Cadi guiaandaʼ lii gudiiluʼ xquíxepeʼ binni

«Raquel bendaʼ:

Xquíxepeʼ lii pur guiráʼ ni bíʼniluʼ pur naa. Zándaca qué nudiiluʼ cuenta, peru ca diidxaʼ gúdxiluʼ naa ora beedaluʼ ra nuaa que nabé gucanécani naa. Nadxii Jennifer lii.»

XIMODO runi sentirluʼ ora guni ti binni xiixa para gusihuinni cudii xquíxepeʼ lii pur ni bíʼniluʼ pur laa yaʼ. Zándaca guizáʼ guiécheluʼ, purtiʼ guiranu nga riuuláʼdxinu gusisaca binni ni rúninu (Mateo 25:19-23).

Ca binni ni maʼ biaa gudii xquíxepeʼ ne runi xiixa para gusihuínnini la? jma galán riuu ne xcaadxi binni. Peru, ni jma risaca nga cayúnibe casi biʼniʼ Jesucristu, purtiʼ nabé bisisácabe ca cosa sicarú ni biʼniʼ xcaadxi binni (Marcos 14:3-9; Lucas 21:1-4).

Nabé triste nga guininu zeʼ dxi jma huaxiéʼ binni rusihuinni rudii xquíxepeʼ pur xiixa ni bíʼnicabe laa. Biblia na lu ca últimu dxi riʼ ziuu binni ni qué zudii xquixe, o qué zulabi ni gúnicabe pur laa (2 Timoteo 3:1, 2). Nga runi, naquiiñeʼ gápanu laanu para cadi gácanu casi ca binni ca, purtiʼ zándaca despué maʼ cadi gulábinu binni o maʼ cadi guni sentirnu yuubaʼ cadiʼdiʼ.

Yanna, ximodo zanda gusiidiʼ binni xiiñiʼ gudii xquíxepeʼ yaʼ. Tuu ndiʼ naquiiñeʼ gudiʼnu xquíxepeʼ, ne xiñee naquiiñeʼ gusihuínninu ni neca qué guni xcaadxi ni.

Gudiʼnu xquíxepeʼ ndaaniʼ lídxinu

Stale binni runi dxiiñaʼ nadipaʼ para gudii xiiñiʼ guiráʼ ni caquiiñeʼ, peru nuu tiru ruuyacabe qué rusisaca diʼ xiiñicabe ni. Xi zanda gúnicabe para gaca chaahuiʼ guendanagana riʼ yaʼ.

1) Laquixhe ejemplu ca. Jma nagueenda nga riziidiʼ ca baʼduhuiiniʼ ca pa guni binni ni primeru. Biblia ruzeeteʼ xi guiráʼ runi ti gunaa ni napa xiiñiʼ ni bibani guidxi Israel de dxiqué, ne caniʼni xi riníʼcabe de laabe, nani: «Ca xiiñibe riásacaʼ ne rábicaʼ laabe diidxaʼ sicarú». Paraa biziidicabe guiníʼcabe zacá yaʼ. Laaca versículo ca na sicaríʼ: «Xheelabe laaca riguu naróʼ stibe» (Proverbios 31:28). Dxandíʼ, ora guʼyaʼ ca baʼduʼ ca ximodo rudii bixhózecaʼ xquíxepeʼ la? riziidicabe pabiáʼ risaca nga gúnicabe ni purtiʼ rusiécheni binni ni gábicabe ni, jma sicarú riunécabe binnilídxicabe ne rihuinni nuu xpiaanicabe.

Ti hombre láʼ Stephen na: «Para quixheʼ ejemplu ca nezalú ca dxaapahuiiniʼ stidu la? cada góʼxhidu rudiéʼ xquíxepeʼ xheelaʼ pur laani. Laacabe rudiicabe cuenta de ni runeʼ, ne yanna maʼ ruyúbicabe ximodo gudiicabe xquíxepeʼ jñaacabe». Lii pue, ñee rudiiluʼ xquíxepeʼ xheelaluʼ pur guiráʼ ni runi, dede ne ora guni xixa cosahuiiniʼ la? Rudiiluʼ xquíxepeʼ ca xiiñiluʼ ora gúnicabe ni raca caber laacabe la?

2) Lagusiidiʼ laacabe. Para ganna binni gudii xquíxepeʼ la? naquiiñeʼ guiziidiʼ gúnini. Peru ximodo gusiidiʼ bixhoze binni ca xiiñiʼ gúnini yaʼ. Rey Salomón, ti hombre guizáʼ nanna, guníʼ naquiiñeʼ guiníʼ ique binni. Nabe sicaríʼ: «Ladxidóʼ binni ni runi ni jneza la? riníʼ ique ante guicabi» (Proverbios 15:28).

Ora gusigáʼdecabe xiiñiluʼ xiixa, ñee dxandíʼ rusisácacabe ni la? Ñee riníʼ íquecabe dxandíʼ rizaalaʼdxiʼ binni laacabe ne zacá rusihuinni riuulaʼdxiʼ gudii laacabe xiixa la? Pa gusiidiluʼ laacabe guiníʼ íquecabe ca cosa riʼ la? despué maʼ de laasicabe ziale gudiicabe xquíxepeʼ binni. María, ti gunaa ni napa chonna xiiñiʼ, na sicaríʼ: «Neca caquiiñeʼ cueenu tiempu para gusiénenu xiiñinu pabiáʼ risaca ni cusigáʼdecabe laanu, peru zabeendunu ni galán pa gúninu ni. Zanda gábinu laacabe nuu tu guníʼ ique laanu ne nuu gusihuinni pabiáʼ nadxii laanu». Pa guinínenu xiiñinu sicaríʼ la? zusíʼdinu laacabe gudiicabe xquíxepeʼ binni, ne laaca zaziidicabe xiñee naquiiñeʼ gúnicabe ni.

Binni ni nanna gusiniisi xiiñiʼ jneza la? qué rudiidiʼ lugar guiníʼ ique xiiñiʼ naquiiñeʼ cueza gusigáʼdecabe laa xiixa pur ni biʼniʼ o guiníʼ ique napa xidé gudii binni laacaʼ xiixa.a Ca diidxaʼ ni cá lu Proverbios 29:21 ra caníʼ ximodo gaca binni ne mozo stiʼ dxiqué, laaca zanda iquiiñeʼ ni ora gusiniisi binni xiiñi ca dxi riʼ, nani sicaríʼ: «Pa tuuxa gudii guiráʼ ni racalaʼdxiʼ mozo stiʼ dede dxi nahuiinibe la? despué qué zudiibe xquíxepeʼ laa pur guiráʼ ni biʼniʼ pur laabe».

Dede ca baʼduhuiiniʼ ca zanda guiziidicaʼ gudiicaʼ xquíxepeʼ. Ximodo yaʼ. Ti gunaa ni napa chonna xiiñiʼ, láʼ Linda, caníʼ xi runi ne xheelaʼ, nabe: «Ora gúnidu ti guiʼchiʼ para gudiʼdu tuuxa la? rábidu xiiñidu guni ti dibuju o gucaabe labe luni». Nécapeʼ cadi naca dibuju ca casi ca cuadru guizáʼ sicarú ca ne ca letra ca cadi galanpeʼ cani la? ca baʼduhuiiniʼ ca riziidicabe stale ora gúnicaʼ ni.

3) Cadi guireetu gana. Binni guidxilayú nabé nga riuulaʼdxiʼ puru si para laa, nga runi raca nagana para laa gudii xquíxepeʼ (Génesis 8:21; Mateo 15:19). Peru Biblia cayabi laanu sicaríʼ: «Naquiiñe usihuinni tu ma nacubi tu dede ndaani ladxidóʼ to ne idubi xquenda biaani tu. Naquiiñe ibani tu modo naguixhe Dios ne usihuinni tu dxandí ma adxé laatu yanna, purti ma nayá xpida tu ne runi tu ni jneza» (Efesios 4:23, 24).

Pur modo biniisi stale binni nanna nagana nga gacané xiiñiʼ «usihuinni ma adxé» modo laacaʼ. Hombre ni maca bizéʼtenu, ni láʼ Stephen que, na sicaríʼ: «Rábidu zandaa ca dxaapahuiiniʼ stidu guiziidicaʼ gudiicaʼ xquíxepeʼ de laasicaʼ sin gábidu laaca gúnicaʼ ni». Peru nin laabe nin xheelabe qué nireedicabe gana. Laabe guníʼrube: «Gúpadu paciencia laacabe, ne despué biziidicabe gudiicabe xquíxepeʼ binni. Nabé rusiéchecabe laadu».

Gudiʼnu xquíxepeʼ ca xhamígunu ne ca xpesínunu

Nuu tiru qué rudiʼnu xquíxepeʼ, peru cadi purtiʼ qué nanu gúninu ni, sínuque purtiʼ riaandaʼ laanu. Yanna, ñee risácapeʼ nga gusihuínninu rudiʼnu xquíxepeʼ la? Ñee cadi naquiiñeʼ chuuláʼdxisinu ni cudiicabe laanu la? Guidúʼndanu ti relatu ni zeeda ndaaniʼ Biblia para guiénenu ni caninu riʼ.

Lu tobi de ca biaje zeʼ Jesús Jerusalén la? bidxaagalube chii hombre napa lepra. Ora gucabiáʼ ca hombre riʼ laabe la? «bicaa ca ridxi laabe: Jesús, Maistru, biá laadu. Ora biʼya be laaca rabi be laacaʼ: Laché ra nuu sacerdote. Lachiuluíʼ laa ma bianda tu. Ne laga ze ca neza nisi pe byuiʼ lepra que ladi caʼ. Ora biʼya tobi de laaca ma bianda, bigueta uxooñeʼ, cucaa ridxi, cusisaca Dios. Bizuxibi xa ñee be dede gudixhe ique layú, cudii diuxquixe. Ngue nda samaritanu laa» (Lucas 17:11-16).

Xi biʼniʼ Jesús yaʼ. Ñee guniʼbe xiñee qué nibiguetaʼ xcaadxi hombre que para nudii xquíxepeʼ laabe la? Relatu que na guníʼ Jesús sicaríʼ: «Ñee cadi chii cabe bianda la? Laga xcaʼ que yaʼ, uná laacaʼ. Ñee iruti ru qué nibigueta nusisaca Dios sínuque laga ni cadi binni laanu ri la?» (Lucas 17:17, 18).

Ca hombre que cadi binni malu diʼ laacaʼ, purtiʼ maʼ bisihuínnicabe runi crécabe Jesús, ne bíʼnicabe ni gudxi laacabe, guyécabe ra nuu cani ruzaaquiʼ guʼxhuʼ ni nuu Jerusalén que. Dxandipeʼ biéchecabe pur ni biʼniʼ Jesús pur laacabe. Peru qué nusihuínnicabe ni, ngue runi bidxagayaa Jesús. Xi rizíʼdinu de relatu riʼ yaʼ. Guiníʼ íquenu ndiʼ, xi rúninu ora guni tuuxa xiixa sicarú pur laanu. Ñee oraqueca rudiʼnu xquíxepeʼ laabe la? Zándaca guséʼndanu ti guiʼchihuiiniʼ ra nuube para gudiʼnu xquíxepeʼ laabe o gúninu sti cosa.

Biblia na ora nadxiinu binni la? qué zaninu xiixa diidxaʼ para guninanu laa, ne qué zuyúbinu para laasinu (1 Corintios 13:5). Nga runi, ora gudiʼnu xquíxepeʼ binni de guidubi ladxidoʼno la? laaca rusihuínninu nadxiinu laacaʼ, ne cadi rúninu ni purtiʼ si naquiiñeʼ gácani. Relatu stiʼ chii binni napa lepra que rusiidini laanu pa racaláʼdxinu chuulaʼdxiʼ Cristu ni rúninu la? naquiiñeʼ gusihuínninu nadxiinu binni ora gudiʼnu xquíxepeʼ laa. Ne naquiiñeʼ gúninu ni ne guiráʼ binni, neca nácacaʼ de gadxé guidxi, raza o religión.

Nga runi, galán guinabadiidxanu ndiʼ: «Padxí nga últimu bidiéʼ xquíxepeʼ tuuxa, zándaca ti vecinu, tobi ni runeniáʼ dxiiñaʼ o ni riniáʼ scuela, ti doctor, tobi ni cutoo o sti binni ni biʼniʼ xiixa pur naa yaʼ». Para guʼyuʼ pa riaadxaʼ lii guʼnuʼ ndiʼ la? zanda ugábaluʼ panda biaje rudiiluʼ xquíxepeʼ, bíʼnini biaʼ chupa gubidxa, neca ora si gábiluʼ binni «xquíxepeʼ lii» o gúniluʼ ni de sti modo.

Ni jma caquiiñeʼ gudiʼnu xquíxepeʼ nga Jiobá, purtiʼ laa rudii laanu «irá ni nachaʼhui ne irá ni dxandí sicarú» (Santiago 1:17). Nga runi, guiníʼ íquenu xi runi Jiobá pur laanu ne guinabadiidxanu ndiʼ: ñee cudiʼnu xquíxepeʼ laabe pur laacani la? (1 Tesalonicenses 5:17, 18.)

Xiñee naquiiñeʼ gudiʼnu xquíxepeʼ neca xcaadxi qué rúnini

Zándaca ca binni ni nuu ládenu qué rudiicaʼ xquíxepeʼ. Xiñee naquiiñeʼ gúninu ni laanu yaʼ. Guininu tobi de ca razón nápanu.

Pa gácanu nachaʼhuiʼ ne binni ni qué rudii xquíxepeʼ la? cayúninu casi runi Jiobá, Dios ni bizáʼ laanu. Neca stale binni qué rusisaca ni rúnibe pur laacaʼ la? laabe qué rusaanadibe de gannaxhiibe laacaʼ (Romanos 5:8; 1 Juan 4:9, 10). Ne zacá ni «purti laa rudii lugar guzaani gubidxa sti ra nuu cani nachaʼhui ne ra nuu cani nadxabaʼ, ne rusaba nisa guie ra nuu cani runi ni na, ne ra nuu cani qué runi ni na». Nga runi, pa gúninu stipa pur gudiʼnu xquíxepeʼ binni, neca laacaʼ cadi gúnicaʼ zacá la? zusihuínninu «[ye]ndee [n]u Bixhoze [n]u ni nuu ibáʼ» (Mateo 5:45).

[Cani cá ñee yaza]

[Dibuju/foto ni zeeda lu yaza 13]

Zanda ugábaluʼ panda biaje rudiiluʼ xquíxepeʼ, bíʼnini biaʼ chupa gubidxa, neca ora si gábiluʼ binni «xquíxepeʼ lii» o gúniluʼ ni de sti modo

[Dibuju/foto ni zeeda lu yaza 13]

Gudixhe ejemplu ca nezalú ca xiiñiluʼ ti gúʼyacaʼ rudiiluʼ xquíxepeʼ

[Dibuju/foto ni zeeda lu yaza 13]

Dede ca baʼduhuiiniʼ ca zanda guiziidicaʼ gudiicaʼ xquíxepeʼ