Ximodo cuinu jneza ni gucaʼdiáganu, guidúʼyanu ne quítenu

1, 2. Xi naquiiñeʼ guiníʼ íquenu ante cuinu xi gucaʼdiáganu, guidúʼyanu ne quítenu.

BIXUIʼLÚ maʼ chitoloʼ ti cuananaxhi, peru málasi biiyaluʼ nayuudxuʼ cueʼ ni. Xi gúniluʼ. Zanda gúniluʼ chonna cosa: primé, goloʼ guidubi ni neca nayuudxuʼ cueʼ ni, guiropa, gusáʼbiluʼ ni ne guionna, gáxhaluʼ ra nayuudxuʼ ca ne goloʼ ra galán si. Yanna, xi gúniluʼ.

² Cásica cuananaxhi ni guninu ca, lu guidxilayú riʼ nuu stale tipu saa ni gucaʼdiáganu, stale ni gúʼyanu lu televisión ne stale cosa ni quítenu. Ora guʼyaʼ chaahuinu cani, zudiʼnu cuenta stale de laacani cadi jneza ne casi ñaca nayuudxuʼ cani. Yanna xi gúninu yaʼ. Nuu tu laa ricaa guiráʼ ni cudii guidxilayú riʼ sin guiníʼ íquecaʼ pa jneza o cadi jneza cani, ne ora gúnicabe zacá casi ñaca ñócabe guidubi cuananaxhi que. Xcaadxi qué rinacaʼ gúnicaʼ guiráʼ ni cudii guidxilayú riʼ ti cadi gacanacaʼ. Ne nuu tu laa ruuyaʼ chaahuiʼ pa jneza ni chigucaadiaga, ni chiguuya ne ni chichite. Yanna, xi zaguixhe íquenu gúninu ti cadi guixélenu de Dios ni nadxii laanu yaʼ.

 3. Xi chidúʼyanu yanna.

³ Stale de laanu nánnanu caquiiñeʼ gúninu xiixa para chuʼnu nayecheʼ, peru naquiiñeʼ gánnanu pa jneza ni ti gúninu ni. Para ganda gúninu nga la? caquiiñeʼ gánnanu xi zanda o xi qué zanda gucaʼdiáganu, guidúʼyanu ne quítenu. Peru ante guidúʼyanu xi gúninu la? naquiiñeʼ guiníʼ íquenu pa zusiéchenu ladxidoʼ Jiobá ora maʼ cayuni adorarnu laa pur cani cuinu gúninu.

 4. Xi naquiiñeʼ gúninu pa maʼ bidiʼnu laanu Dios.

⁴ Raca chupa chonna iza, ti Testigu ni guyuunisa lu iza 1946 guníʼ: «Maʼ biaaʼ gucaadiaʼgaʼ guiráʼ libana ni rudiicabe ora chichuunisa binni ne qué runiteʼ nin tobi de laani, rucaadiagaʼ chaahueʼ ni casi ñaca naa chichuaanisaʼ». Bisiénebe xiñee rúnibe ni: «Rusietenalaʼdxiʼ ni naa maʼ bidiéʼ xquendanabaneʼ Jiobá ne pur nga caquiiñeʼ guzuubaʼ stiidxabe». Zacaca nga riníʼ íquenu: para guzúʼbanu stiidxaʼ Dios caquiiñeʼ guietenaláʼdxinu ni gúdxinu laabe dxi bidiʼnu laanu laabe. Xi gúdxinu laabe yaʼ. Zaquiiñenu xquendanabáninu para gúninu ni nabe. Biblia na: «Cada gudii stiidxaluʼ Dios gúniluʼ xiixa la? biʼniʼ ni nagueendaca, purtiʼ guirutiʼ riuulaʼdxiʼ ni runi ca binni huati. Biʼniʼ ni gudii stiidxaluʼ gúniluʼ» (Eclesiastés 5:4). Ni gúdxinu laabe que naquiiñeʼ guihuinni ni pur modo cayúninu dxiiñaʼ bidiibe laanu. Ne laaca naquiiñeʼ gusihuínninu ni lu xcaadxi cosa, casi ora cuinu xi gucaʼdiáganu, guidúʼyanu ne quítenu. Zacá bisiene apóstol Pablu ni ora bicaa ra nuu ca xpinni Cristu de dxiqué: «Pa go to o pa gue tu, o intiisi guni tu, laguni irá ni para usisaca tu Dios» (1 Corintios 10:31).

 5. Xi ruzeeteʼ Levítico 22:18-20 cadi naquiiñeʼ guni ca israelita que ne xi caguixhená Romanos 12:1 laanu gúninu.

⁵ Guiráʼ ni gúninu lu xquendanabáninu zusihuinni cani modo cayuni adorarnu Jiobá. Zacá bisiene Pablu ni ora bicaa ca diidxaʼ riʼ ra nuu ca xpinni Cristu de Roma: «Rinaba udii tu [xcuérputu Dios], casi ti ofrenda ni nabani ne nayá, ne ni chuʼlaʼdxi icaa. Zacá ti zanda usisaca tu laa de idubi ladxidóʼ to» (Romanos 12:1). Xi gucalaʼdxiʼ Pablu niníʼ ora bizeeteʼ de xcuérpunu yaʼ. Caniʼbe de guidubi ladxidoʼno ne stipa stinu (Marcos 12:30). Ximodo rudiʼnu xcuérpunu casi ofrenda yaʼ. Rudiʼnu ni ra gúninu ni na Dios de guidubi xhiálmanu. Diidxaʼ «ofrenda» ca laaca caguixhená ni laanu. Purtiʼ Ley ni gucuaa Moisés que na cadi naquiiñeʼ gudii ca israelita que tuuxa maniʼ ni maʼ huará purtiʼ qué ziuulaʼdxiʼ Dios ni (Levítico 22:18-20). Zacaca nga pa ti xpinni Cristu qué guni ni na Jiobá jneza, laaca qué ziuuláʼdxibe ni gudii binni ca laabe. Xi cadi naquiiñeʼ gúninu para cadi gucaanáʼ Jiobá cani gudiʼnu laa yaʼ.

6, 7. Ximodo zanda guni biidiʼ ti xpinni Cristu xcuerpu, ne xi zazaacabe pa gúnibe ni.

⁶ Pablu gudixhená ca xpinni Cristu de Roma né ca diidxaʼ riʼ: «Cadi udii tu laatu pecadu» (o casi na La Palabra de Dios para Todos «maʼ cadi gudiitu xcuérputu»). Laaca gúdxibe laacaʼ maʼ cadi guibánicaʼ modo na íquecaʼ o xcuérpucaʼ (Romanos 6:12-14; 8:13). Ante guiniʼbe ca diidxaʼ riʼ, maca bizeetebe xcaadxi cosa ni napa xcuérpunu ne ximodo riquiiñeʼ binni cani para guni guendaquéiquiiñeʼ. Ora caniʼbe de ca binni que bizeetebe: «Ruaa cabe napa cabe laa para si enda riguu dí ne diidxa naná». «Nabé nagueenda ruxooñe cabe ra chi uxhii cabe rini.» «Qué ridxibi cabe Dios.» (Romanos 3:13-18.) Xi zazaaca pa iquiiñeʼ ti xpinni Cristu xcuerpu para guni xiixa guendaquéiquiiñeʼ yaʼ. Zunibiidibe guidubi naca xcuérpube. Guzéʼtenu ti ejemplu. Pa ti xpinni Cristu nuyubi ñuuyaʼ xiixa ni cadi jneza, casi ti película ra cayati stale binni o pornografía, zeeda gaca ni casi ñaca nudiibe lube para ñuuyaʼ ni cadi jneza ne ñaca biidiʼ xcuérpube. Maʼ qué ñanda diʼ nudiibe laabe Dios purtiʼ maʼ guca biidibe (Deuteronomio 15:21; 1 Pedro 1:14-16; 2 Pedro 3:11). Ne pa gúʼyabe ca cosa ni cadi jneza riʼ la? naná zaguíxebe ni.

⁷ Ndiʼ rusihuinni zanda gueeda guizaacanu xiixa pur ni cuinu gúninu. Nga runi qué racaláʼdxinu guchéʼnenu Dios pur ni gúninu, sínuque ni racaláʼdxinu nga jma gusisaca ni cuinu gúninu ca laabe. Yanna guidúʼyanu ximodo zanda gánnanu pa jneza ni nuunu gúninu ca o coʼ.

8, 9. 1) Xi chupa cosa naquiiñeʼ guni ti xpinni Cristu ora gacalaʼdxiʼ gucaadiaga, guʼyaʼ ne quite xiixa. 2) Xi guiráʼ cosa runi binni ni cadi naquiiñeʼ guni ti xpinni Cristu, ne xiñee.

⁸ Nuu chupa cosa naquiiñeʼ guni ti xpinni Cristu ora gacalaʼdxiʼ gucaadiaga, guʼyaʼ ne quite xiixa: primé, nuu de laacani cadi lica naquiiñeʼ gúnibe o gúʼyabe; guiropa, nuu de laacani zanda guni ca xpinni Cristu pa qué guchiiñaʼ xquendabiaanicaʼ laacaʼ. Ni chiguidúʼyanu primé nga ni cadi lica naquiiñeʼ guni ti xpinni Cristu.

⁹ Casi bidúʼyanu lu primé capítulo stiʼ libru riʼ, Biblia racané laanu gudiʼnu cuenta nuu stale saa ni riuulaʼdxiʼ binni gucaadiaga, stale ni ruuyacaʼ ne ni riguítecaʼ peru cadi jneza cani. Lu televisión, Internet ne lu ca película ca rihuinni cayati binni ne ridiʼdiʼ pornografía lu cani, ne lu ca canción ca rieeteʼ cosa de Binidxabaʼ. Cumu stale binni maʼ qué rudii cuenta pa malu nga gucaadiaga, guʼyaʼ ne quite xiixa ni na Biblia cadi jneza la? nga runi naquiiñeʼ gapa ca xpinni Cristu laacaʼ para cadi gúnicaʼ cani (Hechos 15:28, 29; 1 Corintios 6:9, 10; Apocalipsis 21:8). Pa gúninu zacá la? casi ora cayábinu Jiobá cayuni respetarnu guiropaʼ mandatu riʼ: «Laucaa ná ni nadxabaʼ» ne laguixeleʼ «de cosa malu». Ora gúninu zacá cusihuínninu runi crenu de guidubi ladxidoʼno ni cayabi Dios laanu (Romanos 12:9; Salmo 34:14; 1 Timoteo 1:5).

10. Ximodo riníʼ ique caadxi binni, ne xiñee ziuucabe ra naxoo pur modo riníʼ íquecabe ca.

¹⁰ Nuu tu laa riníʼ ique gastiʼ naca gúʼyacaʼ xiixa película ra rihuinni guiráʼ cani na Biblia cadi guidúʼyanu. Zándaca guiníʼ íquecabe: «Gadxé nga guuyaʼ ni ne gadxepeʼ nga guneʼ ni». Peru cani riníʼ ique zacá caguítecaʼ laca laacaʼ ne ziuucaʼ ra naxoo. Biblia na: «Ladxidóʼ binni nga ni jma riguite laa que intiica si cosa, ne qué ridxela ni xi guni ni. Tu zanda gunibiáʼ ni yaʼ» (Jeremías 17:9). Pa riuuláʼdxinu guidúʼyanu cani nanalaʼdxiʼ Jiobá, ñee zanda guininu cucáʼnanu ni nadxabaʼ la? Ne pa gatigá guidúʼyanu ca guendaquéiquiiñeʼ ca nin qué zandaa maʼ qué zuchiiñaʼ xconciéncianu laanu ne zucaa ni laanu gucheʼnu o guidúʼyanu cadi malu guiráʼ ca guendaquéiquiiñeʼ ca (Salmo 119:70; 1 Timoteo 4:1, 2).

11. Ximodo racané Gálatas 6:7 laanu guiníʼ íquenu xi zanda gucaʼdiáganu, guidúʼyanu ne quítenu.

¹¹ Ngapeʼ nga ni huazaaca stale xpinni Cristu. Nuu de laacaʼ biiyacaʼ o bicaadiágacaʼ xiixa ni cadi jneza ne qué nindaa bíʼnicaʼ guendaquéiquiiñeʼ. Ca guendananá ni gúpacabe bisiidiʼ ni laacabe «irá ni udxiiba binni, ngue ca cuee» (Gálatas 6:7). Peru laanu cadi naquiiñeʼ gúninu ni bíʼnicabe ca. Pa gúninu stipa pur gucaʼ íquenu gúninu ni jneza si zabeendunu ni galán (biiyaʼ cuadru ra ná: «Xi naquiiñeʼ gucaadiaʼgaʼ, guuyaʼ ne quiteʼ»).

12. Ximodo zanda gúninu ni na Gálatas 6:5 lu xquendanabáninu ora cuinu xi gúninu, ne paraa zanda guidxélanu xiixa ni gacané laanu.

¹² Yanna chiguidúʼyanu xi naquiiñeʼ gúninu pa cadi cá lu Stiidxaʼ Dios malu gucaʼdiáganu, guidúʼyanu ne quítenu xiixa. Pa zacá ni, maʼ de binni riaana guʼyaʼ xi guni (biindaʼ Gálatas 6:5). Peru Biblia zacané laanu cuinu xi gúninu. Ne luni zeeda stale conseju ni zacané laanu gánnanu xi riníʼ ique Jiobá de ni racaláʼdxinu gúninu ca. Nga runi, pa guʼyaʼ chaahuinu cani, zanda gánnanu xi rinabaʼ Dios laanu lu xquendanabáninu ne dede lu cani cuinu gucaʼdiáganu, guidúʼyanu ne quítenu (Efesios 5:17).

13. Xi zacané laanu para ganda gucáʼnanu cani nanalaʼdxiʼ Jiobá.

¹³ Peru cadi guiráʼ diʼ ca xpinni Cristu zuuyaʼ ca cosa ca casi modo ridúʼyanu cani (Filipenses 1:9). Cada tobi nga ribí xi racalaʼdxiʼ gucaadiaga, guʼyaʼ ne quite. Nga runi, qué zanda diʼ cuézanu guiníʼ ique guirácabe cásica riníʼ íquenu. Neca zacá, guiranu naquiiñeʼ guiníʼ ique chaahuinu ni ná ca conseju ni zeeda lu Biblia ne gudiʼnu lugar gucaa cani xquendabiaaninu ne ladxidoʼno guni ni jneza. Pa gúninu zacá la? ziuʼnu listu para gucáʼnanu intiica cosa ni nanalaʼdxiʼ Jiobá (Salmo 119:11, 129; 1 Pedro 2:16).

14. 1) Xi naquiiñeʼ guidúʼyanu ora cuinu xi gucaʼdiáganu, guidúʼyanu ne quítenu. 2) Xi zacané laanu para cadi gusaana de quixhe íquenu gúninu xhiiñaʼ Reinu.

¹⁴ Galán guʼyaʼ chaahuinu xi rucaʼdiáganu, xi ridúʼyanu ne xi riguítenu, purtiʼ pa gúninu nga zudiʼnu cuenta pa cayúninu ni jneza o pa coʼ. Peru laaca naquiiñeʼ guidúʼyanu pabiáʼ tiempu riquiiñenu lu cani. Xiñee yaʼ. Purtiʼ zacá zudiʼnu cuenta pabiáʼ rusisácanu cani. Cadi guiaandaʼ laanu: ni jma risaca para ti xpinni Cristu nga guni xhiiñaʼ Reinu (biindaʼ Mateo 6:33). Xi zacané laanu para ganda quixhe íquenu gúninu cani primé lu xquendanabáninu yaʼ. Chinándanu conseju ni bidii apóstol Pablu: «Laguuya chaahui ximodo sa tu, cadi casi cani qué riene, sínuque casi cani nuu xpiaaniʼ. Laguni ni iree ndu laga zanda» (Efesios 5:15, 16). Pa gúninu zacá la? zanda quíxhenu pabiáʼ tiempu si guidúʼyanu, gucaʼdiáganu o quítenu xiixa, ne zápanu tiempu para gúninu «ni dxandí risaca», ni zacané laanu chuʼnu gaxha de Dios (Filipenses 1:10).

15. Xiñee caquiiñeʼ chuʼnu seguru de cani cuinu gucaʼdiáganu, guidúʼyanu ne quítenu.

¹⁵ Ora cuinu xi gucaʼdiáganu, guidúʼyanu o quítenu la? naquiiñeʼ chuʼnu seguru cadi gúninu intiica cosa ni zanda guniná laanu. Guzéʼtenu ejemplu ni guninu ra bizulú capítulo riʼ sti biaje. Para cadi guidoʼno ra nayuudxuʼ la? caquiiñeʼ gáxhanu ra nayuudxuʼ ca dede né ti ndaa ra galán. Zacaca nga naquiiñeʼ gúninu ora gucaʼdiáganu, guidúʼyanu ne quítenu xiixa. Ca xpinni Cristu qué rúninu guiráʼ ca cosa ni na Biblia cadi jneza, peru laaca naquiiñeʼ gucáʼnanu cani qué gánnanu pa jneza nuucaʼ o cani ruluíʼ napa xiixa ni qué zacané laanu chuʼnu gaxha de Dios (Proverbios 4:25-27). Naquiiñeʼ gúninu cásipeʼ modo na ca conseju ni zeeda lu Biblia ti chuʼnu seguru jneza ni chigúninu.

16. 1) Ximodo rusihuínninu racaláʼdxinu gúninu ca cosa ca casi modo riuulaʼdxiʼ Jiobá. 2) Xi racaláʼdxinu gusihuínninu guiráʼ dxi.

¹⁶ Ora cuinu xi gucaʼdiáganu, guidúʼyanu ne quítenu galán guidúʼyanu ca cosa ca casi ruuyaʼ Dios cani. Para ganda gúninu nga la? caquiiñeʼ guidúʼndanu Biblia, purtiʼ lu ni cá ley stiʼ Jiobá ne cá ximodo ruuyabe ca cosa ca. Zanda guidúʼndanu lista ni bicaa rey Salomón ra bizeeteʼ nanalaʼdxiʼ Jiobá «ti ludxi rusiguii», «naʼ ni ruxhii rini stiʼ binni qué gapa donda», «ti ladxidóʼ ni runi guendaquéiquiiñeʼ» ne «ca ñee ni ruxooñeʼ para guni cosa malu» (Proverbios 6:16-19). Ora maʼ nánnanu xi riníʼ ique Dios, xi naquiiñeʼ gúninu. Hombre ni bicaa salmo riʼ na: «Laatu cani nadxii Jiobá, lagaca nanalaʼdxi ni cadi jneza» (Salmo 97:10). Guiráʼ ni cuinu gucaʼdiáganu, guidúʼyanu ne quítenu naquiiñeʼ gusihuinni cani nanaláʼdxinu guiráʼ ni nanalaʼdxiʼ Jiobá (Gálatas 5:19-21). Ne naquiiñeʼ gúninu ni ora nuunu nezalú stale binni ne ora nuunu stúbinu, purtiʼ racá nga zusihuínninu ximódopeʼ laanu (Salmo 11:4; 16:8). Ñee rusihuínninu racaláʼdxinu gúninu ca cosa ca de guidubi ladxidoʼno casi modo riuulaʼdxiʼ Jiobá la? Pa racaláʼdxinu gusihuínninu ni, qué zusaananu de gúninu ni na ca conseju ni zeeda lu Biblia ora cuinu xi gucaʼdiáganu, guidúʼyanu ne quítenu. Ne ngapeʼ nga ni racaláʼdxinu gusihuínninu guiráʼ dxi (2 Corintios 3:18).

17. Xi naquiiñeʼ guinabadiidxanu laca laanu ora cuinu xi gucaʼdiáganu, guidúʼyanu ne quítenu.

¹⁷ Xiruʼ zanda gúninu para gudiʼnu cuenta pa ziuulaʼdxiʼ Jiobá ni cuinu gucaʼdiáganu, guidúʼyanu ne quítenu. Zanda guinabadiidxanu laca laanu: «Ximodo zacané ni naa ne modo runeʼ adorar Dios yaʼ». Ante guidúʼyanu ti película galán guiníʼ íquenu: «Ñee zuchiiñaʼ ni xquendabiaaneʼ la?». Guidúʼyanu caadxi conseju ni zanda gacané laanu.

18, 19. 1) Ximodo zanda gacané Filipenses 4:8 laanu ora cuinu xi gucaʼdiáganu, guidúʼyanu ne quítenu. 2) Xi xcaadxi conseju zanda gacané laanu (biiyaʼ nota).

¹⁸ Tobi de ca conseju ni zanda gacané laanu nga ni guníʼ Pablu lu Filipenses 4:8: «Racaladxe gabe laatu, ucaa ique tu ni dxandí si, ne ni naquiiñe ulabi nu, ne ni jneza, ne ni nachaʼhuiʼ, ne ni rusieche binni, ne ni guiaba laacaʼ. Laquixhe xquenda biaani tu lu ni jneza ne ni dxandí risaca». Dxandíʼ, dxi bidii Pablu conseju riʼ cadi caníʼdibe de cani rucaʼdiáganu de cani ridúʼyanu ne cani riguítenu, sínuque pabiáʼ naquiiñeʼ guiníʼ íquenu gúninu ca cosa ni riuulaʼdxiʼ Dios (Salmo 19:14). Peru laaca zanda iquiiñenu ca diidxaʼ ca lu cani gucaʼdiáganu, guidúʼyanu ne cani quítenu. Ximodo yaʼ.

¹⁹ Zanda guinabadiidxanu laca laanu: «Ñee nayá riuu xquendabiaaneʼ ora guuyaʼ película, quite videojuego, gucaadiaʼgaʼ xiixa saa o guneʼ xcaadxi cosa la?». Ora guiluxe guidúʼyanu ti película, galán gánnanu xi biaana ndaaniʼ íquenu de ni bidúʼyanu ca. Zudiʼnu cuenta gulinu ti película galán, pa qué nidiʼdiʼ cosa feu luni ne pa zanda gacané ni laanu. Peru qué zanda diʼ guininu jneza ni gulinu pa nisi caníʼ íquenu cosa dxabaʼ (Mateo 12:33; Marcos 7:20-23). Ora guiníʼ íquenu ni cadi jneza, ximodo runiná nga laanu yaʼ. Qué ratadxí ladxidoʼno, ruchiiñaʼ xconciéncianu laanu dede zándaca guixélenu de Dios (Efesios 5:5; 1 Timoteo 1:5, 19). Cumu nánnanu zuniná ca cosa malu ni maʼ bizéʼtenu ca laanu la? galán gúninu stipa pur cadi gúninu cani (Romanos 12:2).a Caquiiñeʼ guinábanu Jiobá casi gunabaʼ hombre ni bicaa salmo riʼ: «Cadi gudiiluʼ lugar guʼyaʼ luáʼ cosa qué iquiiñeʼ» (Salmo 119:37).

20, 21. Ximodo zanda gúninu ni na 1 Corintios 10:23, 24 ora cuinu xi gucaʼdiáganu, guidúʼyanu ne quítenu.

²⁰ Pablu laaca bizeeteʼ sti conseju ni naquiiñeʼ guidúʼyanu ora chigúninu xiixa: «Dxandí libre binni guni intiisi, peru cadi irá ni zacané ca hermanu stinu iniisi lu stiidxa Dios. Naquiiñe uyubi nu acané nu stobi ne cadi uyubi nu para laasi nu» (1 Corintios 10:23, 24). Ximodo zacané conseju riʼ laanu ora cuinu gúninu xiixa yaʼ. Caquiiñeʼ guinabadiidxanu laca laanu: «Ximodo zuuyaʼ xcaadxi binni ni guneʼ».

²¹ Zándaca guiníʼ íquenu «libre» laanu gucaadiáganu, guidúʼyanu ne quítenu xiixa. Peru pa guidúʼyanu cuchiiñaʼ ni cayúninu ca xconciencia xcaadxi xpinni Cristu la? galán guyúbinu gúninu sti cosa. Xiñee yaʼ. Purtiʼ qué racaláʼdxinu pur laanu gusaana de gúnicabe ni na Dios. Pacaa zuchéʼnenu laacabe o casi na Pablu, zuchéʼnenu Cristu. Nga runi, caquiiñeʼ gúninu ni na ca diidxaʼ riʼ: «Cadi guni tu gasti ni uchenda [...] ca xpinni Dios» (1 Corintios 8:12; 10:32). Casi xpinni Cristu rucáʼnanu cani qué zacané ca bíchinu neca para laanu gastiʼ naca gúninu cani. Pa gúninu zacá la? zúninu ni na ca conseju ni bidii Pablu ca (Romanos 14:1; 15:1).

22. Xiñee naquiiñeʼ guni respetarnu ni quixhe ique xcaadxi binni guni.

²² Peru xi naquiiñeʼ gúninu pa pur intiica cosa ni guidúʼyanu guni sti binni maca cuchiiñaʼ xconciéncianu laanu yaʼ. Naquiiñeʼ guiénenu cadi guirácabe zuuyacabe ca cosa ca casi ridúʼyanu cani. Cadi galán diʼ cuézanu guiníʼ íquecabe casi riníʼ íquenu. Zeeda gaca ni casi ca carru ca ora maʼ zecaʼ lu carretera; qué zabézanu guxooñeʼ cani biaʼ zinenu stinu. Pa para laanu cadi galán ni gacalaʼdxiʼ ti xpinni Cristu gucaadiaga, guʼyaʼ o quite ne lu Stiidxaʼ Dios cadi cá pa malu ni, xi naquiiñeʼ gúninu yaʼ. Zuni respetarnu ni quixhe íquebe gúnibe ca purtiʼ nadxiinu laabe. Zacá zudii binni cuenta nácanu binni ni riene (Filipenses 4:5; Eclesiastés 7:16).

23. Xi caquiiñeʼ gúninu para guiduʼyaʼ chaahuinu xi gucaʼdiáganu, guidúʼyanu ne quítenu.

²³ Pur cani bizéʼtenu ca, xi caquiiñeʼ gúninu ti gánnanu xi gucaʼdiáganu, guidúʼyanu ne quítenu yaʼ. Primé, cadi naquiiñeʼ guidúʼyanu, gucaʼdiáganu ne quítenu xiixa ni rihuinni napa cosa ni na Biblia cadi jneza. Ne pa chigúninu xiixa peru cadi cá lu Stiidxaʼ Dios pa jneza o cadi jneza ni la? zuyúbinu xi conseju zeeda lu Biblia ni zanda gacané laanu. Laaca zucáʼnanu guiráʼ ni guchiiñaʼ xconciéncianu, ne zúninu stipa pur cadi gúninu xiixa ni guchiiñaʼ xconciencia binni, ne jmaruʼ si pa zuchiiñaʼ ni xconciencia tobi de ca bíʼchinu. Pa gúninu stipa pur guʼyaʼ chaahuinu xi gucaʼdiáganu, guidúʼyanu ne quítenu la? zusisácanu Dios ne qué zusaana de gannaxhiibe laanu ne binnilídxinu.