Ca diidxaʼ ruzuluneni

1, 2. Ximodo biʼyaʼ ti binnigola ni riganna ca binni ridagulisaa ca binni ni rieeteʼ lu Biblia, ne xiñee galán ñaca xhamígunu laacabe.

«CASI ñaca maʼ xadxí xhamígube ca binni ni rieeteʼ lu Biblia ora maʼ caniʼbe de laacaʼ.» Zacá guníʼ ti gunaa xpinni Cristu ora biluxe binadiaga ti libana ni bidii ti binnigola ni riganna ca binni ridagulisaa ni maʼ huaniisi. Ne biáʼsipeʼ nga ni guniʼbe, purtiʼ xpinni Cristu riʼ maʼ napa iza de cayuundaʼ Biblia ne cusiidiʼ de laani. Ngue runi, ora guniʼbe de ca hombre ne ca gunaa ni bibani dxiqué ni biʼniʼ ni na Dios, casi ñaca caniʼbe de ca xhamígube ni maʼ xadxí runibiaʼbe.

² Ñee cadi dxandíʼ ñuuláʼdxinu ñaca xhamígunu ca binni ni rieeteʼ lu Stiidxaʼ Dios la? Ñee zacá ruuyaluʼ laacabe la? Bixuiʼlú pabiáʼ galán ñuni sentirluʼ pa nidxaagaluʼ laacabe ne ñuiʼneluʼ laacabe diidxaʼ, ne nibeeluʼ tiempu para ñunibiaʼluʼ ca hombre ne ca gunaa casi Noé, Abrahán, Rut, Elías ne Ester. Guníʼ ique ximodo ñacanécabe lii. ¡Nanna panda conseju nudiicabe lii ne pabiáʼ niguucabe gana lii yaʼ! (Biindaʼ Proverbios 13:20.)

 3. 1) Ximodo zanda gacané ejemplu stiʼ ca hombre ne ca gunaa ni bibani dxiqué laanu. 2) Xi guendarinabadiidxaʼ zacábinu.

³ Dxi gusibani Dios cani nachaʼhuiʼ zanda guidxaaganu laacabe ne gaca xhamígunu laacabe (Hech. 24:15). Peru dede yánnaca zanda guizíʼdinu de ejemplu stiʼ ca hombre ne ca gunaa ni gupa fe ni ruzeeteʼ Biblia. Ximodo yaʼ. Sicaríʼ na apóstol Pablu naquiiñeʼ gúninu: «Laguni casi cani ma napa ni bidii stiidxa Dios udii binni. Cacaa cabe ni purti runi cre cabe ne cadi caree cabe gana» (Heb. 6:12). Ante guzulú guidúʼndanu relatu stiʼ ca binni ni rieeteʼ lu Biblia, naquiiñeʼ guicábinu ca guendarinabadiidxaʼ riʼ: Xii nga fe, ne xiñee caquiiñeʼ gápanu ni. Ne ximodo zanda chinándanu ejemplu stiʼ ca xpinni Dios ni bibani dxiqué.

 4. Xii nga fe para stale binni, ne xiñee cadi jneza modo riníʼ íquecaʼ.

⁴ Lu libru riʼ zadúʼyanu pabiáʼ risaca nga gapa binni fe cásica gupa ca xpinni Dios ni bibani dxiqué. Nabé triste guininu ni, peru ca dxi nabáninu riʼ stale binni qué ganna xii nga fe. Laacabe nácabe fe nga guni cré binni xiixa sin ganna pa dxandíʼ ni. Peru ñee zacá ni la? Coʼ, purtiʼ ora dxandíʼ napa binni fe la? qué runi cré intiica si cosa, ne cadi ti cosa ni guni sentir si binni ni. Purtiʼ guiráʼ ora ruchaa ni runi sentir binni. Ne cadi caquiiñeʼ si guni crenu Dios, purtiʼ ca demonio ca laaca «runi cre ca [...] ne raca diti caʼ» (Sant. 2:19).

5, 6. 1) Xi chupa cosa zanda gápanu fe neca qué ridúʼyanu cani. 2) Xi razón nápanu para gusihuínninu dxandíʼ fe stinu. Bidii ti ejemplu.

⁵ Casi maʼ bidúʼyanu, cadi guni cré si binni xiixa nga zanda guiníʼ maʼ napa fe. Guidúʼyanu ximodo rusiene Biblia guenda riʼ lu Hebreos 11:1, na ni sicaríʼ: «Pa dxandí runi cre nu Dios [o pa nápanu «fe»,TNM] qué zagúʼ xa ique nu de ni cabeza nu udii be laanu, ne neca caʼru ihuinni irá ni, peru casi ñaca ma caduʼya nu ni yanna, purti runi cre nu laabe». Lu ca diidxaʼ ni bicaa Pablu ca rihuinni zanda gápanu fe lu chupa cosa ni qué ridúʼyanu. Primé la? nápanu fe Jiobá, Xiiñiʼ ne Reinu stiʼ ni maʼ cayuni mandar guibáʼ. Ne guiropa la? nápanu fe «de ni cabeza nu udii be laanu [...] neca caʼru ihuinni irá ni». Casi xi laa yaʼ. Casi guidxilayú cubi ni mayaca guedané Reinu stiʼ Dios. Ñee riníʼ nga qué gápanu razón para guni crenu qué zaca cani bizéʼtenu ca la?

⁶ Cadi zacá diʼ ni. Pablu bisiene rapa binni fe ora dxandíʼ nuu razón para gapa ni. Ora guniʼbe fe nga «casi ñaca ma caduʼya nu ni yanna» laaca ñanda nibiʼxhiʼ ca diidxaʼ ca casi «ti documentu ni rusihuinni maʼ guzinu xiixa». Bixuiʼlú cusigaʼdeʼ tuuxa lii ti yoo, ora nugaasabe guiʼchiʼ yoo ca naluʼ ne ñábibe lii: «Maʼ stiuʼ yoo riʼ». Cadi cayábidibe lii lu guiʼchiʼ ca nga chindézaluʼ. Peru guiʼchiʼ ca cusihuinni maʼ stiluʼ yoo ca, nga runi casi ñaca guiʼchiʼ ca nga yoo ca. Zacaca nga guiráʼ ni maʼ bidii stiidxaʼ Dios laanu lu Biblia, nanna dxíchinu zaca cani pur fe ni nápanu.

 7. Ximodo rihuinni dxandíʼ nápanu fe.

⁷ Nga runi, zuni crenu Jiobá de guidubi ladxidoʼno pa dxandíʼ nápanu fe. Ne racaneni laanu guidúʼyanu Jiobá casi Bixhózenu ni nadxii laanu ne guni crenu dxandíʼ zuni guiráʼ ni maʼ bidii stiidxaʼ. Peru cadi nga si nga laani, purtiʼ cásica rirá stipa stiʼ binni ora qué gó la? zaqueca zará fe stinu pa qué gusihuínninu ni (Sant. 2:26).

 8. Xiñee nabé risaca gápanu fe.

⁸ Xiñee nabé risaca gápanu fe. Apóstol Pablu cudii laanu ti razón nabé risaca (biindaʼ Hebreos 11:6). Pa qué gápanu fe qué zanda guidxíñanu ra nuu Jiobá ne qué ziuuláʼdxibe cani gúninu. Nga runi, nabé risaca nga gápanu fe para ugaandanu ni racalaʼdxiʼ guiráʼ binni: guidxíñacaʼ Jiobá, Bixhózenu ni nuu guibáʼ ne gusisácacaʼ laabe.

 9. Ximodo rusihuinni Jiobá nanna caquiiñeʼ gápanu fe.

⁹ Jiobá nanna pabiáʼ caquiiñeʼ gápanu fe, nga runi cudiibe laanu caadxi ejemplu para gusiidibe laanu ximodo zanda gápanu ni ne ximodo zanda gusihuínninu ni. Nápanu ejemplu stiʼ ca xpinni Cristu ni zaniruʼ lade ca binni ridagulisaa, nga runi Biblia na: «Laguni cre Dios casi bini cre cabe» (Heb. 13:7). Ne laaca nápanu ejemplu stiʼ «ca binni ni bini cre Dios chiqué», casi bizeeteʼ Pablu (Heb. 12:1). Laabe bizeetebe chupa chonna de ca xpinni Dios lu capítulo 11 stiʼ Hebreos, peru nuuruʼ stale xpinni Dios ni gupa fe. Lu Biblia zadxélanu historia stiʼ stale hombre ne gunaa, cásica ni nahuiiniʼ zaqueca ni huaniisi, ne gadxé gadxé ni bizaacacaʼ. Nga runi, galán guidúʼndanu historia stícabe purtiʼ zusiidicani laanu gápanu fe cásica gúpacabe, ne jmaruʼ si naquiiñeʼ gúninu ni yanna purtiʼ ca dxi riʼ jma rihuinni qué gapa binni fe.

10. Ximodo zanda gacané relatu stiʼ ca hombre ne ca gunaa ni gupa fe Dios laanu ora maʼ cadúʼndanu stúbinu.

¹⁰ Qué liica zanda gúninu casi runi tuuxa pa qué guiduʼyaʼ chaahuinu cani runi. Nga runi, para guca libru riʼ, biindaʼ chaahuicabe de ca hombre ne ca gunaa ni gupa fe Dios ni cayeeteʼ luni ti ganda guxuíʼluluʼ laacabe casi ñaca cayuuyaluʼ laacabe. Galán pa guyúbiluʼ xcaadxi libru ne revista ni maʼ gulee xquidxi Dios ni caníʼ de laacabe ora maʼ cayuundaluʼ stúbiluʼ. Ne laaca galán guxuíʼluluʼ paraa ne ximodo bizaaca cada tobi de ca relatu ca. Guníʼ ique nuuluʼ ra cayácani, cayuuyaluʼ guiráʼ ni nuu raqué ne cayuuxiiluʼ guiráʼ ni candáʼ naxhi lugar que. Pa gúniluʼ stipa pur guni sentirluʼ ni cayuni sentir ca binni ni cayeeteʼ lu relatu ca ne guiníʼ íqueluʼ casi ñaca lii nga cazaacaluʼ ni la? zuxuíʼluluʼ casi ñaca dxandíʼ cayuuyaluʼ ca binni ca ne zuni sentirluʼ casi ora maʼ xadxí xhamíguluʼ laacabe.

11, 12. 1) Xi zanda gúniluʼ ti gunibiáʼ chaahuiluʼ Abrahán ne Sara. 2) Ximodo zanda gacané relatu stiʼ Ana, Elías ne Samuel laanu yaʼ.

¹¹ Ora guiziidiluʼ jma de ca xpinni Dios riʼ, zucaacani lii chinándaluʼ ejemplu stícabe. Guidúʼyanu ximodo zanda gacanécani lii. Guníʼ ique cayuni invitárcabe lii chindézaluʼ sti lugar ra jma caquiiñeʼ tu gucheeche diidxaʼ o cayábicabe lii gucheecheluʼ diidxaʼ sti modo ni rábiluʼ zaca nagana para lii o dede zatuíluluʼ guʼnuʼ ni. Ora guiníʼ íqueluʼ dxiiñaʼ nacubi gucuaaluʼ ca ne guni orarluʼ Jiobá, laaca galán guiníʼ íqueluʼ ejemplu stiʼ Abrahán. Laabe ne Sara bisiguéndacabe gusaanacabe guiráʼ ni gúpacabe ndaaniʼ guidxi Ur ne pur ngue nabé guluu Dios ndaayaʼ laacabe. Pa chinándaluʼ ejemplu stícabe zudiiluʼ cuenta jma zunibiaʼluʼ laacabe.

¹² Guzéʼtenu sti ejemplu. Bixuiʼlú bininá ti binni ni nabé ridxaagaluʼ lii, ne pur nga nuuluʼ triste dede maʼ qué naluʼ cheluʼ guendaridagulisaa. Galán guiníʼ íqueluʼ ejemplu stiʼ Ana, purtiʼ qué nudii lugar nucueeza guiráʼ cosa feu ni biʼniʼ Peniná laa de ñuni adorar Jiobá. Relatu stibe zacané lii gánnaluʼ xii nga ni jma jneza gúniluʼ ne zuuyaluʼ laabe casi xhamígaluʼ ni nadxiiluʼ. Ne pa guiníʼ íqueluʼ qué risaca guiráʼ ni rúniluʼ ne riguu ni triste lii la? zanda gacané ejemplu stiʼ Elías lii ora gúʼyaluʼ pabiáʼ nagana ra gudiʼdiʼ, peru gupa Jiobá laabe ne gudixhedxí ladxidoʼbe. Yanna, xi zanda gacané ca hombrehuiiniʼ ne ca dxaapahuiiniʼ pa ca xcompañérucaʼ cucaa laacaʼ gúnicaʼ cosa dxabaʼ yaʼ. Zanda gacané ejemplu stiʼ Samuel laacabe. Ora gúʼndacabe relatu stibe zuuyacabe qué ñúnibe ca cosa dxabaʼ ni biʼniʼ ca xiiñiʼ Elí ndaaniʼ tabernáculo que.

13. Pa chinándaluʼ ejemplu stiʼ ca binni ni rieeteʼ lu Biblia, ñee maʼ qué zasaca fe stiluʼ nezalú Dios la? Bisiene ni guicábiluʼ.

¹³ Ñee tiisi chinándanu ejemplu stiʼ cani gupa fe dxiqué, jma huaxiéʼ zasaca fe stinu nezalú Jiobá la? Coʼ, purtiʼ Stiidxaʼ Dios cayabi laanu chinándanu ejemplu stícabe (1 Cor. 4:16; 11:1; 2 Tes. 3:7, 9). Lu libru riʼ laaca zadúʼyanu guyuu caadxi xpinni Dios ni yenanda ejemplu stiʼ ca binni ni bibani ante de laacaʼ. Casi lu capítulo 17 stiʼ libru riʼ zadúʼyanu biquiiñeʼ María chupa chonna diidxaʼ ni guníʼ Ana ra guniʼné Dios dxiqué, ne nga rusihuinni yenándabe ejemplu stiʼ Ana. Ñee pur nga maʼ qué nisaca fe stiʼ María la? Coʼ, sínuque gucané ejemplu stiʼ Ana laabe gaca fe stibe jma naguidxi ne zacá guyuulaʼdxiʼ Jiobá cani bíʼnibe.

14, 15. Xii nga cani zeeda lu libru riʼ, ne xi zanda gúninu para gacaneni laanu.

¹⁴ Libru riʼ gúcani para gacaneni laanu iguidxi fe stinu. Ca tema ni zeeda luni bireecani lu ndaa ra na «Ejemplu stiʼ cani gupa fe» ni biree lu ca revista Torre stiʼ ni rapa 2008 dede 2013. Laaca neni xcaadxi cosa ni jma cusiene cada relatu. Ca guendarinabadiidxaʼ ni zeeda lúcani zacanécani laanu guʼyaʼ chaahuinu ni zeeda lu cada capítulo ne zucaacani laanu gúninu cásica bíʼnicabe. Lu stale yaza stiʼ libru riʼ zeeda caadxi dibuju de color ni gúcapeʼ para laani, ne guca chaahuiʼ xcaadxi dibuju ni maca huaree. Laaca zeeda fecha ne mapa luni. Zanda iquiiñenu libru Chinándanu ejemplu stiʼ cani gupa fe ora guidúʼndanu stúbinu, o lu ca guendaridagulisaa. Ne laaca zanda guidúʼndanenu ni binnilídxinu. Xiñee que gúʼndatu ca historia ca nadipaʼ huiiniʼ yaʼ. ¡Né ngasi zabeendutu stale ni galán!

¹⁵ Nanna dxíchinu zacané libru riʼ laanu gápanu fe cásica gupa ca xpinni Dios de dxiqué. Ne ra guidúʼndanu ni zacaneni laanu iguidxi fe stinu jma ne ziuʼnu jma gaxha de Jiobá, Bixhózenu ni nuu guibáʼ.