruʼ ximodo chuulaʼdxiʼ Jenny laa. Na Jenny: «Bineʼ stale stipa para cadi gucheeniáʼ Dios, purtiʼ guizáʼ galán runi sentir binni ora tuuxa chuulaʼdxiʼ laa». Laabe bidiibe cuenta racalaʼdxiʼ si hombre riʼ guiníʼ laaca maʼ gutané laabe casi huayuni ne stale gunaa. Ora guni sentirbe ruluíʼ maʼ qué zanda guni huantarbe la? rinábabe Jiobá gudii stipa laabe para cadi gucheebe. Laabe ruzeetebe nabé rietenaláʼdxibe guiráʼ ni ruundabe lu Biblia ne ni reeda lu ca guiʼchiʼ ni rudii xquidxi Dios ne nga racané laabe para cadi gucheebe. Tobi de cani rietenaláʼdxibe nga ni bizaaca José ne xheelaʼ Potifar. Jenny guniʼruʼ: «Guiráʼ dxi rietenalaʼdxeʼ pabiáʼ nadxiee Jiobá, nga runi qué zunediáʼ ti guendaquéiquiiñeʼ ne gucheeniáʼ laabe».

Gúninu guiráʼ ni rusietenalaʼdxiʼ Dios

16. Xi ribeendunu ora guidúʼndanu historia stiʼ ca binni ni ruzeeteʼ Biblia ne ora guiníʼ íquenu de laacani.

¹⁶ Guiranu jma ziuuláʼdxinu ca ley stiʼ Dios ra guicá íquenu guiénenu xiñee guniʼbe guicá caadxi historia lu Biblia para laanu. Xi rizíʼdinu de laacani yaʼ. Xi biʼniʼ caadxi binni ni cuzeeteʼ Biblia ni naquiiñeʼ gúninu, o cadi gúninu yaʼ. Cadi guiaandaʼ laanu zeeda stale historia ni dxandíʼ bizaaca binni lu Stiidxaʼ Dios. Guiráʼ tu gannaxhii ni rusiidiʼ Dios la? galán nga chuulaʼdxiʼ gaca binni nuu xpiaaniʼ, purtiʼ nga zacané laa gapa guendanabani. Ti modo zanda gácanu binni nuu xpiaaniʼ nga guidúʼyanu xi rusiidiʼ ca ejemplu ni guníʼ Jiobá guicá lu Biblia. Lu revista riʼ huaree stale tema ni huasiene xi zanda guizíʼdinu de ca historia ca. Ñee ribeeluʼ tiempu para gúʼndaluʼ cani la?

17. Xi riníʼ íqueluʼ de cani rusietenalaʼdxiʼ Jiobá laanu, ne xiñee.

¹⁷ Rudiʼnu xquixe Jiobá purtiʼ ne stale guendarannaxhii rápabe cani runi stipa para gúnicaʼ ni nabe. Laaca binni ruchee laanu, cásica guca ca hombre ne ca gunaa ni ruzeeteʼ Biblia. Peru guizáʼ risaca historia stícabe para laanu. Ora gúninu guiráʼ ni rusietenalaʼdxiʼ Jiobá la? zacané cani laanu para cadi gúninu xiixa guizáʼ malu ne zudii cani stipa laanu para chinándanu ejemplu stiʼ ca binni biʼniʼ ni jneza. Pa gúninu zacá la? zanda guni stinu ca diidxaʼ ni guníʼ hombre bicaa salmo riʼ ora biʼndaʼ: «Nayecheʼ ziuu cani qué rusiaandaʼ [guiráʼ] ni rusietenalaʼdxiʼ [Jiobá]; ruyúbicaʼ laabe de guidubi ladxidoʼcaʼ. Naa runeʼ guiráʼ ni rusietenaláʼdxiluʼ, ne nadxiee cani stálepeʼ» (Salmo 119:2, 167).

[Cani cá ñee yaza]

Xi guicábiluʼ

• Xi rizíʼdinu de ni biʼniʼ David rey Saúl.

• Xi rusiidiʼ ni bizaaca Ananías ne Safira laanu.

• Xiñee risaca historia stiʼ José para laanu yanna riʼ.