Jiobá riníʼ «ximodo riluxe xiixa ni ruzulú»

«Ni riníʼ ximodo riluxe xiixa ni ruzulú, ne ni riníʼ dede ante ca cosa ni caʼruʼ gaca.» (ISAÍAS 46:10.)

1, 2. Xiñee ridxagayaanu modo biaba Babilonia, ne xi rusihuinni nga de Jiobá.

TI HUAXHINNI, chaahuidugá gudiʼdiʼ ca soldadu ni naca xhenemigu Babilonia ndaaniʼ guiiguʼ Éufrates ne gucuaacaʼ guidxi roʼ ni nabé nadipaʼ que. Ora yendácabe gaxha de guidxi que la? ¡guizáʼ bidxagayaacabe ora biiyacabe biaanaxeleʼ ca puertaʼ ngola stiʼ ca lindaa ni napa guidxi que! Bireesicabe de ndaaniʼ guiiguʼ que guyuucabe ndaaniʼ guidxi que ne qué nindaa diʼ guca stícabe ni. Ciro, xaíque stiʼ ca soldadu que, bizulú biʼniʼ mandarbe guidxi stiʼ Babilonia ne qué nindaa diʼ bicaabe ti ley ra cayábibe guidxi que gundaa ca israelita ni nuu de esclavu raqué. Stale de laacaʼ bibiguétacaʼ xquídxicaʼ para guni adorarcaʼ Jiobá sti biaje ndaaniʼ guidxi Jerusalén (2 Crónicas 36:22, 23; Esdras 1:1-4).

² Cani bizéʼtenu riʼ, guca cani lu ca iza 539 ne 537 ante de ca dxi stiʼ Jesús, ne zacá na ca binni ni rucaa de historia gúcani. Peru ni jma ridxagayaanu nga purtiʼ maca bieeteʼ cani chupa siglu ante gaca cani. Dxandíʼ, Jiobá maca gúdxibe Isaías, ti ni riguixhená stibe, gucaa ximodo guiaba guidxi Babilonia (Isaías 44:24–45:7). Peru cadi guníʼsibe ximodo guiaba guidxi que, sínuque laaca guniʼbe lá hombre ni chiguicaani.a Jiobá gúdxibe ca diidxaʼ riʼ ca israelita, cani guca testigu stibe dxiqué: «Laguietenalaʼdxiʼ ca primé cosa de dxiqué, naa nga Dios ne gástiruʼ stobi, nin stobi casi naa; Ni riníʼ ximodo riluxe xiixa ni ruzulú, ne ni riníʼ dede ante ca cosa ni caʼruʼ gaca» (Isaías 46:9, 10a). Jiobá nga ti Dios ni dxandíʼ nanna xi chiguizaaca.

3. Gunaa nga ca guendarinabadiidxaʼ ni chiguicábinu.

³ Pabiáʼ nanna Dios de ni chiguizaaca yaʼ. Ñee maca nánnabe xi chiguni cada tóbinu la? Ñee maca nexheʼ ximodo guibáninu la? Tema ni cayúʼndanu riʼ ne stobi ni chiguidúʼndanu ca zusiene cani laanu xiná Biblia de laacani ne de xcaadxi ni rinabadiidxanu.

Jiobá, ti Dios ni riníʼ xi chiguizaaca

4. Tu stiʼ ca diidxaʼ riguixhená ni cá lu Biblia.

⁴ Cumu zanda ganna Jiobá xi chiguizaaca la? bisiaanibe xquendabiaaniʼ ca xpínnibe ni bibani dxiqué para gucaacaʼ xi chigaca ti ganda gánnanu dede ante xi naguixhe íquebe gúnibe. Laabe guniʼbe: «Ca primé cosa... laguuyaʼ, maʼ guca cani, peru cuzeeteʼ caadxi cosa nacubi. Ante guihuinni cani, cayabeʼ cani laatu ti gunadiágatu cani» (Isaías 42:9). ¡Dxandíʼ ti ndaayaʼ ndiʼ para xquidxi Dios!

5. Xi naquiiñeʼ guni binni ora ganna xi chiguni Jiobá.

⁵ Amós, tobi de cani riguixhená stiʼ Dios guníʼ: «Jiobá, Señor Ni Jma Nandxóʼ, qué zúnibe nin ti cosa sin qué gábibe ni nánnabe laasibe ca xpínnibe cani riguixhená». Cumu gúnnacabe xi chiguni Dios la? bicaani laacabe gúnicabe xiixa. Guidúʼyanu ti ejemplu guizáʼ galán ni biquiiñeʼ Amós ora guníʼ ca diidxaʼ riʼ: «¡Nuu ti lión ni guluu beedxeʼ! Tu laa qué guidxibi». Ora riguu beedxeʼ ti lión la? rucaani binni ne zaqueca ca maniʼ ca gúnicaʼ xiixa nagueendaca. Zacaca nga ora riníʼ Jiobá, laaca nagueendaca rucaani cani riguixhená guiniʼcaʼ cani gábibe laacaʼ, cásica biʼniʼ Amós. «¡Jiobá, Señor Ni Jma Nandxóʼ, maʼ guníʼ! Tu laa qué zaguixhená.» (Amós 3:7, 8.)

Stiidxaʼ Jiobá «dxandíʼ zácani»

6. Ximodo guca ni maca «gudixhe» Jiobá guizaaca Babilonia.

⁶ Jiobá biquiiñebe Isaías ni riguixhená stibe para guiniʼbe ca diidxaʼ riʼ: «Guiráʼ ni maʼ gudixhe iqueʼ gaca la? zaca, ne guiráʼ ni gacalaʼdxeʼ zuneʼ» (Isaías 46:10b). Pur «guiráʼ ni maʼ gudixhe» ique Dios guni Babilonia la? caquiiñeʼ gueeda Ciro dede Persia para guicaabe guidxi que. Jiobá guníʼ dede ante xi racalaʼdxiʼ guni, ne casi maʼ bidúʼyanu ca, guca guiráʼ ni guniʼbe que lu iza 539 ante de ca dxi stiʼ Jesús.

7. Xiñee zanda guni crenu de guidubi ladxidoʼno dxandíʼ raca stiidxaʼ Jiobá.

⁷ Tapa siglu ante guicaa Ciro guidxi Babilonia, Jehosafat, rey stiʼ guidxi Judá, bidxelasaabe ca soldadu stiʼ guidxi Ammón ne Moab. Laabe guníʼnebe Jiobá de guidubi ladxidoʼbe ne nabe: «Jiobá, Dios stiʼ ca bixhoze góladu, ñee cadi lii nga Dios ni nuu guibáʼ, ne cadi lii nga cayuni mandarluʼ luguiáʼ ca reinu stiʼ ca guidxi roʼ ca, ne ndaaniʼ naluʼ nga nuu poder ne stipa, ne guirutiʼ qué zuzuhuaa dxiichiʼ nezaluluʼ la?» (2 Crónicas 20:6). Ngaca nga ni biʼniʼ sentir Isaías ora guníʼ ca diidxaʼ riʼ: «Jiobá stiʼ stale binni nanda guiibaʼ maʼ gudixhe gaca xiixa, ne guirutiʼ qué zanda guchiani. Ne ora maʼ bisigaanabe, guirutiʼ zanda gudxiguétani» (Isaías 14:27). Gudiʼdiʼ si stale iza, Nabucodonosor, rey stiʼ guidxi Babilonia, guniʼbe ca diidxaʼ riʼ beeda si xpiaanibe: «Guirutiʼ zanda gucueeza [naʼ Dios] o ganda gabi laabe: “Xii nga cayuʼnuʼ pue”» (Daniel 4:35). Jiobá dxandipeʼ cayabi ca xpinni: «Zacá zaca stiidxaʼ [...]. Qué zabiguetaʼ ni ra nuaa sin gácani, sínuque zúnini ni racalaʼdxeʼ, ne dxandíʼ zácani purtiʼ para nga biseendaʼ ni» (Isaías 55:11). Zanda guni crenu de guidubi ladxidoʼno dxandíʼ raca stiidxaʼ Jiobá. Ni maʼ gudixhe ique Dios dxandíʼ raca.

Ni «maca gudixhe» Dios guni

8. Xii nga ni «maca gudixhe» ique Dios guni.

⁸ Lu carta ni bicaa Pablu ra nuu ca xpinni Cristu de Éfeso guniʼbe «maca gudixhe» ique Dios guni xiixa lu Guidxilayú riʼ (Efesios 3:11). Jiobá maca guníʼ ximodo gaca ni gudixhe íquebe para binni ne para Guidxilayú riʼ (Génesis 1:28). Para ganda guiene chaahuinu dxandíʼ zaca ni maʼ gudixhe ique Dios, guidúʼyanu primé diidxaʼ riguixhená ni cá lu Biblia.

9. Xi cusihuinni Génesis 3:15 de ni maca gudixhe ique Dios guni.

⁹ Guiráʼ ca ángel ni ruzuubaʼ stiidxaʼ Dios la? zeeda gácacabe casi xheelaʼ Dios. Lu Génesis 3:15 cá ni bizabiruaa Dios ora bichee Adán ne Eva, ne laani cusihuínnini zapa gunaa stiʼ Jiobá riʼ ti xiiñiʼ. Dios maca nanna ximodo gueeda guiluxe xiana ni gapa gunaa stibe ne Binidxabaʼ ne ximodo guiluxe xiana ni chuʼ lade xiiñiʼ cada tóbicabe. Neca zudii Jiobá lugar gacaná xatini ñee ni Za de gunaa ca, peru laabe maca guniʼbe zucache ni Za de gunaa ca ique beendaʼ ca, o ique Binidxabaʼ. Laga caʼruʼ gueedandá dxi que, Dios gulí caadxi binni ne lade xiiñiʼ ca binni riʼ nga gale Jesús para gaca guiráʼ ni maca guniʼbe, ne zaqué gúcani (Lucas 3:15, 23-38; Gálatas 4:4).

Ni riguixhe Jiobá gaca

10. Ñee maca gudixhe Jiobá guchee Adán ne Eva la? Bisiene ni.

¹⁰ Pedru bizeeteʼ xi dxiiñaʼ chiguni Jesús lu ni maʼ gudixhe ique Dios. Laabe bicaabe: «Ante cha guidxilayú maca gudixhe Dios [ni] gaca Cristu [...], peru deru bisihuinni be ni para bien stitu» (1 Pedro 1:20). Ñee maca gudixhe Jiobá guchee Adán ne Eva ne gueeda gati Jesús para ganda guilá binni guidxilayú la? Coʼ. Diidxaʼ «cha» ni zeeda lu 1 Pedro 1:20 la? lu diidxaʼ griegu riníʼcabe ni «guiaba ti biidxiʼ». Ñee «[b]iaba ti biidxiʼ», o guca xiiñiʼ Eva ante guchee la? Coʼ, purtiʼ Adán ne Eva gúpacaʼ xiiñicaʼ bicheesicaʼ (Génesis 4:1). Nga runi, bichee si Adán ne Eva ne ante gaca xiiñiʼ la? Jiobá guníʼ zeeda ni «Za» de gunaa ni ruzeeteʼ Génesis 3:15. Ra guti Jesús ne bibani sti biaje nga gudixe Dios ni caquiiñeʼ para guilá binni, ne ngaca nga ni zaquiiñeʼ para guiree guiráʼ donda gulené binni ne guibiá ca xhiiñaʼ Binidxabaʼ (Mateo 20:28; Hebreos 2:14; 1 Juan 3:8).

11. Xi guníʼ Jiobá chigaca casi maca gudixhe íquebe.

¹¹ Guyuuruʼ stiʼ cosa ni guníʼ Jiobá chigaca casi maca gudixhe íquebe. Zacá bizeeteʼ Pablu ni ora bicaabe carta ra nuu ca bíʼchibe ne ca bizáʼnabe ni nuu Éfeso. Laabe guniʼbe maca gudixhe Dios «chuʼ irá ni nuu ibáʼ ne irá ni nuu ndaani guidxilayú tobi si». Ora bizeetebe «irá ni nuu ibáʼ» (ca binni ni maʼ gulí Dios para guni mandarnecaʼ Cristu), bisiénebe: «Gulí be laanu para chuʼ né nu Cristu tobi si, ne para icaa né nu irá ca xpinni be ni chi udii be laacaʼ» (Efesios 1:10, 11). Dxandíʼ, Jiobá maca guníʼ panda binni nga zaree de cani Za de gunaa que, laacabe ne Cristu nga chigudiicabe ndaayaʼ binni guidxilayú pur guendaguti stiʼ Cristu (Romanos 8:28-30). Apóstol Pedru gulee lá ca binni riʼ «guidxi ni ulee chu» Dios (1 Pedro 2:9). Apóstol Juan gucuaa ti visión ne luni binadiágabe panda binni chiguni mandarné Cristu: 144,000 (Apocalipsis 7:4-8; 14:1, 3). Laacabe ne Rey stícabe, Cristu, chigúnicabe dxiiñaʼ para «usihuinni[cabe] enda nandxóʼ stiʼ [Dios], ti usisaca binni laa» (Efesios 1:12-14).

12. Ximodo nánnanu cadi maca gudixhe Jiobá tupeʼ nga gueeda gaca cada tobi de ca binni ni chichuu lade grupu de 144,000 ca.

¹² Jiobá gudixhe chuʼ 144,000 binni, peru qué riníʼ diʼ nga maca gulibe tupeʼ nga gueeda gaca cada tobi de ca binni ni guni dxiiñaʼ riʼ. Ca conseju ni zeeda lu Biblia ni gucuá lu diidxaʼ griegu, gucuá cani para guluíʼ cani ca binni ni bibí xi naquiiñeʼ gúnicaʼ ne gudii cani stipa laacaʼ ti guzuubacaʼ diidxaʼ ne guihuinni maʼ nuucaʼ listu para checaʼ guibáʼ (Filipenses 2:12; 2 Tesalonicenses 1:5, 11; 2 Pedro 1:10, 11). Jiobá maca nanna ziuu 144,000 binni para iquiiñebe laacaʼ ti gúnicaʼ ni maca gudixhe íquebe. Tupeʼ nga ca binni riʼ yaʼ. Ximodo ribí Dios cani runi invitar yaʼ. Pur modo guibani cada tobi de ca binni riʼ zusihuínnicaʼ pa ziuucaʼ lade grupu riʼ, ne laacaʼ nga quíxhecaʼ modo guibánicaʼ (Mateo 24:13).

Ni maca nanna Jiobá

13, 14. Xi rusihuinni Jiobá ora maʼ nanna xi chiguizaaca, ne xiñee.

¹³ Jiobá nga ti Dios ni nanna xi chiguizaaca ne maca gudixhe íquebe gaca xiixa, yanna, ximodo nga maca nuu pora riguíxhebe xi chiguizaaca yaʼ. Primé la? nánnanu qué ruchee diʼ guiráʼ cani rusiidiʼ Dios, jneza cani ne rusihuinni cani nadxiibe laanu. Ora bicaa Pablu ra nuu ca hebreu de primé siglu que guniʼbe qué rusiguii diʼ Dios lu chupa cosa: ora runi jurar ne ora riníʼ gaca xiixa (Hebreos 6:17, 18). Lu carta ni bicaabe ra nuu Tito laaca gúdxibe laa «qué rusiguii» diʼ Dios (Tito 1:2).

¹⁴ Nécapeʼ zanda guni Jiobá guiráʼ ni gacalaʼdxiʼ la? laabe qué rúnibe xiixa ni cadi jneza. Moisés guníʼ nácabe ti «Dios ni runi ni riníʼ, ne qué rúnibe ni malu; ti Dios ni runi ni jneza ne qué ruchee» (Deuteronomio 32:4). Jiobá rusihuinni guendarannaxhii, guendanuuxpiaaniʼ, guendaruni jneza ne poder lu guiráʼ ni runi. Laacani nga ca guenda ni jma risaca nápabe, ne biaʼsi jneza modo riquiiñebe cani guiráʼ ora.

15, 16. Xi gudxi Jiobá Adán zanda guni ndaaniʼ jardín ni guyuu Edén que.

¹⁵ Guidúʼyanu ximodo rihuinni ca guenda riʼ ne ni guca ndaaniʼ jardín ni guyuu Edén que. Cásica ti binni ni nadxii xiiñiʼ la? Jiobá bidii guiráʼ ni caquiiñeʼ binni ti ganda guibani. Bizaʼbe Adán para ganda guiníʼ ique, guiene ne ganda guʼyaʼ pa jneza ni chiguni. Ca maniʼ ca rúnicaʼ intiisi cosa purtiʼ maʼ gadxé laacaʼ, peru Adán zanda cuí xi guni. Ngue runi, ora biʼyaʼ Dios dede guibáʼ «guiráʼ ni biʼniʼ» la? biiyabe «nabé galán cani» (Génesis 1:26-31; 2 Pedro 2:12).

¹⁶ Ora biʼniʼ mandar Jiobá Adán cadi go de cuananaxhi stiʼ yaga ni zusiene laabe xii nga ni jneza ne ni cadi jneza la? gúdxibe laa xipeʼ nga naquiiñeʼ guni. Gúdxibe laa zanda go de cuananaxhi stiʼ «guiráʼ yaga» ni nuu ndaaniʼ jardín que, peru tobi si de laani qué zanda diʼ gobe. Laaca gudixhená Dios laabe de ca guendanagana ni zápabe pa qué guzuubabe diidxaʼ (Génesis 2:16, 17). Jiobá bisiene Adán xi zazaaca pur ni guni. Yanna, xi gúnibe yaʼ.

17. Xiñee zanda guininu maca nuu pora nga riguixhe Jiobá xi chiguizaaca.

¹⁷ Ruluíʼ qué niná diʼ Jiobá ñanna xi chiguni Adán ne Eva, nécapeʼ ñanda ñúnibe ni. Nga runi, ni cadúʼyanu raríʼ nga cadi pa zanda diʼ ganna Jiobá xi chigaca, sínuque pa racaláʼdxibe gúnibe ni. Jiobá nga ti Dios ni nanna gannaxhii, nga runi cadi jneza diʼ nga guiníʼ íquenu maca nánnabe zucaalúcabe laabe ne zápacabe guendanagana ora gúnicabe ni (Mateo 7:11; 1 Juan 4:8). Casi ridúʼyanu, maca nuu pora nga riguixhe Jiobá xi chiguizaaca.

18. Xiñee qué zanda guininu ruchee Jiobá purtiʼ si maca nuu pora riguíxhebe xi chiguizaaca.

¹⁸ Ñee purtiʼ si maca nuu pora nga riguixhe Jiobá xi chiguizaaca zanda guininu nuu ra rucheebe la? Coʼ. Moisés guníʼ naca Jiobá ti «Guié» ne «ca dxiiñaʼ stibe biaʼsi cani». Guiráʼ ca yuubaʼ napa binni yanna pur ruchee la? cadi Dios diʼ napa donda pur laacani, sínuque nuu cani purtiʼ qué nuzuubaʼ tobi hombre stiidxaʼ Dios. Nayaguieʼ bisiene apóstol Pablu ni ora guníʼ sicaríʼ: «Pur tobi hombre biuu enda ruchee ndaani guidxilayú, ne guti be purti bichee be, ne zacá ucuá enda guti que irá xixé binni, purti laca bichee caʼ» (Deuteronomio 32:4, 5; Romanos 5:12; Jeremías 10:23).

19. Gunáʼ nga ca guendarinabadiidxaʼ ni chiguicabi sti tema ca.

¹⁹ Dede raríʼ maʼ bidúʼyanu Jiobá qué rúnibe ni cadi jneza (Salmo 33:5). Coʼ, sínuque riquiiñebe poder stibe, modo laabe ne ca ley ni gudíxhebe para gacané gaca ni maʼ naguixhe íquebe (Romanos 8:28). Cumu ti Dios ni riníʼ xi chigaca laabe la? Jiobá «riníʼ ximodo riluxe xiixa ni ruzulú, ne ni riníʼ dede ante ca cosa ni caʼruʼ gaca» (Isaías 46:9, 10). Laaca maʼ bidúʼyanu maca nuu pora nga riguixhe Jiobá xi chiguizaaca. Yanna, xi rucaa nga laanu gúninu yaʼ. Ximodo gánnanu pa biaʼsi nuu guiráʼ ni racaláʼdxinu gúninu ne cani maʼ naguixhe ique Dios guni yaʼ. Xi ca ndaayaʼ zápanu ora guibáninu casi modo na ca ley stibe yaʼ. Sti tema ca zusiene ca guendarinabadiidxaʼ ca.

[Cani cá ñee yaza]

Zanda gusiéneluʼ ca ndiʼ la?

• Xi ejemplu nápanu de ni guca dxiqué ni rusihuinni dxandíʼ raca guiráʼ ni maʼ guníʼ Dios.

• Xi maca guníʼ Jiobá zaca para guni ni maca gudixhe ique.

• Xiñee maca nuu pora nga riguixhe Jiobá xi chiguizaaca.