Rusiecheʼ cani rusietenalaʼdxiʼ Jiobá ladxidoʼno

 1. 1) Ximodo runi sentir binni ora gudiicabe laa xiixa conseju, ne xiñee. 2) Xi runi ti binni ni ruchá bi yanni ora gudiicabe ti conseju laa.

ORA gábicabe binni xi naquiiñeʼ guni, gadxé gadxé modo rusihuínnicaʼ zúnicaʼ ni gábicabe laacaʼ. Zándaca gúnicabe ni na ti binni ni naca xaíque stícabe sin quicheruaacabe, peru zaca nagana para laacabe gúnicabe ni na tuuxa ni napa ti puestu biaʼca nápacabe o ti binni ni runi xhiiñacabe. Ora guicaa tuuxa binni xiixa conseju riuu triste o rituilú, peru nuu tu laa jmaruʼ si riuu gana ne runi stipa pur guni ni jneza. Xiñee nuu binni riecheʼ ne nuu binni riuu triste yaʼ. Purtiʼ nuu binni ruchá bi yanni. Ne rihuinni zacá ni, purtiʼ ti binni ruchá bi yanni la? riníʼ ique cadi para laa conseju ni gudiicabe laa ne qué runi ni nani ne gastiʼ qué ribeendú (Prov. 16:18).

 2. Xiñee rudii cani dxandíʼ xpinni Cristu xquíxepeʼ ora rudiicabe laacaʼ ti conseju ni zeeda lu Stiidxaʼ Dios.

² Peru cani dxandíʼ naca xpinni Cristu rudiicaʼ xquíxepeʼ ora gudiicabe laacaʼ ti conseju ne jmaruʼ si, pa iquiiñecabe Stiidxaʼ Dios para gúnicabe ni. Cani rusietenalaʼdxiʼ Jiobá racanécani laanu gácanu binni nuu xpiaaniʼ, purtiʼ racané ni laanu gánnanu xii nga ca trampa stiʼ Binidxabaʼ para cadi guiábanu lúcani, casi guiníʼ íquenu gápanu jma bidxichi, chúʼnenu ni cadi xheelanu, xhúdxinu ne cúbanu guixi (Prov. 20:1; 2 Cor. 7:1; 1 Tes. 4:3-5; 1 Tim. 6:6-11). Ne nayecheʼ ziuu ladxidoʼno ora guzúʼbanu stiidxaʼ Dios (Is. 65:14).

 3. Xiñee galán gúninu casi biʼniʼ salmista que.

³ Para cadi guixélenu de Bixhózenu ni nuu guibáʼ la? naquiiñeʼ chinándanu ca conseju stibe. Naquiiñeʼ gácanu casi salmista que, purtiʼ laa guníʼ: «Maʼ gucuaaʼ cani rusietenaláʼdxiluʼ naa ne qué ziuu dxi gundaa cani, purtiʼ laacani nga ni rusiecheʼ ladxiduáʼ» (Sal. 119:111). Ñee riéchenu gúninu ni na ca Ley stiʼ Jiobá, cásica salmista que la? o nuu tiru raca nagana para laanu gúninu cani. Ne pa chuʼ biaje gaca nagana para laanu gúninu ni na xiixa conseju la? cadi chuʼnu triste. Naquiiñeʼ gánnanu ribeendunu ni galán ora ruzúʼbanu diidxaʼ. Guidúʼyanu chonna modo zanda gúninu cani.

 4. Xi ti cosa nabé bisihuinni David dxi bibani.

⁴ Dxi bibani rey David, guyuu tiempu gudiʼdiʼ ra galán ne laaca guyuu tiempu gudiʼdiʼ ra nagana, peru qué ñuu dxi nusaana de ñuni cré zacané Jiobá laa. Laabe guniʼbe: «Lii Jiobá, lii nga rinieniáʼ. Dios stinneʼ, lii nga runeʼ cré zanda gacaneluʼ naa» (Sal. 25:1, 2). Xi gucané David para guni cré zacané Jiobá laa yaʼ.

5, 6. Xi rusihuinni ca oración ni biʼniʼ David.

⁵ Stale binni ora si nápacaʼ guendanagana nga runi orarcaʼ Dios. Guníʼ ique nápaluʼ ti xhamíguluʼ ne riniʼné lii ora si caquiiñeʼ bueltu o caquiiñeʼ gacaneluʼ laa. Despué zaníʼ íqueluʼ pa dxandíʼ xhamígube lii. Peru David gadxé modo guca. Purtiʼ biaʼ dxi bibánibe bisihuínnibe nadxiibe Jiobá ne biʼniʼ crebe zacané laabe, cásica ora nuube galán ne zaqueca ora cadíʼdibe lu guendanagana (Sal. 40:8).

⁶ Guidúʼyanu ximodo bidii David xquíxepeʼ Jiobá ne bisisaca laabe ora guníʼ: «Jiobá Señor stidu, ¡nabé nandxóʼ laluʼ lu guidubi naca guidxilayú, guendanandxóʼ stiluʼ rihuínnini lu guidubi naca guibáʼ ne guidxilayú!» (Sal. 8:1). Xi rusihuinni ca diidxaʼ riʼ yaʼ. Rusihuínnicani nabé guca xhamigu David Jiobá. Ne laaca bidxagayaabe pabiáʼ nandxóʼ Jiobá ne pabiáʼ risaca, ngue runi bisisácabe laa biaʼ dxi bibánibe (Sal. 35:28).

 7. Xi zabeendunu ora guni orarnu Jiobá.

⁷ Cásica biʼniʼ David, laanu laaca naquiiñeʼ guni orarnu Jiobá guiráʼ dxi ti ganda guni crenu zacanebe laanu. Biblia na: «Laidxiña gaxha de Dios, ne laa zadxiña gaxha de laatu» (Sant. 4:8). Ora guni orarnu Jiobá ziuʼnu jma gaxha de laa ne nga nga tobi de ca modo zanda guicaanu espíritu santu stibe (biindaʼ 1 Juan 3:22).

 8. Xiñee cadi naquiiñeʼ guininu ngueca ca ngueca lu oración stinu.

⁸ Ora runi orarluʼ Dios, ñee ngueca ca ngueca riniʼluʼ lu oración stiluʼ la? Pa zacá rúniluʼ, guníʼ ique dede ante xipeʼ nga racaláʼdxiluʼ guiniʼluʼ. Ñee ñuulaʼdxiʼ ti xhamígunu o ti binnilídxinu ñábinu laa ngueca ca ngueca guiráʼ biaje nidúʼyanu laa la? Coʼ njaʼ. Zándaca maʼ qué nucaadiágabe laanu. Peru Jiobá cadi zacá diʼ laa, neca rucaadiágabe guiráʼ oración ni runi ca xpínnibe, peru naquiiñeʼ guidúʼyanu cadi ngueca ca ngueca gábinu laabe guiráʼ biaje guni orarnu.

9, 10. 1) Xi zanda guzéʼtenu lu ca oración stinu. 2) Xi zacané laanu gánnanu xi guininu lu oración stinu.

⁹ Pa racaláʼdxinu guidxíñanu Jiobá, naquiiñeʼ gábinu laabe xipeʼ nga cuchiiñaʼ laanu. Ora gábinu laabe guiráʼ ni cayácanu ne xi naguu xizaa laanu la? jma zuni crenu zacanebe laanu. Xi guiráʼ zanda guininu lu oración stinu yaʼ. Biblia na: «Lainíʼ né Dios. Lainaba laa irá ni caquiiñe tu, ne laudii diuxquixe laa» (Filip. 4:6). Biáʼsipeʼ nga ni caníʼ Biblia, purtiʼ zanda gábinu Jiobá intiica ni guizaaca lu xquendanabáninu ne xi caquiiñeʼ gúninu para cadi guixélenu de laabe.

¹⁰ Ndaaniʼ Biblia zeeda stale oración ni biʼniʼ ca xpinni Dios ni bibani dxiqué, ora guidúʼndanu cani zabeendunu ni galán (1 Sam. 1:10, 11; Hech. 4:24-31). Lu Salmo zeeda stale oración ne diidxaʼ riuundaʼ ni bíʼnicabe para Jiobá. Ne lúcani rihuinni modo biʼniʼ sentir binni ora guyuucaʼ nayecheʼ ne ora gudíʼdicaʼ ra nagana. Nga runi, ora guiduʼndaʼ chaahuinu cani, zacané cani laanu gánnanu xi guininu ora guni orarnu Jiobá.

11. Xiñee naquiiñeʼ guiníʼ ique chaahuinu ca conseju ni rudii Dios laanu.

¹¹ Sicaríʼ guníʼ David: «Jneza ni rusietenalaʼdxiʼ Jiobá laanu, ne riguuni xpiaaniʼ binni ni qué ganna» (Sal. 19:7). Ne nuu de ca conseju ca naquiiñeʼ guiníʼ ique chaahuinu cani ti gánnanu ximodo zanda gacané cani laanu. Xiñee yaʼ. Purtiʼ ora gúninu zacá, zánnanu xi gúninu ora guidxaagalunu xiixa guendanagana. Casi ora maʼ nuunu ra scuela o ra dxiiñaʼ ne gacalaʼdxiʼ tuuxa gucaa laanu gúninu xiixa ni cadi jneza la? zánnanu ximodo gudxíʼlunu ni, laaca zacaneni laanu gánnanu ximodo ruuyaʼ Dios guicá binni rini, laaca zacaneni laanu cadi chuʼnu lu política ne gánnanu xi gúninu ora cuinu lari gácunu ne modo guzuchaahuinu. Ora guiníʼ íquenu ximodo ruuyaʼ Dios cani bizéʼtenu ca la? zacané ni laanu gánnanu xi gúninu pa guidxaagalunu xiixa guendanagana ne zacá maʼ qué zacananu (Prov. 15:28).

12. Xi caquiiñeʼ guiníʼ íquenu ti ganda gúninu ni na ca Ley stiʼ Dios.

¹² Laga cabézanu guni Dios guiráʼ ni maʼ bizabiruaa. Ñee rusihuínninu runi crenu zúnibe cani maʼ bizabiruaabe la? Ñee risaca para laanu gúninu ni nabe lu xquendanabáninu la? Yanna, ñee dxandipeʼ runi crenu zanitilú guiráʼ ca religión ni qué rusiidiʼ ni dxandíʼ la? Ñee runi crenu zabáninu ndaaniʼ ti paraísu lu Guidxilayú riʼ, cásica biʼniʼ crenu ni dxi bizulú cazíʼdinu de Biblia la? Ñee rucheechenu diidxaʼ né stale gana ne qué rudiʼnu lugar chuʼ ni gucueeza laanu de gúninu ni la? Ñee risaca para laanu gánnanu ziasa ca gueʼtuʼ ca, guisaca lá Jiobá ne guihuinni jneza modo runi mandarbe, cásica bisaca cani para laanu dxi bizulú cazíʼdinu de Biblia la? Ora guiníʼ ique chaahuinu cani gunabadiidxanu riʼ zacanécani laanu para cadi gusiaandanu cani rusietenalaʼdxiʼ Jiobá (Sal. 119:111).

13. Xiñee qué ñene ca discípulo ni bibani lu primé siglu que caadxi cosa. Gudixhe ti ejemplu.

¹³ Nuu caadxi cosa ni zándaca qué ziene chaahuinu ora guidúʼndanu Biblia, purtiʼ zeedaruʼ dxi gusiene Jiobá cani. Stale biaje gudxi Jesús ca apóstol stiʼ zedandá dxi zuninácabe laa ne zuuticabe laa (biindaʼ Mateo 12:40 ne 16:21). Peru qué ñene ca apóstol que xii ngue nuube guiniʼbe. Biénecabe ni óraruʼ bisiene Jesús ni laacabe biasa si lade gueʼtuʼ. Biblia na: «Ne óraque bixhele be xquenda biaani ca para guiene ca ni cá lu Xquiʼchi Dios» (Luc. 24:44-46; Hech. 1:3). Ne laaca qué ñénecabe pa guibáʼ nga chiguni mandar Reinu stiʼ Dios, sínuque biénecabe ni dxi gulí Dios laacabe né espíritu santu lu Pentecostés iza 33 (Hech. 1:6-8).

14. Xiñee galán ejemplu ni bidii ca xpinni Cristu ni bibani ra bizulú siglu XX.

¹⁴ Zacaca nga gúcani dxi bizulú siglu XX, cani dxandíʼ xpinni Cristu qué ñene chaahuicaʼ xi zazaaca lu ca últimu dxi (2 Tim. 3:1). Casi ni bizaaca lu iza 1914, nuu tu guníʼ ique maʼ qué zandaa ziecaʼ guibáʼ. Ora bíʼyacabe qué ñaca ni guníʼ íquecabe que la? bibiguetaʼ biindaʼ chaahuicabe Stiidxaʼ Dios ne bidiicabe cuenta caquiiñeʼ gaca ti dxiiñaʼ nabé naroʼbaʼ: gucheechecabe diidxaʼ (Mar. 13:10). Yanna, lu iza 1922, guca ti guendaridagulisaa roʼ stiʼ stale guidxi ndaaniʼ guidxi Cedar Point (Ohio, Estados Unidos), ne raqué Joseph F. Rutherford, ni zaniruʼ lu dxiiñaʼ ni cayúnicabe dxiqué, guníʼ ca diidxaʼ riʼ: «¡Laguuyaʼ Rey ca maʼ cayuni mandar! Laatu nga cani chigucheeche stiidxabe. Nga runi, laguiníʼ, laguiníʼ, laguiníʼ de Rey ne reinu stiʼ». Ne dede dxi que runibiáʼcabe ca xpinni Jiobá casi cani rucheeche stiidxaʼ Reinu (Mat. 4:23; 24:14).

15. Xiñee galán guiníʼ íquenu guiráʼ ni maʼ biʼniʼ Dios pur xquidxi.

¹⁵ Ora guiníʼ íquenu guiráʼ ni maʼ biʼniʼ Dios para xquidxi tiempu que ne ni cayúnibe para laacaʼ yanna riʼ, zacané cani laanu guni crenu zúnibe guiráʼ ni maʼ bizabiruaabe. Zacaca nga cani rusietenalaʼdxiʼ Jiobá laanu, rusiecheʼ cani laanu ne racané cani laanu guni crenu dxandíʼ zaca cani maʼ bizabiruaabe.

16. Xi ndaayaʼ ricaanu pur rucheechenu diidxaʼ né stale gana.

¹⁶ Jiobá, Dios ni bizáʼ laanu cadi cayaanadxí de guni dxiiñaʼ. Ne zacapeʼ guníʼ salmista que: «Jiobá, tuu nga nadipaʼ casi lii yaʼ». Ne laaca guniʼbe: «Nadipaʼ naluʼ, ne naluʼ ladu derechu nandísaluʼ lu bi» (Sal. 89:8, 13). Cumu nácabe ti Dios ni cayuni dxiiñaʼ la? rusisácabe ne riguube ndaayaʼ stipa ni rúninu pur rucheechenu stiidxaʼ Reinu. Laabe ruuyabe cadi nachaabaʼ ca xpínnibe —hombre ne gunaa, nahuiiniʼ ne ni maʼ huaniisi— ne cadi nisi maʼ guidxi nacaʼ (Prov. 31:27). Ni rúnicabe nga, rinándacabe ejemplu stiʼ Dios ne qué rusaana de gúnicabe xhiiñabe. Ne riéchecabe ora rúnicabe xhiiñaʼ Jiobá de guidubi ladxidóʼcabe ne riguu ndaayaʼ laacabe. Biblia na: «Laaca stiluʼ guendanachaʼhuiʼ ca Jiobá, purtiʼ lii riguíxeluʼ cada tobi biaʼ ni biʼniʼ» (Salmo 62:12).

17, 18. Xiñee zanda guininu ora guzúʼbanu stiidxaʼ Jiobá nga riguidxi fe nápanu laa. Bizeeteʼ ti ejemplu.

¹⁷ Cada biaje gusihuínninu nápanu fe Dios la? jma zuni crenu zúnibe guiráʼ ni maʼ bizabiruaabe. Guidúʼyanu ximodo ruzeeteʼ Biblia guyuu ca israelita lu Layú ni bizabiruaa Dios gudii laacaʼ. Gudxi Jiobá cani ruzaaquiʼ guʼxhuʼ ni ziné guiña stiʼ pactu que guiétecaʼ ndaaniʼ guiiguʼ Jordán. Peru ora yendácabe raqué biiyacabe caree guiiguʼ, purtiʼ nabé cayaba nisaguié ca dxi que. Xi biʼniʼ ca israelita que yaʼ. Ñee gulézacabe chupa chonna semana laga guiete guiiguʼ que la? Coʼ, biʼniʼ crécabe Jiobá ne bíʼnicabe guiráʼ ni gudxi laacabe. Xi bizaaca yaʼ. Relatu ca na: «Casi bizuhuaa ñee cani ruzaaquiʼ guʼxhuʼ ni ziné guiña que ndaaniʼ nisa que la? gulezadxica nisa que ne [...] cani ruzaaquiʼ guʼxhuʼ que [...] bizuhuaadxicaʼ ndaaniʼ guiiguʼ Jordán ra nabidxi xhuxhu laga gudiʼdiʼ guidubi guidxi Israel ndaaniʼ ni» (Jos. 3:12-17). ¡Nanna pabiáʼ nayecheʼ guyuucabe ora bíʼyacabe gulezadxí guiiguʼ que, neca ziáʼ ne nadipaʼ cuxooñeʼ yaʼ! ¡Nanna pabiáʼ biguidxi fe stícabe yaʼ! Cumu bizuubacabe stiidxaʼ Jiobá la? gucané laacabe.

¹⁸ Tiempu riʼ, qué runi Jiobá milagru para laanu cásica bíʼnibe dxiqué, peru riguube ndaayaʼ laanu purtiʼ nápanu fe laabe ne ruzúʼbanu stiidxabe. Laabe rudiibe espíritu santu laanu para ganda gucheechenu stiidxaʼ Reinu guidubi naca Guidxilayú. Jesucristu nga Testigu ni jma risaca stiʼ Jiobá, ne laa na zacané ca xpinni para gúnicaʼ dxiiñaʼ nabé risaca ca. Despué de biásabe lade gueʼtuʼ, gúdxibe ca discípulo stibe: «Laché irá xixé guidxi lachiusiidi irá xixé binni sa nanda naa [...]. Ne ganna ca tu qué ziuu dxi ixele de laatu dede dxi iluxe guidxilayú» (Mat. 28:19, 20). Stale Testigu raca nagana para laacaʼ gucheechecaʼ diidxaʼ purtiʼ nabé rituílucaʼ, peru maʼ bidiicabe cuenta dxandíʼ racané espíritu santu stiʼ Dios laacabe para guiniʼnécabe tutiica binni. Biblia na: «Zaniéʼ cani rusietenaláʼdxiluʼ naa nezalú rey, ne qué zatuí luaʼ» (Salmo 119:46 ne biindaʼ 2 Corintios 4:7).

19. Xi naquiiñeʼ gánnanu neca nuu biaje maʼ qué zanda gúninu biaʼ racaláʼdxinu lu xhiiñaʼ Jiobá.

¹⁹ Nuu xcaadxi xpinni Cristu huaracaʼ o maʼ nagólacaʼ. Xi naquiiñeʼ gúnicabe yaʼ. Naquiiñeʼ guni crécabe zudii Jiobá ni caquiiñecabe purtiʼ laa riá binni ne riguixhedxí ladxidoʼno (2 Cor. 1:3). Rusisaca Jiobá guiráʼ ni rúninu para ganda gúninu xhiiñaʼ. Laaca naquiiñeʼ gánnanu para ganda guilanu naquiiñeʼ gusihuínninu nápanu fe lu guendaguti stiʼ Jesús ne gúninu biaʼ gándatiʼ lu xhiiñaʼ Dios (Heb. 10:39).

20, 21. Ximodo zanda gusihuínninu runi crenu Jiobá.

²⁰ Laaca cayuni adorarnu Jiobá nga ora iquiiñenu biaʼ gándatiʼ tiempu stinu, stipa stinu ne cani nápanu para gúninu ni nabe. De guidubi ladxidoʼno racaláʼdxinu «güi [nu] stiidxa Cristu» (2 Tim. 4:5). Nabé nayecheʼ runi sentirnu purtiʼ racanenu binni guiziidiʼ «ca ni dxandíʼ» rusiidiʼ Dios (1 Tim. 2:4). Galán riuʼnu nezalú Jiobá ora gusisácanu laa (Prov. 10:22). Ne laaca zuni crenu qué ziuu dxi gusaana Jiobá de gacané laanu (Rom. 8:35-39).

²¹ Casi maʼ bidúʼyanu ca, naquiiñeʼ gánnanu Jiobá nga rabi laanu xi naquiiñeʼ gúninu, peru cadi de laasinu nga gúninu ni. Ximodo naquiiñeʼ gúninu ni yaʼ. Naquiiñeʼ guni orarnu laabe, guiníʼ íquenu modo huayúnibe cani maʼ guniʼbe ne cani chigúnirube ne gúninu stipa pur iguidxi fe stinu. Pa guzúʼbanu stiidxaʼ Jiobá ne gúninu cani rusietenaláʼdxibe laanu, «qué ziuu dxi» gusaana de gúninu ni na cani, ne zabáninu sin qué chuʼ dxi gátinu.