Gusisácanu Jiobá lade ca binni ridagulisaa
«Zusiide ca biche de lii, ne ra idxiña ca [o, guidagulisaacaʼ] zuunda cantu para usisaca lii nezalú caʼ.» (HEBREOS 2:12.)
1, 2. Xiñee nabé risaca ca binni ridagulisaa, ne xi para nga ridagulisaacabe.
DEDE dxi huabani binni ndaaniʼ Guidxilayú la? huadii cuenta pabiáʼ galán gannaxhii ca binnilidxi laa ne gápacabe laa. Peru, Biblia laaca ruzeeteʼ de xcaadxi binni ni nuucaʼ tobi si, nadxiisaacaʼ ne cayápasaacaʼ laacaʼ, laacabe nga ca xpinni Cristu. Pa nabanineluʼ ca binnilídxiluʼ galán o pa coʼ la? zanda gusisácaluʼ guiráʼ ni cudii Jiobá lii lade ca binni ridagulisaa ca. Yanna, pa maʼ ridagulisaaneluʼ ca Testigu stiʼ Jiobá la? rudiiluʼ cuenta nadxiicabe lii ne rápacabe lii.
2 Ca binni riʼ la? cadi ridagulisaasicaʼ para gúnicaʼ xiixa ni gacané xcaadxi binni. Ne cadi ridagulisaadicaʼ para chuʼcaʼ galán ti ratu, para gúnicaʼ xiixa o para quítecaʼ. Ca binni riʼ ridagulisaacaʼ para gusisácacaʼ Jiobá Dios, ne zacá huayácani dede maʼ xadxí, casi rusihuinni Salmo 35:18 ni, racá na sicaríʼ: «Dxandipeʼ zusisacaʼ lii ra ridagulisaa stale binni; ndaaniʼ ti guidxi ra nuu stale binni zusisacaʼ lii». Laaca zacaca nga ni cayabi Salmo 107:31, 32 laanu gúninu: «Lagudii xquíxepeʼ Jiobá pur guendanachaʼhuiʼ stiʼ, ne pur guiráʼ cosa sicarú ni huayuni para ca xiiñiʼ binni guidxilayú. Lagusisaca laabe lade ca binni ridagulisaa ni nuu ndaaniʼ ti guidxi».
3. Xiruʼ runi ca binni ridagulisaa casi guníʼ apóstol Pablu.
3 Apóstol Pablu laaca bisihuinni sti cosa risaca ni runi ca binni ridagulisaa ni naca «ca xpinni Dios ni nabani [o, «ca binni ridagulisaa», NM]. Laacabe cayapa cabe stiidxa be ndaani guidxilayú riʼ, ne cucueeza cabe cani rucaa lú ni» (1 Timoteo 3:15). Tuu ndiʼ «ca xpinni Dios» o, ca binni ridagulisaa ni caníʼ Pablu riʼ yaʼ. Xi guiráʼ zanda guiénenu ora riquiiñeʼ Biblia diidxaʼ binni ridagulisaa. Xi riquiiñeʼ gucaani laanu gúninu ne guendanabani stinu ne cani quixhe íquenu gúninu yaʼ. Primeru la? guidúʼyanu gunáʼ caadxi modo riquiiñeʼ Stiidxaʼ Dios diidxaʼ binni ridagulisaa.
4. Pora nga jma riquiiñeʼ diidxaʼ binni ridagulisaa lu Stiidxaʼ Dios ni gucuá hebreu.
4 Diidxaʼ hebreu ni riquiiñeʼ para guiníʼcabe «binni ridagulisaa» la? zeedani de ti diidxaʼ ni riníʼ «cuídxicabe binni» o «gutegulisaacabe binni» (Deuteronomio 4:10; 9:10). Lu libru stiʼ Salmo zeeda diidxaʼ ca ra ruzeeteni de ca ángel ni nuu guibáʼ ne de ti grupu de binni malu (Salmo 26:5; 89:5-7). Peru, lu Stiidxaʼ Dios ni gucuá hebreu ca jma riquiiñeʼ diidxaʼ ca ora ruzeeteni de ca israelita. Dios guníʼ zeeda gaca Jacob ti neza binni ridagulisaa stiʼ stale guidxi, ne zaqué gúcani (Génesis 28:3; 35:11; 48:4). Ca israelita que bibicaʼ para gácacaʼ «binni ridagulisaa stiʼ Jiobá» ne «binni ridagulisaa stiʼ tobi lucha Dios ni dxandíʼ» (Números 20:4; Nehemías 13:1; Josué 8:35; 1 Samuel 17:47; Miqueas 2:5).
5. Xi diidxaʼ griegu riquiiñeʼ para guiníʼcabe «binni ridagulisaa», ne xi para riquiiñecabe ni.
5 Para guiníʼcabe diidxaʼ griegu ek·klē··sí·a la? riquiiñecabe chupa diidxaʼ «fuera» ne «gucaarídxicabe», guiropa diidxaʼ riʼ nga riquiiñecabe para guiníʼcabe binni ridagulisaa. Nuu tiru riquiiñecabe diidxaʼ ca para guzeetecabe ti grupu de binni ni ridagulisaa peru cadi para guni adorarcaʼ Dios, casi ca binni ni bitegulisaa Demetriu para bicaalucaʼ Pablu ndaaniʼ guidxi Éfeso (Hechos 19:32, 39, 41). Peru lu Biblia la? jma nga riquiiñeni ora rieeteʼ de ca xpinni Cristu ni ridagulisaa. Nécapeʼ nuu stale Biblia rutiixhi diidxaʼ binni ridagulisaa casi «yuʼduʼ» la? Nuevo Diccionario Bíblico Ilustrado na «cadi guiráʼ diʼ ra riquiiñecabe diidxaʼ yuʼduʼ ca caníʼcabe de ti lugar ra raca adorar». Peru galán guzéʼtenu riníʼ diidxaʼ binni ridagulisaa ca tapa cosa lu Stiidxaʼ Dios ni gucuá griegu.
«Ca xpinni Dios» ni bibí
6. Xi biʼniʼ David ne xi biʼniʼ Jesús lade ca binni ridagulisaa.
6 Ora cuzeeteʼ apóstol Pablu de ni guníʼ David lu Salmo 22:22 chiguni Jesús la? bicaa: «Zusiide ca biche de lii, ne ra idxiña ca [o, «ra guidagulisaacaʼ», NM] zuunda cantu para usisaca lii nezalú caʼ. Gupa [Jesús] xidé guca [...] casi pe ca biʼchi [...], purti zacá si zanda guiá be laanu, ne uzuhuaa be lu Dios pur laanu casi runi ti sacerdote gola ni runi xhiiña jneza» (Hebreos 2:12, 17). David bisisaca Dios lade ca binni ridagulisaa ni guyuu Israel dxiqué (Salmo 40:9). Peru, tuu nga ca binni ni cuzeeteʼ Pablu ora guníʼ bisisaca Jesús Dios lade ca binni ridagulisaa yaʼ.
7. Tuu nga cani cuzeeteʼ Stiidxaʼ Dios primeca casi binni ridagulisaa.
7 Ca diidxaʼ ni cá lu Hebreos 2:12, 17 cusiénecaʼ jma de ni caninu riʼ, purtiʼ rusihuínnicani laaca guyuu Cristu lade ca binni ridagulisaa ra bisisácabe Dios nezalú ca bíʼchibe. Tuu ngue guca ca bíʼchibe yaʼ. Cani zá de Abrahán, ca bíʼchibe ni bibí pur espíritu santu, cani «ulee chu Dios para» ché guibáʼ (Hebreos 2:16–3:1; Mateo 25:40). Ora ruzeeteʼ Stiidxaʼ Dios ni gucuá lu diidxaʼ griegu binni ridagulisaa la? primeca de ca discípulo stiʼ Cristu ni bibí pur espíritu santu nga caniʼni. Biaʼsi 144.000 nga guirácabe ne laacabe nga «cani ma [ché] ibáʼ, zanda gabi nu ma xquidxi ca ibáʼ» (Hebreos 12:23).
8. Ximodo maca guníʼ Jesús zuzulú ca xpinni gácacaʼ ti grupu de binni ridagulisaa.
8 Jesús maca guníʼ ximodo zuzulú zaca ca xpínnibe binni ridagulisaa. Biaʼ ti iza ante gátibe gúdxibe tobi de ca apóstol stibe: «Ma gulee laʼya lii Pedru [...] Ne lu guie ca [o, «ti guie jma naroʼbaʼ», NM] chi ucué ti yuʼduʼ, ne yuʼdu ca nga, ca xpinneʼ [o, «ca binni ridagulisaa», NM]. Ne gasti qué zanda uxhá ni, gueeda ni gueeda, neca enda guti» (Mateo 16:18). Cásica Pedru ne Pablu la? biene chaahuicabe Jesús nga guié naroʼbaʼ que. Pedru na cani «zeda gaca guie ni nabani» ni chiguiquiiñeʼ Jesús para cuí yuʼduʼ stiʼ Dios lu guié ni jma naroʼbaʼ, ni zeeda gaca Cristu ca nga cani cuzeeteʼ textu riʼ: «Ma naca tu ti guidxi ni ulee chu be para laabe. Ma sti pe be laatu. Ne gudixhe be gaca ni zacá para gabi tu binni rihuinni pabiáʼ nandxóʼ be pur ni runi be, purti ulee be laatu de lu guelacahui» (1 Pedro 2:4-9; Salmo 118:22; Isaías 8:14; 1 Corintios 10:1-4).
9. Padxí beeda gaca «guidxi ni ulee chu» Dios que binni ridagulisaa.
9 Padxí beeda gaca «guidxi ni ulee chu» Dios ca binni ridagulisaa yaʼ. Dxi bisaba Dios espíritu santu luguiáʼ ca discípulo ni nuu Jerusalén que, lu Pentecostés stiʼ iza 33. Gudiʼdiʼ si chupa chonna hora de guca nga la? bidii Pedru ti libana guizáʼ sicarú nezalú stale judíu ne nezalú binni ni cadi judíu ni rúnicaʼ ni na ley gucuaa Moisés. Stale de cani bicaadiaga libana que gucaná ladxidoʼcaʼ pur guendaguti stiʼ Jesús que, ngue runi guca arrepentircaʼ ne guyuunísacaʼ. Ne lu Biblia na biaʼsi chonna mil binni bidaaguʼ ca binni ridagulisaa ni deruʼ bizulú que, ne zidiʼdiʼ dxi jma zidálecaʼ (Hechos 2:1-4, 14, 37-47). Zeʼ dxi jma stale judíu ne ca binni ni cadi judíu zigudiicaʼ cuenta maʼ ca xpinni Cristu ni bibí pur espíritu santu que nga «cani dxandí xpinni Dios», ne maʼ cadi ca judíu de guidxi Israel (Gálatas 6:16; Hechos 20:28).
10. Tu zeeda gaca Jesús para ca binni ridagulisaa ni bibí pur espíritu santu.
10 Stale biaje, ora ruzeeteʼ Biblia de Jesús ne de ca xpinni ni bibí pur espíritu la? rusihuínnini gadxé nga Jesús ne gadxé nga ca xpinni casi rieeteʼ raríʼ: «Cristu [ne] ca xpinni». Jesús nga Xaíque stiʼ ca binni ridagulisaa ni bibí pur espíritu santu. Pablu na biʼniʼ Dios «laabe xaíque sti ca xpinni be. Ca xpinni be [ni] zeda gaca casi cuerpu stibe» (Efesios 1:22, 23; 5:23, 32; Colosenses 1:18, 24). Yanna riʼ maʼ xcaadxi si de ca binni ridagulisaa ni bibí pur espíritu nabani ndaaniʼ Guidxilayú. Laanu nanna dxíchinu guizáʼ nadxii Jesucristu laacabe, xaíque stícabe, casi na Efesios 5:25: «Gunaxhii Cristu ca xpinni, dede bidii xpida pur laacaʼ». Nabé gunnaxhii Cristu laacabe, purtiʼ cásica bíʼnibe dxi guyuube ndaaniʼ Guidxilayú riʼ la? laacabe laaca rúnicabe stipa para gúnicabe ni na ca diidxaʼ riʼ: «Cadi guiaana dxí nu de usisaca nu Dios purti ra udxiʼba nu laa pur irá ni huayuni para laanu la? casi ñaca cusigaʼde nu laa xiixa galán» (Hebreos 13:15).
Xcaadxi modo riquiiñeʼ diidxaʼ binni ridagulisaa
11. Xi sti modo riquiiñeʼ diidxaʼ binni ridagulisaa lu Stiidxaʼ Dios ni gucuá lu diidxaʼ Griegu.
11 Nuu tiru, ora ruzeeteʼ Biblia de binni ridagulisaa la? cadi caníʼdini de ca 144,000 binni ni bibí pur espíritu santu ni nácacaʼ «xpinni Dios», sínuque caniʼni de ti grupu jma nahuiiniʼ. Casi rihuínnini lu ni bicaa Pablu ra nuu ti grupu de xpinni Cristu, nabe: «Cadi guni tu gasti ni uchenda ca judíu, nin ca binni ni cadi judíu, nin ca xpinni Dios [o, «ca binni ridagulisaa», NM]» (1 Corintios 10:32). Pa ti xpinni Cristu de guidxi Corinto guni xiixa ni cadi jneza la? zándaca pur ni gúnibe que guiree tuuxa de ndaaniʼ xquidxi Dios. Peru, ñee niree guiráʼ ca griegu, ca judíu o guiráʼ cani bibí pur espíritu ni bibani dxiqué dede ne cani nabani yanna la? Coʼ. Nga runi, ora cuzeeteʼ versículo ca de «ca xpinni Dios» o, ca binni ridagulisaa la? ruluíʼ si caniʼni de «ca xpinni Dios» o, ca binni ridagulisaa ni naca xpinni Cristu ni nabani lu ti tiempu si. Ne pur nga zanda guininu Dios nga cusiene, cayacané o caguu ndaayaʼ ca binni ridagulisaa ni nabánicaʼ lu ti tiempu si, neca gadxé gadxé lugar nuucaʼ. O laaca zanda iquiiñenu diidxaʼ ca ora guininu de guendanayecheʼ ne guendariuudxi ni napa guiráʼ ca neza binni ridagulisaa stiʼ Dios ni nuu lu guidubi naca Guidxilayú.
12. Gunáʼ nga guionna modo riquiiñeʼ Biblia diidxaʼ binni ridagulisaa.
12 Guionna modo riquiiñeʼ Biblia diidxaʼ binni ridagulisaa nga ora caniʼni de guiráʼ ca xpinni Cristu ni nabani ndaaniʼ ca guidxi ni nuu gaxha gaxha. Casi ni cá raríʼ: «Ma iruti nuchiiña ca xpinni Cristu [«ca binni ridagulisaa», NM], cani nuu Judea ne Galilea ne Samaria» (Hechos 9:31). Nánnanu guyuu stale grupu de xpinni Cristu guiráʼ ca lugar que, peru guirácabe rieeteʼ casi ora ñácacabe ti neza binni ridagulisaa. Yanna, cumu lu Pentecostés stiʼ iza 33 que stale binni nga guyuunisa ne gudiʼdiʼ si saa que laaca la? zanda guininu guyuu jma de ti grupu de binni ridagulisaa Jerusalén ne zaqueca xcaadxi guidxi gaxha de laani (Hechos 2:41, 46, 47; 4:4; 6:1, 7). Herodes Agripa I biʼniʼ gobernar Judea dede dxi guti lu iza 44, ne casi na 1 Tesalonicenses 2:14 la? rihuinni dxíchica maʼ nuu stale neza binni ridagulisaa guidubi raqué para lu iza 50. Nga runi, ora ruzeeteʼ Biblia bizulú «Herodes bininá caadxi de ca xpinni Cristu» la? zándaca cuzeeteni de caadxi grupu ni guyuu Jerusalén (Hechos 12:1).
13. Gunáʼ nga guidapa modo jma riquiiñeʼ diidxaʼ binni ridagulisaa lu Biblia.
13 Guidapa modo riquiiñeʼ diidxaʼ binni ridagulisaa nga ora ruzeeteni guiráʼ ca xpinni Cristu de ti neza binni ridagulisaa si, neca ridagulisaacaʼ ra lidxi tuuxa. Pablu guníʼ chupa biaje «ca hermanu [«ca neza binni ridagulisaa», NM] ni nuu Galacia», ora guniʼbe zacá la? cuzeetebe ca neza binni ridagulisaa ni nuu ndaaniʼ guiráʼ ca guidxi ra runi mandar Roma. Ndaaniʼ guiráʼ ca neza binni ridagulisaa ni guyuu Antioquía, Derbe, Listra ne Iconio la? bibí hombre ni runi guiráʼ ni canabaʼ Biblia para gaca tuuxa binnigola (1 Corintios 16:1; Gálatas 1:2; Hechos 14:19-23). Stiidxaʼ Dios na guirácabe nga «ca xpinni Dios» o ca neza binni ridagulisaa (1 Corintios 11:16; 2 Tesalonicenses 1:4).
14. Xi rizíʼdinu pur modo riquiiñeʼ diidxaʼ binni ridagulisaa lu caadxi textu zeeda lu Biblia.
14 Guyuu grupuhuiiniʼ de ca xpinni Cristu ni bidagulisaa ra lidxi tuuxa; neca zaqué la? laaca gúdxicabe laacaʼ binni ridagulisaa. Nánnanu zacá ni purtiʼ guyuu tu bidagulisaa ra lidxi Áquila ne Prisca, ne ra lidxi Ninfa ne Filemón (Romanos 16:3-5; Colosenses 4:15; Filemón 2). Nga runi, ca neza binni ridagulisaa ni nuu yanna riʼ zanda chuʼcaʼ nayecheʼ neca ridagulisaacaʼ ra lidxi tuuxa ne huaxieʼcaʼ. Cásica guyuulaʼdxiʼ Jiobá ca neza binni ridagulisaa ni guyuu lu primé siglu que neca huaxieʼcaʼ la? zacaca nga riuuláʼdxibe cani nuu yanna riʼ ne riguube ndaayaʼ laacaʼ ne espíritu stibe.
Rusisaca ca binni ridagulisaa Jiobá
15. Ximodo bihuinni gupa ca neza binni ridagulisaa ni guyuu lu primé siglu que espíritu santu.
15 Lu Salmo 22:22 bidúʼyanu bisisaca Jesús Dios lade ca binni ridagulisaa (Hebreos 2:12). Ca discípulo stibe laaca naquiiñeʼ gúnicaʼ zacaca. Casi lu primé siglu que, caadxi de ca discípulo ni bibí pur espíritu para gueeda gácacaʼ xiiñiʼ Dios ne biʼchiʼ ne bizaʼnaʼ Cristu la? gucané espíritu santu laacaʼ para bíʼnicaʼ ti dxiiñaʼ jma risaca. Espíritu que gucané laacabe para guníʼcabe ne guendabiaaniʼ, gusiándacabe binni, guiníʼcabe xi chigaca o dede guiníʼcabe sti diidxaʼ ni qué runibiáʼcabe (1 Corintios 12:4-11).
16. Xi para ngue gucuaa caadxi discípulo espíritu santu.
16 Cumu Pablu laaca guníʼ sti diidxaʼ la? nga runi bicaa sicaríʼ: «Zuunda nia laabe ne espíritu, peru laca zuunda nia laabe ne xquenda biaaneʼ» (1 Corintios 14:15). Laabe gúnnabe qué zaziidiʼ binni gastiʼ pa qué guiene xi caniʼbe. Cumu gucuá íquebe gusisácabe Jiobá lade ca binni ridagulisaa la? gúdxibe cani racané espíritu que: «Lauyubi gapa tu ca gracia ni jma racané irá ca xpinni Cristu», ne ra nabe naquiiñeʼ gusihuínnicabe ca gracia ca nga lade ca binni ridagulisaa ra nuucabe (1 Corintios 14:4, 5, 12, 23). Pablu nabé gucuá ique guiziidiʼ guiráʼ ca neza binni ridagulisaa, purtiʼ nanna nuu stale modo para gusisaca ca xpinni Cristu Dios ndaaniʼ cada tobi de laacani.
17. Xi naquiiñeʼ gánnanu cayuni Jiobá pur cada neza binni ridagulisaa ni nuu yanna riʼ.
17 Dede yanna riquiiñeʼ Jiobá ca binni ridagulisaa ne cayacanebe laacaʼ. Riguube ndaayaʼ guiráʼ ca xpinni Cristu ni bibí pur espíritu ni nabánirucaʼ ndaaniʼ Guidxilayú riʼ, ne rihuinni zacá ni purtiʼ rusiidicabe xquidxi Dios stale de ni zeeda lu Biblia (Lucas 12:42). Laaca riguu Jiobá ndaayaʼ guiráʼ ca Testigu ni nuu lu guidubi naca Guidxilayú ne riguube ndaayaʼ cada neza binni ridagulisaa, ra rusisácanu Dios ne cani rúninu ne ora guininu xiixa ni gacané iguidxi fe stiʼ xcaadxi. Racá rizíʼdinu ximodo zanda gusisácanu Dios sti lugar, cásixa ora maʼ cadi nuunu lade ca binni ridagulisaa.
18, 19. Xi riuulaʼdxiʼ cani dxandíʼ runi adorar Dios guni lade ca neza binni ridagulisaa.
18 Guietenaláʼdxinu xi bicaa Pablu guni ca xpinni Cristu de Macedonia ni guyuu guidxi Filipos: «Ne rinaba laabe acané be laatu [...] ganda iquiiñe xpida tu para udxiiba cabe ne usisaca cabe Dios ra guʼya cabe pabiáʼ jneza nabani tu». Para gaca nga la? naquiiñeʼ guiníʼcabe ra nuu guiráʼ binni ni cadi nuu lade ca binni ridagulisaa de fe ni nápacabe Jesús ne de ni cabézacabe chiguni Dios (Filipenses 1:9-11; 3:8-11). Nga runi gudxi Pablu ca biʼchiʼ gúnicaʼ sicaríʼ: «Yáquexa ma bichiña Jesucristu laanu ra nuu Dios la? cadi guiaana dxí nu de usisaca nu Dios purti ra udxiʼba nu laa pur irá ni huayuni para laanu la? casi ñaca cusigaʼde nu laa xiixa galán» (Hebreos 13:15).
19 Ñee riuuláʼdxiluʼ gusisácaluʼ Dios lade ca binni ridagulisaa cásica biʼniʼ Jesús, ne gusisácaluʼ laabe nezalú cani qué runibiáʼ laabe ne qué runi adorarcaʼ laabe la? (Hebreos 2:12; Romanos 15:9-11.) Zánnaluʼ xi gúniluʼ pa guiéneluʼ ximodo riquiiñeʼ Jiobá neza binni ridagulisaa ni nuuluʼ lade ca para gúnibe ni maʼ gudixhe íquebe. Lu sti tema ca zadúʼyanu ximodo cusiidiʼ ne caquiiñeʼ Jiobá cada neza binni ridagulisaa, ne ximodo racaneni laanu.
Rietenalaʼdxuʼ la?
• Ximodo beeda chuu «ca xpinni Dios» ni bibí pur espíritu santu.
• Gunáʼ xhonna modo riquiiñeʼ Biblia diidxaʼ binni ridagulisaa.
• Xi guyuulaʼdxiʼ David, Jesús ne ca xpinni ni bibani lu primé siglu que guni lade ca binni ridagulisaa, ne xi naquiiñeʼ gucaa nga laanu gúninu.
[Dibuju/foto ni zeeda lu yaza 8]
Gunáʼ nga neza binni ridagulisaa ni gurí lu guié jma naroʼbaʼ ni zeeda gaca Jesús que
[Dibuju/foto ni zeeda lu yaza 9]
Ca grupu de xpinni Cristu que nga ca binni ridagulisaa
[Dibuju/foto ni zeeda lu yaza 10]
Casi ca xpinni Cristu de Benín riʼ, naquiiñeʼ gusisácanu Jiobá ra nuu guiráʼ ca binni ridagulisaa