Ca diidxaʼ nacubi ne galán ni nabé caquiiñenu

«Stiidxa Cristu [...] nga ni riquiiñe Dios para ulá irá cani guni cre ni.» (ROM. 1:16)

1, 2. Xiñee rucheechenu «ca diidxaʼ nacubi ne galán stiʼ reinu», ne xii nga ni jma rábinu binni.

«NABÉ riuuladxeʼ guiniéʼ de ca diidxaʼ nacubi ne galán ca guiráʼ dxi.» Zándaca huaninu o huaníʼ íquenu zacá, purtiʼ laanu ca xpinni Jiobá riénenu pabiáʼ risaca nga gucheechenu «ca diidxaʼ nacubi ne galán stiʼ reinu». Ne zándaca de memoria nánnanu ni guníʼ Jesús de dxiiñaʼ riʼ (Mat. 24:14, NM).

² Ora rusíʼdinu binni de «modo runi mandar Dios» o de «ca diidxa nacubi ne galán stiʼ reinu» la? cayúnirunu dxiiñaʼ ni bizulú Jesús (biindaʼ Lucas 4:43). Ne tobi de ca cosa ni jma rábinu binni nga mayaca cuee Dios ca cosa malu ni cayuniná binni guidxilayú. Lu ca dxi jma naná ca zunitilú Dios guiráʼ religión ni rusiidiʼ ni cadi dxandíʼ ne maʼ qué ziuu guendaquéiquiiñeʼ lu Guidxilayú riʼ (Mat. 24:21). Ne laaca rininu zuni Reinu stiʼ Dios Guidxilayú riʼ ti paraísu ne zabáninu nayecheʼ luni ne guirutiʼ qué zuniná laanu. Dxandíʼ, «ca diidxa nacubi ne galán stiʼ reinu» ca nuucani lade ca diidxaʼ «uníʼ [Dios] ra gudxi be Abraham ca diidxa sicarú riʼ, na be rabi be laa: “Pur lii zaguaa ndaaya idubi naca guidxilayú”» (Gál. 3:8).

 3. Xiñee zanda guininu nabé bisisaca Pablu ca diidxaʼ nacubi ne galán ca lu carta ni bicaa ra nuu ca romanu.

³ Yanna, ñee nuu xiixa ni huaxiéʼ rusiénenu de ca diidxaʼ nacubi ne galán ni naquiiñeʼ ganna binni ora maʼ zigucheechenu diidxaʼ la? Lu carta bicaa Pablu ra nuu ca romanu biquiiñebe «ca diidxaʼ nacubi ne galán» o Evangeliu ca doce biaje, peru ti biaje si biquiiñebe diidxaʼ «reinu» (biindaʼ Romanos 14:17, NM). Yanna, xidepeʼ nga bizeeteʼ Pablu ora guníʼ ca diidxaʼ nacubi ne galán ca lu libru ni bicaa yaʼ, ne xiñee nabé risácani para guiranu. Xiñee naquiiñeʼ guietenaláʼdxinu de laani ora maʼ cucheechenu «stiidxa Dios» yaʼ (Mar. 1:14; Rom. 15:16; 1 Tes. 2:2).

Xi biquiiñeʼ ca romanu

 4. Xi chupa tema nga jma bizeeteʼ Pablu ora bicheeche diidxaʼ primé biaje biseguyoocabe laa Roma.

⁴ Ti cosa ni zacané laanu guiene chaahuinu cani caninu riʼ nga guidúʼndanu de ca tema ni guníʼ Pablu primé biaje biseguyoocabe laa Roma. Biblia na ora yeganna ti grupu de judíu laabe bíʼnibe chupa cosa. Primé la? bisiidiʼ chaahuibe «laaca de enda runi mandar sti Dios». Ne guiropa la? bíʼnibe stipa para «[bi]cuudxi be laaca guni cre ca Cristu». Xi guleendube pur ngue yaʼ. «Nuu caadxi ucuaa ni uníʼ be que, peru nuu xcaadxi qué ñuni cre.» Despué «bieche né [Pablu] irá ni yeganna laa» ne bíʼnibe casi bíʼnibe primé biaje que: primé la? «byuíʼ né be [laacaʼ] de enda runi mandar sti Dios» o de Reinu stiʼ Dios, ne guiropa la? bisiidibe laacaʼ de «stiidxa Señor Jesucristu» (Hech. 28:17, 23-31). Casi maʼ bidúʼyanu ca, nabé guníʼ Pablu de Reinu stiʼ Dios. Peru xiruʼ nga jma bizeetebe yaʼ. De ti cosa ni jma risaca de gobiernu ca: ni chiguni Jesús para gaca ni maca gudixhe ique Dios.

 5. Xi ti cosa nabé risaca nga bizeeteʼ Pablu lu carta ni bicaa ra nuu ca romanu.

⁵ Guiráʼ binni naquiiñeʼ gunibiáʼ Jesucristu ne gapa fe laabe. Ngue runi, lu carta ni bicaa Pablu ra nuu ca romanu guniʼbe naquiiñeʼ gúnicabe ni maʼ bizéʼtenu ca. Lu ca primé versículo ca cusiénebe sicaríʼ: «Rune xhiiña Dios ne rue de evangeliu sti Xiiñi be de idubi ladxiduáʼ». De raqué guniʼbe: «Qué rituí di lua güe stiidxa Cristu, purti laape ni nga ni riquiiñe Dios para ulá irá cani guni cre ni». Ne despué guniʼbe de «dxi usihuinni Dios irá ni gaʼchi ndaani ladxidóʼ binni, ne zuni né be ni Jesucristu. Zacá na stiidxa Cristu ni canayué riʼ». Ne para guilúxebe guniʼbe: «Zaqué biree de Jerusalén bidiee vuelta dede yendaya Ilírico. Idubi neza que ma bisiide chaahue stiidxa evangeliu sti Cristu» (Rom. 1:9, 16; 2:16; 15:19).a Xiñee nabé guniʼné Pablu ca romanu que de Cristu yaʼ.

6, 7. Ximodo bizulú neza binni ridagulisaa ni guyuu Roma, ne padé laacabe.

⁶ Qué gánnadinu ximodo bizulú neza binni ridagulisaa guyuu Roma. Zándaca bizulú caadxi judíu ni o ca binni de sti guidxi ni zinanda Ley bicaa Moisés ni guca xpinni Cristu lu Pentecostés stiʼ iza 33 ne despué bibiguétacaʼ capital stiʼ Roma (Hech. 2:10). O zándaca gunna ca binni de Roma de stiidxaʼ Dios pur ca binni ni rutoo o pur ca xpinni Cristu ni runi viaje raqué. Pa gúcani zacá o pa coʼ la? ora bicaa Pablu carta stiʼ ra nuucabe lu iza 56, maʼ ziné ti tiempu de bizulú neza binni ridagulisaa que (Rom. 1:8). Padé ca xpinni Cristu ni nuu raqué yaʼ.

⁷ Nuu de laacabe nácacaʼ judíu. Casi Pablu la? biseendaʼ diuxi ra nuu Andrónico ne Junias, ne guniʼbe de laaca casi «binni xquidxeʼ», ne zándaca guniʼbe zacá purtiʼ de ti familia si laacabe. Áquila ne Priscila laaca judíu laacaʼ, ne dxiiñaʼ stícabe nga gúnicabe yoo de lari ndaaniʼ capital stiʼ guidxi que (Rom. 4:1; 9:3, 4; 16:3, 7; Hech. 18:2). Peru zándaca stale de ca xpinni Cristu ni biseendaʼ apóstol diuxi ra nuu que cadi judíu laacaʼ. Zándaca guca caadxi de laacabe de «cani nuu ralidxi César», ca binni riʼ ruluíʼ si gúcacaʼ esclavu stiʼ emperador o gúcacaʼ oficial (Fili. 4:22; Rom. 1:6; 11:13).

 8. Xi guendanagana bidxaagalú ca romanu.

⁸ Ca xpinni Cristu de Roma bidxaagalucaʼ ti guendanagana, cásica cadxaagalunu. Sicaríʼ bisiene Pablu ni: «Guiráʼ xixé binni maʼ bichee ne qué zanda gusihuínnicaʼ ca guenda sicarú stiʼ Dios» (Rom. 3:23, NM). Casi maʼ bidúʼyanu, naquiiñeʼ guiene ca binni ni yendá carta que ra nuu nácacaʼ binni ruchee ne caquiiñeʼ gápacaʼ fe lu cayuni Dios para gulá laacaʼ.

Naquiiñeʼ gánnanu nácanu binni ruchee

 9. Casi bisihuinni Pablu, xi zanda guni ca diidxaʼ nacubi ne galán pur binni.

⁹ Lu ca primé versículo stiʼ carta que, gudxi Pablu ca romanu xi zanda guni evangeliu, o ca diidxaʼ nacubi ne galán ni nabé cuzeetebe que pur binni. Laabe guniʼbe: «Qué rituí di lua güe stiidxa Cristu, purti laape ni nga ni riquiiñe Dios para ulá irá cani guni cre ni. Nirudóʼ beeda ni ra nuu ca judíu, ne óraque ra nuu cani cadi judíu». Lu textu ca bisihuinni apóstol ca zanda guilá guirácabe, cásica judíu zaqueca ni cadi judíu. Peru caquiiñeʼ gusihuínnicabe nápacabe fe, casi rusihuinni ca diidxaʼ guníʼ Pablu ora bizeeteʼ ni na Habacuc 2:4: «Ni ma bixá stonda ra bini cre la? zabani» (Rom. 1:16, 17; Gál. 3:11; Heb. 10:38). Yanna, pa «guiráʼ xixé binni maʼ bichee», ximodo zanda gulá ca diidxaʼ nacubi ne galán ca laacabe yaʼ.

10, 11. Xiñee nuu binni nagueenda riene ni na Romanos 3:23, peru xiñee nuu xcaadxi qué riene ni.

¹⁰ Para gapa tuuxa fe ni zanda gulá laa la? primeru naquiiñeʼ guiene naca ti binni ruchee. Ndaaniʼ ca guidxi ra rusiidicabe binni guni cré Dios dede nahuiiniʼ ne ganna caadxi cosa ni zeeda lu Biblia, cadi nagana para guiénecaʼ nácacaʼ binni ruchee. Biblia na: «Nin ti hombre qué randa runi puru si ni jneza sin guchee ndaaniʼ guidxilayú» (Eclesiastés 7:20). Ndaaniʼ ca guidxi ca, dede ca binni ni huaxiéʼ runi cré pa dxandíʼ nga na Pablu «irá xixé nu bichéʼ nu» la? randa riene huiinicaʼ xidé guniʼbe (Rom. 3:23). Peru nuu lugar ra rucheeche ca xpinni Cristu diidxaʼ ridxaagacaʼ stale binni ni qué liica riénecaʼ ca diidxaʼ ni guníʼ Pablu.

¹¹ Ndaaniʼ caadxi guidxi, nuu binni qué runi cré pa ralenenu donda ne rutíʼdinu ni ca xiiñinu. Nánnacabe nuu ora rucheecabe, rápacabe xiixa guendahuará o nuu tiru rúnicabe xiixa cosa malu. Ne laaca ruuyacabe zacaca nuu guiráʼ binni. Peru ra biniisicabe qué ñuu tu nusiidiʼ laacabe xi pur nuu ca guendanagana ca. Ne ndiʼ nga ni jma triste: ora runadiágacabe de tuuxa ni napa donda la? lu stiidxacabe riénecabe caníʼ binni de tuuxa ni bicheené ley o de tuuxa ni biʼniʼ ti cosa malu. Racá ridúʼyanu ti cosa, ti binni ni biniisi zacá gadxé modo riene ca diidxaʼ guníʼ Pablu, nga runi, para laabe cadi nácabe ti binni ruchee.

12. Xiñee qué runi cré stale binni pa gulenenu donda.

¹² Dede ca guidxi ni nacaʼ runi crecaʼ Cristu, stale de ca binni nuu racá qué rinacaʼ guni crecaʼ pa gulenenu donda. Xiñee yaʼ. Purtiʼ neca nuu biaje riécabe yuʼduʼ, ruuyacabe relatu ra ruzeeteʼ Biblia de Adán ne Eva casi ti cuentu o ti historia ni bizáʼ si binni. Ne nuu xcaadxi binni biniisicaʼ ti lugar ra huaxiéʼ runi crécabe Dios o ra qué liica runi crécabe laabe. Qué runi crécabe pa nuu ti Dios, nga runi, huaxiéʼ riuuláʼdxicabe gánnacabe pa gudixhe Dios caadxi ley ni naquiiñeʼ chinanda binni, laaca qué riuuláʼdxicabe chuʼ tu gabi laacabe cucheecabe ora qué rúnicabe ni na ca ley ca. Zanda guininu zeeda gácacabe casi ca binni ni bibani lu primé siglu, de cani guníʼ Pablu sicaríʼ: «Uzá tu ndaani guidxilayú sin ñunibiáʼ tu Dios, ne qué nibeza tu gasti de laa» (Efe. 2:12).

13, 14. 1) Gunáʼ nga ti razón ni rusihuinni cadi jneza nga guiníʼ tuuxa qué runi cré Dios ne guiníʼ cadi dxandíʼ ralenenu donda. 2) Xi cosa yuudxuʼ runi stale binni purtiʼ qué runi crecaʼ pa nuu ti Dios ni dxandíʼ.

¹³ Lu carta ni bicaa Pablu ra nuu ca romanu, bidiibe chupa razón ni rusihuinni cadi jneza diʼ nga guiníʼ binni qué ganna de Dios purtiʼ si biniisi ti lugar ra qué runi crécabe laabe. Primé razón ca nga purtiʼ guiráʼ ni nuu guibáʼ ne lu Guidxilayú rusihuínnicani nuu ti Dios ni bizáʼ cani (biindaʼ Romanos 1:19, 20). Ne jneza ni caninu pa guchaaganu ni né ca diidxaʼ ni bicaa Pablu lu ti carta ni biseendaʼ ra nuu ca hebreu, ra guniʼbe: «Guiráʼ yoo nuu tu bizáʼ laa, peru ni bizáʼ guiráʼ xixé ni nuu nga Dios» (Heb. 3:4, NM). Ni maʼ guninu ca rusihuinni nuu ti Dios ni bizáʼ guibáʼ ne Guidxilayú.

¹⁴ Ngue runi, ora bicaa Pablu ra nuu ca romanu, guníʼ qué gapa ca israelita ne ca binni de sti guidxi razón para guni adorarcaʼ bidóʼ ni qué risaca. Ne ngaca nga ni zanda guininu de ca hombre ni riuuné hombre ne gunaa ni riuuné gunaa, purtiʼ ora rúnicabe zacá maʼ qué riquiiñecabe xcuérpucabe modo gudixhe Dios iquiiñeʼ ni (Rom. 1:22-27). Ngue runi, jneza ngue modo biene Pablu ca diidxaʼ riʼ: «Cásica judíu zaqueca cani cadi judíu, dxiʼba donda ique caʼ» (Rom. 3:9).

«Xquenda biaani cabe rusiene laacabe»

15. Tu guiráʼ nga napa guendabiaaniʼ, ne xi rucaani laacabe gúnicabe.

¹⁵ Lu carta ni gucuá ra nuu ca romanu nuu sti razón ni rusihuinni xiñee naquiiñeʼ ganna binni gulené donda ne caquiiñeʼ chuʼ tu gulá laacaʼ. Ora caníʼ Pablu de guiráʼ ca ley ni bidii Dios guidxi Israel, guníʼ ca diidxaʼ riʼ: «Irá cani bichee ma nanna xi na ley la? zaguiʼba donda ique pur ley» (Rom. 2:12). Ra zigusiénebe jma de ni caniʼbe riʼ, bisihuínnibe ti cosa: stale biaje neca nuu binni qué ganna de ley ni bidii Dios guidxi Israel rúnicaʼ «jneza casi na ley». Nga runi riníʼcabe cadi jneza nga chuʼné tuuxa ti binnilidxi, guuti ne cuanaʼ. Xiñee yaʼ. Purtiʼ casi bisiene Pablu que guiranu nápanu guendabiaaniʼ (biindaʼ Romanos 2:14, 15).

16. Xiñee cadi purtiʼ si nápanu guendabiaaniʼ nga qué ziuu dxi gucheʼnu.

¹⁶ Neca guiranu nápanu ti guendabiaaniʼ ni rabi laanu xii nga ni jneza ne ni cadi jneza, cadi guiráʼ diʼ biaje ruzúʼbanu stiidxaʼ ni. Guzéʼtenu ejemplu stiʼ ca israelita ni bibani dxiqué. Stale biaje qué nulábicabe guendabiaaniʼ bidii Jiobá laacabe ne qué ñúnicabe ni na ca mandamientu cá lu Ley ra guníʼ Dios cadi cuanacabe ne cadi chuʼnécabe ni cadi xheelacabe (Rom. 2:21-23). Ngue runi, jma nápacabe donda purtiʼ qué ñúnicabe ni na xquendabiaanicabe ne ni na Dios. Racá rihuinni nácacabe binni ruchee, purtiʼ qué randa rúnicabe ni rinabaʼ Dios laacabe ne qué randa runi adorárcabe laabe modo riuuláʼdxibe. Ngue runi guca nagana para laacabe chúʼcabe gaxha de Dios (Lev. 19:11; 20:10; Rom. 3:20).

17. Xi diidxaʼ zeeda lu Romanos riguixhedxí ladxidoʼno.

¹⁷ Pur guiráʼ ni maʼ guninu ca, zándaca chuʼ tu guiníʼ nabé triste nga na libru stiʼ Romanos modo nuunu nezalú Dios ni jma nandxóʼ. Peru Pablu bisiéneruʼ jma de laani. Ra cuzeetebe de ca diidxaʼ guníʼ David lu Salmo 32:1, 2, bicaabe: «Purti cá ni uníʼ David que lu Xquiʼchi Dios: Tutiica bichee ne ma guca perdonar la? nayeche ziaana, purti ma gaʼchi irá ni bichee caʼ. Nayeche ziaana cani qué uquixe Dios irá ni bichee» (Rom. 4:7, 8). Casi maʼ bidúʼyanu ca, Dios rutiidilaʼdxiʼ donda stiʼ binni ne para nga maʼ gudíxhebe ximodo gácani.

Ca diidxaʼ nacubi ne galán ni jma caníʼ de Jesús

18, 19. 1) Xii nga na Pablu jma risaca de ca diidxaʼ nacubi ne galán ni bicaabe ra nuu ca romanu. 2) Xii nga cani naquiiñeʼ gúninu para guicaanu ca ndaayaʼ ni chigudii Reinu stiʼ Dios.

¹⁸ ¡Nabé sicarú ca diidxaʼ ca! Laacani rusietenalaʼdxiʼ cani laanu de ca diidxaʼ nacubi ne galán ni jma bizeeteʼ Pablu lu carta ni bicaa ra nuu ca romanu. Casi maʼ bidúʼyanu ca, apóstol ca bicaa ca diidxaʼ riʼ: «Qué rituí di lua güe stiidxa Cristu, purti laape ni nga ni riquiiñe Dios para ulá irá cani guni cre ni» (Rom. 1:15, 16).

¹⁹ Ca diidxaʼ nacubi ne galán riʼ jma cuzeeteni de dxiiñaʼ chiguni Jesús para gaca ni maca gudixhe ique Dios. Casi dxi caníʼ Pablu de «stiidxa Cristu» la? bizeetebe zedandá ti «dxi usihuinni Dios irá ni gaʼchi ndaani ladxidóʼ binni, ne zuni né be ni Jesucristu» (Rom. 2:16). Ora guniʼbe ca diidxaʼ riʼ, cadi caníʼdibe huaxiéʼ risaca «ra runi mandar Cristu ne Dios» o reinu stiʼ Cristu ne Dios, ne laaca cadi caníʼdibe qué risaca reinu ca ne ni chiguni (Efe. 5:5). Ni cusiénebe raríʼ nga guiráʼ ni racalaʼdxiʼ guibani ora guni mandar Reinu ca ne guicaa ndaayaʼ stini naquiiñeʼ guni chupa cosa: primé la? guiénebe nácabe binni ruchee nezalú Dios, ne guiropa, gusihuínnibe nápabe fe Jesucristu ti ganda gutiidilaʼdxiʼ Dios stóndabe. Ora guiénenu xii nga naguixhe ique Dios guni ca dxi zeeda ca ne guicaanu cani la? nápanu stale razón para guininu: «¡Nabé sicarú ca diidxaʼ ca!».

20, 21. Xiñee cadi naquiiñeʼ gusiáʼndanu ni zanda guni ca diidxaʼ nacubi ne galán ni bicaa Pablu ra nuu ca romanu ora maʼ ziuunu de yoo pur yoo, ne xi zabeendunu ora gúninu ni.

²⁰ Cadi naquiiñeʼ gusiáʼndanu xi zanda guni ca diidxaʼ nacubi ne galán ca ora maʼ canagucheechenu diidxaʼ. Ora bizeeteʼ Pablu de ni guníʼ Isaías bicaabe ca diidxaʼ riʼ: «Zuni be irá ni uníʼ be para tutiica guni cre laabe» (Rom. 10:11; Isa. 28:16). Ndaaniʼ ca guidxi ra runi cré binni rusiidiʼ Biblia nácanu binni gulené donda la? qué ridxagayaadícabe ora gunadiágacabe de Jesús. Peru ndaaniʼ ca guidxi ra qué runi crécabe o qué liica gánnacabe de laacani la? gadxé modo ruuyaʼ binni cani. Nga runi, ora gueeda guni cré binni de ca guidxi ca Dios ne ni cá lu Stiidxabe, naquiiñeʼ gusiénenu laacabe xi dxiiñaʼ cayuni Jesús. Lu sti tema ca zadúʼyanu ximodo cusiene capítulo 5 stiʼ Romanos ni guninu riʼ. Ni guizíʼdinu lu tema ca zanda iquiiñenu ni ora maʼ zigucheechenu diidxaʼ.

²¹ Casi maʼ bidúʼyanu ca, carta ni gucuá ra nuu ca romanu nabé ruzeeteni de ca diidxaʼ nacubi ne galán ca ne rusihuínnini «laape ni nga ni riquiiñe Dios para ulá irá cani guni cre ni» (Rom. 1:16). ¡Nabé riéchenu ora runi crenu ni ne ora racanenu binni ni dxandíʼ riuulaʼdxiʼ guiziidiʼ para guni cré ni! Ca binni ni riuulaʼdxiʼ guiziidiʼ de Dios riniʼcaʼ casi guníʼ Pablu lu Romanos 10:15: «Dunabé sicarú ni cayuni ni canayuíʼ de evangeliu ni rusieche binni» (Isa. 52:7). Ridxá tipa ladxidoʼno ora gunadiáganu guiníʼcabe zacá.

[Cani cá ñee yaza]

Ñee rietenaláʼdxinu ca ndiʼ la?

• Xii nga ni jma risaca lade ca diidxaʼ nacubi ne galán ni gucuá ra nuu ca romanu.

• Xii nga ni naquiiñeʼ gacanenu binni guiene.

• Xi ndaayaʼ na «evangeliu sti Cristu» nuu para guiráʼ binni.

[Ni caníʼ yaza 8]

Ca diidxaʼ nacubi ne galán ni rieeteʼ lu carta ni gucuá ra nuu ca romanu rusihuínnicani pabiáʼ risaca dxiiñaʼ ni cayuni Jesús para gaca ni maca gudixhe ique Dios

[Dibuju/foto ni zeeda lu yaza 9]

Guiranu rátinu purtiʼ ralenenu donda