Xi naquiiñeʼ gúniluʼ para guibanineluʼ xheelaluʼ nayecheʼ

1, 2. 1) Xi guníʼ Jesús naquiiñeʼ guni tuuxa ante quixhe ique guni xiixa. 2) Pora nga jma naquiiñeʼ guiníʼ ique tuuxa xi naquiiñeʼ guni.

ORA quixhe ique tuuxa gucuí ti yoo, napa xidé guni stale cosa. Ante guilaa base stini naquiiñeʼ guidxela ti layú ne despué guni planu stini. Peru laaca naquiiñeʼ gúnibe sti cosa nabé risaca. Jesús guníʼ: «Lácaxa nuzulú tobi hombre ti yoo sin que nirudóʼ nibí ñuuya chaahui pa zugaanda xpidxichi para iluxe ni. Oraque ru nuzulú ni» (Lucas 14:28).

² Cásica raca ora cuí ti yoo, zaqueca naquiiñeʼ gaca ora guzulú ti guendaxheelaʼ ti guibánicaʼ nayecheʼ. Stale tu riníʼ: «Maʼ napaʼ gana guichaganaʼyaʼ». Peru panda de laacabe ribí ne riníʼ ique pa zieni laa jneza yaʼ. Neca ruzeeteʼ Biblia galán nga guichaganáʼ binni, laaca ruzeeteni zadxaagalucaʼ guendanagana (Proverbios 18:22; 1 Corintios 7:28). Nga runi, cani maʼ caníʼ ique guichaganáʼ naquiiñeʼ gánnacaʼ zápacaʼ ndaayaʼ ne zaqueca zadxaagalucaʼ guendanagana.

 3. Xiñee zanda gacané Biblia cani racalaʼdxiʼ guichaganáʼ, ne xi chonna cosa zacané Biblia laacabe gánnacabe.

³ Biblia zanda gacané laanu, purtiʼ Jiobá, Dios ni gudixhestí guendaxheelaʼ, guníʼ ca conseju ni cá luni (Efesios 3:14, 15; 2 Timoteo 3:16). Neca maʼ xadxí de gucuá cani, riquiiñeruʼ cani dede yanna para 1) ganna tuuxa pa maʼ nuu listu para guichaganáʼ, 2) ganna xi naquiiñeʼ guʼyaʼ de binni ni chiguichaganáʼ ne 3) ximodo chuʼ nayá nezalú Dios ora maʼ napa xnovia o xnovio.

 4. Xi zacané ca guendaxheelaʼ ca para cadi gusaana de chuʼcaʼ nayecheʼ, ne xiñee.

⁴ Stale bueltu nga riquiiñeʼ binni para gucuí ti yoo, peru laaca riquiiñeʼ binni bueltu para gapa ni ne gusiá ni. Zaqueca nga rizaaca ora richaganáʼ binni. Zándaca guca nagana para tuuxa guidxela tu guichaganáʼ, peru laaca zaca nagana para laa guibaniné xheelaʼ nayecheʼ guiráʼ iza. Xi naquiiñeʼ gúnicabe para chúʼcabe nayecheʼ yaʼ. Guirópacabe naquiiñeʼ gúnicabe stipa para cadi chuʼ xiixa ni guxheleʼ laacabe. Sicaríʼ riníʼ Biblia de guendaxheelaʼ: «Zusaana hombre bixhoze ne jñaa, ne naquiiñeʼ guicanú xheelaʼ, ne gueeda gácacabe ti beela si» (Génesis 2:24). Jesucristu guníʼ zanda gaca divorciar binni ne guichaganáʼ sti biaje pa chuʼné xheelabe stobi, ne nga si nga razón ni rudii Biblia para gaca divorciar binni (Mateo 19:9). Pa maʼ caníʼ íqueluʼ guichaganaluʼ, cadi guiaandaʼ lii cani cayuni mandar Jiobá lii gúniluʼ. Pa caʼruʼ chuʼluʼ listu para gucaanaluʼ ca cosa ni gacalaʼdxiʼ guxheleʼ lii de xheelaluʼ la? cadi nuuluʼ listu para guichaganaluʼ (Deuteronomio 23:21; Eclesiastés 5:4, 5).

 5. Nécapeʼ nuu tu ridxibi gudii stiidxaʼ para guichaganáʼ, xiñee naquiiñeʼ guisaca ni para cani maʼ caníʼ ique guichaganáʼ.

⁵ Stale tu nabé ridxibi gudii stiidxaʼ para guichaganáʼ. Sicaríʼ guníʼ ti hombrehuiiniʼ: «Cumu nannaʼ zabezaniáʼ laabe biaʼ dxi guibaneʼ la? bicaa nga naa guneʼ sentir maʼ qué zanda guneʼ sti cosa, casi ñaca nuseguyoocabe naa». Peru pa dxandíʼ nadxiiluʼ binni ni cá íqueluʼ guichaganaluʼ ca la? qué zaca nagana para lii guibanineluʼ laabe, sínuque zuni sentirluʼ nuu tu cayapa lii. Cumu guiropaʼ cani chiguichaganáʼ riʼ maʼ bidii stiidxacaʼ qué ziuu xiixa ni guxheleʼ laacaʼ la? nga zucaa laacabe chúʼcabe tobi si, neca gápacabe guendanagana ne laaca zacanésaacabe lu xcaadxi cosa. Apóstol Pablu bizeeteʼ ora dxandíʼ nadxiinu tuuxa runi huantarnu laa lu intiica cosa ne qué rireʼnu gana laa (1 Corintios 13:4, 7). Ti gunaa guníʼ sicaríʼ: «Dxi bidieeʼ stiidxaʼ xheelaʼ bineʼ sentir maʼ nuu tu cayapa naa. Nabé nayecheʼ bineʼ sentir ora bidii stiidxadu ne ora bisihuínnidu nezalú binni racaláʼdxidu chuʼdu tobi si» (Eclesiastés 4:9-12).

 6. Xiñee jma jneza cueza binni guiniisi para guichaganáʼ.

⁶ Galán cueza binni dede ora maʼ huaniisi para gudii stiidxaʼ guichaganáʼ. Nga runi, Pablu na jma galán guichaganáʼ binni ora maʼ gudiʼdiʼ tiempu ra ruzulú ribani ladxidóʼ ne ruquiinde laa gatané tuuxa, purtiʼ qué rudiini lugar laa guiníʼ ique jneza (1 Corintios 7:36). Cani nahuiiniʼ ca nabé nagueenda ruchaacaʼ ora maʼ ziniisicaʼ. Stale de cani richaganáʼ nahuiinirucaʼ, rudiicaʼ cuenta tiidiʼ si chupa chonna iza de bichaganacaʼ ruchaa cani racaláʼdxicaʼ ne ni caquiiñecaʼ, ne zaqueca xheelacaʼ. Pur ni huayuuyacabe, ruluíʼ si jma stale de cani richaganáʼ nahuiiniʼ qué ribánicaʼ nayecheʼ ne jma nagueenda raca divorciarcaʼ que cani richaganáʼ ora maʼ huaniisi. Nga runi, cadi naquiiñeʼ gacalúguluʼ para guichaganaluʼ. Pa maʼ huaniisiluʼ ora guichaganaluʼ, ca dxi chuʼluʼ stúbiluʼ zaziidiluʼ stale cosa ni zacané lii ora maʼ guichaganaluʼ ne zacané nga lii gunibiáʼ chaahuiluʼ laca lii, ne guibanineluʼ xheelaluʼ galán.

 7. Xiñee naquiiñeʼ guʼyaʼ chaahuiʼ tuuxa ximodo laa ante guiníʼ ique guichaganáʼ.

⁷ Stale biaje jma nagueenda zaca para lii guiniʼluʼ gunáʼ nga ca guenda ñuuláʼdxiluʼ ñapa binni ni racaláʼdxiluʼ guichaganaluʼ. Peru xi zanda guiniʼluʼ de ca guenda nápaluʼ yaʼ. Nga runi, galán guinabadiidxaluʼ laca lii: Xi guenda napaʼ ni zanda gacané guibaneniáʼ xheelaʼ nayecheʼ. Tu clase hombre o tu clase gunaa zacaʼ ora guichaganaʼyaʼ. Ne ora gucheeʼ, ñee nagueendaca riniéʼ dxandíʼ bicheeʼ ne ricaaʼ conseju ni gudiicabe naa la? o nisi ricaberuaaʼ binni ni cudii conseju naa. Ñee rusihuinneʼ nayecheʼ nuaaʼ ne riníʼ iqueʼ zaree cani guneʼ jneza la? o riníʼ iqueʼ cadi jneza zaree cani guneʼ ne nisi maʼ caguicheruaaʼ (Proverbios 8:33; 15:15). Naquiiñeʼ gánnaluʼ qué zuchaaluʼ modo lii ora maʼ guichaganaluʼ. Pa ante guichaganaluʼ rudxiibaluʼ laca lii, nabé nadaluʼ o riníʼ íqueluʼ cadi jneza zaree cani gúniluʼ la? zacaca zácaluʼ ora maʼ bichaganaluʼ. Cumu qué zanda gúʼyaluʼ ximodo lii cásica ruuyaʼ xcaadxi binni lii la? galán guinábaluʼ bixhózeluʼ o jñaaluʼ o tuuxa xhamíguluʼ gabi lii ximodo nácaluʼ ne paraa zanda guchaaluʼ. Ne pa gúʼyaluʼ caquiiñeʼ guchaaluʼ modo lii la? naquiiñeʼ gúniluʼ ni ante guiníʼ íqueluʼ guichaganaluʼ.

8-10. Xi conseju zeeda lu Biblia zacané binni chuʼ listu para guichaganáʼ.

⁸ Stiidxaʼ Dios cayabi laanu gudiʼnu lugar gacané espíritu santu stiʼ Dios laanu ti gannaxhiinu binni, chuʼnu nayecheʼ, gatadxí ladxidoʼno, cadi guixhacaláʼdxinu stobi, cadi guninanu binni, gácanu nachaʼhuiʼ, gápanu fe, gácanu nadóʼ ne gucueezanu laanu. Laaca cayábini laanu naquiiñeʼ gusihuínninu nabáninu modo naguixhe Dios ne maʼ gadxé laanu yanna, purtiʼ maʼ nayá xpídanu ne rúninu ni jneza (Gálatas 5:22, 23; Efesios 4:23, 24). Pa chinándaluʼ conseju ca ante guichaganaluʼ la? zacaaluʼ stale ndaayaʼ, casi ñaca niguuluʼ bueltu ndaaniʼ bancu para guni ganarni jma.

⁹ Ti gunaa naquiiñeʼ guni stipa pur gapa ca guenda sicarú ni riuulaʼdxiʼ Dios, lugar de guyubi puru si guzuchaahuiʼ (1 Pedro 3:3, 4). Pa gácube lari jneza ne guiníʼ íquebe jneza la? zacaneni laabe gácabe binni nuu xpiaaniʼ, ni zeeda gaca casi ti corona sicarú (Proverbios 4:9; 31:10, 30; 1 Timoteo 2:9, 10). Ti hombre laaca naquiiñeʼ guiziidiʼ gaca nachaʼhuiʼ né gunaa ne gapa respetu laacabe (1 Timoteo 5:1, 2). Laaca naquiiñeʼ guiziidiʼ quixhe chaahuiʼ guni dxiiñaʼ ne guni jneza guiráʼ dxiiñaʼ ni guicaa. Ya, cadi naquiiñeʼ gudxiibaʼ laca laa. Binni ni racalaʼdxiʼ gaca guiráʼ ni na la? rapa stale guendanagana lu xquendaxheelaʼ (Proverbios 29:23; Miqueas 6:8; Efesios 5:28, 29).

¹⁰ Neca nagana guchaa binni modo laa casi maʼ guninu ca, guiráʼ ca xpinni Cristu naquiiñeʼ gúnicaʼ stipa pur guchaacaʼ modo laacaʼ, purtiʼ zacaneni laacaʼ guibaninecaʼ xheelacaʼ nayecheʼ.

11, 12. Ximodo zanda ganna chupa binni pa zanda guibánicaʼ nayecheʼ.

¹¹ Ñee cada binni nga ribí tu guichaganáʼ ndaaniʼ xquídxiluʼ la? Pa zacá ni, xi naquiiñeʼ gúniluʼ pa chuuláʼdxiluʼ tuuxa yaʼ. Primeru naquiiñeʼ guinabadiidxaluʼ laca lii: «Ñee dxandíʼ rapaʼ gana guichaganaʼyaʼ la?». Nabé zuninaluʼ tuuxa pa gucaaluʼ laa guiníʼ ique zachaganaluʼ laa peru cadi dxandíʼ ni (Proverbios 13:12). Laaca zanda guinabadiidxaluʼ laca lii: «Ñee maʼ nuaaʼ listu para guichaganaʼyaʼ la?». Pa ruuyaluʼ maʼ zanda guichaganaluʼ, zanda gúniluʼ ni runi ca binni xquídxiluʼ ora maʼ nápacaʼ gana guichaganacaʼ. Ndaaniʼ caadxi guidxi, primeru ruuyacabe ximodo binni ni cá íquecabe guichaganácabe ca ti tiempu; de racá maʼ rábicabe laa rápacabe gana gunibiáʼ chaahuicabe laa. Pa qué náʼ binni ca la? cadi naquiiñeʼ síñecabe laa dede guchiichicabe laa. Cadi guiaandaʼ laanu laaca napa binni ca derechu guiníʼ xi racalaʼdxiʼ. Peru pa binni ca guiníʼ zanda gunibiaʼluʼ laa la? óraca maʼ zanda guireeneluʼ laabe. Zacá zanda gánnaluʼ pa laabe nga binni ni zanda guichaganaluʼ.a Xi naquiiñeʼ gúʼyaluʼ de binni ni cayunibiaʼluʼ ca yaʼ.

¹² Para ganda guicábinu ni gunabadiidxanu ca la? guníʼ ique chupa instrumentu ni ruxhídxicabe, casi ti pianu ne ti guitarra. Pa guiropaʼ cani nuucani afinadu la? cada tobi de laacani zaxídxicani galán. Peru xi naquiiñeʼ gaca pa racaláʼdxicabe guxhídxicabe cani juntu yaʼ. Naquiiñeʼ gaca afinar cani juntu. Zacaca nga rizaaca ti hombre ne ti gunaa. Zándaca cada tobi de laacabe maʼ biʼniʼ stipa pur guchaa modo laa. Peru ñee zanda guibánicabe nayecheʼ la?

13. Xiñee cadi jneza guzulú gunibiaʼluʼ tuuxa ni qué runi cré ni runi creluʼ.

¹³ Nabé risaca nga tobi si ni guni cré guirópacabe ne chinándacabe ca conseju ni zeeda lu Biblia. Sicaríʼ bicaa apóstol Pablu: «Cadi gaca né tu cani qué runi cre tobi si, purti zacá zeda gaca tu casi ti buey ni cadi cá né xcompañeru» (2 Corintios 6:14; 1 Corintios 7:39). Pa guichaganáʼ tuuxa tobi ni qué runi ni na Dios, zápacabe stale guendanagana. Peru ora guirópacabe runi adorárcabe Jiobá Dios, riuucabe tobi si. Jiobá racalaʼdxiʼ guibániluʼ nayecheʼ ne chuʼluʼ tobi si né xheelaluʼ. Racaláʼdxibe chuʼtu tobi si né laabe ne zacá gueeda gácatu casi ti doo de chonna xcuaa, purtiʼ nadxiibe laatu ne laatu nadxiitu laabe (Eclesiastés 4:12).

14, 15. Bisiene xiñee cadi purtiʼ tobi si ni runi cré binni guiníʼ ique zabaniné xheelaʼ tobi si.

¹⁴ Neca jma risaca nga guni adorar guirópacabe Dios para chúʼcabe tobi si la? nuu xcaadxi cosa ni zanda gacané laacabe. Casi xi laa yaʼ. Cásica hombre ne zaqueca gunaa ngueca si ni naquiiñeʼ quixhe íquecaʼ gúnicaʼ. Laatu yaʼ, xi naguixhe íquetu gúnitu. Ñee cá íquetu gápatu xiiñitu la? Xii nga ni jma risaca lu xquendanabánitub (Mateo 6:33). Para ganda guibani ti guendaxheelaʼ nayecheʼ la? naquiiñeʼ gaca xhamígucaʼ ne chuuláʼdxicaʼ chuʼcaʼ juntu (Proverbios 17:17). Para nga la? tobi si ni naquiiñeʼ quixhe íquecabe gúnicabe. Nagana gueeda gaca xhamigu chupa binni pa cadi ngueca ni naguixhe íquecaʼ gúnicaʼ, jmaruʼ si pa maʼ bichaganacaʼ. Yanna, pa binni ni chiguichaganaluʼ ca riuulaʼdxiʼ guni xiixa, casi chigunibiáʼ sti lugar, ne lii qué riuuláʼdxiluʼ yaʼ, ñee riníʼ nga qué zanda guibánitu galán la? Coʼ. Zándaca nuu xcaadxi cosa jma risaca ni riuuláʼdxiluʼ gúniluʼ. Peru zusiécheluʼ binni ni chiguichaganaluʼ ca ora gúniluʼ ni riuuláʼdxibe (Hechos 20:35).

¹⁵ Para guibani chupa binni nayecheʼ cadi caquiiñepeʼ gaca xpiáʼcabe tobi si, sínuque cada tobi de laacabe naquiiñeʼ guyubi guni ni riuulaʼdxiʼ binni ni guichaganáʼ. Lugar de guiníʼ íqueluʼ: «Ñee tobi si modo riníʼ íquedu lu guiráʼ cosa la?», jma jneza guiníʼ íqueluʼ: «Xi raca ora cadi tobi si modo riníʼ íquedu lu xiixa cosa yaʼ. Ñee randa runi chaahuidu guendanagana stidu sin guidxiichidu nagueenda ne rusihuínnidu runi respetarsaadu laadu ora gúnidu ni la? o ridinde diidxadu ora cadi tobi si modo riníʼ íquedu lu xiixa cosa» (Efesios 4:29, 31). Pa racaláʼdxiluʼ guichaganaluʼ, naquiiñeʼ gápaluʼ lii de ca binni ni nabé rudxiibaʼ laca laa, de ca binni ni ruyubi gaca puru si ni na, neca nuucaʼ nezalú binni.

16, 17. Xi naquiiñeʼ guyubi ti hombre o ti gunaa de binni ni racalaʼdxiʼ guichaganáʼ.

¹⁶ Para gudiicabe tuuxa ti dxiiñaʼ lade ca binni ridagulisaa, primeru ruuyacabe pa zanda gúnibe ni (1 Timoteo 3:10). Zacaca zanda gúniluʼ ora guyúbiluʼ tuuxa para guichaganaluʼ. Ti gunaa zanda guinabadiidxaʼ laca laa: «Xi riníʼ binni de hombre ni rapaʼ gana guichaganaʼyaʼ ca yaʼ. Tuu nga ca xhamígube. Ñee randa rucueezabe laabe la? Ximodo laabe né ca binni huaniisi. Ximodo ca binnilídxibe. Ximodo laabe né ca binnilídxibe. Ñee ruyúbibe uguu chaahuibe xpuéltube la? o riguítebe ni. Ñee reʼ xhaatabe nisa dxuʼniʼ la? Ñee feu xpiaʼbe o nandáʼ íquebe la? Xi dxiiñaʼ nápabe lade ca binni ridagulisaa ne ximodo rúnibe cani. Ñee zanda guneʼ respetar laabe la?» (Levítico 19:32; Proverbios 22:29; 31:23; Efesios 5:3-5, 33; 1 Timoteo 5:8; 6:10; Tito 2:6, 7).

¹⁷ Ti hombre zanda guinabadiidxaʼ laca laa: «Ñee nadxii gunaa riʼ Dios ne runi respetar laabe la? Ñee zanda guni tenderbe ti familia la? Xi zabeza binnilídxibe gúnidu yaʼ. Ñee rusihuínnibe nuu xpiaanibe lu cani rúnibe la? Ñee nánnabe gúnibe dxiiñaʼ ne nánnabe uguu chaahuibe xpuéltube la? Ora maʼ cayuiʼbe diidxaʼ, xi jma riniʼbe. Ñee rizaaláʼdxibe sti binni la? o riníʼ íquebe puru para laasibe ne nabé riuube lu xpida binni. Ñee zanda guni cré binni laabe la? Ñee zanabe guzuubabe stiidxaʼ la? o zacabe tema gaca ni nabe dede gucaalube naa» (Proverbios 31:10-31; Lucas 6:45; Efesios 5:22, 23; 1 Timoteo 5:13; 1 Pedro 4:15).

18. Xi naquiiñeʼ guietenaláʼdxiluʼ pa gúʼyaluʼ nuu ra ruchee xnóvialuʼ o xnóvioluʼ.

¹⁸ Cadi guiaandaʼ lii ti binni ruchee ni zá de Adán nga ni cayunibiaʼluʼ, ne cadi ti binni casi ruzeetecabe lu ca libru de novela. Guiráʼ binni nga ruchee, nga runi naquiiñeʼ gutiidiláʼdxiluʼ stonda binni ni chiguichaganaluʼ ne zaqueca naquiiñeʼ gúnibe (Romanos 3:23; Santiago 3:2). Ne pa nuu xiixa ra rucheebe la? zanda gacané nga lii gusihuínniluʼ ca guenda ni ribeza Dios gapa ca xpinni. Cadi guidxagayaaluʼ pa tinde diidxaneluʼ xnóvialuʼ o xnóvioluʼ, purtiʼ dede ca binni ni nadxiisaacaʼ ne runi respetarsaacaʼ nuu biaje gadxé gadxé modo ruuyacaʼ xiixa cosa (zanda gúʼndaluʼ Génesis 30:2; Hechos 15:39). Ñee zanda gúnitu stipa pur gucueezatu laatu ne guiziiditu guni chaahuitu guendanagana sin tíndetu la? (Proverbios 25:28.) Ñee rusihuinni binni ni chiguichaganaluʼ ca rapa gana guchaa modo laa la? Ñee zúniluʼ stipa pur guchaaluʼ modo lii la? Ñee zanda guiziidiluʼ cadi gácaluʼ tan nadá la? (Eclesiastés 7:9.) Ora guiziidiʼ binni guni chaahuiʼ ca guendanagana gapa, qué zaca nagana para laa guiníʼ ni runi sentir ora maʼ bichaganáʼ (Colosenses 3:13).

19. Xi naquiiñeʼ gúniluʼ pa gúʼyaluʼ nuu xiixa ni cadi jneza runi binni ni racaláʼdxiluʼ guichaganaluʼ.

¹⁹ Xi naquiiñeʼ gúniluʼ pa gudiiluʼ cuenta nuu xiixa ni naguu lii xizaa. Naquiiñeʼ gúʼyaluʼ pa dxandíʼ naquiiñeʼ cuʼ xaíqueluʼ ni. Neca nabé riuuláʼdxiluʼ binni ca ne maʼ nápaluʼ gana guichaganaluʼ la? cadi pur nga maʼ qué zazaaláʼdxiluʼ ca cosa ni cadi jneza rúnibe (Proverbios 22:3; Eclesiastés 2:14). Pa gúʼyaluʼ nuu ni cadi jneza rúnibe, jma galán gábiluʼ laabe maʼ qué zaca xnóvialuʼ o xnóvioluʼ laabe ne maʼ cadi gudii stiidxaluʼ guichaganaluʼ laabe.

20. Xi zanda guni cani napa xnovia o xnovio para cadi gúnicaʼ cosa dxabaʼ.

²⁰ Pa maʼ nápaluʼ novia o novio, xi naquiiñeʼ gúniluʼ para cadi gucheeneluʼ Dios. Primeru naquiiñeʼ guʼyaʼ chaahuiluʼ cadi cayúniluʼ xiixa cosa malu. Ñee jneza ruuyaʼ binni neza ra nabézaluʼ guinaazenáʼ cani napa novia o novio, gudiicaʼ bixiduʼ ne quiidxicaʼ la? Neca para stale binni cadi malu gúnitu zacá, naquiiñeʼ cuézatu dede ora maʼ nexheʼ dxi guichaganatu para gúnitu ni. Naquiiñeʼ gápatu laatu ti cadi tiidisutu lu cani maʼ guninu ca dede gúnitu cosa dxabaʼ o dede gátatu ante guichaganatu (Efesios 4:18, 19; zanda gúʼndaluʼ Cantar de los Cantares 1:2; 2:6; 8:5, 9, 10). Cumu nabé riguite ladxidóʼ binni laa la? jma neza cadi guiaanatu stúbisitu ra lídxitu, ndaaniʼ ti cuartu, ndaaniʼ xcárrutu o sti lugar ra zanda gúnitu cosa dxabaʼ (Jeremías 17:9). Pa gucueezatu laatu para cadi gúnitu xiixa ni cadi jneza ora maʼ nuutu juntu, zusihuínnitu racaláʼdxitu ni jma galán para guirópatu. Ne ni jma risaca nga zusiéchetu ladxidóʼ Jiobá ora gúnitu zacá, purtiʼ laabe runi mandarbe ca xpínnibe cadi gúnicaʼ cosa dxabaʼ ne cadi chúʼnecaʼ ni cadi xheelacaʼ (Gálatas 5:19-21).

21. Xidé naquiiñeʼ guiníʼ cani napa xnovia o xnovio para ganda gápacaʼ xpiaʼcaʼ galán.

²¹ Guiropa cosa ni naquiiñeʼ gúniluʼ para gaca xpiaʼluʼ galán ora maʼ nápaluʼ novia o novio nga cadi gucaachiluʼ xiixa ni nuu ndaaniʼ ladxidoʼloʼ. Ora maʼ caníʼ íqueluʼ guichaganaluʼ, nuu xcaadxi cosa ni naquiiñeʼ gúʼyaluʼ. Casi paraa chindézatu, pa guirópatu zúnitu dxiiñaʼ ne pa zápatu xiiñitu. Laaca risaca nga guiniʼtu de xiixa ni bíʼnitu dxiqué, ni zándaca guchiiñaʼ laatu ora maʼ bichaganatu. Casi pa nuzaabitu tuuxa o biaananetu xiixa dxiiñaʼ ni naquiiñeʼ gúnitu o pa nápatu xiixa guendahuará malu. Nuu binni ni napa VIH (virus stiʼ sida) qué rihuinni pa huaracaʼ. Nga runi, gastiʼ naca pa bixhózeluʼ o jñaaluʼ o lii guinábatu binni ni chiguichanaluʼ ca ti examen para guihuinni pa nápabe sida pur guyuunebe tutiica binni dxiqué o gucuabe droga lu vena. Pa guihuinni napa binni ca sida la? cadi naquiiñeʼ gucaabe lii guichaganaluʼ laabe pa qué naluʼ. Pa tuuxa biʼniʼ stale cosa malu dxiqué la? jma jneza gácabe ti examen para guihuinni pa nápabe sida ante gaca xnóviabe o xnóviobe tuuxa.

22, 23. 1) Xiñee cadi naquiiñeʼ tiidisú binni ora maʼ caguixhe xi guni dxi guichaganáʼ. 2) Xi cadi naquiiñepeʼ guicá ique cani chiguichaganáʼ, ne xii nga ni jma jneza gúnicabe.

²² Zándaca nabé ziuu xhiiñatu chupa chonna beeu pur guiráʼ bieque gaca ante guichaganatu. Peru qué ziuupetu xizaa pa gúnitu ni biaʼ galán. Ti guendaxheelaʼ naroʼbaʼ zándaca zusiécheni familia stitu ne ca binni ni nabeza neza ra cayaca ni. Peru zándaca gusidxágani laatu ne ca binnilídxitu ne gunítitu stale bueltu ni cadi caquiiñeʼ. Nuu costumbre ni zanda chinándatu ni raca ra nabézatu, peru cadi naquiiñeʼ diʼ tiidisutu ne gúnitu ni para gusihuínnitu jma galán ni bíʼnitu que stobi, purtiʼ zándaca pur nga maʼ cadi guisaca dxi ca ne maʼ cadi chuʼtu nayecheʼ. Neca risaca nga gucaadiágatu ni racalaʼdxiʼ xcaadxi binni gaca dxi ca la? novio ca nga naquiiñeʼ guʼyaʼ primé xi guiráʼ gaca dxi guichaganatu (Juan 2:9).

²³ Cadi guiaandaʼ laatu ti dxi si nga richaganáʼ binni, peru xquendaxheelaʼ binni rindaa ni guidubi naca xquendanabani. Laguni stipa pur cadi guiníʼ íquepetu ni chigúnitu dxi guichaganatu. Lugar de nga la? laguyubi gacané Jiobá laatu ne laquixhe chaahuiʼ modo guibaninetu xheelatu. Zacá ziuutu listu para guibánitu nayecheʼ.