Ni rusiidiʼ Dios binni nga ni jma risaca
«Irá ni ma qué iquiiñe ni para naa, purti ma binebiaʼya Cristu Jesús Señor stinneʼ.» (FILI. 3:8)
1, 2. Xi huaguixhe ique stale xpinni Cristu guni, ne xiñee.
DEDE dxi nahuiiniʼ Robert, bihuinni nabé nanna. Dxi nápabe xhono iza, guyé tobi de ca maestra stibe ralídxibe ne gudxi laabe zanda ugaandabe guiráʼ ni gacaláʼdxibe lu xquendanabánibe, ne na ñuulaʼdxiʼ ñuuyaʼ ñácabe ti doctor. Ne dxi maʼ biniisibe, laaca bihuinni nánnabe stale dede ñanda ñebe xiixa scuela roʼ ndaaniʼ xquídxibe. Peru lugar de nibibe ñebe racá la? gudixhe íquebe gácabe precursor regular ne zacá bisihuínnibe bicaanabe tobi de ca cosa ni na binni maʼ qué zanda gápabe despué.
2 Cásica Robert, ca dxi stinu riʼ stale de ca xpinni Cristu de gadxé gadxé iza laaca ñanda ñácacaʼ tuuxa ndaaniʼ guidxilayú riʼ. Peru nuu de laacabe lugar de ñúnicaʼ nga, riguixhe íquecaʼ ugaandacaʼ xiixa guenda ndaaniʼ xquidxi Dios (1 Cor. 7:29-31). Xiñee huaguixhe ique ca xpinni Cristu ca gúnicaʼ jma lu xhiiñaʼ Dios yaʼ. Huayúnicabe zacá purtiʼ nadxiicabe Jiobá, peru laaca rúnicabe ni purtiʼ nánnacabe jma risaca ni rusiidiʼ Dios binni. Ñee huaníʼ íqueluʼ ximodo nibániluʼ pa ñaca qué niziidiluʼ ni zeeda lu Stiidxaʼ Dios la? Guidúʼyanu caadxi de ca ndaayaʼ ni nápanu pur bisiidiʼ Jiobá laanu. Zacá jma zusisácanu ca diidxaʼ nacubi ne galán ca ne zucheechenu diidxaʼ ne stale gana.
Ti ndaayaʼ naroʼbaʼ nga gusiidiʼ Jiobá laanu
3. Ximodo nánnanu riná Jiobá gusiidiʼ binni neca gulenecaʼ donda.
3 Cumu nabé nachaʼhuiʼ Jiobá la? rinabe gusiidibe binni neca gulenecaʼ donda. Isaías guníʼ caadxi diidxaʼ ra cayeeteʼ de ca xpinni Cristu ni bibí, nabe: «Guiráʼ ca xiiñiluʼ zusiidiʼ Jiobá laacabe, ne zápacabe guendariuudxí» (Isaías 54:13). Ca diidxaʼ riʼ laaca zaca ni nácani luguiáʼ «xcaadxi dendxu» stiʼ Cristu (Juan 10:16). Ximodo nánnanu nga yaʼ. Nánnanu ni pur ni na ti diidxaʼ riguixhená ni cayaca ni na ca dxi stinu riʼ. Lu ti visión ni gucuaa Isaías biiyabe stale binni de guiráʼ guidxi ni zeeda guni adorar Dios. Ne lu ca diidxaʼ riguixhená ca caníʼcabe: «Quíbanu lu dani stiʼ Jiobá, ralidxi Dios stiʼ Jacob; ne laabe zusiidibe laanu sanu lu neza stibe, ne dxandipeʼ zazanu luni» (Isa. 2:1-3). Nga rusihuinni Jiobá peʼ cusiidiʼ laacabe. ¡Nabé naroʼbaʼ ndaayaʼ ca!
4. Xi naquiiñeʼ gúninu para gusiidiʼ Jiobá laanu.
4 Xi naquiiñeʼ gúninu para gusiidiʼ Dios laanu yaʼ. Naquiiñeʼ gácanu binni nadóʼ ne gudiʼnu lugar gusiidibe laanu. David bicaa salmo riʼ: «Jiobá nachaʼhuiʼ ne runi ni jneza. [...] [Laabe] zusiidibe ca binni nadóʼ sacaʼ lu neza stibe» (Sal. 25:8, 9). Ne Jesús guníʼ: «[Xquíxepeʼ] lii, Bixhozeʼ. Lii nga xpixuaana ibáʼ ne guidxilayú. Rudiee [xquíxepeʼ] lii purti qué nudiiu lugar ñene cani riene ne cani nuu xpiaani irá ndiʼ, sínuque bicaachi lu ni para biluíʼ lu ni cani zeda gaca casi baʼduʼ» (Luc. 10:21). Ñee cadi dxandíʼ qué raca nagana para laanu gannaxhiinu ti Dios ni racané cani qué rudxiibaʼ laca laa la? (1 Ped. 5:5.)
5. Xi gucané laanu gunibiaʼnu Dios.
5 Ñee pur nuu xpiaaninu o pur nánnanu gúninu stale cosa nga bizíʼdinu de Dios la? Coʼ, laasinu qué ñanda diʼ ñunibiaʼnu Dios. Jesús guníʼ: «Biseenda Bixhoze naa, ne iruti zanda gueeda ra nuaaʼ, pa qué cuidxi be laa» (Juan 6:44). Dxandíʼ, Jiobá nga riquiiñeʼ espíritu santu stiʼ ne ca xpinni ni rucheeche diidxaʼ para guchiña binni ni zeeda gaca casi dendxuʼ ndaaniʼ xquidxi (Ageo 2:7). Ñee cadi dxandíʼ rudiiluʼ xquíxepeʼ Jiobá purtiʼ bichiña lii ra nuu Xiiñiʼ la? (Biindaʼ Jeremías 9:23, 24.)
Ruchaani xquendanabani binni
6. Xi ribeendú binni ora guiziidiʼ de Jiobá.
6 Ca diidxaʼ riguixhená stiʼ Isaías cuzeeteʼ caadxi ejemplu ni cusihuinni pabiáʼ sicarú ni cayaca ca dxi stinu riʼ. Stale binni ni nabé gudinde dxiqué, yanna maʼ nácacaʼ binni nadóʼ (biindaʼ Isaías 11:6-9). Xcaadxi binni ni guca nanaláʼdxisaa purtiʼ de sti raza laa, de sti tribu laa, de gadxé guidxi laa ne nápacaʼ gadxé costumbre, maʼ biziidicaʼ guibánicaʼ sin tíndecaʼ. Zacá nga casi ñaca ñúnicabe «espada stícabe guiibaʼ ni chuʼ ruaa aradu» (Isa. 2:4). Xiñee bichaacabe modo nabánicabe yaʼ. Purtiʼ maʼ bisiidiʼ Jiobá laacabe ne maʼ cayúnicabe ni nabe lu xquendanabánicabe. Nécapeʼ binni ruchee ca xpinni Dios, nadxiisaacaʼ casi ti familia ni nuu lu guidubi naca Guidxilayú. Nabé sicarú modo cuchaa ca diidxaʼ nacubi ne galán ca binni de guidubi naca Guidxilayú ne nga rusihuinni pabiáʼ risaca gudii binni lugar gusiidiʼ Dios laacaʼ (Mat. 11:19).
7, 8. 1) Xii nga intiica ni riguixhe binni para cadi chindá stiidxa Dios ra nuu xcaadxi binni yaʼ. 2) Xi ejemplu rusihuinni ora guiziidiʼ tuuxa de Dios racaneni gusisaca binni Jiobá.
7 Apóstol Pablu guníʼ casi ñaca cucaalú ca xpinni Dios Binidxabaʼ ora rucheechecaʼ diidxaʼ. Laabe bicaabe: «Ni riquiʼñe du para ucáʼ lú né du la? cadi casi ni riquiiñe binni guidxilayú, sínuque nandxóʼ ni casi nandxóʼ Dios ni bidii cani laadu para uchiá né du intiica ni quixhe cabe para cadi chindá stiidxa Dios ra nuu cabe. Ruseʼgu du ruaa cani riguiñe yu stiidxa Dios, cani raca nandxóʼ ne riguixhe xiixa para qué chuʼ tu gunibiáʼ Dios» (2 Cor. 10:4, 5). Xii nga «intiica ni quixhe cabe para cadi chindá stiidxa Dios ra nuu» binni yaʼ. Laacani nga guiráʼ cani rusiidiʼ ca religión ni cadi dxandíʼ ca, cani runi cré binni ni ruchibi laacaʼ, cani rusiidiʼ binni guidxilayú, ne nuuruʼ xcaadxi cosa (Col. 2:8). Guiráʼ cani rusiidiʼ Jiobá binni racanécani laacabe gusaanacabe ca cosa malu bíʼnicabe ne gápacabe ca guenda ni napa ca xpinni Dios (1 Cor. 6:9-11). Laaca racanécani ca familia ca chuʼcaʼ galán ne gánnacaʼ nuu xi cabeza laacaʼ despué. Ni rusiidiʼ Jiobá ca nga ni jma caquiiñeʼ binni yanna.
8 Tobi de ca guenda ni zanda gacané Jiobá binni gapa lu xquendanabani nga guendaruni ni jneza, ne zacá rihuínnini lu ejemplu riʼ (Heb. 13:18). Ndaaniʼ guidxi la India, bizulú ti gunaa biindaʼ Biblia ne despué guca tobi de cani rucheeche diidxaʼ ni caʼruʼ chúʼnisa. Ti dxi ora bibiguétabe ralídxibe de yegúnibe dxiiñaʼ ra cabí ti Yoo stiʼ Reinu, bidxélabe ti cadena de oro ni nexheʼ neza ra ribézacabe carru. Nécapeʼ pobre laabe ne risaca cadena que biaʼ 800 dólar la? guníʼ íquebe chisaanabe ni ra nuu puliciá, ne gunábabe ti binnigola ni rié ra ridagulisaabe chiné laabe. Puliciá ni bidxaagalú laacabe que qué guiráʼ guidxagayaa ni cayúnibe que. Despué gunabadiidxaʼ sti puliciá laabe xiñee cudxiguétabe cadena que, laabe gúdxibe laa: «Purtiʼ Stiidxaʼ Dios gucané naa guchaa modo riníʼ iqueʼ. Ne yanna maʼ runeʼ ni jneza». Nabé bidxagayaa puliciá que, ne gúdxibe binnigola que: «Ndaaniʼ guidxi riʼ nuu treinta y ocho millón de binni. Pa ñacaneluʼ biaʼ chii si binni ñaca casi gunaa riʼ la? guizáʼ galán ñuʼnuʼ». Ni rusiidiʼ Jiobá huayacané millón de binni ni nuu lu guidubi naca Guidxilayú guchaa xquendanabani. Cadi dxandíʼ nga nga ti razón jma risaca ni nápanu para gusisácanu Jiobá la?
9. Xiñee zanda guchaa ti binni xquendanabani ora guiziidiʼ cani zeeda lu Stiidxaʼ Dios.
9 Stiidxaʼ Dios ne espíritu santu stibe ca racanécani binni guchaa modo nabani (Rom. 12:2; Gál. 5:22, 23). Colosenses 3:10 cayabi laanu ca diidxaʼ riʼ: «Ma adxé laatu yanna. Ma bichaa Dios laatu, ne ze dxi jma rusi ziuchaa laatu, cayuni laatu casi laa, dede gunibiáʼ chaahui tu laa». Ni rusiidiʼ Stiidxaʼ Dios ca nabé nandxóʼ ni purtiʼ racaneni binni gusihuinni xi nuu ndaaniʼ ladxidóʼ ne gucaani laa guchaa modo riníʼ ique ne ni runi sentir (biindaʼ Hebreos 4:12). Ne ora maʼ biziidibe cani cá lu Biblia ne gúnibe ni na ca ley stiʼ Dios la? zanda chuʼbe gaxha de Dios ne zanda guibánibe sin qué chuʼ dxi gátibe.
Cusiidiʼ Jiobá laanu ximodo chuʼnu listu ora gueeda dxi stiʼ
10. 1) Xiñee Jiobá si nga ni jma zanda gusiidiʼ laanu para guibáninu despué. 2) Xii nga ca cosa ni mayaca guizaaca lu guidubi naca Guidxilayú.
10 Jiobá si nga zanda gusiidiʼ laanu ximodo chuʼnu listu ora gueeda dxi stiʼ, purtiʼ laabe nánnabe xi chiguizaaca binni guidxilayú (Isa. 46:9, 10). Biblia na «maʼ gaxha nuu dxi jma risaca stiʼ Jiobá» (Sof. 1:14). Ne dxicá nga zaca ni na ca diidxaʼ ni cá lu Proverbios 11:4: «Ca cosa risaca ca qué zacané diʼ cani binni dxi xiana stiʼ Jiobá, peru pa gúninu ni jneza qué zátinu». Ni jma zasaca dxi gunitilú Dios guidxilayú malu riʼ nga pa nuunu galán ne laabe. Qué zasaca diʼ bueltu dxi ca, purtiʼ Ezequiel 7:19 na «zusáʼbicabe ca plata stícabe lu calle, ne zaxhacaláʼdxicabe oro stícabe». Gánnanu nga zacané laanu quixhe íquenu gúninu ni jneza dede yanna.
11. Bizeeteʼ tobi de ca modo racané cani rusiidiʼ Dios laanu para chuʼnu listu ora gueeda dxi stiʼ Jiobá.
11 Sti modo racané cani rusiidiʼ Jiobá laanu chuʼnu listu ora gueeda dxi stibe nga guidúʼyanu xii nga ni jma risaca gúninu lu xquendanabáninu. Sicaríʼ gudxi apóstol Pablu Timoteu: «Gudxi cani napa bidxichi cadi aca nayá[ʼ] né ca xpidxichi caʼ, ne cadi icá lú ca ni purti zanda guiaana ca sin gastiʼ. Sínuque icá lú ca Dios ni nabani». Neca cadi nácanu binni ricu la? zanda gacané conseju ca laanu. Ora runi crenu zacané Dios laanu ne cadi guicálunu bidxichi stinu la? zusihuínninu nacháʼhuinu ne zúninu stale cosa ni galán lugar de guyúbinu gápanu cosa ni risaca. Pa quixhe íquenu gúninu xhiiñaʼ Dios la? zacaneni laanu «stobi dxi» (1 Tim. 6:17-19). Zusihuínninu nuu xpiaaninu pa cadi guyúbinu gápanu cosa ni risaca, purtiʼ casi guníʼ Jesús que, «paraa iquiiñe ni binni pa guni ganar idubi guidxilayú peru guniti xhialma» yaʼ (Mat. 16:26, 27). Cumu maʼ gaxha nuu dxi stiʼ Jiobá, cada tobi de laanu naquiiñeʼ guiníʼ íquenu: «Paraa cutaleʼ cosa risaca. Ñee nacaʼ esclavu stiʼ Dios la? o stiʼ bidxichi» (Mat. 6:19, 20, 24).
12. Xiñee cadi naquiiñeʼ guireʼnu gana pa tuuxa qué náʼ gucaadiaga laanu ora maʼ zigucheechenu diidxaʼ.
12 Lade ca cosa ni galán ni rabi Biblia laanu gúninu nga gucheechenu diidxaʼ ne gacanenu binni gaca xpinni Cristu, ne laani nga ti dxiiñaʼ ni naquiiñeʼ gúninu primé (Mat. 24:14; 28:19, 20). Ca dxi stinu riʼ laaca qué riná binni gucaadiaga ora maʼ zigucheechenu diidxaʼ cásica biʼniʼ binni lu primé siglu que (1 Cor. 1:18-21). Peru cadi pur nga maʼ qué risaca ca diidxaʼ nacubi ne galán ni zinenu ra nuu binni o maʼ qué risaca dxiiñaʼ cayúninu para chinenu ca diidxaʼ ca ra nuu binni laga zándaruʼ chuunu ra nuucaʼ (Rom. 10:13, 14). Ne pa gacanenu binni gusiidiʼ Jiobá laacaʼ la? zacaacaʼ stale ndaayaʼ ne zaqueca laanu.
Ca ndaayaʼ ni ricaa cani runi xhiiñaʼ Jiobá primé lu xquendanabani
13. Xi guiráʼ bisaana apóstol Pablu ora biziidiʼ de ca diidxaʼ nacubi ne galán ca.
13 Dede dxi nahuiiniʼ apóstol Pablu biziidiʼ chaahuiʼ ximodo ñaca tuuxa binni risaca lade ca judíu. Biaʼ 13 iza laabe dxi bireebe de Tarso, guidxi ra gúlebe, para chindézabe Jerusalén ne para gúʼndabe ra nuu Gamaliel, ti maestru de ley ni nabé risaca (Hech. 22:3). Nabé bihuinni nanna Pablu ne pa qué nusaanabe de niziidibe jma la? ñácabe tuuxa binni nabé risaca lu judaísmu (Gál. 1:13, 14). Peru dxi maʼ biziidibe ca diidxaʼ nacubi ne galán ca ne bizulú bicheechebe diidxaʼ la? bisaanabe guiráʼ ni. Ñee guyuu ora guníʼ íquebe xiñee bisaanabe cani la? Coʼ. Ne laapebe guniʼbe ca diidxaʼ riʼ: «Irá ni ma qué iquiiñe ni para naa, purti ma binebiaʼya Cristu Jesús Señor stinneʼ, ne laa si risaca para naa. Bisaana irá xixé ni para zinanda laabe, ne ma casi guixi ni para naa» (Fili. 3:8).
14, 15. Xi ndaayaʼ ricaanu pur runinenu Dios dxiiñaʼ tobi si.
14 Cásica Pablu, ca xpinni Dios ni nuu yanna laaca rusaanacaʼ stale cosa ni riuuláʼdxicaʼ pur gucheechecaʼ ca diidxaʼ nacubi ne galán ca (Mar. 10:29, 30). Ñee riaadxaʼ xiixa ni caquiiñenu pur rúninu zacá la? Guidúʼyanu ca diidxaʼ ni guníʼ Robert, hombre ni bizéʼtenu primé que, purtiʼ laabe runi sentirbe cásica runi sentir stale xpinni Cristu, sicaríʼ guniʼbe: «Qué racaná ladxiduáʼ pur cani bisaanaʼ. Nabé riecheʼ ora gucheeche diidxaʼ. Huayacaneni naa guuyaʼ pabiáʼ nachaʼhuiʼ Jiobá. Ne ora gusaanaʼ de guneʼ stale cosa para ugaandaʼ ni naguixheʼ iqueʼ ndaaniʼ xquídxibe la? riguu ndaayabe naa jma que biaʼ bisaanaʼ. Ne despué rudieeʼ cuenta casi ñaca qué nuniteʼ gastiʼ purtiʼ stale ni rudiibe naa» (Sal. 34:8; Pro. 10:22).
15 Pa maʼ zineluʼ tiempu de cucheecheluʼ diidxaʼ ne cusiidiluʼ binni gaca xpinni Cristu, dxandipeʼ maʼ huayuuyaluʼ pabiáʼ nachaʼhuiʼ Jiobá. Ñee huadiiluʼ cuenta modo racané espíritu santu lii ora gucheecheluʼ diidxaʼ la? Ñee huayuuyaluʼ pabiáʼ nayecheʼ riuu binni ora guxheleʼ Jiobá ladxidóʼcabe para gucaadiágacabe stiidxabe la? (Hech. 16:14.) Ñee huayacané Jiobá lii gudxiiluluʼ xiixa guendanagana ni cucueeza lii de gucheecheluʼ diidxaʼ jma la? Ñee huayuuyaluʼ modo huayacanebe lii ne huadiibe stipa lii lu xiixa guendanagana ni huayápaluʼ para cadi nireeluʼ gana ora guníʼ íqueluʼ maʼ qué zanda guʼnuʼ gastiʼ la? (Fili. 4:13.) Ora ridúʼyanu modo racané Jiobá laanu para gucheechenu diidxaʼ la? rudiʼnu cuenta zeeda gácabe casi ti binni ni nuu gaxha de laanu ni zanda guidxíñanu laa (Isa. 41:10). Ñee cadi dxandíʼ ti ndaayaʼ nga guninenu Dios dxiiñaʼ tobi si lu dxiiñaʼ ni cayúninu para gusíʼdinu binni de Biblia la? (1 Cor. 3:9.)
16. Xi riníʼ íqueluʼ pur guiráʼ ni bisaanaluʼ para gacaneluʼ binni gudii lugar gusiidiʼ Jiobá laacaʼ.
16 Stale tu riníʼ ique gaca tuuxa binni risaca lu Guidxilayú riʼ. Peru laanu nánnanu guiráʼ ni rugaanda binni guni lu Guidxilayú riʼ riaandaʼ cani despué neca nabé risaca ni gúnicabe. Peru ni cayuni Jiobá yanna para guisaca lá qué ziuu dxi guiaandaʼ ni (Pro. 10:7; Heb. 6:10). Nga runi, naquiiñeʼ gusisácanu dxiiñaʼ ni nápanu para gacanenu binni gudii lugar gusiidiʼ Jiobá laacaʼ ca dxi stinu riʼ.
Xi nicábiluʼ
• Xi naquiiñeʼ gúninu para gusiidiʼ Jiobá laanu.
• Ximodo nánnanu ruchaa xquendanabani binni ora gusiidiʼ Jiobá laa.
• Xi ndaayaʼ ricaanu ora gacanenu xcaadxi binni gudii lugar gusiidiʼ Dios laacaʼ.
[Dibuju/foto ni zeeda lu yaza 23]
Ca binni ni rusiidiʼ Jiobá zeeda gácacaʼ casi ti familia ni nuu lu guidubi naca Guidxilayú
[Dibuju/foto ni zeeda lu yaza 24]
Ñee cadi dxandíʼ ti ndaayaʼ nga guninenu Dios dxiiñaʼ tobi si la?