Biʼniʼ adorar Dios modo riuulaʼdxiʼ

1, 2. ¿Xi decisión naquiiñeʼ guicaanu guiranu?

RA CAYUNI estudiarluʼ Biblia, maʼ biziidiluʼ nuu stale binni riníʼ runi adorar Dios, peru rúnicaʼ ne rusiidicaʼ cosa ni nanaláʼdxibe (2 Corintios 6:17). Nga runi, cayabi Jehová laanu guireʼnu de ndaaniʼ religión falsu, «Babilonia guidxi roʼ» (Apocalipsis 18:2, 4). Cada tobi de laanu caquiiñeʼ guicaa ti decisión: pa zuni servirnu Dios casi modo racalaʼdxiʼ o casi modo racaláʼdxinu.

² Pa maʼ bireeluʼ o maʼ bisaanaluʼ ti religión falsu la? maʼ gucuaaluʼ ti decisión nabé galán. Peru zándaca nuuruʼ xiixa práctica o costumbre stiʼ religión falsu ni riuuláʼdxiruluʼ ne qué ganda cueeluʼ ni de ndaaniʼ ladxidoʼloʼ. Guidúʼyanu caadxi de laacani ne xiñee risaca guidúʼyanu ca ni modo ruuyaʼ Jehová ca ni.

 3. a) ¿Xiñee zándaca gaca nagana para caadxi binni gusaana de guni adorar bidóʼ? b) ¿Ñee rusiidiʼ Biblia jneza iquiiñeʼ binni bidóʼ para guni adorar Dios la?

³ Nuu binni maʼ xadxí riquiiñeʼ bidóʼ o altarhuiiniʼ ra lidxi para guni adorar Dios. Pa zacá rúniluʼ, zándaca guiníʼ íqueluʼ cadi jneza nga guni adorárcabe Dios sin ca cosa ca. Peru cadi guiaandaʼ lii, cusiidiʼ Jehová laanu ximodo racalaʼdxiʼ guni adorarnu laa. Ne Biblia ná qué racalaʼdxiʼ Jehová iquiiñenu bidóʼ para guni adorarnu laa (biindaʼ Éxodo 20:4, 5; Salmo 115:4-8; Isaías 42:8; 1 Juan 5:21).

 4. a) ¿Xiñee cadi caquiiñeʼ guni adorarnu ca gueʼtuʼ? b) ¿Xiñee gudxi Jehová ca israelita cadi guyúbicaʼ guiníʼnecaʼ ca gueʼtuʼ?

⁴ Ndaaniʼ stale guidxi rúnicabe saa para ca gueʼtuʼ. Zándaca caadxi binni riquiiñeʼ tiempu, stipa stiʼ para gusiéchecaʼ ca binni ni maʼ guti. Dede runi adorárcabe laacaʼ. Peru maʼ bizíʼdinu cadi caquiiñeʼ gúninu ni, purtiʼ qué zanda gacané nin guniná ca gueʼtuʼ ca laanu. Ne cadi nabánicabe sti lugar. Ne pa gacalaʼdxiʼ tuuxa guiniʼné laacabe zanda chuʼ lu peligru, purtiʼ cadi de familia stiʼ ni maʼ guti nga zeeda xiixa mensaje, sínuque zeeda ca ni de ca demonio. Nga runi, gudxi Jehová ca israelita cadi guyúbicaʼ guiníʼnecaʼ ca gueʼtuʼ ne gucaanacaʼ intiica práctica ni zeeda de ca demonio (Deuteronomio 18:10-12). (Biindaʼ nota 26, «Espiritismo ne caadxi modo runi practicárcabe ocultismo» ne 31, «Ca demonio»).

 5. ¿Xi zanda gacané lii para gusaana de guni adorarluʼ gueʼtuʼ o iquiiñeluʼ bidóʼ ora guni adorarluʼ Dios?

⁵ Pa runi adorarluʼ ca gueʼtuʼ o riquiiñeluʼ bidóʼ para guni adorarluʼ Dios, ¿xi zanda gacané lii para gusaana de gúniluʼ ca cosa riʼ yaʼ? Zanda gúʼndaluʼ Biblia ne guiníʼ íqueluʼ ximodo ruuyaʼ Jehová ca ni. Purtiʼ ribixhiláʼdxibe ca práctica ne ca costumbre ca (Deuteronomio 27:15). Gunabaʼ Jehová guiráʼ dxi gacané lii gúʼyaluʼ ca cosa ni bizéʼtenu riʼ modo ruuyabe ca ni ne guni adorarluʼ laabe modo racaláʼdxibe (Isaías 55:9). Zudii Jehová lii stipa ni caquiiñeluʼ para gusáʼbiluʼ ca cosa ni zeeda de religión falsu.

 6. ¿Xiñee gulí binni 25 de diciembre para guni celebrar dxi gule Jesús?

⁶ Navidad nga tobi de ca saa ni jma runi binni lu Guidxilayú, ne stale binni riníʼ ique caquiiñeʼ gaca ni para guni celebrarcaʼ dxi gule Jesús. Peru saa riʼ zeeda ni de religión falsu. Ti enciclopedia cusiene 25 de diciembre biʼniʼ celebrar ca binni de Roma ni qué runi adorar Dios dxi gule Gubidxa. Gucalaʼdxiʼ ca xaíque yuʼduʼ ñaca ca binni ni qué runi adorar Dios que cristianu. Nga runi, gudíxhecabe guni celebrárcabe dxi gule Jesús 25 de diciembre neca cadi dxi ca gúlebe (Lucas 2:8-12). Peru ca discípulo stiʼ Jesús qué ñuni celebrarcaʼ Navidad. Casi ná ti libru ni láʼ Los orígenes sagrados de las cosas profundas, despué de chupa gayuaa iza de gule Cristu, «guirutiʼ ñanna padxí gule Jesús ne huaxiéʼ si tu bizaalaʼdxiʼ ni». Ne bizulú guca celebrar Navidad, jma de chonna gayuaa iza despué de guti Jesús.

 7. ¿Xiñee qué runi celebrar ca ni dxandíʼ xpinni Cristu Navidad?

⁷ Stale nanna paraa biasastí Navidad ne ca costumbre stiʼ, casi gúnicabe guendaró para gonécabe familia stícabe o gudiicabe regalu. Guyuu ti tiempu, ndaaniʼ guidxi Inglaterra ne ndaaniʼ caadxi guidxi stiʼ Norteamérica guca prohibir guni celebrar binni Navidad purtiʼ zeeda ni de ca binni ni qué runi adorar Dios. Guiráʼ tu biʼniʼ celebrar ni gucuaacaʼ ti castigu. Peru despué bizulú biʼniʼ celebrárcabe Navidad sti biaje. ¿Xiñee qué runi celebrar ca ni dxandíʼ xpinni Cristu Navidad yaʼ? Purtiʼ racaláʼdxicaʼ chuulaʼdxiʼ Dios guiráʼ ni rúnicaʼ.

8, 9. ¿Xiñee qué ñuni celebrar ca primé xpinni Cristu dxi rusaacaʼ iza?

⁸ Sti saa ni nabé runi binni nga dxi rusaa iza. ¿Ñee caquiiñeʼ guni celebrar ca xpinni Cristu ni la? Lu Biblia riete ca binni ni qué ñuni adorar Jehová nga ca ni biʼniʼ celebrar dxi rusaa iza (Génesis 40:20; Marcos 6:21). Lu ca saa riʼ runi adorar binni dios falsu. Nga runi, biiyaʼ ca primé xpinni Cristu ca saa que casi ti «costumbre ni biʼniʼ ca binni ni qué runi adorar Dios ni dxandíʼ» ne qué ñúnicabe ni (Las cosas nuestras de cada día).

⁹ Ca binni de Roma ne Grecia de dxiqué biʼniʼ crecaʼ riuu ti espíritu gaxha de binni ora gale ne rapa espíritu riʼ binni ca biaʼ dxi nabani. «Espíritu riʼ riuu gaxha de dios ni rusaa iza dxi ca rusaa binni ca iza» (The Lore of Birthdays [Ni runi cré binni dxi rusaacabe iza]). Nga runi ca binni ni qué ñuni adorar Dios biʼniʼ crecaʼ caquiiñeʼ guni celebrar binni dxi rusaa iza para gapa espíritu ca laa.

10. ¿Xiñee qué runi celebrar ca xpinni Cristu de tiempu riʼ dxi rusaacaʼ iza?

¹⁰ ¿Ñee rábiluʼ riuulaʼdxiʼ Jehová ca saa ni zeeda de religión falsu la? (Isaías 65:11, 12). Coʼ ¿njaʼ? Nga runi, ca xpinni Cristu de tiempu riʼ cadi caquiiñeʼ guni celebrarcaʼ dxi rusaacaʼ iza nin xcaadxi saa ni zeeda de religión falsu.

11. a) ¿Xiñee runi celebrar binni caadxi saa ni zeeda de religión falsu? b) ¿Xii nga ni jma naquiiñeʼ guisaca para lii?

¹¹ Stale binni nanna paraa biasastí Navidad ne xcaadxi saa peru runi celebrarcaʼ ni. Riníʼ íquecaʼ racané ca saa ca para chúʼnecaʼ familia sticaʼ tobi si. ¿Ñee zacá riníʼ íqueluʼ la? Cadi malu diʼ nga chuʼné binni familia stiʼ tobi si. Jehová nga bizáʼ familia ne racalaʼdxiʼ chuʼnu tobi si né familia stinu (Efesios 3:14, 15). Peru jma naquiiñeʼ guisaca amistad nápanu né Jehová que chúʼnenu familia stinu ne guni celebrarnu xiixa saa ni zeeda de religión falsu. Nga runi, sicaríʼ bicaa apóstol Pablo: «Laguuyaʼ chaahuiʼ xii nga ni riuulaʼdxiʼ Señor» (Efesios 5:10).

12. ¿Xi saa nga qué riuulaʼdxiʼ Jehová?

¹² Stale binni riníʼ ique qué risaca ganna binni paraa biasastí xiixa saa. Peru cadi zacá riníʼ ique Jehová. Qué riuuláʼdxibe nin ti saa runi ca religión falsu nin ca saa ni raca para gusisácacabe binni o ti guidxi. Guzéʼtenu ti ejemplu, ca binni de Egipto biʼniʼ celebrarcaʼ stale saa para guni adorarcaʼ ca dios falsu sticaʼ. Despué de biree ca israelita de Egipto, bíʼnicabe ti saa ni runi ca binni de Egipto ne guníʼcabe nácani «ti saa para Jehová». Peru biʼniʼ castigar Jehová laacabe pur ni bíʼnicabe que (Éxodo 32:2-10). Nga runi, caquiiñeʼ gúninu ni guníʼ apóstol Pablo: «Cadi cánatu ca cosa ni nabiidiʼ» (biindaʼ 2 Corintios 6:17).

13. ¿Xi pregunta zándaca gúniluʼ ora gusaana de guni celebrarluʼ ca saa ni qué riuulaʼdxiʼ Dios?

¹³ Ora gusaana de guni celebrarluʼ ca saa ni qué riuulaʼdxiʼ Dios, zándaca gúniluʼ stale pregunta. Casi ca pregunta riʼ: «¿Xi caquiiñeʼ guneʼ pa guinabadiidxaʼ ca compañeru stinneʼ naa xiñee qué runeʼ celebrar Navidad? ¿Xi guneʼ pa gudiicabe naa ti regalu de Navidad? ¿Xi guneʼ pa málasi gabi xheelaʼ naa gúnidu ti saa ni qué riuulaʼdxiʼ Dios yaʼ? ¿Ximodo zanda gacaniáʼ ca xiiñeʼ para cadi chuʼcaʼ triste purtiʼ qué runi celebrardu xiixa saa o lanibidóʼ?».

14, 15. ¿Xi caquiiñeʼ gúniluʼ pa gabi tuuxa lii feliz año o gudii lii ti regalu?

¹⁴ Nabé risaca guiníʼ íquenu ante guininu ne gúninu xiixa cosa. Casi pa gábicabe lii feliz año, cadi naquiiñeʼ guni ignorarluʼ laabe. Zanda guiniʼluʼ «xquixe peʼ lii». Ne pa tuuxa racalaʼdxiʼ ganna jma la? zanda gusiéneluʼ laa xiñee qué runi celebrarluʼ xiixa saa. Peru caquiiñeʼ gácanu nadóʼ ne guininu né respetu. Biblia ná: «Siempre laguiníʼ diidxaʼ ni guiaba binni, ne cásica riaba zidi lu guendaró para gaca nanixe, zacaca laguni né stiidxatu, ti gánnatu ximodo guicábitu cada binni» (Colosenses 4:6). Zanda gusiéneluʼ binni riuuláʼdxiluʼ guidxaagaluʼ xcaadxi ne gudiiluʼ regalu laacaʼ, peru qué rúniluʼ ni ora cayaca xiixa saa.

¹⁵ ¿Xi caquiiñeʼ gúniluʼ pa gudii tuuxa lii ti regalu? Cadi zeeda ti lista lu Biblia ra cá xi peʼ caquiiñeʼ gúninu, peru cayabi ni laanu caquiiñeʼ gápanu ti conciencia nayá (1 Timoteo 1:18, 19). Zándaca binni ni cudii regalu ca lii qué ganna pa qué runi celebrarluʼ saa ca. O zándaca gabi lii: «Nannaʼ qué runi celebrarluʼ saa riʼ, peru racalaʼdxeʼ gudieeʼ lii regalu riʼ». Caquiiñeʼ gúʼyaluʼ pa zacaaluʼ regalu ca o coʼ. Peru naquiiñeʼ chuʼluʼ cuidadu cadi guchiiñaʼ conciencia stiluʼ lii pur decisión ni guicaaluʼ. Qué racaláʼdxinu gúninu xiixa ni guxheleʼ laanu de Jehová.

16. ¿Xi caquiiñeʼ gúniluʼ pa racalaʼdxiʼ familia stiluʼ guni celebrar ti saa ni qué riuulaʼdxiʼ Dios?

¹⁶ ¿Xi caquiiñeʼ gúniluʼ pa racalaʼdxiʼ familia stiluʼ guni celebrar ti saa ni qué riuulaʼdxiʼ Dios? Cadi tinde diidxaneluʼ laacabe. Cadi guiaandaʼ lii nápacabe derechu de cuícabe xi gúnicabe. Guniʼné laacabe né diidxaʼ nadóʼ ne biʼniʼ respetar decisión stícabe, cásica racaláʼdxiluʼ guni respetárcabe ca decisión stiluʼ (biindaʼ Mateo 7:12). Peru ¿pa racalaʼdxiʼ familia stiluʼ chuʼluʼ né laacaʼ ora cayúnicaʼ xiixa saa yaʼ? Ante guicaaluʼ ti decisión, gunabaʼ Jehová gacané lii gúniluʼ ni jneza. Guníʼ ique ni cazaacaluʼ ca ne biyubi información ni zanda gacané lii. Cadi guiaandaʼ lii ni jma racaláʼdxiluʼ nga gusiécheluʼ ladxidóʼ Jehová.

17. ¿Xi zanda gúniluʼ para cadi chuʼ ca xiiñiluʼ triste ora gúʼyacaʼ cayuni binni ni qué runi adorar Dios xiixa saa?

¹⁷ ¿Xi zanda gúniluʼ para gacaneluʼ ca xiiñiluʼ cadi chuʼcaʼ triste ora gúʼyacaʼ cayuni binni ni qué runi adorar Dios xiixa saa? Gatigá biʼniʼ xiixa cosahuiiniʼ para laacabe. Laaca zanda gudiiluʼ laacabe xiixa regalu. Tobi de ca regalu jma galán zanda gudiiluʼ laacabe nga tiempu ne cariñu stiluʼ.

18. ¿Xiñee caquiiñeʼ chuunu ca reunión ni runi ca testigu stiʼ Jehová?

¹⁸ Pa racaláʼdxinu chuulaʼdxiʼ Jehová ni rúninu, caquiiñeʼ guireʼnu de religión falsu ne gucáʼnanu ca costumbre ne tradición ni zeeda de laacani. Ne caquiiñeʼ gúninu ni runi religión ni dxandíʼ. ¿Ximodo yaʼ? Ti modo zanda gúninu ni nga ra cadi guiáʼdxanu ca reunión ni runi ca testigu stiʼ Jehová (biindaʼ Hebreos 10:24, 25). Nabé risaca chuunu reunión purtiʼ racá runi adorarnu Jehová (Salmo 22:22; 122:1). Ne rigúʼsaanu gana laanu (Romanos 1:12).

19. ¿Xiñee risaca guiníʼneluʼ xcaadxi binni ni maʼ biziidiluʼ de lu Biblia?

¹⁹ Para gusihuínniluʼ rúniluʼ ni rusiidiʼ religión ni dxandíʼ, caquiiñeʼ guiníʼneluʼ xcaadxi binni ni maʼ biziidiluʼ de lu Biblia. Stale binni nuu xizaa pur guiráʼ ca cosa malu ni cazaaca lu Guidxilayú. Zándaca runibiaʼluʼ tuuxa binni ni cayuni sentir zacá. Nga runi, guniʼné laacabe de esperanza sicarú ni chigudii Dios laanu. Pa qué gusaana de cheluʼ reunión ne gábiluʼ xcaadxi binni ni rusiidiʼ Biblia la? zudiiluʼ cuenta maʼ qué racaláʼdxiluʼ gúniluʼ guiráʼ costumbre ni zeeda de religión falsu. Zanda chuʼluʼ seguru ziuuluʼ nayecheʼ ne zaguu Jehová ndaayaʼ stipa ni cayúniluʼ purtiʼ cayuni adorarluʼ laa modo riuulaʼdxiʼ (Malaquías 3:10).