Rietenalaʼdxuʼ la?

Ñee biindaluʼ ca últimu tema ni bedané revista Torre stiʼ ni rapa la? Yanna biiyaʼ pa zanda guicábiluʼ ca guendarinabadiidxaʼ riʼ:

• Ñee nuu Reinu stiʼ Dios ndaaniʼ ladxidoʼno la?

Jesús guníʼ: «De ndaani ladxidóʼ cabe riree irá ni riníʼ ique cabe guni cabe: chuʼ né cabe ni cadi xheela cabe, gapa cabe jnadxii cabe, guuti cabe binni, cuana cabe, acalaʼdxi cabe gapa cabe jma que stobi, guni cabe ni nadxabáʼ» (Marcos 7:20-22). Ñee cadi de ndaaniʼ ladxidóʼ binni riale guni cani ndiʼ la? Yanna, ximodo ndiʼ chuʼ Reinu stiʼ Dios ni runi ni jneza ca ndaaniʼ ladxidóʼ binni yaʼ. Rihuinni dxíchica qué zanda diʼ chuʼ Reinu stiʼ Dios ndaaniʼ ladxidóʼ binni, sínuque casi guníʼ cani riguixhená que, laani nga ti gobiernu ni chiguni chaahuiʼ ca cosa ni nuu ndaaniʼ Guidxilayú.—wp 01-03, yaza 13.

• Padxí yeganna ca hombre ni ruundaʼ de ca beleguí que Jesús.

Ti Biblia ruzeeteʼ sicaríʼ: «Ca hombre nuu xpiaaniʼ que, qué ñuudicabe ne ca hombre rapa dendxuʼ que huaxhinni gule Jesús, sínuque guyécabe gudiʼdiʼ si caadxi beeu». Ca dxi que maʼ naca Jesús ti xcuidihuiiniʼ ne maʼ nabézabe ndaaniʼ ti yoo (Mat. 2:7-11). Pa ñaca nusigáʼdecabe Jesús oro ne xcaadxi cosa risaca huaxhinni gúlebe que, ñee nudii María chupa si guuguhuiiniʼ casi ofrenda ora guyé ndaaniʼ yuʼduʼ nuu Jerusalén que gudiʼdiʼ si cuarenta dxi de gule Jesús la?—wp 01-03, yaza 31.

• Ximodo zanda quixhe íqueluʼ gúniluʼ ni na Dios lu xquendanabániluʼ.

Guníʼ ique ndiʼ: «Ñee zanda guchaa modo nabaneʼ para gapaʼ ni iquiiñesiaʼ la?». Nga nga ni biʼniʼ Amy. Nécapeʼ gúpabe ti dxiiñaʼ ra biʼniʼ ganarbe stale bueltu la? qué nibánidibe nayecheʼ. Bidiibe cuenta caxélebe de Jiobá purtiʼ racaláʼdxibe gácabe tuuxa ndaaniʼ Guidxilayú riʼ. Ngue runi gudixhe íquebe gúnibe jma lu xhiiñaʼ Reinu ne gunda gúcabe precursora caadxi iza. Yanna riniʼbe nuube jma nayecheʼ que dxi gucaláʼdxibe ñácabe tuuxa lu Guidxilayú riʼ.—15/1, yaza 19.

• Tuu nga ca binni ni bizeeteʼ Jesús zuuyacaʼ ca seña ni guniʼbe lu Mateo 24:34.

Ora bizeeteʼ Jesús de ca binni ni nuu yanna la? stale biaje cadi galán diʼ ni guniʼbe de laacaʼ. Biquiiñebe diidxaʼ ca para guniʼbe de ca binni qué iquiiñeʼ nabeza xtiémpube. Peru cadi zacá diʼ biquiiñeʼ Jesús diidxaʼ ca ora guniʼné ca discípulo stiʼ, cani mayaca cuícabe laacaʼ ne espíritu santu. Laacabe nga ca binni ni zanda guiene xi pur cahuinni ca seña ni cuzeeteʼ Mateo 24:32, 33. Nga runi, zanda guininu ora guníʼ Jesús de ca binni nuu yanna la? caniʼbe de ca xpínnibe ni bibí ne espíritu santu, cani bibani dxiqué ne cani nabani yanna.—15/2, yaza 23, 24.

• Casi na Santiago 3:17, gunáʼ nga ca guenda naquiiñeʼ gusihuínninu.

Tobi de laacani nga gápanu ladxidoʼno nayá, purtiʼ nga zacané laanu gucáʼnanu ni nadxabaʼ nagueendaca (Gén. 39:7-9). Laaca naquiiñeʼ gácanu binni nadóʼ, cadi gácanu naduxhuʼ ne cadi chuʼdindenenu stobi. Nga runi naquiiñeʼ guiníʼ íquenu sicaríʼ: «Ñee runibiáʼcabe naa casi tobi ni ruyubi chuʼ binni galán la? o casi tobi ni ruchelatinde binni. Ridinde diidxaʼ ne xcaadxi ora tiica si la? Ridxiicheʼ pur intiica si o ruchiicheʼ stobi la? Ñee nagueendaca rutiidiladxeʼ stonda stobi ne qué ricayaʼ tema gaca ni rabeʼ la?».—15/3, yaza 24, 25.