Riguixhedxí Jiobá ladxidoʼno lu intiica si prueba tiidinu

1, 2. ¿Ximodo riguixhedxí Dios ladxidoʼno, ne xidé zanda chuʼnu seguru pur ni rusiidiʼ Stiidxabe laanu?

TI HERMANU joven, bidxiña ra nuu ti ancianu ni maʼ huaniisi láʼ Stephen ne gunabadiidxaʼ laabe xiixa ni naguu xizaa laa. Nabé riníʼ íquebe 1 Corintios 7:28 ra ná: «Zaca ni nagana para cani ichaganáʼ». Ngue runi gunabadiidxabe Stephen, ti hombre maʼ bichaganáʼ, xii nga ni zaca «nagana» ca ne xi zanda gúnibe para gudxiilube ni pa chuʼ dxi guichaganabe. Ante guicabi Stephen laabe, gudxi laabe guiníʼ íquebe lu xcaadxi diidxaʼ ni bicaa apóstol Pablo, Jiobá nga «Dios stinu ne riguixhe dxí be ladxidóʼ no. Rusieche be laanu ora tiica acaná ladxidóʼ no» (2 Cor. 1:3, 4).

² Nanna dxíchinu, Jiobá nga Bixhózenu ni nadxii laanu ne riguixhedxibe ladxidoʼno ora nápanu guendanagana. Zándaca rietenaláʼdxiluʼ ximodo biluiʼbe lii xi guʼnuʼ ne modo gucanebe lii stale biaje, zándaca biquiiñebe Stiidxabe para bíʼnibe ni. Nuunu seguru racaláʼdxibe ni galán para laanu, cásica gucaláʼdxibe ni galán para ca xpínnibe de dxiqué. Biblia ná: «Purtiʼ nannaʼ dxiicheʼ xi naguixheʼ iqueʼ guneʼ né laatu, ná Jiobá, naguixheʼ iqueʼ chúʼdxitu, ne cadi gacanatu, para gudieeʼ laatu ti futuro ne ti esperanza. Laatu zucaarídxitu naa ne zeedatu para guni orartu naa ne zucaadiagaʼ laatu» (Jeremías 29:11, 12).

 3. ¿Xi guendarinabadiidxaʼ zacábinu?

³ Cásica rúninu lu xcaadxi cosa ridxaagalunu lu xquendanabáninu, pa gánnanu xiñee nápanu prueba ne guendanagana lu xquendaxheelanu o ndaaniʼ familia stinu la? cadi nagana zaca para laanu gudxíʼlunu cani. ¿Xii nga zuni xquendanabani binni «nagana», casi guníʼ Pablo ca yaʼ? ¿Xi ejemplu de dxiqué ni zeeda lu Biblia ne de yanna zanda quixhedxí ladxidoʼno? Ra gánnanu cani zacané cani laanu cadi guireʼnu gana.

4, 5. Bizeeteʼ caadxi cosa ni redané guendanagana lu xquendanabani binni.

⁴ Dxi bicheelaʼ Dios ca primé binni que, guníʼ: «Zusaana hombre bixhoze ne jñaa, ne naquiiñeʼ guicanú xheelaʼ, ne gueeda gácacabe ti beela si» (Gén. 2:24). Peru, cumu binni ruchee laanu la? zándaca zápanu guendanagana ora guichagananu ne ora maʼ gápanu familia stinu (Rom. 3:23). Stale biaje la? hombre ni maʼ bichaganáʼ ca nga ricaa autoridad ni gupa bixhoze guirópacaʼ ante, purtiʼ Dios maʼ gudixhe hombre ca nga gaca xaíque stiʼ xheelaʼ (1 Cor. 11:3). Zándaca gaca nagana para caadxi hombre gúnicaʼ dxiiñaʼ riʼ. Ne laaca zándaca gaca nagana para ca gunaa ca guzuubacaʼ stiidxaʼ xheelacaʼ purtiʼ jma biaacaʼ guzuubacaʼ stiidxaʼ bixhózecaʼ ne jñaacaʼ. Ne ziuu ora zapa cani nacubi bichaganáʼ ca guendanagana ra maʼ chuʼcaʼ lade familia sticaʼ.

⁵ Ne jma riuucabe xizaa ora gabi gunaa ca xheelaʼ maʼ chigápacaʼ ti xiiñicaʼ. Neca riuucabe nayecheʼ, laaca riuucabe xizaa purtiʼ zándaca gapa gunaa ca guendanagana lu tiempu gaca xiiñiʼ o despué. Ne zápacabe jma gastu. Peru cadi ngasi nga ni zuchaa lu xquendanabánicabe. Jma maʼ zabee gunaa ca tiempu para gapa baʼduhuiiniʼ ca ne zuuyaʼ xi caquiiñebe. Ne hombre ca zuni jma dxiiñaʼ, purtiʼ zuuyabe gapa familia stibe ni iquiiñeʼ. Nga runi, cásica hombre ne gunaa ca maʼ qué zápacaʼ stale tiempu para laacaʼ casi ante.

6-8. ¿Ximodo zanda guni sentir ti guendaxheelaʼ pa qué gapa xiiñiʼ neca racalaʼdxiʼ?

⁶ Nuu guendaxheelaʼ ridxaagalú sti guendanagana: qué gápacaʼ xiiñicaʼ neca guizáʼ racaláʼdxicaʼ gápacaʼ. Neca guichaganáʼ binni ne gapa xiiñiʼ, cadi caníʼ diʼ nga maʼ qué ziuu xizaa, xi si la? ora racalaʼdxiʼ binni gapa xiiñiʼ ne qué ganda la? reeda gaca ni ti guendanagana. Stale gunaa nabé riuucaʼ triste purtiʼ qué ganda gaca xiiñicaʼ (Prov. 13:12). Tiempu bibani ca binni ruzeeteʼ Biblia, rúnicabe menu ca binni ni qué rapa xiiñiʼ. Nabé guca deprimir Raquel, xheelaʼ Jacob, ora biʼyaʼ cayapa benda xiiñiʼ ne laa qué ganda (Gén. 30:1, 2). Ndaaniʼ caadxi guidxi ra nabé rapa binni xiiñiʼ, rinabadiidxacabe ca misioneru xiñee qué gápacaʼ nin ti xiiñicaʼ. Neca ruyúbicabe modo gusiénecabe binni ca razón stícabe, nuu biaje ricábicaʼ laacabe: «¡Triste xa! Zuni orardu pur laatu».

⁷ Guidúʼyanu ejemplu stiʼ ti hermana de Inglaterra ni qué ñapa xiiñiʼ, neca nabé gucalaʼdxiʼ ñapa tobi. Ora bigaandabe iza ra maʼ qué zanda gápabe, nabé gucanabe, purtiʼ bidiibe cuenta qué zaca diʼ ni racaláʼdxibe yanna lu Guidxilayú riʼ. Ngue runi, laabe ne xheelabe gudixhe íquecabe guni adoptárcabe ti baʼduhuiiniʼ. Peru, laabe guniʼbe: «Guyuaaʼ triste ti tiempu casi runi sentir tuuxa ora gatiʼ ti binnilidxi. Nannaʼ cadi ngueca diʼ nga gapa binni xiiñiʼ que guni adoptar tobi».

⁸ Dxandíʼ, ruzeeteʼ Biblia «zalá gunaa ra gapa xiiñi» (1 Tim. 2:15). Ca diidxaʼ riʼ qué riníʼ diʼ cani zapa binni guendanabani ni qué zaluxe ora gapa xiiñiʼ, sínuque caníʼ cani maʼ qué zapa gunaa riʼ tiempu para chisme ne chinduu ruaa lu xpida binni, purtiʼ maʼ napa familia ni guni tender (1 Tim. 5:13). Peru laaca si zápabe guendanagana ni rapa ca guendaxheelaʼ ne ca familia.

 9. ¿Xiñee nagana prueba ridxaagalú binni ora gatiʼ xheelaʼ?

⁹ Ora riníʼ íquenu ca guendanagana stiʼ ti guendaxheelaʼ, nuu tobi ni qué lica ridiʼdiʼ ndaaniʼ íquenu: gatiʼ tobi de laacabe. Ni cadiʼdiʼ lu yuubaʼ riʼ zándaca qué niníʼ íquebe pa nizaacabe ndiʼ ndaaniʼ Guidxilayú riʼ. Ca xpinni Cristu runi crécabe promesa biʼniʼ Jesús de dxi guibani gueʼtuʼ, ti esperanza ni riguixhedxí ladxidóʼ tuuxa ni gutiʼ xheelaʼ (Juan 5:28, 29). Ndiʼ nga sti modo riquiiñeʼ Bixhózenu ni nadxii laanu Stiidxaʼ para quixhedxí ladxidóʼ cani cadiʼdiʼ lu xiixa guendanagana. Guidúʼyanu ximodo huaguixhedxí Dios ladxidóʼ caadxi de ca xpinni ne ximodo huayacané ndiʼ laacaʼ.

10. ¿Xi gudixhedxí ladxidóʼ Ana? (Biiyaʼ dibuju ni zeeda ra ruzulú tema riʼ).

¹⁰ Ana, xheelaʼ Elqaná, gupa ti prueba nabé nagana: qué ganda gapa xiiñiʼ, peru Peniná, sti xheelaʼ Elqaná, napa. Biblia ná: «Ne bigaanda dxi gudii Elqaná ofrenda, ne bidiibe ni raca caber Peniná xheelabe ne guiráʼ ca xiiñiʼ cásica hombre ne gunaa; peru Ana bidiibe laa ti ndaa si. Ana ndaʼ nga ni jma nadxiibe, peru nuseeguʼ Jiobá matriz stiʼ. Ne pur ngue nabé rucaalú Peniná laa ne ruchiichi laa dede rusituí lube para chuʼbe triste purtiʼ biseeguʼ Jiobá matriz stibe» (1 Samuel 1:4-6). Guiráʼ iza naquiiñeʼ guni huantar Ana ca burla stiʼ Peniná, ne ngue nabé riguu laabe triste. ¿Xi gudixhedxí ladxidoʼbe yaʼ? Biblia ná «xadxí biʼniʼ orarbe Jiobá» para gábibe laa guendanagana stibe. Nanna dxíchinu gulézabe guicabi Jiobá oración stibe. Peru intiica si gaca, «maʼ qué lica nihuinni lube pa nuube xizaa» (1 Sam. 1:12, 17, 18). Gúpabe confianza zudii Jiobá laabe ti xiiñibe o zuyubi sti modo quixhedxí ladxidoʼbe.

11. ¿Ximodo riguixhedxí oración ladxidoʼno?

¹¹ Laga nácanu imperfectu ne nabanirunu lu guidxilayú ni nuu lu náʼ Binidxabaʼ riʼ zadidirunu prueba (1 Juan 5:19). Peru nánnanu zacané Dios ni riguixhedxí ladxidoʼno laanu. Laabe zacanebe laanu ora maʼ cadídinu lu guendanagana, pa guni orarnu laabe de guidubi ladxidoʼno, cásica biʼniʼ Ana. Cadi naquiiñeʼ si gábinu laabe ca guendanagana stinu; naquiiñeʼ gábinu laabe ximódopeʼ cayuni sentirnu ne guinábanu laabe gacanebe laanu de guidubi ladxidoʼno (Filip. 4:6, 7).

12. ¿Xi gucané Ana para guyuu nayecheʼ?

¹² Neca qué ganda gapa binni xiiñiʼ o guniti binnilidxi lu guendaguti, zanda guidxela ni quixhedxí ladxidóʼ. Guietenaláʼdxinu de ti profetisa ni bibani tiempu stiʼ Jesús, laaca Ana labe. Guti xheelabe dxi deruʼ gadxe iza nápabe de bichaganabe, ne Biblia qué ruzeeteʼ pa gúpabe xiiñibe. Dxi nápabe 84 iza, «qué riree be ndaani yuʼdu roʼ. Rusisaca be Dios ridxí ne huaxhinni, ne stale tiru riaana be sin go be para iníʼ né be Dios» (Luc. 2:36, 37). Ni gudixhedxí ladxidóʼ Ana ne ni guluu laa nayecheʼ nga guni adorar Jiobá.

13. Bizeeteʼ ti ejemplu ni rusihuinni ximodo zanda quixhedxí ca xhamígunu ladxidoʼno ora qué guni familia stinu ni.

¹³ Laaca zanda quixhedxí ca xhamígunu ni nápanu ndaaniʼ congregación ladxidoʼno (Prov. 18:24). Guidúʼyanu ejemplu stiʼ Paula. Nabé triste guyuube dxi bisaana jñaabe Jiobá. Nagana guca ni para laabe, purtiʼ deruʼ gaayuʼ iza nápabe. Peru ti tiempu despué guluu Ann gana laabe, ti precursora de congregación stibe, ne bisihuinni nadxii ne rizaalaʼdxiʼ laabe. Paula ná: «Neca cadi de familia stinneʼ Ann, peru ra bizaaláʼdxibe naa ne bisihuínnibe cariñu naa nabé gucané ni naa». Ne guníʼrube: «Gucané ngue para cadi gusaanaʼ de guneʼ xhiiñaʼ Jiobá». Biguetaʼ jñaabe ndaaniʼ congregación sti biaje, ne nga nabé rusiecheʼ ni Paula. Laaca nayecheʼ nuu Ann, purtiʼ gucanebe Paula para cadi gusaana de guni xhiiñaʼ Jiobá.

14. Ora quixhedxinu ladxidóʼ sti binni, ¿ximodo racané ni laanu?

¹⁴ Risaca guzéʼtenu ndiʼ: ora gusihuínninu nadxiinu xcaadxi binni ne dxandipeʼ rizaláʼdxinu laacaʼ la? rusiáʼndanu ca guendanagana stinu. Stale hermana, cásica ni maʼ bichaganáʼ ne ni caʼruʼ guichaganáʼ, nánnacaʼ ridxá tipa ladxidoʼcaʼ ora racanecaʼ gaca xhiiñaʼ Dios ra gucheechecaʼ ca diidxaʼ nacubi ne galán. Meta stícabe nga gusisácacabe Jiobá ra gúnicabe ni ná. Predicación ca zeeda gácani casi ti terapia para chupa chonna de laacabe. Rihuinni dxíchica guiranu racanenu chuʼ congregación tobi si ora rizaláʼdxinu ca hermanu ne ca binni nuu lu territorio (Filip. 2:4). Ndiʼ nga ni biʼniʼ apóstol Pablo. Gúpabe ca hermanu de Tesalónica «casi runi ti gunaa ne ca xiiñi» ne gudixhedxibe ladxidoʼcaʼ casi ora ñácabe bixhózecaʼ en sentidu espiritual (biindaʼ 1 Tesalonicenses 2:7, 11, 12).

15. ¿Tu lu náʼ nga nuu gusiidiʼ ca xcuidi ca?

¹⁵ Laaca risaca nga guiníʼ íquenu modo quixhedxinu ladxidóʼ ca familia ne modo gacanenu laacaʼ. Nuu hermanu ni huaxieʼruʼ tiempu napa ndaaniʼ congregación rinabaʼ sti hermanu ni maʼ napa stale tiempu para gacané ca xiiñibe guiziidicaʼ ni dxandíʼ, dede gudii estudiu laacabe. Stiidxaʼ Dios ná bixhoze ne jñaa ca xcuidi ca nga nuu lu nacaʼ gusiidicaʼ ca xiiñicaʼ (Prov. 23:22; Efes. 6:1-4). Ne de yanna zacá ni neca nuu biaje riquiiñecabe tu gacané laacabe ne rudiicabe xquíxepeʼ ora chuʼ tu guni ni. Nga runi, galán nga guiniʼnécabe ca xiiñicabe gatigá.

16. ¿Xi cadi naquiiñeʼ guiaandaʼ laanu ora guinábacabe laanu gacanenu ti xcuidi?

¹⁶ Pa guinabaʼ tuuxa laanu guni estudiárnenu xiiñiʼ Biblia, naquiiñeʼ guietenaláʼdxinu cadi chigúninu dxiiñaʼ ni nuu lu nabe. Dede zándaca guinábacabe laanu guni estudiárnenu xiiñiʼ tuuxa ni qué lica riuulaʼdxiʼ ni dxandíʼ rusiidiʼ Biblia. Pa zacá ni, naquiiñeʼ gánnanu cadi purtiʼ si cayacanenu binni ca maʼ guiníʼ íquenu laanu nga bixhózebe o jñaabe en sentidu espiritual. Laaca jneza nga guni estudiárnenu ca xcuidi ca ra lídxicaʼ ora nuu bixhózecaʼ ne jñaacaʼ o ti xpinni Cristu ni maʼ huaniisi, o ti lugar galán ra nuu binni. Zacá qué zudiʼnu razón binni para guiníʼ ique mal. Peru ra tiidiʼ tiempu maʼ bixhózecabe ne jñaacabe gusiniisicaʼ laacabe en sentidu espiritual, casi cayuni mandar Jiobá laacaʼ.

17. ¿Ximodo zanda quixhedxí xiiñiʼ binni ladxidóʼ bixhoze ne jñaa?

¹⁷ Ca joven ni maʼ biziidiʼ gannaxhii Dios ne guzuubaʼ stiidxabe, riguixhedxicaʼ ladxidóʼ bixhózecaʼ ne jñaacaʼ ora runi respetarcaʼ laacabe, ora racanecaʼ laacabe né bueltu o sti modo ne ora racanecaʼ para chuʼ familia sticaʼ galán en sentidu espiritual. Lamec, tobi de cani beeda gale lade ca xiiñiʼ Set ni bibani ante guiaba nisaguié naroʼbaʼ que, biʼniʼ adorar Jiobá. Laabe guniʼbe ca diidxaʼ riguixhená riʼ de xiiñibe Noé: «Ndiʼ zaguixhedxí ladxidoʼno pur dxiiñaʼ stinu ne pur dxiiñaʼ naná ni rúninu né nanu lu layú ni qué gapa ndaayaʼ stiʼ Jiobá». Guca cumplir ca diidxaʼ guniʼbe ca dxi maʼ guluu Dios ndaayaʼ layú sti biaje (Gén. 5:29; 8:21). Ca dxi nabáninu riʼ, ca xcuidi ni runi defender modo naquiiñeʼ gaca adorar Dios, riguixhedxicaʼ ladxidóʼ familia sticaʼ. Zanda gacanécabe ca binnilídxicabe ni nadxiicabe guni huantarcaʼ ca prueba tiidicaʼ ne ganda guilacaʼ de fin ni maʼ zedadxiña, ni zaca jma naroʼbaʼ que nisaguié ni biaba tiempu stiʼ Noé que.

18. ¿Xi zacané laanu guni huantarnu neca guidxaagalunu intiica guendanagana?

¹⁸ Yanna riʼ millón de binni ratadxí ladxidoʼcaʼ ora runi orarcaʼ, ora riníʼ íquecaʼ ca ejemplu zeeda lu Biblia ne ora ruyúbicaʼ gaca xhamígucaʼ xcaadxi xpinni Dios. Biblia ná: «Jiobá nuu gaxha de guiráʼ cani rinabaʼ gacanebe laacaʼ, de guiráʼ cani dxandíʼ rinabaʼ ruaa laabe. Zudiibe guiráʼ ni gacalaʼdxiʼ cani ridxibi laabe; zucaadiágabe ora guinábacaʼ gacanebe laacaʼ, ne zulabe laacaʼ» (Salmo 145:18, 19). Nánnanu nuuca Jiobá listu para quixhedxí ladxidoʼno, ne nga zacané laanu guni huantarnu intiica guendanagana ni guidxaagalunu, cásica yanna riʼ ne ca dxi ni zeeda ca.