Ximodo rusihuínninu cadi nácanu casi binni guidxilayú

 1. Xi bisihuinni Jesús gueelaʼ ante gatiʼ.

GUEELAʼ ante gatiʼ Jesús, bisihuinni rizaalaʼdxiʼ pur ni guizaaca ca discípulo stiʼ. Dede bíʼnibe ti oración para gúdxibe Bixhózebe ca diidxaʼ riʼ: «Cadi canaba lii gaxhu laacabe de ndaani guidxilayú, sínuque ulá lu laacabe de binidxabaʼ. Cásica naa cadi zinanda guidxilayú zaqueca laacabe, cadi zinanda cabe guidxilayú» (Juan 17:15, 16). Oración ni bíʼnibe de guidubi ladxidoʼbe que bisihuinni ni nabé nadxiibe ca discípulo stibe ne laaca bisihuínnibe risaca ca diidxaʼ ni guniʼbe huaxhinni que nezalú caadxi de laacaʼ: «Ma ulee laatu de [ndaaniʼ guidxilayú]» (Juan 15:19). Ne cani guniʼbe ca bisihuínnibe naquiiñeʼ guixeleʼ ca xpínnibe de binni guidxilayú.

 2. Xi guidxilayú nga ni guníʼ Jesús.

² Xii nga guidxilayú ni guníʼ Jesús riʼ yaʼ. Guidxilayú riʼ nga guiráʼ binni ni cadi cayuni ni na Dios, cani runi mandar Binidxabaʼ laacaʼ ne rusihuínnicaʼ nácacaʼ casi laabe purtiʼ ruyúbicaʼ para laasicaʼ ne rudxiibacaʼ laca laacaʼ (Juan 14:30; Efesios 2:2; 1 Juan 5:19). Nga runi, Biblia ruzeeteʼ «qué zanda ganaxhii nu Dios ne ganaxhii ca nu guidxilayú» (Santiago 4:4). Cumu qué racaláʼdxinu guixélenu de Dios ni nadxii laanu la? galán guidúʼyanu ximodo zanda guibáninu lu guidxilayú riʼ sin gácanu casi ca binni nabani luni. Para cadi gaca nga la? guidúʼyanu gaayuʼ cosa ni zanda gacané laanu: primé, cadi gusaana de guni crenu zanda gacané Cristu laanu ora guni mandar lu Reinu stiʼ Dios ne cadi chuʼnu lu política. Guiropa, cadi guicá espíritu stiʼ binni guidxilayú laanu; guionna, gácunu lari jneza; guidapa, cadi gusaana de guidúʼyanu ni jneza si, ne gaayuʼ, guicaanu guiráʼ ni cudii Dios para gápanu laanu.

 3. 1) Xi qué ñuni Jesús dxi guyuu lu Guidxilayú riʼ. 2) Xiñee ruzeeteʼ Biblia ca binni ni bibí pur espíritu santu ca nga cani «biseenda Cristu» para gúnicaʼ xhiiñabe (biiyaʼ nota).

³ Jesús qué ñuu diʼ lu política ca dxi bibani lu Guidxilayú riʼ, sínuque jma gucuá íquebe gucheechebe ca diidxaʼ stiʼ Reinu stiʼ Dios, ti gobiernu ni chichuu guibáʼ ne ra chiguni mandarbe casi Rey (Daniel 7:13, 14; Lucas 4:43; 17:20, 21). Nga runi, gunda guniʼbe nezalú gobernador romanu Poncio Pilatu: «Cadi beda aca diaʼ rey ndaani guidxilayú riʼ» (Juan 18:36). Laanu, ca discípulo stibe, zinándanu ejemplu bisaanabe. Ximodo rúninu ni yaʼ. Ra cadi gusaana de guni crenu ni chiguni Reinu ca ne rey stini, Jesucristu, ne ra guininu lu guidubi naca Guidxilayú riʼ xi chiguni gobiernu ca (Mateo 24:14). Apóstol Pablu bicaa: «Biseenda Cristu laadu gueda tidxi du laatu uyubi tu chuʼ né tu Dios tobi si, casi ñaca Dios canaba laatu guni tu ni» (2 Corintios 5:20).a

 4. Ximodo huasihuinni ca xpinni Cristu qué rusaanacaʼ de gúnicaʼ ni na Reinu stiʼ Dios (biiyaʼ cuadru ra ná: «Ca primé xpinni cristu qué nucheenecaʼ ley stiʼ Dios»).

⁴ Ora guseendaʼ ti gobiernu xpinni ndaaniʼ sti guidxi para chiguni dxiiñaʼ stiʼ, qué riuu cani guseendabe ca lu política stiʼ guidxi ra checaʼ. Ne neca nuucabe ndaaniʼ guidxi ca, qué rusaana de gúnicabe xhiiñaʼ gobiernu stícabe. Zacaca runi ca xpinni Cristu ni chiguibani guibáʼ ni bibí pur espíritu santu (Filipenses 3:20). Cani biseendaʼ Jesús ca cucheechecaʼ stiidxaʼ Reinu ne stale gana, ne pur ni huayúnicabe ca huayacanécabe millón de «xcaadxi dendxu» chucaʼ gaxha de Dios (Juan 10:16; Mateo 25:31-40). «Xcaadxi dendxu» ca racané cani bibí pur espíritu santu para gúnicaʼ dxiiñaʼ ni maʼ bisaanané Cristu laacaʼ. Guiropaʼ grupu riʼ zeeda gácacaʼ tobi si purtiʼ cayúnicaʼ dxiiñaʼ ni bisaanabe gúnicaʼ ne qué riuucaʼ lu política stiʼ guidxilayú riʼ. Biblia na: «Ne laabe zuni juzgarbe stale guidxi roʼ, ne zuni chaahuibe ca cosa ni cadi jneza cayuni stale guidxi. Ne napa xidé gúnicabe espada stícabe cubu ni riuu ruaa aradu, ne zúnicabe lanza stícabe podadera para uganécabe guixi. Qué zandisaʼ ti guidxi roʼ espada stiʼ para gucaalú sti guidxi roʼ, ne maʼ qué zaziidicaʼ tíndecaʼ para checaʼ lu guerra» (Isaías 2:4).

 5. Ximodo nga gadxé modo bibani ca israelita que de modo nabani ca xpinni Cristu yanna, ne xi nizaaca xcaadxi xpinni Cristu pa ñuucaʼ lu ti grupu políticu yaʼ.

⁵ Peru nuu xcaadxi razón para cadi chuʼnu lu política ne zacá gusihuínninu qué rusaananu de chinándanu Cristu. Cadi nabézadinu ndaaniʼ ti guidxi o ti lugar si casi bibani ca israelita que, peru nácanu ti grupu ni nuu lu guidubi naca Guidxilayú (Mateo 28:19; 1 Pedro 2:9). Yanna, xi ñaca pa ninándanu ti grupu políticu yaʼ. Zándaca maʼ qué ñanda ñuʼnu tobi si ne maʼ qué ñanda nininenu guiráʼ xixé binni de Reinu stiʼ Dios de guidubi ladxidoʼno (1 Corintios 1:10). Ne ora ñuu ti guendaridinde, nidxelasaanu ca bíʼchinu ne ca bizáʼnanu, Stiidxaʼ Dios ndaʼ na gannaxhiisaanu (Juan 13:34, 35; 1 Juan 3:10-12). Pur nga, Jesús biʼniʼ mandar ca discípulo stiʼ cadi tíndecaʼ ne gannaxhiicaʼ dede né ca xhenemígucaʼ (Mateo 5:44; 26:52; biiyaʼ cuadru ra ná: «Ñee qué rucheeniáʼ ley stiʼ Dios la?»).

 6. Xi naquiiñeʼ gudiʼnu gobiernu neca cayúninu ni na Dios.

⁶ Ne ca xpinni Cristu maʼ bidiicaʼ xquendanabánicaʼ Dios ne cadi ti hombre, nin ti gunaa o ti grupu de binni ni nuu lu Guidxilayú riʼ o ti guidxi. Lu 1 Corintios 6:19, 20 Pablu bizeeteʼ: «Ma cadi stubi tu raca mandar tu. Purti ma uzíʼ Dios laatu, ne naroʼba gudixe be saca tu». Neca maʼ bidiicabe laacabe Dios, runi respetárcabe «César», riguíxecabe impuestu ne ruzuubacabe stiidxacaʼ. Peru ni jma rúnicabe nga ni rinabaʼ Dios laacabe (Marcos 12:17; Romanos 13:1-7). Xi rinabaʼ Dios laacabe gúnicabe yaʼ. Guni adorárcabe laa, gannaxhiicabe laa de guidubi ladxidóʼcabe, guzuubacabe stiidxabe, cadi gusaanacabe de gúnicabe ni nabe dede gudiicabe xquendanabánicabe pa caquiiñeʼ gúnicabe ni (Lucas 4:8; 10:27; biindaʼ Hechos 5:29 ne Romanos 14:8).

7, 8. Xii nga espíritu ni runi mandar binni guidxilayú ne xi rucaa ni laacaʼ gúnicaʼ.

⁷ Sti modo para cadi gácanu casi binni guidxilayú riʼ nga gucáʼnanu espíritu malu nuu ndaaniʼ ni. Pablu bicaa «cadi espíritu sti binni guidxilayú ucuaa nu, sínuque Espíritu ni zeeda de Dios» (1 Corintios 2:12). Ne ca xpinni Cristu de Éfeso gúdxibe laacaʼ: «Yenándatu modo na binni guidxilayú, ne bíʼnitu ni na xaíque ni naze bi ni runi mandar, ne nga nga espíritu ni runi dxiiñaʼ ndaaniʼ ladxidóʼ cani qué ruzuubaʼ stiidxaʼ Dios» (Efesios 2:2, 3, TNM).

⁸ Xii nga bi, o espíritu, ni runi dxiiñaʼ ndaaniʼ ladxidóʼ binni. Nga nga stipa ni rucaa binni cadi guzuubaʼ diidxaʼ. Ximodo raca nga yaʼ. Stipa ca rucaa ni binni cadi guni ni na Dios ne laaca rucaa ni laacaʼ gúnicaʼ ni na íquecaʼ ne gápacaʼ guiráʼ ni gúʼyacaʼ (1 Juan 2:16; 1 Timoteo 6:9, 10). Ximodo runi mandar bi ca binni guidxilayú yaʼ. Sin gudiicaʼ cuenta, rucaa ni laacaʼ gúnicaʼ guendaquéiquiiñeʼ, ne casi bi, nuu ni guiráʼ ladu. Ximodo runi ni dxiiñaʼ ndaaniʼ ladxidóʼ binni yaʼ. Chaahuidugá rucaa ni laacaʼ gúnicaʼ cani nanalaʼdxiʼ Dios, casi gápacaʼ xiixa para laasicaʼ, guchacaʼ bi yánnicaʼ, gacaláʼdxicaʼ gápacaʼ jma, gúnicaʼ ni gacaláʼdxicaʼ lu xquendanabánicaʼ ne maʼ qué guzuubacaʼ diidxaʼ.b Chaahuidugá reeda gácacaʼ casi Binidxabaʼ, purtiʼ rúnicaʼ guiráʼ ni rúnibe (Juan 8:44; Hechos 13:10; 1 Juan 3:8, 10).

 9. Ximodo ricaa xcu espíritu stiʼ binni guidxilayú ndaaniʼ ladxidoʼno ne lu xquendabiaaninu.

⁹ Ñee zanda guicaa xcu espíritu ni nuu lu guidxilayú ndaaniʼ ladxidoʼno ne lu xquendabiaaninu la? Zanda pa qué gápanu laanu. Biblia na: «De guiráʼ xixé cosa ni naquiiñeʼ gápaluʼ la? jma gupa chaahuiʼ ladxidoʼloʼ, purtiʼ de laani nga zeeda guendanabani» (Proverbios 4:23). Nuu tiru qué rudii binni cuenta ricaa xcu espíritu ca ndaaniʼ ladxidóʼ. Ximodo raca nga yaʼ. Ra guidxaaganu ti binni ni ruluíʼ nachaʼhuiʼ peru cadi nadxii Jiobá (Proverbios 13:20; 1 Corintios 15:33). Laaca zanda guzulú guiníʼ íquenu casi riníʼ ique binni guidxilayú ra guidúʼndanu xiixa revista o libru ni cadi jneza guʼndaʼ ti xpinni Cristu, ra guidúʼyanu pornografía lu Internet o stiʼ ca apóstata. Zaqueca ra gacaláʼdxinu quítenu xiixa ni qué zacané laanu chuʼnu gaxha de Dios ne ra gacaláʼdxinu guni ganarnu sin guiníʼ íquenu pa zuninanu sti binni, ne tutiica binni o intiica cosa ni napa modo riníʼ ique Binidxabaʼ ne guidxilayú stiʼ.

10. Xi zanda gúninu para cadi guicá espíritu stiʼ binni guidxilayú laanu.

¹⁰ Xi zanda gúninu para cadi guicá espíritu stiʼ binni guidxilayú laanu ne cadi guixélenu de Dios ni nadxii laanu yaʼ. Galán iquiiñenu biaʼ gándatiʼ guiráʼ cani cudii Jiobá laanu ti cadi guixélenu de laabe ne cadi gusaana de guinábanu gudiibe laanu espíritu santu stibe. Neca Binidxabaʼ ne guidxilayú stiʼ nadípacaʼ la? jma nadipaʼ Dios que laacaʼ (1 Juan 4:4). Nga runi, caquiiñeʼ guni orarnu para chuʼnu gaxha de laabe.

11. Ximodo rusihuinni binni napa espíritu stiʼ binni guidxilayú pur modo racu lari.

¹¹ Guzéʼtenu sti cosa ra rihuinni modo riníʼ íquenu. Rihuinni ni ora guzuchaahuinu, casi xi lari gácunu ne pa nayanu. Triste nga guidúʼyanu ndaaniʼ stale guidxi rihuinni maʼ qué racu binni lari jneza. Nga runi, ti hombre ni rutiidiʼ noticia na, pur modo racu binni lari yanna riʼ zedandá dxi maʼ qué zánnacabe tuu nga ca gunaa rizá zacasi. Ti periódicu bizeeteʼ dede nahuiiniʼ ca dxaapahuiiniʼ ca maʼ qué rácucaʼ lari jneza, puru lari nachucu rácucaʼ ne nabéʼ riguiichicaʼ ndaaniʼ lari ne rácucaʼ xcaadxi ni rusihuinni maʼ qué rituí lucaʼ. Ne nuu tu laa racu lari ni rusihuinni maʼ qué riuulaʼdxiʼ guzuubaʼ diidxaʼ, qué rizaaláʼdxicaʼ modo guʼyaʼ xcaadxi binni laacaʼ ne rusihuínnicaʼ cadi nadxiicaʼ laca laacaʼ.

12, 13. Xi conseju ni zeeda lu Biblia naquiiñeʼ chinándanu ora guidúʼyanu xi lari gácunu.

¹² Cumu runi adorarnu Jiobá la? racaláʼdxinu guʼyaʼ binni jneza modo rácunu lari, rácunu lari nayá ne nánnanu cuinu xi lari gácunu ora chuunu paxaraa. Ra tiica chuunu naquiiñeʼ gusihuínninu nácanu binni nuu xpiaaniʼ, purtiʼ rácunu lari jneza ne galán xpiaʼnu ti guʼyaʼ binni cayúninu ni na Dios. Rácunu lari jneza cadi para guyadxí binni laanu, sínuque para cadi guixélenu de Dios ni nadxii laanu (1 Timoteo 2:9, 10; Judas 21). Peru ni jma risaca para Jiobá nga gusiéchenu ladxidóʼ pur modo laanu (1 Pedro 3:3, 4).

¹³ Laaca naquiiñeʼ guietenaláʼdxinu pur modo gácunu lari jneza zanna binni gunáʼ nga religión ni dxandíʼ. Diidxaʼ gácunu lari jneza, zeeda ni de ti diidxaʼ griegu ni rusihuinni naquiiñeʼ gápanu respetu binni pur modo gácunu lari ne guiníʼ íquenu xi zaníʼ íquecabe de laanu. Nga runi, galán gácunu lari jneza para cadi guninanu xconciencia binni, neca para laanu gastiʼ naca gácunu ni. Ni jma naquiiñeʼ gúninu nga gusisácanu Jiobá ne xquidxi ne gusihuínninu cayúninu xhiiñabe. Pur nga, galán gúninu stipa gusihuínninu rusisácanu Dios pur modo rácunu lari (1 Corintios 4:9; 10:31; 2 Corintios 6:3, 4; 7:1).

14. Xi naquiiñeʼ guinabadiidxanu laca laanu de modo ruzuchaahuinu ne modo rusianu laanu.

¹⁴ Ora chigucheechenu diidxaʼ o chuunu ti guendaridagulisaa naquiiñeʼ gaca xhábanu ne ládinu nayá. Nga runi galán guinabadiidxanu laca laanu: «Ñee ruuyadxí binni naa pur lari ni racuaʼ o pur nabiideʼ la? Ñee dede rituilú binni ora guʼyaʼ naa la? Xi jma risaca para naa: guzuchaahueʼ modo gapa gana la? o guzuchaahueʼ modo gusihuinneʼ cayuneʼ stipa para ugaanda xiixa dxiiñaʼ ndaaniʼ neza binni ridagulisaa» (Salmo 68:6; Filipenses 4:5; 1 Pedro 5:6).

15. Xiñee qué nusaana Jiobá ti lista lu Biblia ra niguixhe xi lari gácunu, ximodo gusianu laanu o ximodo guzuchaahuinu.

¹⁵ Jiobá qué nusaana diʼ ti lista lu Biblia ra niguixhe xi lari gácunu, ximodo gusianu laanu o ximodo guzuchaahuinu. Xiñee qué ñúnibe ni yaʼ. Purtiʼ qué ninádibe ñáxhabe laanu derechu ni nápanu para cuinu ne guiníʼ íquenu xi gúninu. Racaláʼdxibe gácanu binni nuu xpiaaniʼ ne ora guidúʼndanu Stiidxabe ganda gacané ni laanu gánnanu «uná nga jneza ne uná nga ni cadi jneza» (Hebreos 5:14). Peru ni jma racaláʼdxibe nga ni quixhe íquenu gúninu ca gusihuinni nadxiinu laabe ne nadxiinu cani nuu gaxha de laanu (biindaʼ Marcos 12:30, 31). Nuu stale modo gácunu lari ne stale modo guzuchaahuinu. Zanda chuunu ra cayaca ti asamblea stiʼ ca testigu stiʼ Jiobá ndaaniʼ intiica guidxi ne racá zadúʼyanu modo ruzuchaahuiʼ guiráʼ binni rié raqué ne pabiáʼ nayecheʼ riuucaʼ.

16. Xi rucaa espíritu stiʼ binni guidxilayú riʼ guni stale binni, ne xi guníʼ Jesús de laani. Xi naquiiñeʼ guinabadiidxanu laca laanu.

¹⁶ Espíritu stiʼ binni guidxilayú nabé riguite ni binni. Rucaa ni millón de binni guyubi gapa bidxichi ne xcaadxi cosa ni jma risaca ti guibánicaʼ jma nayecheʼ. Peru Jesús guníʼ: «Laguuya gá laatu ne enda ruyubi gapa bidxichi cadi nga si nga enda nabani sti binni» (Lucas 12:15). Biaʼsi nga ni guníʼ Jesús ca. Ca diidxaʼ ca cadi cusihuinni cani cadi lica gapa binni gastiʼ. Peru bisiidibe, para ganda guibani binni nayecheʼ ne guilá la? caquiiñeʼ guiziidiʼ de Dios ne guni ni nabe ne cadi gusaana de guyadxí ni jneza si ti ganda guni xhiiñaʼ Dios (Mateo 5:3; 6:22). Nga runi galán guinabadiidxanu laca laanu: «Ñee dxandipeʼ runeʼ cré guiráʼ cani bisiidiʼ Jesús la? o cudieeʼ lugar guneʼ ni na “bixhoze gola enda rusiguii”» (Juan 8:44). «Xi rusihuinni cani riniéʼ, ni naguixhe iqueʼ ugaandaʼ, guiráʼ cani runeʼ ne modo nabaneʼ yaʼ.» (Lucas 6:45; 21:34-36; 2 Juan 6.)

17. Bizeeteʼ xi ribeendú binni ora qué rusaana de guyadxí ni jneza si.

¹⁷ Jesús guníʼ «pur ni runi binni rihuinni tu laa» (Mateo 11:19). Yanna, xi ribeendú binni pa qué gusaana de guyadxí ni jneza si yaʼ. Tobi de laacani nga ratadxí ladxidóʼcabe ora gucheechecabe diidxaʼ (Mateo 11:29, 30). Cumu ruuyadxícabe ni jneza si la? qué riuucabe xizaa ne qué rapapécabe guendanagana nin yuubaʼ (biindaʼ 1 Timoteo 6:9, 10). Jma nápacabe tiempu para familia stícabe ne para guidagulisaanécabe ca xpinni Cristu, purtiʼ ricá íquecabe gápacabe ni caquiiñesícabe. Ne randa rásicabe galán purtiʼ gastiʼ ruchiiñaʼ laacabe (Eclesiastés 5:12). Nabánicabe nayecheʼ purtiʼ riquiiñecabe tiempu stícabe ne ca cosa stícabe para gacanécabe binni (Hechos 20:35). Laaca runi crécabe zacané Dios laacabe, nga runi ratadxí ladxidóʼcabe gánnacabe ni ne riuucabe galán (Romanos 15:13; Mateo 6:31, 32). Guiráʼ ndaayaʼ riʼ qué zanda siʼ binni cani.

18. Xi cuzeeteʼ Biblia de xhenemígunu, de cani riquiiñebe para gucaalube laanu ne modo cadxelasaanu laabe.

¹⁸ Pa chuʼnu gaxha de Dios ni nadxii laanu qué zanda diʼ guxheleʼ Binidxabaʼ laanu de gúninu ni na Dios, purtiʼ Binidxabaʼ qué racalaʼdxiʼ chuʼnu nayecheʼ ne ugaandanu ti guendanabani ni qué zaluxe (1 Pedro 5:8). Pablu na «cadi binni guidxilayú cadinde né nu, sínuque cadinde né nu ca xaíque sti ca binidxabaʼ, ca espíritu ni runi mandar ndaani guidxilayú cahui riʼ, ne irá ca espíritu malu ni nuu neza ibáʼ» (Efesios 6:12). Diidxaʼ griegu «cadinde» ni bizeeteʼ Pablu ca, riquiiñeʼ ni para guiníʼcabe ora cadxelasaa chupa binni. Pablu bizeeteʼ cadi binni guidxilayú nga ca xhenemígunu, sínuque «ca xaíque sti ca binidxabaʼ», «ca espíritu ni runi mandar» ne «ca espíritu malu». Xi riníʼ ndiʼ yaʼ. Ndiʼ rusihuinni maca naguixhe chaahuiʼ ca demonio ca modo gucaalucaʼ laanu.

19. Bizeeteʼ xi guiráʼ cosa maʼ bidii Dios laanu.

¹⁹ Neca rúninu stale cosa ni cadi jneza ne nuu tiru raca nagana para laanu gusaana de gúninu xiixa, peru zanda guni ganarnu. Ximodo yaʼ. Ra iquiiñenu «irá ni ma bidii Dios» laanu (Efesios 6:13). Lu Efesios 6:14-18 cayeeteʼ guiráʼ ca cosa ni maʼ bidii Dios laanu: «Lachuu listu casi soldadu. Ruxhii ca cinturón ndaani ca ti cadi uchiiña xhaba ca laacaʼ. Zacaca laatu lauzuhuaa chaahui lu ni dxandíʼ, ti cadi chuʼ ni uchiiña laatu. Laca rucaa cabe xiixa xpechu cabe para cadi tidi ni guniná laacabe. Zacaca laguni ni jneza ti qué ganda cuʼ xquichi binidxaba lade tu. Ne casi rucaa ñee soldadu zapatu para sa né ora chi tinde la? zacaca lachuu listu para güi tu stiidxa Cristu ni riguixhe dxí ladxidóʼ binni. Ne nuu ru ni riquiiñe cabe. Rinaaze cabe escudu para qué cui flecha laacabe. Zacaca lauzuhuaa dxiichi lu ni runi cre tu ti ganda usuíʼ tu ca flecha ni cá gui ni undaa binidxaba laatu. Ne laca riguu soldadu cascu ique ti ilá ique. Zacaca laatu, laguietenalaʼdxi ma bilá tu, ti cadi utiixhi binidxaba ique tu. Ne rinaaze soldadu espada para ucaa lú né. Laatu laaca, laucaa lú ne espada ni rudii Espíritu Santu laatu, ne nga nga stiidxa Dios. Ne cadi guiaana dxí tu de iníʼ né tu Dios. Lainaba ni naquiiñe inaba tu, ne laguni ni modo uluíʼ Espíritu Santu laatu».

20. Ximodo gadxé laanu de ca soldadu stiʼ guidxilayú riʼ.

²⁰ Cani maʼ bidii Dios laanu ca zacané cani laanu purtiʼ zeeda cani de Laabe. Peru galán cadi gusaana de iquiiñenu cani ti gacané cani laanu. Xiñee yaʼ. Purtiʼ guendaridinde ni nápanu riʼ qué riluxe ni casi ca guendaridinde ni rapa ca guidxi ca, purtiʼ cani ridinde ca randa riziiláʼdxicaʼ ora guiluxe ni. Laanu caquiiñeʼ gudxíʼlunu para cadi gátinu lu guendaridinde riʼ. Padxí guiluxe ni yaʼ. Zaluxe ni dxi gunitilú Dios guidxilayú stiʼ Binidxabaʼ riʼ ne ca demonio stiʼ ne guiábacaʼ ndaaniʼ ti lugar ni zeeda gaca casi ti bizé roʼ (Apocalipsis 12:17; 20:1-3). Nga runi, pa cayaca nagana para lii gusaanaluʼ ca cosa malu ni riuuláʼdxiluʼ gúniluʼ ne cani rucaa ládiluʼ lii gúniluʼ la? cadi guireeluʼ gana. Guiranu naquiiñeʼ gucueezanu laca laanu ti guzúʼbanu stiidxaʼ Jiobá (1 Corintios 9:27). Jma feu nga pa qué gúninu stipa pur gusaananu cani racalaʼdxiʼ beela ládinu.

21. Ximodo zanda guni ganarnu guendaridinde ni cadxaagalunu.

²¹ Ne stipa si stinu qué zanda diʼ guni ganarnu. Ngue runi Pablu bisietenalaʼdxiʼ laanu «cadi guiaana dxí[nu]» de guni orarnu Dios. Peru laaca naquiiñeʼ gucaadiáganu Dios. Ximodo nga yaʼ. Ra guidúʼndanu Stiidxabe ne cadi gusaana de guidagulisaanenu ca bíʼchinu ne ca bizáʼnanu ni cadxaagalú cani ridxaagalunu. Nga rusihuinni cadi laasinu cudxiilunu guendaridinde riʼ (Filemón 2; Hebreos 10:24, 25). Pa gúninu guiráʼ ni canabaʼ Dios laanu ca la? cadi zuni ganársinu guendaridinde riʼ, sínuque laaca zanda gusiénenu cani runi crenu ora gacalaʼdxiʼ tuuxa guiníʼ mal de laacani.

22, 23. 1) Xiñee naquiiñeʼ chuʼnu listu para gusihuínninu dxandíʼ cani runi crenu, ne xi naquiiñeʼ guinabadiidxanu laca laanu. 2) Xi zadúʼyanu lu sti capítulo ca.

²² Jesús guníʼ: «Ma ulee laatu de lade cabe, nga runi nanalaʼdxi cabe laatu» (Juan 15:19). Laanu ca xpinni Cristu, naquiiñeʼ chuʼnu listu para gusiénenu cani runi crenu ne gúninu ni né diidxaʼ nadóʼ ne stale respetu (biindaʼ 1 Pedro 3:15). Galán guinabadiidxanu laca laanu: «Ñee rieneʼ xiñee nuu tiru qué runi ca testigu stiʼ Jiobá ca cosa ni runi stale binni la? Ora quixhe iqueʼ cadi guneʼ xiixa ni runi stale binni, ñee runeʼ cré dxandíʼ ni rusiidiʼ Biblia ne mozo ni nuu xpiaaniʼ ne ni runi jneza la?» (Mateo 24:45; Juan 17:17). «Ora caquiiñeʼ guluéʼ nuaaʼ pur Jiobá, ñee nuaaʼ listu para gusihuinneʼ gadxé naa de xcaadxi binni ne riecheʼ pur cadi nacaʼ casi laacabe la?» (Salmo 34:2; Mateo 10:32, 33.)

²³ Peru Binidxabaʼ ruyubi xcaadxi modo para guicá espíritu stiʼ binni guidxilayú laanu. Casi maʼ bidúʼyanu ca, nuu tiru riquiiñebe ca cosa ni riuuláʼdxinu gúninu para uquiindebe laanu gucheʼnu. Ora cuinu xiixa quítenu o chizanu paxaraa para chuʼnu nayecheʼ, xi zacané laanu guyúbinu tobi ni chuulaʼdxiʼ Dios ni zanda gacané laanu ne cadi guchiiñaʼ xconciéncianu laanu yaʼ. Lu sti capítulo ca zadúʼyanu ni.