Rietenalaʼdxuʼ la?

Ñee biindaluʼ ca últimu tema ni bedané revista Torre stiʼ ni rapa la? Yanna biiyaʼ pa zanda guicábiluʼ ca guendarinabadiidxaʼ riʼ:

• Xi guendanagana ridxagalú caadxi xpinni Cristu ni nacubi bichaganacaʼ ne xi naquiiñeʼ gúnicabe.

Nuu guendaxheelaʼ rudiicaʼ cuenta huaxiéʼ rienesaacaʼ. Peru naquiiñeʼ gúnicabe stipa pur cadi guixiá xquendaxheelacabe, purtiʼ qué zanda gaca divorciárcabe pa cadi cudii Biblia nin ti razón para gúnicabe ni (15/4, yaza 17).

• Xi guendanagana ridxagalú ca xpinni Cristu ni nabeza ndaaniʼ ca yoo ra rápacabe binnigola.

Zándaca gadxé binni ridagulisaa rucheeche diidxaʼ neza ra nuu ca yoo ra nuu ca binnigola ca. Ne racá nabézacabe lade binni ni napa gadxé religión, nga runi zándaca gucaa ca binni ca laacabe gúnicabe ni raca ndaaniʼ religión sticaʼ. Ca binnilídxicabe ni naca Testigu ne ca binni ridagulisaa naquiiñeʼ gánnacaʼ guiráʼ ni rizaacacabe racá, nga runi naquiiñeʼ gacanecaʼ laacabe ne gápacaʼ laacabe (15/4, yaza 25-27).

• Xi tapa cosa zacané ca guendaxheelaʼ ca para guni chaahuicaʼ guendanagana sticaʼ.

Gudixhe ti ora para guiniʼtu de guendanagana ni nápatu (Ecl. 3:1, 7). Guníʼ ni racaláʼdxiluʼ peru ne respetu (Efe. 4:25). Bicaadiaga xheelaluʼ ne biʼniʼ stipa para gánnaluʼ xi runi sentirbe (Mat. 7:12). Laquixhe ximodo guni chaahuitu guendanagana ca ne lagacanesaa para guni chaahuitu ni (Ecl. 4:9, 10) (wp 07-09, yaza 10-12).

• Gunáʼ nga xhoopaʼ grupu ni napa Grupu ni Zaniruʼ.

Grupu de Cani Ruuyaʼ Dxiiñaʼ Runi Xcaadxi Grupu, Grupu ni Ruuyaʼ ca Binni ni Runi Dxiiñaʼ Betel, Grupu ni Ruuyaʼ Gaca ca Guiʼchiʼ ni Riquiiñenu, Grupu ni Ruuyaʼ Guireeche Diidxaʼ, Grupu ni Ruuyaʼ xi Guizíʼdinu ne Grupu ni Ruuyaʼ xi Guicá lu ca Guiʼchiʼ Ricaanu (15/5, yaza 29).

• Tuu nga gúdxicabe ca diidxaʼ ni zeeda lu Romanos 1:24-32, ca judíu la? o cani cadi judíu.

Ñándaca nininu ca judíu ne cani cadi judíu nga gúdxicabe ca diidxaʼ ca, peru Pablu gudxi ni ca israelita de dxiqué, purtiʼ stale iza qué ninándacaʼ ley ni bidii Dios laacaʼ. Ca israelita ca gúnnacaʼ «xi na Dios» ñúnicaʼ, peru qué ñúnicaʼ ni (15/6, yaza 29).

• Xiñee ziuʼnu jma nayecheʼ pa quixhe íquenu gúninu cani zanda si lu xhiiñaʼ Jiobá.

Pa gacaláʼdxipenu ugaandanu xiixa ni qué zanda gúninu la? zusidxáganu laanu. Peru laaca cadi jneza diʼ nga guiníʼ íquenu pur xiixa ni cazaacanu maʼ qué zanda gúninu jma lu xhiiñaʼ Dios neca nánnanu zanda gúninu ni (15/7, yaza 29).