Rusihuinni Dios pabiáʼ nadxii laanu

«Uca Dios nachaʼhui ne laanu, ruxhá stonda nu ne rudii laanu enda nabani ni qué zaluxe.» (ROM. 5:21)

1, 2. Xi bisaanané ca romanu binni, peru xii nga ni jma risaca bidii Dios laanu.

«TI COSA risaca ni bisaana ca romanu nga ca ley sticaʼ ne para laacabe naquiiñeʼ chinanda binni modo na cani.» (David J. Williams, ti hombre ni rutiixhi Biblia ne naca maestru ndaaniʼ Universidad ni nuu Melbourne, Australia.) Qué zacaayúdinu pa dxandíʼ ni guníʼ hombre ca, purtiʼ nuu sti cosa ni jma risaca ni bidiicabe laanu. Laani nga xiixa ni bisigaʼdeʼ Jiobá laanu: ni gudíxhebe gaca para chuuláʼdxibe ni gúninu, para guilanu ne para guicaanu guendanabani ni qué zaluxe.

² Modo gudixhe Jiobá gaca ni bizéʼtenu ca biaʼsi gúcani né modo na ca ley stibe. Ora bisiene Pablu de tema riʼ lu capítulo 5 stiʼ Romanos, qué ñúnidibe ni casi ora niniʼbe naquiiñeʼ gaca guiráʼ ni zeeda lu ley. Laabe bizulube né caadxi diidxaʼ ni rusiecheʼ laanu: «Yanna ma nuu né nu Dios tobi si, purti bixhá stonda nu ra bini cre nu Jesucristu, Señor stinu». Yanna, ximodo ruuyaʼ binni ni bisigaʼdeʼ Dios ca yaʼ. Cani ricaa ni la? ruuyaʼ cani casi ti modo rusihuinni Dios nadxii laacaʼ ne rápacaʼ gana gannaxhiicaʼ laabe. Lade cani biʼniʼ zacá nuu apóstol Pablu, laa bicaa ca diidxaʼ riʼ: «Ma bidii be laanu Espíritu Santu ne rusiene Espíritu que laanu pabiáʼ nadxii be laanu» (Rom. 5:1, 5).

 3. Xi naquiiñeʼ guinabadiidxanu laca laanu.

³ Yanna, xiñee caquiiñepeʼ gusigaʼdeʼ Dios laanu ni maʼ bizéʼtenu ca yaʼ. Xiñee jneza ni biʼniʼ Dios ne ximodo biáʼsipeʼ laani nga ni naquiiñeʼ gaca. Xi naquiiñeʼ guni tuuxa para guicaani yaʼ. Guidúʼyanu ximodo ricabi Stiidxaʼ Dios cani ne ximodo rusihuínnicani nadxii Jiobá laanu.

Nadxii Dios laanu neca gulenenu donda

4, 5. 1) Ximodo bisihuinni Jiobá pabiáʼ nadxii laanu. 2) Xi historia rieeteʼ lu Biblia racané laanu guiénenu ni zeeda lu Romanos 5:12.

⁴ Cumu nabé nadxii Jiobá laanu la? biseendabe tobi lucha Xiiñibe para gacané laanu. Ngapeʼ nga ni guníʼ Pablu: «Dios huaxa rusihuinni pabiáʼ nadxii laanu purti neca cuchéʼ né nu laa chiqué, biseenda Cristu guti pur laanu» (Rom. 5:8). Textu ca cusihuinni ximodo nga nuunu dxi guti Jesús pur laanu, racá na: «Cuchéʼ né nu [Dios] chiqué». Nga runi, galán gánnanu ximodo nga beeda guiaananu zacá.

⁵ Pablu bizulú bisiene ni ra guníʼ ti historia ni dxandíʼ guca: «Pur tobi hombre biuu enda ruchee ndaani guidxilayú, ne guti be purti bichee be, ne zacá ucuá enda guti que irá xixé binni, purti laca bichee caʼ» (Rom. 5:12). Lu xcaadxi relatu ni zeeda lu Biblia, cusiene Dios laanu ximodo bizaaca ni guninu riʼ. Laanu nánnanu bizulú bibani binni ndaaniʼ Guidxilayú dxi bizáʼ Jiobá Adán ne Eva, laacabe gúcacabe binni ni qué gapa donda cásica Jiobá. Despué gunábabe laacaʼ gúnicaʼ ti cosa ni cadi nagana, peru gúdxibe laacaʼ záticaʼ pa qué guzuubacaʼ diidxaʼ (Gén. 2:17). Triste guininu ni, peru Adán ne Eva bíʼnicaʼ ti guendahuati ora qué nuzuubacaʼ diidxaʼ, zaqué bisihuínnicabe qué racaláʼdxicabe gaca Jiobá ti Dios ni riguixhe Ley para laacabe ne tobi ni runi mandar guibáʼ ne guidubi naca Guidxilayú (Deu. 32:4, 5).

 6. 1) Bisiene xiñee guti ca xiiñiʼ Adán, ne pa bichaa modo guyuucabe despué de gucuaacabe Ley bidii Dios. 2) Xiñee zanda guchaaganu donda gulenenu casi guendahuará ni láʼ hemofilia.

⁶ Ca xiiñiʼ Adán gúlecaʼ despué de bidxiideche bixhózecaʼ Dios ndaaniʼ jardín ni guyuu Edén. Ngue runi, guirácabe gulenécabe donda ne biaananécabe guiráʼ yuubaʼ stini. Peru Jiobá qué nugaaniʼ donda íquecabe pur bichee Adán, purtiʼ cadi laadícabe bicheenécabe mandatu stiʼ Dios; ne dxiqué caʼruʼ quixhe diʼ Dios nin ti ley (Gén. 2:17). Neca zaqué gulenécabe donda. Dede dxiqué nga guyuu guendaguti ne guendaruchee luguiáʼ guiráʼ binni dede dxi bidii Dios Ley ca israelita, ne zaqué nga bihuinni nácacabe binni ruchee (biindaʼ Romanos 5:13, 14). Donda bisaanané Adán laanu zeeda gácani casi ti guendahuará ni napa tuuxa ne rutiidini ca xiiñiʼ casi talasemia, o anemia mediterránea (tuuxa ni huaxiéʼ napa rini), ne hemofilia (tuuxa ni nalase rini stiʼ), ne rihuínnini ora nabé ruxhii tuuxa rini ora gueeda gaca xiixa. Nga nga ni bizaaca ti príncipe nabé risaca ni láʼ Alejo de Rusia, xiiñiʼ zar Nicolás II ne xiiñiʼ zarina Alejandra. Casi familia ni bizéʼtenu ca, cadi guirádicaʼ xiiñicabe zuniná guendahuará ca, neca gápacabe ni. Peru donda bisaanané Adán laanu ca maʼ gadxé ni, purtiʼ guiráʼ tu nápani qué zalá diʼ. Guiranu ralenenu ni de jñaanu ne de bixhózenu, rutíʼdinu ni ca xiiñinu ne ruutini laanu. Ñee zanda gaca chaahuiʼ modo nuunu riʼ la?

Xii nga ni cudii Dios laanu pur Jesucristu

7, 8. Xi guleendú Adán ne xi guleendú Jesús pur ni bíʼnicaʼ.

⁷ Dios ni nadxii laanu maʼ gudixhe ximodo guiándanu de donda ni gulenenu de Adán. Pablu bisiene gúcani pur ni biʼniʼ «rairopa Adán», o ti hombre ni qué gapa donda casi primé que (1 Cor. 15:45). Peru casi chiguidúʼyanu riʼ gadxé gadxé ni biʼniʼ cada tobi de laacabe ne gadxé gadxé ni guleendúcabe (biindaʼ Romanos 5:15, 16).

⁸ Pablu na «adxé ni bidii Adán laanu pur enda ruchee stiʼ» ne gadxé «ni cudii Dios laanu yanna pur enda nachaʼhui stiʼ». Xi bizaaca pur «enda ruchee» stiʼ Adán yaʼ. Laaca laabe gúpabe donda de ni bizaacabe, ngue runi jneza ngue na Dios gátibe. Peru cadi laasibe nga binítibe guendanabani, apóstol Pablu guníʼ: «Stale tu guti purti bichee Adán». Ley stiʼ Dios na naquiiñeʼ gati guiráʼ ca binni ni za de Adán purtiʼ laaca nápacaʼ donda, dede né laanu. Peru nabé ratadxí ladxidoʼno gánnanu gadxé ni guleendú Jesús, ti hombre ni qué gapa donda. Xi guleendube yaʼ. Pablu bicabi ni ora bizeeteʼ ca diidxaʼ riʼ: «Zaxá stonda caʼ, ne zapa ca enda nabani», o «zaníʼ [Dios] nácacabe binni runi ni jneza ti guicaacabe guendanabani» (Rom. 5:18; NM).

 9. Ora guníʼ Dios zanda guixiá stonda binni casi na Romanos 5:16, 18, xi cayúnibe pur laacaʼ.

⁹ Ximodo naquiiñeʼ guiénenu ca diidxaʼ «ruxhá [Dios] stonda binni» ne «zaxá stonda caʼ» yaʼ. Ca diidxaʼ griegu ni biquiiñeʼ lu textu ca racanécani laanu. Hombre rutiixhi Biblia ni bizéʼtenu que bicaa: «Zeeda gácani casi ora ñuu tuuxa nezalú ti juez para gaca juzgar. Cadi caníʼ diʼ ni de guchaa binni modo laa, sínuque caniʼni de ximodo nuu binni nezalú Dios [...]. Lu ejemplu riʼ la? Dios nga juez ni na qué gapa binni ca donda. Zeeda gácani casi ora ñeedanécabe laabe nezalú Dios para gaca juzgarbe purtiʼ nápabe donda, peru Dios na nácabe ti binni runi ni jneza».

10. Xi biʼniʼ Jesús para gunda bixhiá Jiobá donda stiʼ binni ruchee.

¹⁰ Ximodo zanda guni «Juez stiʼ guidubi naca guidxilayú» ni jneza ora gutiidilaʼdxiʼ stonda binni ruchee yaʼ (Gén. 18:25). Zanda gúnibe zacá purtiʼ gúcabe nachaʼhuiʼ ora biseendabe tobi lucha Xiiñibe lu Guidxilayú riʼ, ne zacá nga bíʼnibe primé cosa ni naquiiñeʼ gúnibe para ganda gutiidiláʼdxibe stonda binni. Jesús biʼniʼ guiráʼ ni biʼniʼ mandar Bixhoze laa, neca guyuu ni biquiinde laa, neca biʼniʼ búrlacabe laa ne bininácabe laa. Qué nucheenebe Dios neca gudíʼdibe guiráʼ clase guendanagana, dede ora biiticabe laabe lu ti yaga (Heb. 2:10). Zacá nga bidiibe guendanabani sin donda stibe para guiaxa donda stiʼ ca xiiñiʼ Adán ne gulabe laacaʼ de guendaguti (Mat. 20:28; Rom. 5:6-8).

11. Xiñee Cristu si nga zanda quixe pur donda stinu.

¹¹ Lu sti textu bizeeteʼ Pablu «beda tixe [Cristu] saca ilá» guiráʼ binni (1 Tim. 2:6). Yanna, xii nga gudixe Jesús yaʼ. Cumu bichee Adán la? bisaananebe ca xiiñibe donda ne guendaguti, laacabe nga guiráʼ xixé millón de binni ni nabani lu Guidxilayú riʼ. Cumu Jesús naca ti binni ni qué ruchee la? ñanda ñápabe stale mil millón de xiiñibe ni qué ñapa donda.a Nga runi, dxiqué bisiénenu ñanda niquiiñeʼ xquendanabani Jesús ne stiʼ cani ñándaca ñeeda gaca xiiñibe ni qué gapa donda, para niguíxecaʼ pur xquendanabani Adán ne stiʼ ca xiiñiʼ. Peru ñee riníʼ Biblia ñanda ñaca cani ñeedagaca xiiñiʼ Cristu binni ni nulá laanu la? Coʼ. Lu Romanos 5:15-19 na guendaguti stiʼ «tobi hombre si» nga ni bilá laanu. Casi maʼ bidúʼyanu ca, guendanabani sin donda stiʼ Jesús nga biaʼca guendanabani ni gupa Adán. Nga runi, ni zanda gulá laanu nga Jesucristu. Pur «tobi hombre ni biʼni jneza» si nga randa rixiá stonda guiráʼ clase binni ne zanda guicaacaʼ guendanabani ni qué zaluxe, ne gunda guca nga purtiʼ bizuubaʼ Cristu stiidxaʼ Jiobá ne qué nusaanabe de ñúnibe ni na Jiobá dede dxi gútibe (2 Cor. 5:14, 15; 1 Ped. 3:18). Yanna, ximodo nga ruxhá Dios stóndanu ra guti Cristu pur laanu yaʼ.

Bixá ca donda stinu ra guti Jesús pur laanu

12, 13. Xiñee bisihuinni Dios nadxii binni ne rilaselaʼdxiʼ laacabe ora bixhiá stóndacabe.

¹² Jiobá guyuulaʼdxiʼ ora bidii xiiñiʼ xquendanabani pur guiráʼ binni (Heb. 9:24; 10:10, 12). Peru ximodo nuu ca discípulo stiʼ Cristu dxi nabánirucaʼ lu Guidxilayú riʼ yaʼ. Guirácabe dede né ca apóstol ni qué nusaana laabe gúcacaʼ binni ni napa donda. Neca bíʼnicabe stipa pur gúnicabe ni jneza, cadi guiráʼ diʼ biaje bíʼnicabe zacá. Xiñee yaʼ. Purtiʼ maca gulenécabe donda (Rom. 7:18-20). Peru Dios zanda guni chaahuiʼ modo nuucabe. Jiobá guyuulaʼdxiʼ ora «beda tixe [Cristu] saca ilá» guiráʼ binni, ngue runi gunda bitiidiláʼdxibe stonda guiráʼ ca xpínnibe.

¹³ Cadi purtiʼ si biʼniʼ ca apóstol que ne xcaadxi binni xiixa cosa ni galán nga gutiidilaʼdxiʼ Jiobá stóndacaʼ pur ni gudixe Cristu. Laabe bíʼnibe ni purtiʼ nabé nadxiibe binni ne rilaseláʼdxibe laacaʼ. Laapebe gudixhe íquebe guxhabe donda ni nuaʼ guiráʼ binni ne biiyabe laacaʼ casi binni ni maʼ qué gapa donda. Pablu bisiene chaahuiʼ ni ne ca diidxaʼ riʼ: «Pur enda nachaʼhui stibe bilá be laatu, ne biʼni be ni purti bini cre tu, ne cadi pur xiixa ni biʼni tu, sínuque de laabe zeeda ni» (Efe. 2:8).

14, 15. Xi ndaayaʼ gucuaa ca binni ni guníʼ Dios maʼ bixiá donda sticaʼ, peru xi naquiiñeruʼ gúnicabe.

¹⁴ ¡Nabé sicarú ni bisigaʼdeʼ Dios ni jma nandxóʼ binni ora bitiidilaʼdxiʼ stóndacaʼ ne guiráʼ ni maʼ bicheecaʼ! Ne pa nugábanu guiráʼ biaje huachee ca xpinni Cristu ante gunibiaʼcaʼ Dios la? nabé stale nga ni huacheecabe. Peru cumu beeda gati Cristu pur laacabe la? zanda gutiidilaʼdxiʼ Dios guiráʼ donda ca. Ne zacapeʼ nga guníʼ Pablu de laani: «Pur enda nachaʼhui sti Dios ruxhá stonda binni neca nabé bichee caʼ» (Rom. 5:16). Peru neca guca Jiobá nachaʼhuiʼ ne ca apóstol ne xcaadxi binni ni bixhiabe stóndacaʼ la? gúparuʼ xidé biʼniʼ adorárcabe laabe ne gúpacaʼ fe laabe. Xi zacaacabe despué yaʼ. «Zaxá stonda irá cani icaa ni cudii Dios laa de enda nachaʼhui stiʼ. Zapa ca enda nabani ne zuni mandar né ca Cristu.» Ni bisaanané Adán laanu gadxé ni de ni cusaanané Jiobá laanu, purtiʼ jneza ni bíʼnibe ra bixhiabe stóndanu. Adán bisaanané laanu guendaguti, peru Jiobá cudii laanu guendanabani ni qué zaluxe (Rom. 5:17; biindaʼ Lucas 22:28-30).

¹⁵ Cani guicaa ndaayaʼ de guxhiá Dios donda sticaʼ la? zeeda gácacaʼ xiiñiʼ Dios guibáʼ. Laaca zacaanécabe Cristu de ni chigudii Dios laa. Nga runi, ora gáticabe la? zusibani Dios laacabe casi binni de espíritu para guni mandarnécabe Cristu guibáʼ (biindaʼ Romanos 8:15-17, 23).

Rusihuinni Dios nadxii xcaadxi binni

16. Xi ndaayaʼ zacaa ca xpinni Cristu ni qué zuni mandárnecaʼ laabe guibáʼ.

¹⁶ Peru cadi guiráʼ diʼ cani runi ni na Dios ne nápacaʼ fe laabe nga zuni mandarnecaʼ Cristu guibáʼ. Cásica stale xpinni Dios ni bibani ante gueeda Cristu, stale de ca xpinni Jiobá ni nabani yanna riʼ cabézacaʼ guibánicaʼ sin gáticaʼ ndaaniʼ ti paraísu lu Guidxilayú riʼ. Ñee laaca maʼ guníʼ Jiobá maʼ bixiá donda stícabe para guibánicabe lu Guidxilayú riʼ la? Casi bisiene Pablu ni lu carta ni bicaa ra nuu ca romanu que, zanda guininu maʼ biʼniʼ Jiobá ni.

17, 18. 1) Ximodo biiyaʼ Jiobá Abrahán. 2) Xiñee gunda guníʼ Jiobá naca Abrahán ti binni ni runi ni jneza.

¹⁷ Pablu ruzeeteʼ ti ejemplu nabé risaca. Guniʼbe de Abrahán, ti hombre nabé gupa fe ni bibani stale siglu ante gudii Jiobá Ley guidxi Israel ne stale iza ante guxheleʼ Cristu ti neza para ca binni ni chiguibani guibáʼ (Heb. 10:19, 20). Apóstol Pablu guníʼ: «Bidii stiidxa Dios Abraham ne ca xiiñi zacaa ca guidxilayú, casi ni rudii binni xiiñi ora ma chi gati, peru bidii be ni laaca cadi purti biʼni ca ni na ley sti Moisés, sínuque purti bini cre ca laabe, ne nga runi bixhá be stonda caʼ» (Rom. 4:13; Sant. 2:23, 24). Casi maʼ bidúʼyanu ca, biʼyaʼ Dios naca Abrahán ti binni runi ni jneza (biindaʼ Romanos 4:20-22).

¹⁸ Peru cadi pur nga guininu qué ñuu dxi nuchee Abrahán. Cadi canídinu maʼ qué nucheebe purtiʼ si guníʼ Dios nácabe ti binni runi ni jneza (Rom. 3:10, 23). Peru Jiobá naca ti Dios nabé nuu xpiaaniʼ, ngue runi biiyaʼ pabiáʼ fe nápabe ne ximodo bisihuínnibe fe stibe pur cani bíʼnibe. Nabé biʼniʼ cré Abrahán zeeda binni ni maca guníʼ Dios que de lade ca binnilidxi. Binni ca nga beeda gaca Mesías, o Cristu (Gén. 15:6; 22:15-18). Cumu maʼ «gudixe [Cristu] saca ni bichéʼ nu que» la? ngue runi gunda bitiidilaʼdxiʼ Juez ni jma nandxóʼ stonda Abrahán ne stonda guiráʼ ca xpínnibe ni bibani ante gueeda Cristu, nga runi zanda guiásacabe de lade gueʼtuʼ despué (biindaʼ Romanos 3:24, 25; Sal. 32:1, 2).

Para Dios maʼ nácanu binni runi ni jneza yanna

19. Xi biʼniʼ Jiobá pur Abrahán ni riguu gana ca xpinni Cristu de yanna.

¹⁹ Ra guníʼ Dios ni nadxii laanu naca Abrahán ti binni runi ni jneza, nabé riguu nga gana ca xpinni Cristu ni nabani yanna. Qué niníʼ diʼ Jiobá rúnibe ni jneza cásica guníʼ de ca binni ni bibí pur espíritu, cani «zacaa né [Cristu] de lu ni udii Dios laa». Ca xpinni Cristu de grupuhuiiniʼ riʼ maʼ «ulí» Dios laacaʼ «para [gácacaʼ] xpinni» ne para gácacaʼ «xiiñi Dios» (Rom. 1:7; 8:14, 17, 33). Peru Abrahán beeda gaca «xhamigu [Jiobá]», ne guca nga ante gudii Cristu xquendanabani para guiaxa stonda binni (Sant. 2:23; Isa. 41:8). Yanna, xi zanda guininu de ca xpinni Cristu ni cabeza guibani ndaaniʼ Guidxilayú riʼ ora gácani ti paraísu yaʼ.

20. Xi naquiiñeʼ guni ca binni nabani yanna para guiníʼ Dios rúnicabe ni jneza cásica guniʼbe de Abrahán.

²⁰ Ca xpinni Cristu riʼ maʼ gucuaacaʼ «enda nachaʼhui stiʼ [Dios]» ne maʼ bixiá donda sticaʼ «purti gudixe [Jesucristu] saca ni» bicheecaʼ, peru laacaʼ cadi cabézacaʼ checaʼ guibáʼ (Rom. 3:24; 5:15, 17). Peru runi crécabe Dios de guidubi ladxidóʼcabe ne nápacabe fe lu ni maʼ gudixhe Dios para gulá laacabe. Ne rusihuínnicabe ni pur ca cosa galán rúnicabe, tobi de laacani nga gusiidicabe binni «de enda runi mandar sti Dios ne stiidxa Señor Jesucristu» (Hech. 28:31). Pur ca razón ni maʼ bidúʼyanu ca, riníʼ Jiobá nácacabe binni runi ni jneza cásica Abrahán. Nécapeʼ qué ricaacabe «enda nachaʼhui stiʼ [Dios]» cásica ricaa ca xpinni Cristu ni bibí pur espíritu santu la? riéchecabe stale purtiʼ zanda gaca xhamígucabe Dios, cásica Abrahán.

21. Xi ndaayaʼ zacaanu purtiʼ nadxii Dios laanu ne purtiʼ rúnibe ni jneza.

²¹ Guendanabani ni qué zaluxe ni chigudii Dios binni la? dxandíʼ zácani, qué ziaana diʼ ni lu bi casi riaana guiráʼ ni riníʼ ca políticu ca. Laani nga tobi de ca cosa ni gudixhe ique Dios ni jma nandxóʼ purtiʼ nabé nuu xpiaaniʼ. Ne chaahuiʼ chaahuiʼ ziguxheleʼ Jiobá neza para gaca guiráʼ ni maʼ gudixhe ique. Ne huayúnibe guiráʼ ni maʼ bizéʼtenu sin gucheenebe ca ley stibe. Laacani rusihuínnicani pabiáʼ nadxii Dios laanu. Ngue runi né stale razón bicaa Pablu ca diidxaʼ riʼ: «Dios huaxa rusihuinni pabiáʼ nadxii laanu purti neca cuchéʼ né nu laa chiqué, biseenda Cristu guti pur laanu» (Rom. 5:8).

[Cani cá ñee yaza]

Rietenaláʼdxinu ca ndiʼ la?

• Xi bisaanané Adán laanu, ne xi rizaacanu pur laani.

• Bisiene ximodo «beda tixe [Cristu] saca ilá» guiráʼ binni ne xii nga ni gudíxebe.

• Xi ndaayaʼ nápanu purtiʼ maʼ ruuyaʼ Jiobá laanu casi binni runi ni jneza.

[Dibuju/foto ni zeeda lu yaza 13]

Adán, ti hombre ni qué gapa donda bichee. Jesús, sti hombre ni qué gapa donda «beda tixe [...] saca ilá» guiráʼ binni

[Dibuju/foto ni zeeda lu yaza 15]

Rucheechenu ca diidxaʼ nacubi ne galán ni cusihuinni zanda gácanu binni runi ni jneza ra guti Jesús pur laanu