«Lauyubi uxooñe tu para icaa tu ni»

«Lauyubi uxooñe tu para icaa tu ni.» (1 COR. 9:24)

1, 2. 1) Xi ejemplu biquiiñeʼ Pablu para guluu gana ca hebreu ni naca xpinni Cristu. 2) Xi conseju cudii Pablu guiráʼ ca xpinni Dios.

PABLU bicaa ti carta ra nuu ca hebreu ni naca xpinni Cristu para uguube gana laacaʼ gúnicaʼ stipa pur ugaandacaʼ guendanabani ni qué zaluxe, ne biquiiñebe ejemplu stiʼ ca binni ni rié lu ti carrera. Ne gúdxibe laacaʼ cadi stúbisicaʼ nuucaʼ. Nápacabe ejemplu stiʼ stale xpinni Dios ni guyuu dxiqué ni biʼniʼ ganar carrera ca. Pa guietenaláʼdxicabe modo biʼniʼ ca binni que ni na Dios ne stipa bíʼnicaʼ para biʼniʼ ganarcaʼ, zacaneni laacabe para gudxiilúcabe ne cadi guireecabe gana.

² Lu tema ni gudídinu que bizéʼtenu de stale xpinni Dios ni biʼniʼ ni nabe. Cada tobi de laacabe bisihuinni ximodo nga rudii fe ni napa binni stipa laa, ne gucaneni laacabe para bixooñecabe dede biʼniʼ ganárcabe premiu stícabe. Ximodo zanda guni ganarnu yaʼ. Ra gucaadiáganu conseju bidii Pablu guiráʼ ca xpinni Cristu: «Udxíʼ lú nu sa nu lu neza ni gudixhe Dios para laanu sin ixhacalaʼdxi nu. Ne para ganda chindá nu la? naquiiñe usaana nu irá ni rucueeza laanu, ne zaqueca usaana nu de uchéʼ nu, ti ma cadi icá nu yaga lu ná ni» (Heb. 12:1).

 3. Xi racalaʼdxiʼ Pablu gusiidiʼ ora biquiiñeʼ ejemplu stiʼ ca griegu ni ruxooñeʼ lu ti carrera.

³ Libru El mundo clásico: la epopeya de Grecia y Roma zanda gacané laanu guiénenu xi riníʼ ca diidxaʼ «usaana nu irá ni rucueeza laanu». Libru ca na: «Ora maʼ cayuni ca griegu ejerciciu ne ora checaʼ lu ti carrera rúnicaʼ ni xieeládicaʼ».a Ca hombre que ribeecaʼ guiráʼ lari nácucaʼ para cadi chuʼ xiixa ni guchiiñaʼ laacaʼ. Zándaca para ca binni ni nabani yanna cadi jneza ngue guxooñecabe xieeládicabe, peru bíʼnicabe ni para guni ganárcabe ti premiu. Yanna, xii nga conseju cudii Pablu laanu ora guníʼ zacá yaʼ. Para ganda guni ganarnu lu carrera ra ziuunu ne guicaanu guendanabani, naquiiñeʼ gusaananu guiráʼ ni guchiiñaʼ laanu. Galán conseju ca para tiempu que ne para ca dxi stinu. Peru xii nga cani zanda gucueeza laanu para cadi guni ganarnu premiu ca yaʼ.

«Usaana nu irá ni rucueeza laanu»

 4. Xii nga ni jma gucuá ique ca binni bibani tiempu stiʼ Noé.

⁴ Xi guiráʼ nga zeeda lu ni na Pablu «ni rucueeza laanu» ni naquiiñeʼ gusaananu yaʼ. Laani nga guiráʼ ni cueechú laanu ne ni gusidxaga laanu lu neza ra cayúninu ni na Jiobá. Guidúʼyanu xi guníʼ Jesús de modo bibani binni tiempu stiʼ Noé, tobi de ca hombre ni bizuubaʼ Stiidxaʼ Dios ni bizeeteʼ Pablu. Jesús guníʼ: «Cásica uca dxi bibani Noé, zacaca zaca dxi ibigueta Hombre Biseenda Dios» (Luc. 17:26). Ñee caníʼ Cristu de modo chiguinitilú ca binni que la? Coʼ. Laabe caniʼbe de modo nabani binni yanna, ni zeeda gaca casi modo bibani binni tiempu stiʼ Noé (biindaʼ Mateo 24:37-39). Stale de ca binni que huaxiéʼ bizaaláʼdxicaʼ Dios, ne laaca qué ninacaʼ ñúnicaʼ ni na ca mandamientu stibe. Xii nga ni jma gucuá íquecabe yaʼ. Gócabe, guécabe ne guichaganácabe. Jesús na jma cá ique ca binni que dxiiñaʼ sticaʼ «ne caʼru guiene ca xi chi gaca».

 5. Xi zacané laanu para guni ganarnu carrera stinu.

⁵ Cásica Noé ne ca binnilidxi, laanu laaca nabé nuu xhiiñanu. Naquiiñeʼ gúninu dxiiñaʼ para guibáninu ne para gudiʼnu ni caquiiñeʼ binnilídxinu. Zanda gaxha cani laanu stale tiempu ne stipa. Ne pa qué gápanu bueltu la? zándaca chuʼnu xizaa para guidxélanu ni caquiiñenu. Ne cumu maʼ xpinni Cristu laanu la? maʼ nápanu xcaadxi dxiiñaʼ: casi gucheechenu diidxaʼ, gúʼndanu ni chitiidiʼ lu ca guendaridagulisaa, chuunu ra Yoo stiʼ Reinu ne guidúʼndanu Biblia laasinu o né binnilídxinu para guizíʼdinu jma de Dios. Noé laaca gupa stale dxiiñaʼ, ne «bíʼnibe» cásipeʼ modo gudxi Dios laabe (Gén. 6:22). Pa racaláʼdxinu guni ganarnu carrera stinu la? naquiiñeʼ gusaananu stale de cani rusidxaga laanu ne cadi guyúbirunu xcaadxi cosa ni gúninu.

6, 7. Xi conseju stiʼ Jesús cadi naquiiñeʼ gusiáʼndanu.

⁶ Yanna, xii nga gucalaʼdxiʼ Pablu niníʼ ora bidii conseju riʼ: «Usaana nu irá ni rucueeza laanu». Cadi cayábibe laanu gusaananu guiráʼ ca dxiiñaʼ naquiiñeʼ gúninu. Jesús cayabi laanu cadi gandagaanu ti ladu si: «Cadi chuʼ tu xizaa ne cadi na tu: “Xi idóʼ no, o xi idéʼ nu, o xi gacu nu yaʼ.” Purti nga nga ni ruyubi ca binni ni qué runibiáʼ Dios, peru ma nanna Bixhoze tu ni nuu ibáʼ xi irá cayaadxa laatu» (Mat. 6:31, 32). Xi cusiidiʼ ca versículo riʼ yaʼ. Pa qué chuʼnu cuidadu la? zanda gueeda gaca dxiiñaʼ rúninu para guidxélanu ni gácunu, ni guidoʼno, casi ti guié ni guirenda ñeenu ne gusaba laanu pa qué gatananu.

⁷ Guiduʼyaʼ chaahuinu ca diidxaʼ guníʼ Jesús riʼ: «Ma nanna Bixhoze tu ni nuu ibáʼ xi irá cayaadxa laatu». Ca diidxaʼ riʼ cayábicani laanu zacané Jiobá laanu ne zudiibe ni caquiiñenu para guibáninu. Peru ora guniʼbe zudii Jiobá «irá [ni] cayaadxa» laanu, zándaca qué zeeda cani modo racaláʼdxinu. Neca zacá, Cristu cayabi laanu cadi chuʼnu xizaa pur guiráʼ «ni ruyubi ca binni ni qué runibiáʼ Dios». Xiñee yaʼ. Laabe ricábibe né sti conseju: «Laguuya gá laatu cadi ma canazá tu canaxudxi tu ne nisi icá ique tu ni ricá ique binni ni qué runibiáʼ Dios. Pacaa zaguidxi ladxidóʼ to, ne nin ganna tu mala zanaaze dxi que laatu» (Luc. 21:34, 35).

 8. Xiñee jma caquiiñeʼ gusaananu guiráʼ ni zándaca gucueeza laanu.

⁸ Mayaca chindanu ra riluxe carrera stinu. Ne cumu maʼ cadi stálepeʼ nga ni cayaadxaʼ la? ¡guizáʼ triste nga qué guni ganarnu carrera stinu purtiʼ guyuu stale cosa ni bicueeza laanu! Pa binni nuu xpiaaniʼ laanu la? zinándanu conseju bidii Pablu riʼ: «Dxandí ricu ca xpinni Cristu, pa guieche né ca biaʼ napa si caʼ» (1 Tim. 6:6). Pa gúninu ni na conseju ca, jma nagueenda zuxóʼnenu ne zuni ganarnu.

«Usaana nu de uchéʼ nu, ti ma cadi icá nu yaga lu ná ni»

9, 10. 1) Xi zanda guiénenu né ca diidxaʼ «usaana nu de uchéʼ nu, ti ma cadi icá nu yaga lu ná ni». 2) Xi zanda guizaaca fe stinu.

⁹ Peru qué nuzeeteʼ si Pablu «usaana nu irá ni rucueeza laanu». Laaca cayábibe laanu «usaana nu de uchéʼ nu, ti ma cadi icá nu yaga lu ná ni». Lu diidxaʼ griegu guníʼcabe ni cá lu textu ca sicaríʼ: «Cueenu pecadu ni ruchenda laanu nagueendaca», ne lu textu ca si nga biquiiñeʼ diidxaʼ ca. Albert Barnes, ti hombre ni nabé ruundaʼ de Biblia, cusiene textu ca sicaríʼ: «Ora ruxooñeʼ tuuxa lu ti carrera, naquiiñeʼ cuee guiráʼ lari ni zándaca guirenda ñee ne guchiiñaʼ laa para guxooñeʼ galán. Ngaca nga ni naquiiñeʼ guni ti xpinni Cristu, naquiiñeʼ gusaana guiráʼ ni zándaca guchiiñaʼ laa». Gunáʼ nga ca cosa ni zándaca gucaa tuuxa guniti fe stiʼ yaʼ.

¹⁰ Cadi casi zeʼ binni nga runiti fe stiʼ. Chaahuidugá nga runiti ti xpinni Cristu fe, ne zándaca que zudii cuenta. Ra bizulú carta riʼ, caguixhená Pablu laanu para cadi guireecueʼnu de Dios, purtiʼ «zándaca ixele [nu] de laa [...] chaahui chaahuiʼ», casi rixeleʼ ti barcu, ne laaca guniʼbe «cadi [...] aca ladxidóʼ [no] nadxabaʼ» pacaa zusaana de «guni cre [nu] Dios ni nabani» (Heb. 2:1; 3:12). Guietenaláʼdxinu ndiʼ: pa tuuxa ni ziguxooñeʼ lu ti carrera gueeda guirenda xhaba ñee la? ziaba. Ne jma nagueenda guizaacabe zacá pa gácube lari ni gúdxicabe laabe cadi gácube. Yanna, xiñee gácube lari ni gúdxicabe laabe cadi gácube yaʼ. Purtiʼ qué rucaadiágabe ni gábicabe laabe, runi crebe qué zácabe gastiʼ ne jma ricá íquebe sti cosa. Yanna guidúʼyanu xi rusiidiʼ conseju stiʼ Pablu laanu.

11. Ximodo zanda guiráʼ fe stinu.

¹¹ Peru ximodo nga rusaana binni de gapa fe yaʼ. Pur guiráʼ cani riguixhe ique guni. Sti hombre ni ruundaʼ de Biblia bizeeteʼ de «pecadu ni ruchenda laanu nagueendaca», laani nga ni «jma rucaa laanu gúninu xiixa, zándaca pur modo nabáninu, pur modo laanu o pur ca binni ni ridxaaganu». Nabé nadipaʼ cani, purtiʼ zanda gusirácani fe stinu (Mat. 13:3-9).

12. Xi conseju naquiiñeʼ chinándanu para cadi guiráʼ fe stinu.

¹² Lu ca iza ni maʼ gudiʼdiʼ ca, mozo ni nuu xpiaaniʼ maʼ huasiene naquiiñeʼ gápanu laanu né cani ridúʼyanu ne ni runadiáganu, purtiʼ runinácani xquendabiaaninu ne zucaacani laanu gúninu ni cadi jneza. Laaca maʼ gúdxibe laanu cadi gannaxhiinu bidxichi, cadi nisi maʼ caníʼ íquenu xi gúninu para chuʼnu nayecheʼ o guicá íquenu gápanu guiráʼ cosa ni nacubi caree yanna, pacaa zabeechúcani laanu de neza stinu. Yanna, ximodo ridúʼyanu ca conseju ca yaʼ. Ñee stálepeʼ nga ni canábacabe laanu la? Ñee riníʼ íquenu para xcaadxi binni ca conseju ca, purtiʼ laanu qué zazaacanu gastiʼ la? Cadi jneza guiníʼ íquenu zacá. Nagana para gudiʼnu cuenta paraa nexheʼ ca trampa stiʼ Binidxabaʼ ne maʼ binitilúcani stale binni purtiʼ riguítecani laacaʼ. Qué chuʼ dxi gusaana de gucaadiáganu ni gábicabe laanu, cadi guiníʼ íquenu qué zazaacanu gastiʼ ne cadi guicá íquenu sti cosa. ¡Zándaca gueeda guiaananu sin premiu stinu: guendanabani ni qué zaluxe! (1 Juan 2:15-17.)

13. Xi zacané laanu para guxóʼñenu lu carrera ra ziuunu sin guutixhiéʼ bi stiʼ guidxilayú riʼ laanu.

¹³ Guiráʼ dxi ridxaaganu binni ni rucaa laanu guiníʼ íquenu casi riníʼ ique guidxilayú stiʼ Binidxabaʼ. Laacabe racaláʼdxicabe gusisácanu ca cosa ni rusisácabe ne gúninu ni rúnicabe (biindaʼ Efesios 2:1, 2). Ñee zuninácani laanu la? Zuninácani laanu pa gudiʼnu lugar. Pablu na zeeda gaca modo riníʼ ique binni casi bi ni ricaanu. Peru nabé malu bi ca, purtiʼ casi ora nápani venenu, ne zanda guutini laanu nezalú Dios. Nga runi, naquiiñeʼ gúninu stipa para cadi guicaanu bi ca. Pacaa la? zuutixhieʼni laanu ne qué zindanu lugar ra zacaanu premiu stinu. Xi zacané laanu para cadi gusaana de guxóʼñenu yaʼ. Chinándanu ejemplu stiʼ Jesús guiráʼ ora, xaíque ni zaniruʼ lu carrera ra ziuunu (Heb. 12:2). Sti ejemplu ni naquiiñeʼ chinándanu nga stiʼ Pablu, laa laaca guníʼ zeʼ lu carrera riʼ, ne guluube gana ca bíʼchibe ne ca bizáʼnabe para chinándacaʼ ejemplu stibe (1 Cor. 11:1; Fili. 3:14).

Ximodo ugaandanu premiu

14. Pabiáʼ bisisaca Pablu carrera ra zeʼ ca xpinni Cristu.

¹⁴ Pabiáʼ bisisaca Pablu carrera ra bixooñeʼ para guicaa guendanabani yaʼ. Lu últimu libana ni bidiibe ca binnigola de Éfeso, gúdxibe laaca: «Nin tobi de ca nga qué rizaaladxeʼ, neca pe guuti cabe naa. Xi si rica ique la? unduuxe dxiiña ni bidii Señor Jesús naa guneʼ» (Hech. 20:24). Racá ridúʼyanu nabé bisaca para laabe guni ganarbe premiu stibe. Ngue runi, dede guniʼbe zudiibe lugar gátibe para ugaandabe ni. Bíʼnibe stale stipa para bicheechebe diidxaʼ, peru guniʼbe qué zasaca guiráʼ ni gúnibe pa qué chindabe ra riluxe carrera stibe. Qué ñuu dxi niníʼ íquebe maʼ biʼniʼ ganarbe premiu que (biindaʼ Filipenses 3:12, 13). Dxi mayaca gátibe nga gunda guniʼbe: «Bine xhiiña Dios dede biaʼ ra gunda tiʼ, qué nixele de ni rune cre. Casi ñaca bixooñe ne irá stipa stinneʼ, ne yanna ma yendaya lu raya» (2 Tim. 4:7).

15. Xi diidxaʼ gudxi Pablu ca xcompañeru para uguube gana laacaʼ.

¹⁵ Ne laaca racalaʼdxiʼ Pablu gunduuxeʼ ca biʼchiʼ ne ca bizaʼnaʼ carrera sticaʼ, cadi guiaanacaʼ galaa neza. Nga nga razón ni gúpabe para gúdxibe ca filipenses gúnicaʼ dxiiñaʼ né stale gana para ganda guilacaʼ. Gúdxibe laacaʼ: «[Cadi gusaana de] güi né tu laacabe diidxa ni rudii enda nabani, casi ñaca cuzaani tu lade cabe. Zacá zieche nia laatu dxi gueeda Cristu, ra ganna cadi pur gana si guzaya bine dxiiña lade tu» (Fili. 2:16). Ne laaca gúdxibe ca xpinni Cristu de Corinto, gúnicaʼ stipa pur guni ganarcaʼ premiu sticaʼ. Guniʼbe: «Lauyubi uxooñe tu para icaa tu ni» (1 Cor. 9:24).

16. Xiñee cadi naquiiñeʼ guiaandaʼ laanu premiu ni zacaanu ora gundúʼxenu carrera stinu.

¹⁶ Lu ti carrera ra ruxooñeʼ binni zitu, casi ti maratón, ca binni ca qué ruuyacaʼ paraa chiguiluxe carrera sticaʼ. Peru qué riníʼ íquecabe sti cosa ora maʼ zécabe luni, jmaruʼ si ora nánnacabe mayaca chindácabe. Zacaca nga laanu. Naquiiñeʼ gánnanu dxandíʼ nuu ti premiu para laanu. Xiñee yaʼ. Purtiʼ zaguuni gana laanu para gúninu stipa ti guni ganarnu.

17. Ximodo huayacané fe stiʼ ca xpinni Dios laacaʼ para quixhe íquecaʼ guicaacaʼ premiu ni cabézacaʼ.

¹⁷ Casi guníʼ Pablu, raríʼ nga naquiiñeʼ gusihuínninu fe stinu, purtiʼ «pa dxandí runi cre nu Dios la? qué zagúʼ xa ique nu de ni cabeza nu udii be laanu, ne neca caʼru ihuinni irá ni, peru casi ñaca ma caduʼya nu ni yanna, purti runi cre nu laabe» (Heb. 11:1). Guiníʼ íquenu de Abrahán ne Sara. Xiñee bisaanacabe stale de ca cosa galán ni gúpacabe ne «uníʼ cabe cadi [Canaán] nga xquidxi cabe sínuque zidiʼdi si cabe ndaani» ni yaʼ. Purtiʼ «casi ñaca [cayuuyacabe ni chigudii Dios laacabe] de zitu ne bieche né cabe ni». Guietenaláʼdxinu de Moisés. Xiñee qué ninabe nucheenebe Dios ne «ñapa be irá ni nuu ndaani guidxi Egipto» yaʼ. Purtiʼ gúpabe fe, ne bidiini stipa laabe para bíʼnibe zaqué. Biblia na «bicaa ique be ni chi udii Dios laabe» (Heb. 11:8-13, 24-26). Nga runi, cada biaje guzeeteʼ Pablu de ca binni ni bizuubaʼ diidxaʼ guníʼ biʼniʼ crécabe Dios, ne jneza nga ni guniʼbe. Cumu biʼniʼ crécabe Dios la? ngue runi qué nizaaláʼdxicabe ca guendanagana ni cadíʼdicabe, sínuque jma gucuá íquecabe ni cayuni Dios pur laacabe ne ni chiguni despué.

18. Xi zacané laanu para cadi guiábanu lu «pecadu ni ruchenda laanu nagueendaca».

¹⁸ Pa racaláʼdxinu iguidxi fe stinu ne cadi guiábanu lu «pecadu ni ruchenda laanu nagueendaca» la? naquiiñeʼ guidúʼndanu ejemplu stiʼ ca hombre ne ca gunaa ni zeeda lu capítulo 11 stiʼ Hebreos ne gúninu stipa pur chinándanu ejemplu stícabe (Heb. 12:1, NM). Laaca naquiiñeʼ guidagulisaanu né ca bíʼchinu ne bizáʼnanu ne «ucáʼ ique nu acané saa nu para ganaxhii nu jma, ne guni nu ni nachaʼhuiʼ» (Heb. 10:24).

19. Xiñee naquiiñeʼ gudxíʼlunu lu carrera ra zeʼ ca xpinni Cristu.

¹⁹ Mayaca gundúʼxenu carrera stinu. ¡Casi ñaca maʼ cadúʼyanu ra chiguiluxe ni! Cumu nápanu fe Jiobá ne racanebe laanu la? zanda chinándanu conseju ni bidii Pablu: «Usaana nu irá ni rucueeza laanu, ne zaqueca usaana nu de uchéʼ nu, ti ma cadi icá nu yaga lu ná ni», o pecadu ni ruchenda laanu nagueendaca. Nga zacané laanu guxóʼñenu para ugaandanu premiu ni chigudii Bixhózenu Jiobá laanu.

[Cani cá ñee yaza]

Xi maʼ bizíʼdinu

• Ximodo zanda guiénenu conseju ra na: «Usaana nu irá ni rucueeza laanu».

• Xi rucaa ti xpinni Cristu guniti fe stiʼ.

• Xiñee jma naquiiñeʼ guicá íquenu guni ganarnu premiu ni chigudii Dios laanu.

[Dibuju/foto ni zeeda lu yaza 23]

Xii nga «pecadu ni ruchenda laanu nagueendaca» ne ximodo nga rucheendani laanu