Cadi guiaandaʼ laanu gácanu nachaʼhuiʼ né cani zeeda de sti guidxi

1, 2. a) Xi guendanagana rapa ca binni de sti guidxi ca dxi riʼ. (Biiyaʼ foto ni zeeda ra ruzulú tema riʼ). b) Xi rusietenalaʼdxiʼ Biblia laanu. c) Xi zacábinu lu tema riʼ.

MAʼ RACA jma de 30 iza, ti hombre de guidxi Ghana láʼ Osei bisaana África ne guyé Europa^[1] . Ca dxi que, caʼruʼ gácabe testigu stiʼ Jiobá ne rietenaláʼdxibe gúpabe stale guendanagana. Sicaríʼ guniʼbe: «Qué nindaa bidieeʼ cuenta qué rizaalaʼdxiʼ stale binni naa. Maʼ gadxé si bineʼ sentir clima que. Ora bireeʼ ndaaniʼ aeropuertu que ne primé biaje bineʼ sentir nanda lu xquendanabaneʼ la? bizuluáʼ biinaʼ». Cumu cayaca nagana para laabe guiziidibe idioma ni riníʼcabe guidxi que la? gudiʼdiʼ jma de ti iza para bidxélabe dxiiñaʼ. Ne cumu zitu nuube de ra lídxibe la? nabé bibánabe xfamíliabe ne biʼniʼ sentirbe nuube stúbibe.

² Pa ñuʼnu lugar stiʼ Osei, ximodo ñuuláʼdxinu ñuni tratárcabe laanu yaʼ. Cadi dxandíʼ ñuuláʼdxinu nidxaagalú ca hermanu laanu galán ne ñannaxhiicaʼ laanu neca de sti raza o de sti guidxi laanu la? Biblia cusietenalaʼdxiʼ laanu, cani dxandíʼ xpinni Cristu, cadi guiaandaʼ laanu gácanu nachaʼhuiʼ né ca binni ni «zeeda de sti guidxi» (Hebreos 13:2). Nga runi, lu tema riʼ zacábinu ca guendarinabadiidxaʼ riʼ: Ximodo ruuyaʼ Jiobá ca binni de sti guidxi. Ñee caquiiñeʼ guchaʼnu modo ridúʼyanu ca binni de sti guidxi la? Ximodo zanda gacanenu ca binni de sti guidxi ti guni sentircaʼ nuu tu cadxaagalú laacaʼ ndaaniʼ congregación stinu yaʼ.

3, 4. Casi na Éxodo 23:9, ximodo ngue racalaʼdxiʼ Jiobá guni tratar ca israelita que binni de sti guidxi, ne xiñee.

³ Dxi gulee Jiobá ca israelita de esclavu, bidiibe laacaʼ caadxi ley ni bisiidiʼ laacaʼ gácacaʼ nachaʼhuiʼ né ca binni de sti guidxi ni bireené laacaʼ de Egipto (Éxodo 12:38, 49; 22:21). Nanna Jiobá nuu biaje ridiʼdiʼ ca binni de sti guidxi guendanagana, ngue runi gúpabe laacaʼ né guendarannaxhii. Bidiibe lugar checaʼ lu ca layú que despué de guidopa cosecha para chitópacaʼ guiráʼ ni bisaana cani biʼniʼ dxiiñaʼ lu layú que (Levítico 19:9, 10).

⁴ Qué ñuni mandar si Jiobá ca israelita guni respetarcaʼ ca binni de sti guidxi. Ni racaláʼdxibe nga guietenaláʼdxicaʼ ximodo runi sentir binni ora naca de sti guidxi. Biblia na: «Cadi guninaluʼ binni de sti guidxi, purtiʼ laatu nánnatu xi runi sentir tobi ora naca de sti guidxi, purtiʼ guyuutu ndaaniʼ guidxi Egipto» (Éxodo 23:9). Dede ante cheʼ ca israelita de esclavu Egipto, maca qué riuulaʼdxiʼ ca egipciu que laacaʼ purtiʼ maʼ gadxé laacaʼ (Génesis 43:32; 46:34; Éxodo 1:11-14). Nabé naná guca ni para ca israelita dxi guyuucaʼ Egipto. Ngue runi, racalaʼdxiʼ Jiobá guietenaláʼdxicabe ni ne gúnicabe stipa pur gácacabe nachaʼhuiʼ né ca binni de sti guidxi ni nabeza ládecabe (Levítico 19:33, 34).

 5. Xi zucaa laanu gácanu casi Jiobá ne gusihuínninu nacháʼhuinu né binni de sti guidxi.

⁵ Qué huachaa diʼ Jiobá modo laa. Nga runi, ora gueeda binni de sti guidxi ndaaniʼ congregación stinu, naquiiñeʼ guietenaláʼdxinu rizaalaʼdxiʼ Jiobá laacabe (Deuteronomio 10:17-19; Malaquías 3:5, 6). Naquiiñeʼ guiníʼ íquenu lu ca guendanagana ni zándaca nápacabe. Zándaca qué riénecabe diidxaʼ ni riníʼ binni guidxi nuucabe ne stale binni runi tratar laacabe mal. Ora guiníʼ íquenu guiráʼ ndiʼ, rucaa ni laanu gúninu stipa pur gacanenu laacabe ne gusihuínninu nacháʼhuinu né laacabe (1 Pedro 3:8).

6, 7. Ximodo bisihuinni ca xpinni Cristu ni naca judíu maʼ biziidicaʼ cadi gúnicaʼ menu sti binni.

⁶ Ca xpinni Cristu ni naca judíu biziidicaʼ cadi gácacaʼ casi stale judíu ni biʼniʼ menu ca binni de sti guidxi. Lu saa stiʼ Pentecostés ni guca lu iza 33 que, sicarú modo bidxaagalú ca xpinni Cristu de Jerusalén ca binni de sti guidxi ni deruʼ guca xpinni Cristu ne gúcacaʼ nachaʼhuiʼ né laacabe (Hechos 2:5, 44-47). Nga rusihuinni biénecabe ximodo nga gaca tuuxa nachaʼhuiʼ né binni de sti guidxi.

⁷ Peru ca dxi queca, caadxi hermanu ni riníʼ diidxaʼ griegu nacaʼ cadi jneza cayúnicabe né ca viuda de xquídxicaʼ (Hechos 6:1). Para gaca chaahuiʼ guendanagana que, biseendaʼ ca apóstol gadxe hombre ni napa lá lu diidxaʼ griegu. Xiñee gulícabe ca hombre ni napa lá griegu que yaʼ. Zándaca purtiʼ zacá jma galán zuni sentir ca viuda ni riníʼ griegu (Hechos 6:2-6).

8, 9. a) Xi guendarinabadiidxaʼ zacané laanu gánnanu pa rúninu menu tuuxa binni. b) Xi naquiiñeʼ cueenu de ndaaniʼ ladxidoʼno. (1 Pedro 1:22).

⁸ Nuu biaje rinándanu cultura stinu sin gudiʼnu cuenta (Romanos 12:2). Ne zándaca ca vecinu stinu, cani runinenu dxiiñaʼ o cani rinenu scuela guiniʼcaʼ mal de ca binni de sti lugar, de sti cultura o de sti raza. Ñee rucaa nga laanu guiníʼ íquenu casi laacabe la? Xi rúninu ora guni burla tuuxa xquídxinu o cultura stinu yaʼ.

⁹ Guyuu biaje bisihuinni apóstol Pedru runi menu ca binni ni cadi naca judíu. Peru despué guleebe cani runi sentirbe que de ndaaniʼ ladxidoʼbe (Hechos 10:28, 34, 35; Gálatas 2:11-14). Yanna laanu yaʼ. Xi naquiiñeʼ gúninu pa gudiʼnu cuenta riníʼ íquenu jma risaca raza stinu o rúninu menu binni de sti guidxi yaʼ. Naquiiñeʼ gúninu stipa pur cueenu cani ndaaniʼ íquenu (biindaʼ 1 Pedro 1:22). Xi zanda gacané laanu gúninu ni yaʼ. Guietenaláʼdxinu ndiʼ: neca de intiica guidxi laanu guiranu nácanu binni ruchee ne qué runi merecernu guilanu (Romanos 3:9, 10, 21-24). Nga runi, cadi naquiiñeʼ guni sentirnu jma risácanu que xcaadxi (1 Corintios 4:7). Naquiiñeʼ guni sentirnu casi apóstol Pablu. Laabe gúdxibe ca xpinni Cristu maʼ cadi nácacaʼ binni de sti guidxi, sínuque «ma binni lidxi Dios» laacaʼ (Efesios 2:19). Guiranu naquiiñeʼ gúninu stipa pur gusaana de gúninu menu xcaadxi binni. Zacá zusihuínninu cuchaʼnu modo laanu (Colosenses 3:10, 11).

10, 11. Ximodo bisihuinni Boaz ruuyaʼ ca binni de sti guidxi cásica ruuyaʼ Jiobá laacaʼ.

¹⁰ Biblia ruzeeteʼ de ti hombre ni bizuubaʼ stiidxaʼ Dios láʼ Boaz. Laabe bisihuínnibe ruuyabe ca binni de sti guidxi casi ruuyaʼ Jiobá laacaʼ. Ximodo bíʼnibe ni yaʼ. Dxi yeguuyabe ca layú stibe laga cayasa cosecha, biiyabe ti gunaa de guidxi Moab láʼ Rut. Laa guizáʼ cayuni dxiiñaʼ, cutopa ca trigu ni cayaba layú que. Neca ley stiʼ Moisés que rudii derechu laacabe cuágucabe, peru laabe gunábabe permisu para gúnibe ni. Ora gunna Boaz de ni bíʼnibe que, bidxagayaa ne laaca bidii lugar gutópabe trigu ni maʼ bichuuguʼ ca hombre ni cayuni xhiiñaʼ. Biblia na: «Óraque biásabe para cuágube. Para gudxi Boaz ca hombrehuiiniʼ runi xhiiñaʼ: “Laaca gudiitu lugar cuágube lade ca cebada ni maʼ biruuguʼ ca, ne cadi guchiichitu laabe. Ne laaca naquiiñeʼ cueetu caadxi cebada de lade manojo stitu, naquiiñeʼ gusaanatu cani atrá ti gutópabe cani, ne cadi gábitu laabe xiixa para gucueezatu laabe”» (Rut 2:15, 16).

¹¹ Óraque biʼniʼ Boaz ti cosa ni bisihuinni nuube xizaa pur Rut ne pur ca guendanagana ni napa purtiʼ de sti guidxi laa. Gúdxibe laa guiaana lade ca baʼdudxaapaʼ runi xhiiñabe ti cadi guchiichi ca hombre runi dxiiñaʼ lu layú que laa. Ne laaca biiyabe cadi guiaadxaʼ guendaró ne nisa para Rut ne para cani runi xhiiñabe. Biʼniʼ tratar Boaz Rut né respetu purtiʼ de sti guidxi laa ne guluube gana laa (Rut 2:8-10, 13, 14).

12. Xi zándaca guizaaca pa gácanu nachaʼhuiʼ né binni de sti guidxi.

¹² Nabé gunnaxhii Rut suegra, Noemí, ngue runi guca Boaz nachaʼhuiʼ né laa. Peru laaca gúcabe nachaʼhuiʼ né laa purtiʼ bizulú biʼniʼ adorar Jiobá ne biyubi gapa Dios laa. Ra guca Boaz nachaʼhuiʼ né Rut la? bisihuinni nadxii sti binni cásica nadxii Jiobá (Rut 2:12, 20; Proverbios 19:17). Zacagá nga raca ni ca dxi riʼ. Pa gusihuínninu nacháʼhuinu né «irá binni», zanda gacanenu laacabe guiziidicabe ni dxandíʼ ne gudiicabe cuenta nabé nadxii Jiobá laacabe (1 Timoteo 2:3, 4).

13, 14. a) Xiñee naquiiñeʼ ugapadiúxinu ca binni de sti guidxi ndaaniʼ Yoo stiʼ Reinu. b) Xi zacané laanu guni sentirnu galán ora guinínenu binni de sti cultura.

¹³ Ti modo gusihuínninu nacháʼhuinu né ca binni de sti guidxi nga guidxaagalunu laacaʼ galán ndaaniʼ Yoo stiʼ Reinu. Nuu biaje, cani deruʼ zeeda de sti guidxi natuicaʼ ne qué rinacaʼ guidxíñacaʼ binni. Zándaca guni sentírcabe menu pur cultura stícabe, purtiʼ pobre laacabe, pur raza stícabe o pur xquídxicabe. Nga runi, naquiiñeʼ guidxíñanu laacabe ne gusihuínninu rizaaláʼdxinu laacabe ne gácanu nachaʼhuiʼ. Pa nápanu aplicación JW Language, zanda iquiiñenu ni para guizíʼdinu ugapadiúxinu laacabe lu stiidxacabe (biindaʼ Filipenses 2:3, 4).

¹⁴ Zándaca nuu biaje cadi galán zuni sentirnu ora guinínenu tuuxa de sti cultura. Xi zanda gacané laanu óraca yaʼ. Zanda gábinu laabe xiixa de laanu. Zándaca zudiʼnu cuenta nuu stale cosa ni rúninu ne laabe laaca rúnibe cani. Cadi guiaandaʼ laanu guiráʼ cultura napa paraa galán laa ne paraa coʼ.

15. Xi zacané laanu guiénenu cani cayaa guibani ndaaniʼ sti guidxi.

¹⁵ Ximodo zanda gacanenu xcaadxi binni gúʼyacaʼ nuu tu cadxaagalú laacaʼ galán ndaaniʼ congregación stinu yaʼ. Naquiiñeʼ guinabadiidxanu ndiʼ: «Pa ñuaaʼ sti guidxi, ximodo ñuuladxeʼ ñuni tratárcabe naa yaʼ». (Mateo 7:12). Gápanu paciencia cani cayaa guibani sti guidxi. Zándaca cadi casi ziuunu ziénenu modo riníʼ ique binni ca o modo gúʼyabe ca cosa ca. Peru qué zanda cuézanu guiníʼ íquebe o gúnibe ca cosa ca casi raca lu cultura stinu. Jma galán guiénenu laacabe ne chuʼnu conforme modo laacabe (biindaʼ Romanos 15:7).

16, 17. a) Ximodo zanda gunibiáʼ chaahuinu ca binni de sti cultura. b) Xi zanda gúninu pur ca binni de sti guidxi ni nuu ndaaniʼ congregación stinu.

¹⁶ Ximodo zanda gunibiáʼ chaahuinu ca binni de sti guidxi ni nuu gaxha de laanu yaʼ. Ti modo nga cueenu tiempu para guizíʼdinu jma de xquídxibe ne de cultura stibe. Ora gúninu adoración en familia, galán guyúbinu xiixa ni caníʼ de cultura stiʼ ca binni de sti guidxi ni nuu ndaaniʼ congregación stinu o de cani nabeza neza ra nabézanu. Sti modo nga guni invitarnu laacabe chitócabe ra lídxinu. Jiobá maʼ bixheleʼ ti «neza para guni cre cani cadi judíu» (Hechos 14:27). Chinándanu ejemplu stibe, guxhélenu puertaʼ lídxinu para ca binni de sti guidxi «peru jma pe naquiiñe guni nu ni lade ca hermanu» (Gálatas 6:10; Job 31:32).

¹⁷ Pa guidxaaganu ti familia ni zeeda de sti guidxi zacané ni laanu guiénenu laacabe ne gusisácanu stipa rúnicabe pur guiaacabe cultura stinu. Zándaca guidúʼyanu caquiiñecabe chuʼ tu gacané laacabe para guiziidicabe stiidxanu. Laaca zanda gacanenu laacabe guidxélacabe ti lugar ra chúʼcabe o ra gúnicabe dxiiñaʼ. Pa gúninu cani maʼ bizéʼtenu riʼ la? zanda gacanenu laacabe (Proverbios 3:27).

18. Xi ejemplu sicarú zanda chinanda ca binni de sti guidxi.

¹⁸ Dxandíʼ, cani zeeda de sti guidxi nga naquiiñeʼ gúnicaʼ stipa pur guiaacaʼ cultura ni napa guidxi ra chindézacaʼ. Zanda chinándacabe ejemplu stiʼ Rut. Primé, biʼniʼ respetarbe costumbre ni napa guidxi ra guyebe que. Bíʼnibe ni ra gunábabe permisu para cuágube lu layú que (Rut 2:7). Qué niníʼ íquebe nápabe derechu gúnibe ni ne laaca qué niníʼ íquebe naquiiñeʼ gacané binni laabe. Ne guiropa, qué nusaana de nudiibe xquíxepeʼ pur gúcacabe nachaʼhuiʼ né laabe (Rut 2:13). Pa chinanda ca binni de sti guidxi ejemplu stiʼ Rut la? zándaca jma zapa ca hermanu ne ca binni de guidxi ra nuucabe respetu laacabe.

19. Xi razón nápanu para gacanenu ca binni de sti guidxi guni sentircaʼ galán ládenu.

¹⁹ Riéchenu stale gusihuinni Jiobá nachaʼhuiʼ né guiráʼ binni ne gudiibe lugar laacaʼ guiziidicaʼ de ca noticia galán ni zeeda lu Biblia. Zándaca stale de ca binni de sti guidxi qué ñanda ñuni estudiarcaʼ Biblia o qué ñecaʼ reunión ndaaniʼ xquídxicaʼ. Yanna ra maʼ rúnicabe ni, naquiiñeʼ gacanenu laacabe para guni sentírcabe galán ládenu. Zándaca qué gápanu stale bueltu o qué zanda gacanenu laacaʼ lu ni caquiiñecaʼ. Peru pa gácanu nachaʼhuiʼ né laacabe, zusihuínninu nadxiinu laacabe casi nadxii Jiobá laacabe. Nga runi, chinándanu ejemplu stiʼ Jiobá ne gúninu stipa pur guidxaagalunu ca binni de sti guidxi galán (Efesios 5:1, 2).