Ni zacané binnilídxiluʼ chuʼ nayecheʼ

Ximodo gacaneluʼ xiiñiluʼ ni maʼ ziniisi guibani jneza

«Dxiqué qué raca nagana para naa guinieniáʼ ca xiiñeʼ, purtiʼ rucaadiágacabe naa ne ruzuubacabe stiidxaʼ nagueendaca. Peru yanna ra maʼ ziniisicabe maʼ riguiche ruaacabe para gúnicabe xiixa. Nuu tiru dede ridxiichicabe ora gábidu laacabe chigúʼndadu Stiidxaʼ Dios. Riníʼcabe: “Sti biaje ca maʼ chigúʼndanu Biblia la?”. Qué ñuu dxi niníʼ iqueʼ pa ñaca ca xiiñeʼ zacá, neca huayuuyaʼ xcaadxi binni guizaaca zacá.» (Raúl)a

PA NÁPALUʼ ti xiiñiluʼ nahuiinigaruʼ la? riécheluʼ gúʼyaluʼ maʼ caniisibe, peru zaqueca nánnaluʼ nagana ni. Biiyaʼ pa cazaacaluʼ xiixa casi cani zeeda raríʼ.

▪ Dxi nahuiiniʼ xiiñiluʼ la? gúcabe casi ti barcu ni liibi ti lugar si purtiʼ qué niládibe de lii. Yanna ra maʼ ziniisibe la? maʼ racaláʼdxibe gúnibe ni gápabe gana.

▪ Ante guiniisi xiiñidxaapaluʼ la? rabi lii guiráʼ ni rizaaca. Peru yanna ra jma maʼ ziniisi maʼ biyubi tu gaca xhamiga ne maʼ qué riná gabi lii xiixa.

Pa cazaaca binnilídxiluʼ tobi de cani guninu ca la? cadi guiníʼ íqueluʼ maʼ qué zanda gaca chaahuiʼ guendanagana ca. Para ganda guiéneluʼ ca xiiñiluʼ caquiiñeʼ gánnaluʼ ximodo nga nuucabe.

Ora maʼ caniisi xiiñitu nga jma caquiiñeʼ gacanetu laacaʼ

Dede dxi gale ti baʼduhuiiniʼ ne ora maʼ ziniisi riecheʼ jñaa ne bixhoze, casi ora guzulú guiníʼ, ora saʼ, primé dxi cheʼ scuela ne xcaadxi cosa. Ora guʼyaʼ bixhoze ne jñaa baʼduhuiiniʼ ca xi guiráʼ maʼ zanda guni la? rudiicaʼ cuenta maʼ caniisibe.

Ora jma maʼ ziniisi xiiñiʼ binni rihuinni maʼ zanda guni xcaadxi cosa. Dxandíʼ nga nuu binni qué riuulaʼdxiʼ ora maʼ nuu xiiñiʼ zacá, purtiʼ dxi nahuiinibe nabé bizuubabe diidxaʼ ne yanna málasi guchaa modo laabe. Peru caquiiñeʼ tiidicabe lu ca iza riʼ purtiʼ zacá nga zahuinni maʼ caniisicabe. Guidúʼyanu xiñee.

Biblia na zadxiña dxi gusaana binni bixhoze ne jñaa (Génesis 2:24). Ne ora maʼ ziniisi xiiñitu nga jma caquiiñeʼ gacanetu laa para ganna xi guni ora ganda dxi ca. Ne guiráʼ binni ribeza guiníʼ xiiñiʼ casi guníʼ apóstol Pablu riʼ: «Dxi guca xcuidi la? unié casi riníʼ xcuidi, uníʼ ique casi riníʼ ique xcuidi ne biene biaʼ riene xcuidi. Peru dxi ma biniise bisaana irá enda xcuidi que» (1 Corintios 13:11).

Ne ngapeʼ nga runi xiiñiʼ binni ora maʼ ziniisi, purtiʼ maʼ qué runidícabe casi runi ti xcuidi, sínuque riziidicabe gácacabe casi ti binni huaniisi ne gúnicabe ca cosa ca laasicabe. Nga runi, ti libru na laani nga tiempu nápacabe para guiziidicabe ante gusaanacabe jñaacabe ne bixhózecabe.

Peru zándaca dede ca nagasi cayaca nagana para laatu guiníʼ íquetu zadxiña dxi gusaana xiiñitu laatu. Zándaca guiníʼ íquetu sicaríʼ:

▪ «Pa nin xcuártube qué randa rusiabe, ximodo ndiʼ ganda gápabe binnilídxibe ora maʼ bichaganabe yaʼ».

▪ «Pa qué riuube yoo ora maʼ gudíxhedu gueedabe, ximodo ndiʼ chindabe tempranu ra gúnibe dxiiñaʼ yaʼ».

Pa nga nga ni naguu xaíquetu la? laguietenalaʼdxiʼ ridiʼdiʼ iza para ganda guiziidiʼ tuuxa guni ca cosa ca laa si, ne cadi chupa chonna gubidxa si. Peru laga cadiʼdiʼ ca iza ca zuuyatu stale cosa ni zusihuinni nuu «guendahuati ca [...] ndaaniʼ ladxidóʼ hombrehuiiniʼ ca» (Proverbios 22:15).

Peru pa gusiiditu ne gacanetu xiiñitu la? zándaca gácabe tuuxa ni runi jneza ora guiniisibe ne zánnabe «uná nga jneza ne uná nga ni cadi jneza» (Hebreos 5:14).

Conseju ni zacané laatu

Naquiiñeʼ gacanetu xiiñitu guiníʼ ique ante guni xiixa ti ganna guni ca cosa ca laa si (Romanos 12:1, 2). Ximodo zanda gúnitu nga yaʼ. Guidúʼyanu chupa chonna conseju ni zeeda lu Biblia.

Filipenses 4:5: «Lagaca nachaʼhui dede izaabi stiidxa tu». Laguiníʼ ique gabi xiiñitu laatu rapa gana guiuu yoo xcaadxi huadxí de biaʼ hora gudíxhetu. Pa oraqueca gábitu laabe qué zanda diʼ la? zábibe laatu: «Padxí nga gusaanatu de gúʼyatu naa casi ti xcuidi pue». Cadi oraqueca guicábicatu laabe: «Dede ora gusihuiiniluʼ maʼ qué riníʼ íqueluʼ casi ti xcuidi». Nuu xiiñiʼ binni riuulaʼdxiʼ gudiicabe lugar laa guni stale cosa, dede cani qué zanda guni, peru laaca nuu bixhoze binni qué liica riná gúnicabe xiixa ni riuuláʼdxicabe. Pa gúnitu stipa pur guiénetu xiiñitu la? zándaca ziuu biaje zúnitu ni guinábabe laatu.

XIÑEE QUÉ GÚNITU NDIʼ. Laucaa tobi o chupa cosa ni zanda gudiitu lugar guni xiiñitu laa si. Ante gábitu ni laabe la? lagusiene laabe cayúnitu ni para gúʼyatu pa dxandíʼ zúnibe ni laasibe. Pa gusihuínnibe cayúnibe ca cosa ca jneza la? zanda gudiitu lugar laabe gúnibe xcaadxi cosa, peru pa coʼ la? maʼ qué zudiitu lugar laabe gúnibe xiixa laasibe (Mateo 25:21).

Colosenses 3:21: «Hermanu caʼ, cadi uyubi tu uchiichi tu xiiñi tu, ti cadi iree ca gana». Nuu binni qué liica rudii lugar guni xiiñiʼ ti cosa laa si. Qué rudiicaʼ lugar guireebe stúbibe, ne pa gudiicaʼ lugar chebe la? nisi maʼ canagundaachicaʼ laabe; racaláʼdxicaʼ guyúbicaʼ tu guidxaaga xiiñicaʼ ne nisi maʼ nuucaʼ gánnacaʼ tu riníʼnebe pur teléfono. Peru qué zabeendutu ni galán pa gúnitu zacá. Pa gacaláʼdxitu gucueezatu laabe la? zuyúbibe ximodo guireebe; pa nisi maʼ caniʼtu ca xhamígube la? jmaruʼ si zuyúbibe laacaʼ, ne pa rundaachitu laabe ora maʼ caniʼbe pur teléfono la? zuyúbibe modo guiníʼnebe ca xhamígube sin gánnatu. Ora jma gacaláʼdxitu gucueezatu laabe la? jma zuyúbibe modo gúnibe ni racaláʼdxibe ne maʼ qué liicaʼ zanda guzuubabe stiidxatu. Laguiníʼ ique ndiʼ: Pa yanna qué guiziidiʼ xiiñitu guni ca cosa ca jneza neca nuuné laatu, ximodo ndiʼ gúnibe cani ora maʼ laasibe yaʼ.

XIÑEE QUÉ GÚNITU NDIʼ. Sti biaje gabi xiiñitu laatu xiixa ni qué chuuláʼdxitu la? lagacané laabe gánnabe xi zazaacabe pur cani gúnibe. Lugar de guiniʼtu ca xhamígube, laguinabadiidxaʼ laabe: «Xi zazaaca pa guinaaze puliciá tobi de ca binni ni ridxaaguʼ. Xi raʼbuʼ zaníʼ ique binni de lii». Lagabi laabe zaníʼ binni laabe pur cani gúʼyacaʼ gúnibe (Proverbios 11:17, 22; 20:11).

Efesios 6:4: «Cadi guni tu xiixa para uchiichi si tu xiiñi tu, sínuque lausiidi laacabe ne laulidxe laacabe. Lausiniisi laacabe modo na Señor». Diidxaʼ griegu ni biquiiñeʼ para ca diidxaʼ «lausiniisi laacabe modo na Señor» ca la? Diccionario teológico del Nuevo Testamento rusiéneni diidxaʼ ca casi «guyubi tobi guni chaahuiʼ xquendabiaaniʼ tuuxa», «guni chaahuiʼ ni cadi nuu jneza ne gucaa tuuxa guiníʼ ique casi modo na Dios». Nabé caquiiñeʼ guni bixhoze binni ndiʼ ora maʼ caniisi xiiñiʼ. Ti hombre láʼ Andre, guníʼ sicaríʼ: «Ora jma maʼ ziniisi xiiñiʼ binni jma caquiiñeʼ gusiene binni laacabe xi pur chigúnicabe xiixa ne cadi gabi si laacabe xi qué zanda gúnicabe» (2 Timoteo 3:14).

XIÑEE QUÉ GÚNITU NDIʼ. Ora chuʼ xiixa guendanagana, galán gábitu xiiñitu xi conseju nudii laatu pa ñuube lugar stitu. Lagabi laabe guyúbibe xiixa de tema ca ne chuʼbe listu para guicábibe laatu ora gábitu laabe ñuuláʼdxitu ñúnitu xiixa. Lacueza tiidiʼ chupa chonna gubidxa para guiniʼtu de laani.

Gálatas 6:7: «Irá ni udxiiba binni, ngue ca cuee». Ti baʼduhuiiniʼ zanda guiziidiʼ guzuubaʼ diidxaʼ ora guni castigárcabe laa, casi ora gábicabe laa maʼ qué zuni xiixa ni riuulaʼdxiʼ. Peru ne tobi ni jma maʼ ziniisi la? jma galán gábicabe laa xi zazaaca pur cani guni (Proverbios 6:27).

XIÑEE QUÉ GÚNITU NDIʼ. Lagudii lugar gúʼyabe xi rizaaca binni ora qué ruzuubaʼ diidxaʼ. Pa guzaabibe binni cadi quíxeditu ni. Ne pa biaananebe binni gúnibe xhiiñaʼ ne qué ñúnibe ni la? laguseendaʼ laabe ra nuu binni ca para gábibe laa xiñee qué ñúnibe ni. Zacá zaziidibe gúnibe ca cosa ca jneza.

Guiráʼ binni nga ñuulaʼdxiʼ niniisi xiiñiʼ sin ñapa guendanagana. Peru cadi guiráʼ diʼ biaje rácani zacá. Ora maʼ ziniisi xiiñiʼ binni nga zanda gusiidiʼ bixhózecaʼ ne jñaacaʼ laacaʼ neza ra naquiiñeʼ sacaʼ (Proverbios 22:6). Pa gúnitu ni na ca conseju zeeda lu Biblia la? jma nayecheʼ zabaninetu binnilídxitu.

[Cani cá ñee yaza]

CANI ZANDA GUINÍʼ ÍQUETU

Ora maʼ guibani xiiñeʼ laa si,

▪ ñee zaguixhe chaahuibe tiempu stibe para gúnibe xhiiñaʼ Jiobá la?

▪ ñee zaníʼ íquebe pa jneza nga cani racaláʼdxibe gúnibe la?

▪ ñee maʼ biziidibe guiníʼnebe binni ne respetu la?

▪ ñee maʼ zanda gápabe laabe ti chuʼbe nazaaca la?

▪ ñee zaquiiñebe xpuéltube jneza la?

▪ ñee zanda gusiabe ra nabézabe ne gudiibe ni caquiiñeʼ binnilídxibe la?

▪ ñee zúnibe ca cosa ca de laasibe la?

[Ca dibuju/foto ni zeeda lu yaza 12]

Pa gusihuinni xiiñiluʼ maʼ runi ni jneza la? biiyaʼ xi xcaadxi cosa zanda gúnibe laasibe