¿Xiñee nabé cayuni sufrir binni?

1, 2. ¿Xi pregunta runi stale binni?

BINITILÚ ti tsunami ti guidxi. Bizulú bicuaagu ti hombre ndaaniʼ ti yuʼduʼ, gucaná stale binni ne guti xcaadxi. Guti ti gunaa ni napa cáncer ne bisaanabe gaayuʼ xiiñibe stubi.

² Ora rizaaca xiixa desgracia casi ca ni bizéʼtenu riʼ, stale binni rinabadiidxaʼ xiñee nabé nanaláʼdxisaa binni ne nuu stale sufrimientu. ¿Ñee laaca huayúniluʼ pregunta riʼ la?

3, 4. a) ¿Xi gunabadiidxaʼ Habacuc Jehová? b) ¿Xi gudxi Jehová laabe zuni?

³ Lu Biblia zeeda ejemplu stiʼ caadxi xpinni Dios ni laaca biʼniʼ ca pregunta ni bizéʼtenu riʼ. Ti ejemplu nga profeta Habacuc, gunabadiidxabe Jehová: «¿Xiñee rucaaluʼ naa guuyaʼ cosa malu? ¿Xiñee cudiiluʼ lugar guquiichinácabe binni? ¿Xiñee nabé cunitilusaa binni ne cayuuyaʼ cadíndecaʼ? ¿Ne xiñee cadale binni ni cayuninasaa ne cucaalusaa pue?» (Habacuc 1:3).

⁴ Biblia ná gudxi Jehová Habacuc zuni xiixa para guni chaahuiʼ ca guendanagana que (Habacuc 2:2, 3). Guizáʼ nadxii Jehová binni. Biblia ná rizaalaʼdxiʼ Dios laanu (1 Pedro 5:7). Ne jma riuubaʼ ladxidoʼbe que laanu ora ruuyabe cayacaná binni (Isaías 55:8, 9). Peru ¿xiñee nabé cayuni sufrir binni guidxilayú yaʼ? Guidúʼyanu xiñee.

 5. a) ¿Xi riníʼ ca xaíque yuʼduʼ ora runi sufrir binni? b) ¿Ne xi rusiidiʼ Biblia?

⁵ Stale sacerdote, pastor ne xaíque yuʼduʼ nacaʼ runi sufrirnu purtiʼ nga nga ni racalaʼdxiʼ Dios. Zándaca riníʼcabe Dios nga riguixhe xi guizaacanu ne dede gaca xiixa desgracia. Ne laaca rusiidicabe qué zanda guiénenu xiñee cayacananu. Ne xcaadxi ná rátinu para chuunu guibáʼ ra nuu Dios. Casi ora gatiʼ tuuxa baʼduhuiiniʼ riníʼcabe ziné Dios laabe purtiʼ caquiiñeʼ sti ángel guibáʼ. Peru cadi dxandíʼ guiráʼ ndiʼ. Qué lica ruseendaʼ Dios cosa malu luguiáʼ binni. Biblia ná: «¡Qué ziuu dxi guiníʼ íquenu zuni Dios ni dxandíʼ cosa malu, ne guni ni jma napa poder cosa ni cadi jneza!» (Job 34:10).

 6. ¿Xiñee riníʼ binni Dios napa donda pur guiráʼ ca yuubaʼ ni nuu lu Guidxilayú?

⁶ Stale binni riníʼ Dios napa donda pur guiráʼ ca yuubaʼ ni nuu, purtiʼ riníʼ íquecaʼ laabe cayuni mandarbe Guidxilayú. Peru lu capítulo 3 bizíʼdinu Binidxabaʼ nga cayuni mandar Guidxilayú.

7, 8. ¿Xiñee cayuni sufrir stale binni lu Guidxilayú riʼ?

⁷ Biblia ná «guidubi guidxilayú riʼ nuuni lu náʼ Binidxabaʼ» (1 Juan 5:19). Binidxabaʼ, ni cayuni mandar Guidxilayú riʼ, nabé malu laa ne runi cosa ni qué iquiiñeʼ. Caguítebe «guiráʼ binni guidxilayú» (Apocalipsis 12:9). Nga runi, stale binni runi ni rúnibe ne cumu laabe cayuni mandarbe Guidxilayú la? stale binni rusiguii, nanaláʼdxisaa ne runi cosa malu.

⁸ Guidúʼyanu sti razón ni rusihuinni xiñee cayuni sufrir binni. Despué de bidxiideche Adán ne Eva Dios, gulené ca xiiñicabe pecadu. Pur nga rúnicaʼ cosa malu ne runinacaʼ xcaadxi binni. Ne stale biaje racaláʼdxicaʼ guisácacaʼ jma que xcaadxi. Nga runi ridíndecaʼ, riecaʼ lu guerra ne ruquiichinacaʼ xcaadxi binni (Eclesiastés 4:1; 8:9). Guionna razón pur runi sufrirnu nga purtiʼ «rizaacanu cosa ni cadi caníʼ íquenu ne ora cadi cabézanu ni» (Eclesiastés 9:11). Ndiʼ riníʼ zándaca gápanu ti accidente o guizaacanu xiixa cosa malu purtiʼ nuunu ti lugar ra cadi naquiiñeʼ chuʼnu.

 9. ¿Xiñee nuunu seguru napa Dios ti razón nabé risaca para gudii lugar guni sufrir binni?

⁹ Cadi Jehová diʼ ruseendaʼ xiixa guendananá para guni sufrir binni. Cadi laabe nápabe donda raca guerra, ridinde binni, nuu cosa ni cadi jneza, raca xu roʼ, rilaahua binni ne xcaadxi desastre. Peru zándaca guiníʼ íqueluʼ: «Pa Jehová nga ti binni ni jma napa poder ¿xiñee qué cueebe ca cosa malu riʼ ya?». Nánnanu guizáʼ nadxii Jehová laanu, nga runi nápabe ti razón nabé risaca para gudiibe lugar guni sufrir binni (1 Juan 4:8).

10. ¿Xi cosa cadi jneza guníʼ Binidxabaʼ de Jehová?

¹⁰ Bisiguii Binidxabaʼ Adán ne Eva ndaaniʼ jardín de Edén. Guniʼbe cadi jneza runi mandar Jehová. Ne gúdxibe laacaʼ napa Dios xiixa cosa galán ni qué naʼ gudii laacabe. Gucalaʼdxiʼ Binidxabaʼ nucaa laacabe guiníʼ íquecabe jma galán runi mandar que Jehová ne cadi caquiiñecabe Dios (Génesis 3:2-5). (Biindaʼ nota 27, «Derechu ni napa Jehová para guni mandar»).

11. ¿Xi pregunta caquiiñeʼ guicábinu?

¹¹ Qué nuzuubaʼ Adán ne Eva stiidxaʼ Jehová ne bidxiidéchecaʼ laabe. Guníʼ íquecabe nápacabe derechu de cuícabe xii nga ni jneza ne ni coʼ. ¿Xi ñanda ñuni Jehová para nusihuinni cadi jneza ni caníʼ ique Adán ne Eva ne laasi nga nanna xii nga ni jma jneza para laanu yaʼ?

12, 13. a) ¿Xiñee qué nunitilú Jehová Adán ne Eva oraqueca? b) ¿Xiñee cudii Jehová lugar guni mandar Binidxabaʼ Guidxilayú ne guni mandar binni laca laa?

¹² Ni gudixhe ique Jehová nga ñaca Guidxilayú riʼ ti paraísu ne nibani ca xiiñiʼ Adán ne Eva ndaaniʼ ni. Ne zuni cumplir Jehová ni maʼ gudixhe ique neca gacalaʼdxiʼ Binidxabaʼ gucueeza laabe (Génesis 1:28; Isaías 55:10, 11). Pur nga qué nunitilú Jehová Adán ne Eva oraqueca, sínuque bidiibe lugar gápacaʼ xiiñicaʼ. Zacá zanda cuí ca xiiñiʼ Adán ne Eva tu guni mandar laacaʼ.

¹³ Nezalú millón de ángel guníʼ Binidxabaʼ mal de Jehová (Job 38:7; Daniel 7:10). Ngue runi bidii Jehová lugar tidiʼ tiempu para guihuinni pa dxandíʼ napa Binidxabaʼ razón. Ne laaca bidiibe lugar tidiʼ tiempu para guni mandarsaa binni ndaaniʼ guidxilayú stiʼ Binidxabaʼ riʼ. Zacá zahuinni pa zanda guni mandarsaa binni laa sin gacané Dios laacaʼ.

14. ¿Xi maʼ bihuinni ra maʼ gudiʼdiʼ tiempu?

¹⁴ Raca mil de iza de cayuni mandarsaa binni laca laa peru guiráʼ ca gobiernu huayápacabe qué huabeendú gastiʼ. Nga rusihuinni rusiguii Binidxabaʼ ne caquiiñeʼ binni gacané Dios laacaʼ. Ngue runi dxandíʼ ni guníʼ profeta Jeremías ora bicaa: «Nannaʼ dxicheʼ, Jehová, cadi lu náʼ diʼ binni nuu neza stiʼ. Cadi lu náʼ diʼ binni nuu guni mandar ra guzuhuaa ñee» (Jeremías 10:23).

15, 16. a) ¿Xiñee maʼ xadxí cudii Jehová lugar guni sufrir binni? b) ¿Xiñee qué huabee Jehová guiráʼ ca guendanagana ni huayuni Binidxabaʼ?

¹⁵ ¿Xiñee maʼ xadxí cudii Jehová lugar guni sufrir binni yaʼ? ¿Xiñee cadi cucueeza Dios de guizaaca cosa malu? Maʼ bidii Jehová lugar tidiʼ tiempu para guihuinni qué ganna Binidxabaʼ guni mandar. Stale tipu de gobiernu huayapa binni peru qué huabeenducaʼ gastiʼ. Neca tiempu riʼ guizáʼ maʼ avanzadu nuu ciencia ne tecnología, jmaruʼ si nuu cosa ni cadi jneza, guendapobre, guerra ne cosa malu. Qué zanda diʼ guni mandar binni jneza pa qué gacané Dios laacaʼ.

¹⁶ Ne laaca cadi cayuni chaahuiʼ diʼ Jehová ca guendanagana ni nuu pur Binidxabaʼ, purtiʼ pa ñúnibe ni nusihuínnibe cayacanebe gobiernu stiʼ Binidxabaʼ, ne qué ziuu dxi gúnibe nga. Ne laaca niníʼ ique binni zanda guni mandársaacaʼ laacaʼ. Peru qué ziuu dxi gacané Dios laacaʼ, purtiʼ cadi dxandíʼ zanda guni mandársaacaʼ laacaʼ jneza, ne Jehová qué rusiguii (Hebreos 6:18).

17, 18. ¿Xi zuni Jehová para guni chaahuiʼ guiráʼ ca cosa malu huayuni Binidxabaʼ?

¹⁷ Zanda guni chaahuiʼ Jehová guiráʼ ca cosa malu ni huayuni Binidxabaʼ ne binni. Gastiʼ ni nagana para laabe. Nanna Jehová padxí guihuinni cadi dxandíʼ guiráʼ ni guníʼ Binidxabaʼ. Ne óraca zúnibe Guidxilayú riʼ ti paraísu, casi maca gudixhe íquebe ni. «Guiráʼ ca ni nuu ndaaniʼ baʼ» ziásacaʼ (Juan 5:28, 29). Maʼ qué zaca huará binni ne maʼ qué zati. Zaquiiñeʼ Jehová Jesús «para gunitilú guiráʼ ni cayuni Binidxabaʼ», o para gunduuxeʼ guiráʼ ca cosa malu huayuni Binidxabaʼ (1 Juan 3:8). Laga guizaaca guiráʼ ndiʼ, rudiʼnu xquixe peʼ Jehová purtiʼ napa paciencia laanu. Ne pur nga, nápanu oportunidad de gunibiaʼnu laabe ne cuinu pa zuni mandarbe laanu (biindaʼ 2 Pedro 3:9, 10). Ne laaca racané Jehová laanu guni huantarnu ora runi sufrirnu (biindaʼ 1 Corintios 10:13).

¹⁸ Qué runi obligar Jehová laanu cuinu laa casi gobernante stinu. Maʼ bidiibe laanu ti regalu guizáʼ galán: cuinu xi gúninu. Guidúʼyanu pabiáʼ galán regalu riʼ.

19. a) ¿Xi regalu galán bidii Jehová laanu? b) ¿Xiñee caquiiñeʼ gudiʼnu xquixe peʼ Jehová pur bidii laanu regalu riʼ?

¹⁹ Maʼ bidii Jehová lugar laanu cuinu xi gúninu. Ne pur regalu galán riʼ zanda gánnanu xi gúninu né xquendanabáninu ne cuinu pa zúninu ni ná Jehová o coʼ. Peru maʼ gadxé laanu de ca maniʼ ca, purtiʼ laacaʼ rúnicaʼ xiixa cosa pur instinto (Proverbios 30:24-28). Ne laaca cadi casi máquina laanu ni runi ca cosa ni maca nexheʼ guni. Zanda cuinu tu clase binni racaláʼdxinu gácanu, tu gaca xhamígunu ne xi guninenu xquendanabáninu. Racalaʼdxiʼ Jehová guibáninu nayecheʼ.

20, 21. ¿Xii nga ni jma galán cuiluʼ gúniluʼ yanna?

²⁰ Racalaʼdxiʼ Jehová gannaxhiinu laa (Mateo 22:37, 38). Nácabe casi ti padre ni riecheʼ stale ora gabi xiiñiʼ laa nadxii laa de guidubi ladxidóʼ, ne cadi purtiʼ cucaacabe laa gúnini. Rudii Jehová lugar cuinu pa zúninu ni ná o pa coʼ. Bidxiideche Binidxabaʼ, Adán ne Eva Jehová. Yanna lii yaʼ, ¿ximodo iquiiñeluʼ regalu bidii Dios lii?

²¹ Ni jma galán gúniluʼ yanna nga cuiluʼ gúniluʼ ni ná Jehová. Millón de binni maʼ gulí guni ni ná Jehová ne gudxiideche Binidxabaʼ (Proverbios 27:11). Casi maca bizíʼdinu, zabee Dios guiráʼ ca sufrimientu ne zúnibe Guidxilayú riʼ ti paraísu. ¿Xi zanda gúniluʼ para chuʼluʼ racá yaʼ? Lu sti capítulo ca zacábinu pregunta riʼ.