Gúninu ni na Regla de Oro ora gucheechenu diidxaʼ

 1. Xiñee risaca guizaaláʼdxinu binni ora rucheechenu diidxaʼ. Bizeeteʼ ti ejemplu (biiyaʼ foto ni zeeda ra ruzulú tema riʼ).

RACA chupa chonna iza, ti guendaxheelaʼ de Fiyi, canayuni invitarcaʼ binni cheʼ dxi rietenaláʼdxinu Guendaguti stiʼ Cristu. Laga caniʼnécabe ti gunaa, bizulú biaba nisaguié. Hermanu que bidii laabe ti paragua, ne laa ne xheelaʼ biquiiñecaʼ stobi. ¡Guizáʼ biecheʼ guendaxheelaʼ riʼ ora biʼyaʼ guyé gunaa que dxi rietenaláʼdxinu Guendaguti stiʼ Cristu! Gunaa que guníʼ qué rietenalaʼdxiʼ ni gudxi ca Testigu que laa, peru nabé bidxagayaa ni biʼniʼ ca binni riʼ, nga runi nabe qué zanda diʼ guiaadxabe ra biʼniʼ invitarcaʼ laabe. Xi biʼniʼ guendaxheelaʼ riʼ yaʼ. Yenándacabe ni runibiáʼ binni casi Regla de Oro.

 2. 1) Xii nga Regla de Oro. 2) Ximodo zanda gúninu ni na Regla de Oro.

² Xii nga Regla de Oro yaʼ. Laani nga conseju ni bidii Jesús: «Irá ni racalaʼdxi tu guni binni laatu la? ngue ca laguni laacaʼ» (Mat. 7:12). Ximodo zanda gúninu ni na conseju riʼ yaʼ. Ra gúninu chupa cosa. Primé, galán guinabadiidxanu: «Pa ñacaʼ sti binni, ximodo ñuuladxeʼ niniʼnécabe naa yaʼ.» Guiropa, gúninu biaʼ gándatiʼ pur gacanenu binni (1 Cor. 10:24).

 3, 4. 1) Xiñee cadi naquiiñeʼ gúninu ni na Regla de Oro né ca xpinni Cristu si. 2) Xi zadúʼyanu lu tema riʼ.

³ Ñee guníʼ Jesús naquiiñeʼ chinándanu ni na Regla de Oro ca né ca xpinni Cristu si la? Coʼ, ni guniʼbe nga gúninu ni nani né guiráʼ clase binni dede né ca xhenemígunu (biindaʼ Lucas 6:27, 28, 31, 35). Pa naquiiñeʼ gúninu ni na Regla de Oro dede né ca xhenemígunu la? jmaruʼ si naquiiñeʼ gúninu ni nani né ca binni ni rinínenu ora rucheechenu diidxaʼ. Zándaca stale de laacaʼ «maʼ nuu listu para icaa guendanabani ni qué zaluxe» (Hech. 13:48, TNM).

⁴ Guidúʼyanu tapa cosa ni cadi naquiiñeʼ guiaandaʼ laanu ora gucheechenu diidxaʼ: 1) tuu nga cani naquiiñeʼ guinínenu, 2) paraa rinínenu binni, 3) pora nga jma galán guinínenu binni ne 4) ximodo guzulú guinínenu binni. Ora guiníʼ íquenu ca guendarinabadiidxaʼ riʼ, zacanécani laanu gánnanu ximodo guinínenu cada binni (1 Cor. 9:19-23).

 5. Xi guendarinabadiidxaʼ naquiiñeʼ gúninu ora guinínenu binni.

⁵ Ora maʼ canagucheechenu diidxaʼ rinínenu gadxé gadxé binni, cada tobi de laacaʼ maʼ gadxé modo huabánicaʼ ne gadxé gadxé guendanagana nápacaʼ (2 Crón. 6:29). Ora guiníʼneluʼ ti binni, zanda guinabadiidxaluʼ laaca lii: «Pa ñacaʼ binni ni chiguinieniáʼ ca, ñee ñuuladxeʼ ñuuyabe naa casi tutiica binni la? o ñuuladxeʼ ñunibiaʼbe ximódopeʼ naa». Ora guiníʼ íquenu ca guendarinabadiidxaʼ riʼ, zacanécani laanu gánnanu gadxé gadxé nga modo binni.

 6, 7. Xi naquiiñeʼ gúninu pa cadi galán guidxaagalúcabe laanu ora gucheechenu diidxaʼ.

⁶ Cadi nagueendaca guininu feu xpiaʼ tuuxa binni. Dede né laanu, neca rúninu stale stipa pur chinándanu conseju ni na guininu «diidxa jneza, ni guiaba binni», nuu biaje rininu cosa ni cadi jneza, purtiʼ nácanu binni gulené donda (Col. 4:6; Sant. 3:2). Pa pur modo biranu gueelaʼ gábinu sti binni xiixa ni guchiichi laa, ñuuláʼdxinu niníʼ íquebe feu xpiaʼnu la? Coʼ njaʼ. Ñee cadi ñuuláʼdxinu ñénebe modo nuunu la? Yanna, ñee cadi zacaca nga naquiiñeʼ guidúʼyanu ca binni ni rinínenu de Dios la?

⁷ Pa tuuxa cadi guidxaagalú laanu galán ora maʼ canagucheechenu diidxaʼ, gúninu stipa pur guiénenu xiñee nuube zacá. Zándaca nápabe ti guendanagana ra rúnibe dxiiñaʼ o ra scuela, o nápabe xiixa guendahuará malu. Stale binni ni ricabi laanu naduxhuʼ ora rigánnanu laacaʼ, rinacaʼ gucaadiágacaʼ ora rinínenu laacaʼ né respetu ne diidxaʼ nadóʼ (Prov. 15:1; 1 Ped. 3:15).

 8. Xiñee naquiiñeʼ gucheechenu diidxaʼ ra nuu guiráʼ clase binni.

⁸ Rucheechenu diidxaʼ ra nuu binni de guiráʼ clase. Ca iza gudídinu ca maʼ huaree jma de sesenta tema ni láʼ «Gucané Biblia laacabe para bichaacabe» lu revista Torre stiʼ ni rapa. Lúcani rieeteʼ de binni ni guca gubaanaʼ, binni güeʼ, binni ni guyuu lu xiixa banda o binni ni guduubaʼ guixi. Xcaadxi de laacaʼ guyuucaʼ lu política, gúcacaʼ xaíque stiʼ xiixa religión o nabé gucuá íquecaʼ dxiiñaʼ sticaʼ. Nuu de laacaʼ guyuunecaʼ tutiica binni. Peru bicaadiágacabe ca diidxaʼ nacubi ne galán, gunábacabe guʼndané ca Testigu laacabe Biblia, bichaacabe modo nabánicabe ne gúcacabe testigu stiʼ Jiobá. Nga runi, qué chuʼ dxi guiníʼ íquenu qué zaná tuuxa binni gucaadiaga stiidxaʼ Reinu (biindaʼ 1 Corintios 6:9-11). Cadi guiaandaʼ laanu zanda chindá guiráʼ ni gusíʼdinu ndaaniʼ ladxidóʼ binni de guiráʼ clase (1 Cor. 9:22).

 9. Xiñee naquiiñeʼ guni respetarnu ra lidxi binni ora maʼ zigucheechenu diidxaʼ.

⁹ Paraa rinínenu binni ora maʼ canagucheechenu diidxaʼ. Jma nga rinínenu laacaʼ ra puertaʼ lídxicaʼ (Mat. 10:11-13). Guiníʼ íquenu ndiʼ: guiranu riuuláʼdxinu guni respetárcabe ra nabézanu. Riuuláʼdxinu gaca lídxinu ti lugar ra chuʼnu laasinu né binnilídxinu ne cadi chuʼ tu ganna xi cayúninu. Zacaca nga riuulaʼdxiʼ ca xpecínunu guni respetarnu ra nabézacaʼ. Ñee cayúninu ni la? (Hech. 5:42.)

10. Xi naquiiñeʼ gúninu para cadi guchiichinu binni ora gucheechenu diidxaʼ.

¹⁰ Ca dxi stinu riʼ, cumu nabé nuu stale binni malu la? stale binni ridxibi ora chiganna tuuxa ni qué runibiáʼ laa (2 Tim. 3:1-5). Peru naquiiñeʼ chuʼnu cuidadu ti cadi guiníʼ ique binni mal de laanu. Guníʼ ique bidxíñaluʼ ra lidxi tuuxa binni, bixhidxinaluʼ ne guirutiʼ qué niree. Zándaca uquiinde lii cuʼ luluʼ ra ventana stiʼ binni ca o gudiiluʼ buelta lídxicaʼ para gúʼyaluʼ pa nuu tuuxa. Ñee ruchiichi nga ca binni ni nabeza neza ra rucheecheluʼ diidxaʼ la? Xi zándaca guiníʼ ique ca vecinu ni guʼyaʼ lii yaʼ. Dxandíʼ racaláʼdxinu pa ñanda si guiráʼ binni nga ñanna de Dios (Hech. 10:42). Nabé sicarú ca diidxaʼ rinenu ra nuu binni ne racaláʼdxinu gánnacabe de laacani (Rom. 1:14, 15). Peru naquiiñeʼ gápanu cuidadu ti qué gúninu xiixa ni guchiichi binni. Apóstol Pablu bicaa: «Runi du xhiiña du jneza sin uchéʼ né du irutiʼ, ti qué gapa ca xi pur iníʼ ca laadu nin ni canayuí du» (2 Cor. 6:3). Pa guʼyaʼ binni runi respetarnu lidxi zándaca chuulaʼdxiʼ guiziidiʼ de Dios (biindaʼ 1 Pedro 2:12).

11. Xiñee riuuláʼdxinu guni respetárcabe tiempu stinu.

¹¹ Stale de laanu nabé riuu xhiiñanu. Para ganda gúninu cani, naquiiñeʼ gánnanu xii nga ni jma naquiiñeʼ gúninu ne quixhe chaahuinu tiempu stinu (Efes. 5:16; Filip. 1:10). Zándaca guidxiichinu pa chuʼ tuuxa cuee tiempu stinu. Nga runi, riuuláʼdxinu guiénecabe ora qué zanda guinínenu laacabe xadxí. Ximodo zanda gacané ni na Regla de Oro laanu para gusihuínninu runi respetarnu ca binni ni rinínenu de Dios yaʼ.

12. Ximodo zanda gánnanu pora nga jma zanda guidxélanu binni neza ra rucheechenu diidxaʼ.

¹² Galán guiníʼ íquenu pora nga jma riuu binni ra lidxi neza ra rucheechenu diidxaʼ. Pora nga jma zanda gucaadiágacabe laanu. Galán gúninu stipa para chigánnanu laacabe ora zanda gucaadiágacabe laanu. Stale lugar jma ridxélacabe binni huadxí. Pa neza ra nabézanu jma riuu binni huadxí, ñee zanda gucheechenu diidxaʼ óraca la? (Biindaʼ 1 Corintios 10:24.) Pa gúninu zacá, naquiiñeʼ gánnanu zaguu ndaayaʼ Jiobá stipa ni gúninu pur gucheechenu diidxaʼ ora jma guidxélanu binni.

13. Xi sti modo zanda gusihuínninu runi respetarnu binni.

¹³ Xi sti modo zanda gusihuínninu nápanu respetu binni yaʼ. Ora guidxélanu ti binni ni riuulaʼdxiʼ gucaadiaga laanu, naquiiñeʼ gusiene chaahuinu laa de stiidxaʼ Dios, peru cadi naquiiñeʼ guindaʼnu stale ra nuube. Purtiʼ zándaca cá íquebe gúnibe sti cosa ora yegánnanu laabe. Pa gábibe laanu nuu xhiiñabe la? zanda gábinu laabe qué zandaʼnu... ne cadi guindaʼnu (Mat. 5:37). Ora maʼ biluxe guninenu binni ca, galán guinabadiidxanu laa padxí zanda guidxélanu laa sti biaje. Chupa chonna de cani rucheeche diidxaʼ huaniʼcaʼ: «Ñuuladxeʼ ñeeda gannaʼ lii sti biaje. Ñuuláʼdxiluʼ ninieniáʼ lii pur teléfono o nuseendaʼ ti mensaje ra nuuluʼ ante guendaʼ la?». Ora chuunu ra nuucabe dxi quíxhecabe ni la? zusihuínninu zinándanu ejemplu stiʼ apóstol Pablu, purtiʼ laa guníʼ: «Qué ruyube ni acané naa siaʼ, sínuque ni acané stale binni, ti ilá caʼ» (1 Cor. 10:33).

14-16. 1) Xiñee naquiiñeʼ gábinu binni xi pur zigánnanu laa casi chuʼnu ra lidxi. Bizeeteʼ ti ejemplu. 2) Xi runi ti binnigola ni riganna ca neza binni ridagulisaa.

¹⁴ Bixuiʼlú cabídxicabe lii pur teléfono peru qué gannuʼ tu binni ca. Qué runibiaʼluʼ binni ca peru canabadiidxabe lii xi guendaró riuuláʼdxiluʼ. Zándaca caníʼ íqueluʼ tu laabe ne xi racaláʼdxibe. Pur respetu, zándaca guiníʼneluʼ laabe ti ratu, peru despué zuchuuguluʼ laabe. Yanna, bixuiʼlú gabi binni ni caniʼné lii ca tu laa, ne gábibe lii rúnibe dxiiñaʼ ra racanécabe binni ganna xi gó ti chuʼ nazaaca ne racaláʼdxibe gacanebe lii. Zándaca jma ziuuláʼdxiluʼ gucaadiágaluʼ laabe, cadi dxandíʼ la? Guiranu riuuláʼdxinu guiniʼnécabe laanu né respetu ne gábicabe laanu xi racaláʼdxicabe. Ñee zanda gúninu zacaca ora maʼ canagucheechenu diidxaʼ la?

¹⁵ Ndaaniʼ stale guidxi naquiiñeʼ gábinu binni xi pur zigánnanu laa casi chuʼnu ra lidxi. Dxandíʼ nga risaca ni chitídxinu binni, peru pa málasi chuʼnu ra lídxicabe sin guininu tu laanu ne guinabadiidxanu laabe: «Pa ñanda nibeeluʼ xiixa guendanagana, xi nibeeluʼ yaʼ». Ora rúninu guendarinabadiidxaʼ riʼ, ni racaláʼdxinu nga gánnanu xi riníʼ ique binni ne gánnanu xi textu de lu Biblia guidúʼndanenu laacaʼ. Peru zándaca guiníʼ ique binni ca: «Tu binni riʼ, ne xiñee canabadiidxabe nga naa pue. Xi racaláʼdxibe pue». Nga runi, galán guyúbinu modo chuulaʼdxiʼ binni gucaadiaga laanu (Filip. 2:3, 4). Ximodo zanda gúninu ni yaʼ.

¹⁶ Sicaríʼ runi ti binnigola ni riganna ca neza binni ridagulisaa. Despué de ugapadiúxibe binni ne guiniʼbe tu laabe, rudiibe laa ti tratadu ni láʼ Ñuuláʼdxiluʼ ñánnaluʼ xi riníʼ Biblia de cani huanabadiidxaluʼ la? ne rábibe laa: «Yannadxí canagudiʼdu guiʼchihuiiniʼ riʼ guiráʼ ca binni ni guidxéladu ra lidxi. Neni xhoopaʼ guendarinabadiidxaʼ ni nabé runi binni. Ndiʼ niáʼ para lii». (Xpinni Cristu riʼ na ora ganna binni xi pur rigánnanu laacaʼ la? jma riuudxí ladxidoʼcaʼ ne cadi nagana para guinínenu laacaʼ.) Óraque rabi binnigola que laabe: «Ñee huayuu dxi guiníʼ íqueluʼ tobi de ca guendarinabadiidxaʼ ni zeeda raríʼ la?». Pa guluíʼnabe tobi de laacani, ruxhélebe tratadu ca ne ruluiʼbe laa xi na Biblia de laani. Ne pa qué guluíʼ náʼ binni ca nin tobi la? laabe ribibe ti guendarinabadiidxaʼ ne rusiénebe ni sin gusituibe lú binni ni caníʼnebe ca. Nuu stale modo zanda guinínenu binni. Ndaaniʼ caadxi guidxi rinándacabe costumbre ni nuu raqué ante guiníʼcabe xi zécabe. Ni naquiiñeʼ gúninu nga gánnanu ximodo guinínenu ca binni ni nabeza neza ra rucheechenu diidxaʼ ti chuuláʼdxicaʼ gucaadiágacaʼ laanu.

17. Casi maʼ bidúʼyanu lu tema riʼ, ximodo zanda gúninu ni na Regla de Oro.

¹⁷ Yanna, ximodo zanda gúninu ni na Regla de Oro ora gucheechenu diidxaʼ yaʼ. Ra gusisácanu cada tobi de ca binni ni guinínenu. Guni respetarnu ra lídxicaʼ. Gúninu stipa pur gucheechenu diidxaʼ ora maʼ nuu binni ra lidxi ne ora zanda gucaadiágacaʼ laanu. Ne gánnanu ximodo guinínenu ca binni ni nabeza neza ra rucheechenu diidxaʼ.

18. Xiñee naquiiñeʼ guinínenu ca binni ni nabeza neza ra rucheechenu diidxaʼ casi ñuuláʼdxinu niniʼnécabe laanu.

¹⁸ Zabeendunu ni galán ora guinínenu binni modo ñuuláʼdxinu niníʼnecaʼ laanu. Ora rinínenu binni né diidxaʼ nadóʼ ne runi respetarnu laacaʼ rusihuínninu rúninu ni na ca principiu stiʼ Biblia ne rusisácanu Bixhózenu ni nuu guibáʼ (Mat. 5:16). Zacá jma stale binni ziuulaʼdxiʼ gucaadiaga stiidxaʼ Dios (1 Tim. 4:16). Ne neca qué náʼ binni gucaadiaga laanu, nánnanu cayúninu xhiiñaʼ Dios de guidubi ladxidoʼno (2 Tim. 4:5). Gúninu casi biʼniʼ apóstol Pablu, laa bicaa: «Rune irá nga tílasi guni cre binni stiidxa Cristu, ti zacá laca ne naa guieche nia ni» (1 Cor. 9:23). Nga runi, qué chuʼ dxi gusaana de gúninu ni na Regla de Oro ora gucheechenu diidxaʼ.