4. Xi zadúʼyanu lu tema riʼ.

⁴ Yanna, ximodo naquiiñeʼ gapa ca pastor ni nuu ra ridagulisaanu ca dendxuʼ huiiniʼ ca yaʼ. Ca xpinni Cristu ni nuu ndaaniʼ ca neza binni ridagulisaa cayábicabe laanu guzúʼbanu «stiidxa cani nuu de xaíque» ládenu. Peru laaca cayábicabe ca binnigola cadi uquichinacaʼ ne cadi guni mandarcaʼ ca xpinni Cristu, purtiʼ dendxuʼ stiʼ Dios laacabe (Heb. 13:17; biindaʼ 1 Pedro 5:2, 3). Ximodo zanda gapa ca binnigola ni nuu ra ridagulisaanu ca xpinni Cristu sin uquiichinácabe laacaʼ yaʼ. Ximodo zanda gudiicabe ni caquiiñeʼ ca dendxuʼ huiiniʼ sin guninácabe laacaʼ yaʼ.

 9. Ximodo guluu jneza Jesús ca discípulo stiʼ.

⁹ Apóstol Santiago ne Juan guníʼ íquecaʼ ti pastor nga tuuxa ni guni mandar stobi. Laacaʼ gunábacaʼ gudii Jesús laacaʼ ti puestu risaca lu Reinu stiʼ Dios. Peru gucané Jesús laacabe guchaacabe modo riníʼ íquecabe ne gudxi laacabe: «Nanna tu modo sti cani runi mandar ndaani guidxilayú, runi stica irá binni ni runi mandar caʼ. Ne zaqueca ca hombre ni risaca, riulaʼdxi ca guni binni ni na caʼ. Peru laatu cadi guni tu zacá lade tu, sínuque tu gacalaʼdxi isaca jma la? napa xidé gaca casi jmozo ca xcaadxi» (Mat. 20:25, 26). Ca apóstol que cadi naquiiñeʼ guiníʼ íquecaʼ guni mandarcaʼ xcaadxi xpinni Cristu.

10. 1) Xi racalaʼdxiʼ Jesús guni ca binnigola. 2) Xi ejemplu bisaana Pablu.

¹⁰ Ni racalaʼdxiʼ Jesús nga gannaxhii ca binnigola ni nuu ra ridagulisaanu ca xpínnibe cásica bíʼnibe. Naquiiñeʼ chúʼcabe listu para gacanécabe laacaʼ ne cadi gacaláʼdxicabe gácacabe xpixuaanacaʼ. Pablu bisihuinni qué nudxiibaʼ laca laa, ne rihuinni ni lu ca diidxaʼ ni bicaabe ra nuu ca xpinni Cristu ni nuu Éfeso. Laabe guniʼbe: «Laatu nanna tu ximodo huazaya lade tu dede primé dxi bedandaya Asia. Qué ñuu dxi nudxiiba naa ra cayune xhiiña Señor». Apóstol riʼ gucalaʼdxiʼ ñacané ca binnigola xcaadxi xpinni Cristu de guidubi ladxidoʼcaʼ ne cadi nudxiibacaʼ laca laacaʼ. Ne guníʼrube: «Ma bilué laatu de irá modo naquiiñe guni nu dxiiña para acané nu cani caquiiñe ni» (Hech. 20:18, 19, 35). Ne lu ti carta ni bicaabe ra nuu ca xpinni Cristu de Corinto, gúdxibe laacaʼ cadi laadibe nga riguíxhebe xi gúnicaʼ, sínuque nácabe ti hombre ni runi xhiiñaʼ Dios cásica laacaʼ ne gucanebe laacaʼ chuʼcaʼ nayecheʼ ora gúnicaʼ xhiiñaʼ Dios (2 Cor. 1:24). Pablu bisaana ti ejemplu galán para ca binnigola de yanna, purtiʼ qué nudxiibaʼ laca laa ne nabé biʼniʼ dxiiñaʼ.

13, 14. Xi guiráʼ naquiiñeʼ guni ca binnigola para gácacaʼ ejemplu stiʼ ca xpinni Cristu.

¹³ Pedru gudxi ca binnigola que ca diidxaʼ riʼ: «Cadi guni mandar tu laacabe casi ñaca laatu nga xpixuaana cabe, sínuque lasá jneza ti guʼya cabe ximodo ibani cabe» (1 Ped. 5:3). Ximodo zanda chinanda ti binnigola conseju ca yaʼ. Guidúʼyanu xi chupa cosa naquiiñeʼ guni ti hombre ni «cá ique gaca xaíque sti ca xpinni Cristu». Naquiiñeʼ «cuʼ xpiaaniʼ» ne ganna «guni mandar ndaani lidxi». Para gaca ti xpinni Cristu binnigola naquiiñeʼ «cuʼ xpiaaniʼ», o guiene chaahuiʼ ca conseju ni zeeda de Dios ne gúnini lu xquendanabani. Naquiiñeʼ guiníʼ ique chaahuiʼ ante guni xiixa cosa ne cadi guidxiichi nagueenda ora chuʼ xiixa guendanagana. Ne pa nápabe familia, naquiiñeʼ gácabe ejemplu ndaaniʼ lídxibe, «purti pa qué ganna be guni mandar be ndaani lidxi be la? ximodo zanda gapa be ca xpinni Dios yaʼ» (1 Tim. 3:1, 2, 4, 5). Ora guʼyaʼ ca xpinni Cristu runi ca binnigola ca guiráʼ ni maʼ bizéʼtenu ca la? nga zucaa laacaʼ guidxíñacaʼ laacabe.

¹⁴ Ora ruuyaʼ ca xpinni Cristu rucheeche ca binnigola ca diidxaʼ reeda gácacabe ti ejemplu para laacaʼ. Nabé sicarú ejemplu bisaana Jesús para ca binnigola, purtiʼ para laabe nabé risaca nga gucheechebe diidxaʼ dxi guyuube lu Guidxilayú. Ne laaca bisiidibe ca discípulo stibe ximodo naquiiñeʼ gúnicaʼ dxiiñaʼ riʼ (Mar. 1:38; Luc. 8:1). Ca dxi stinu riʼ, nabé nga riuulaʼdxiʼ ca xpinni Cristu gucheechenecaʼ ca binnigola diidxaʼ, ne gúʼyacaʼ rúnicabe ni né stale gana ne riuuláʼdxicaʼ guiziidicaʼ modo rúnicabe ni. Ora ruuyaʼ ca xpinni Cristu stipa runi ca binnigola ca para cueecaʼ tiempu chigucheechecaʼ diidxaʼ neca stale dxiiñaʼ nápacaʼ, guiráʼ ca binni ridagulisaa laaca riuuláʼdxicaʼ gúnicaʼ modo rúnicabe ca. Laaca nabé riuu ca xpinni Cristu gana ora gúʼyacaʼ ruundaʼ ca binnigola ca dede ante cani chitiidiʼ lu ca guendaridagulisaa ne ricábicabe lúcani, ne laaca riuucaʼ gana ora gúʼyacaʼ rusiácabe ra Yoo stiʼ Reinu ne gacanécabe ora gaca chaahuiʼ ni (Efes. 5:15, 16; biindaʼ Hebreos 13:7).