Mo Degeturo ho Yekova Ayugopai ni Foro ti Regbo Adunguratise

1-2. (a) Waigu Yekova angerafuo agu azingo nga ga gako aboro areme rogo toro yo? (Atambuahe 23:​1, 2, 5) (b) Ginipai ani nika sakapai tipaha rogo gi kekeapai re?

AREME, Yekova nafu badungu ariahe furani nga ga toro. Ani ima rengba ka idakuti gupai Davide apehe ho ko abibia ni ki ya: “Yekova nga babandare, zingohe amánga nga re te.”—Oni gedi Atambuahe 23:​1, 2, 5.

² Gene sa Yekova afu agu ariahe nga ga toro furani areme ngbaha nga vurube gu gaani adunguratise nga ga dungurati. Dedede, pati agi adunguratise re, ani ninaagia agu apai ani aima wirikaha mbata kusayo. Ka si vura du nga ani ‘ni nyakasinyakasi rani rogo rengo yo,’ ani naida aida na agi atingidapai re. (2 Pet. 1:12) Ono tie, ho duhe ni nga i nafura tipa gupai pati dunguratise ani aima giaha bara dunguhe, ya mo si ni kpakarakpakaraha foro tipa mo degeturo kuti ni? Gi kekeapai re ima rengba ka undo ro. Ani nika sakapai tipa ndu gupai si aida ani degeturani ti ni wenengai ti regbo adunguratise. Ani nika bi wai a agu aboro nayugopai rogo dungurati narengbe ka undo kura aboro tipa i degetuyo. Na ani nika sakapai tipa kura aberãpai nga gu rengbe ka undo rani tipa ani du ni wene agipai. Ono ni bambataha, ani nika karagapai kuti gu sanahe nga: Da du nzunzu ninaayugopai furani ti regbo adunguratise?

YEKOVA DU NINAAYUGOPAI FURANI TI REGBO ADUNGURATISE

3. Waigu Yekova afura furani, na waigu gako amoyambu amangasunge wenengai na Fugoko?

³ Yekova nafura furani vurube Fugoko nga Baibiri. (2 Tim. 3:​16, 17) Yesu aima rugatiko na gipai re. Ko amangisunge na Fugo Mbori ngba wene gene si ki sa agu aboro naadegatuyo fuko i sanahe nga: “Gi kumba re ko awiri pa ina pa apai wãi, wa ko awirika nga pai ya?” (Yo. 7:15) Agu aboro nadu na umbasitise na naaida ka wirikapai tipa Yekova adu na bakere ngbarago. Agu aKristano nadu ti rago amokedi wa, aPauro na Aporo, aima wirika ga Yesu kpiapai. I anaadiapai dedede rogo Fugo Mbori yo ka undo gu kura aboro naaida ka rugatiyo na gupai Yekova aida i mangihe. (Amo. 17:​2, 3; 18:​24, 28) Wa du ani ni aDezire Yekova, ani ima ino gupai nga ani ninaa maamburu gaani awaraga, agu ambakadapai nga ga terevizioni, agumbapai, na avidio rii Baibiri. Dungu agu agino ninaaye tipa gaani dunguratise nidu na bakere ngbarago ka bi wai aDezire Yekova amangasunge na Baibiri ti regbo gayo adunguratise. Agu aboro du na papara asunge beyo ti regbo adunguratise ni naamangasunge na Baibiri. I naageda nga kina gedigedi Baibiri sa kini mbuhe te, ono i naundo aboro dunduko tipa i rugutiyo na ni, na i ki ini wai rengbe yo ka mangapai kutini.—Rk. 24:32.

4. Ginipai agu afugo nga “gia” gbiati “degatue” ayugoho?

⁴ Ho aboro anaagia agu afugo ni nga “gia” na “degatue” rogo gu fugo i ake Baibiri rogoho, i aima ino gupai nga rogoyo adu dedede nga ka giasangba. Sidu tie, ho Yekova afura ni furani vurube Fugoko ti regbo adunguratise na ani kini rugutirani na gupai ko aidaha, si taata furani tipa ani gisangbako. Ani ima rengba kadu na gu kido nga Yekova na ngbarago na ani ho ani adegaturani ni ti regbo adunguratise na kini mangipai kuti agu apai ani awirikaha yo.—Snz. 27:11.

TIPAGINE SI AIDA ANI DEGETURANI TI NI WENENGAI TI REGBO ADUNGURATISE?

5. Ginipai ani amangaha bambiko gupai nga ani ima kpinyemu Yekova? (Yoane 4:​23, 24; 1 Yoane 5:3.)

⁵ Ani nadegaturani ti regbo adunguratise bambiko gupai nga ani ima kpinyemu Yekova. (Mt. 22:37) Ho ani awirika dungu apai ni tipa Yekova, ani naye ka kpinyemuko ni bakerehe gbe. Na bambiko gupai nga ani ima kpinyemuko, ani naida ka degaturani kuti agu apai ko apehe furani vuru Baibiri yo, kini gisangbako, na kini irisiko ngba gu gene ko aida ani irisiko ngbaha.—Oni gedi Yoane 4:​23, 24; 1 Yoane 5:3.

6. Ginipai Yekova ayugoho furani ti regbo gaani adunguratise?

⁶ Ani nadegaturani ti regbo adunguratise bambiko ani ima kpinyemu aboro. (Mt. 22:39) Ti regbo gaani adunguratise, Yekova nayugopai furani tipa wai ka undo akuarani aidipase gbiati agu aboro ata inongo ko kindi ya. Ni kpiapai, gu burosua nga Oni Kpinyemu Aboro​—Oni Sa Aboro ni Abawiriki ima undo rani ani sonosi agu asino nga gu naundo rani gene tungusapai yo. Ya mo mo nabihe ni kpakarakpakaraha tipa ka tona fugo na boro? Kangia wo duhe, si ima rengba ka undoro ka mo degeturo wenengai ho awirinamo amanga gu paparaha ni nga “Mo Sonosi Gamo Abirĩ Nga Ga Tungusapai” ti regbo gu dunguratise nga ga bebere poso.

7. Tipagine duhe ti ni ni nyanyakipa pai kaa degaturani fu Yekova?

⁷ Ani nadegaturani ti regbo adunguratise bambiko ani ima kpinyemu raka. A wa Yekova apehe fu gu gako amoyambu nadu ti gu regbo i ake Baibiri ti ni, ka ani aida kadu na ngbarago rogo raka yo na ki raki nyeanye kindi, ani du wa ka ani gisangbako. (Pa Rug. 32:​44-47.) Ni dega ani turani ti regbo gaani adunguratise, ani nagbia ngarasaro nga gu ani aida na ni tipa kaa ndu kumbatayo kindi kaa sungudo vovo zegino ni zerangbaduse. (Rom. 8:25) Degatue fu Yekova awere na nyanyakipaha bambiko ani rogo yangara arame na si naida ani naangera angera kindi rogo toro yo.—Mt. 24:​42-44; Yugo. 1:3.

WAI KA UNDO KURA ABORO I DEGETUYO TI REGBO ADUNGURATISE

8. Tipagine si aida agu awirina nga akumba namanga agumbapai naandu kindi ti ni kumbatayo kaa wirika wai kadu ni wene abagumbapai?

⁸ Agu awirina nga akumba nayugopai rii tambara yo, gu susi gbe nga aguyo namanga agu agumbapai du gbaiga, si naida gupai nga i naandu kumbatayo kindi kaa manga sonakumbatayo rogo gayo ayugopai. Ho gu wirina nga kumba adia regbo ni ka mbakada gako gumbapai wenengai na ki rugutiko na gupai nga ko di agu aberãpai du rogoho kina rogo Baibiri yo, ko ima rengba ka undo agu aboro ata danga ni aDezire Yekova ya tipa i wiriki gu nyanyakipa arengo nga ga Baibiri. Ko naundo agu aboro naima da ni aDezire Yekova a tipa i rugutiyo na agu arengo nga ga Baibiri wenengai na kini mangipai kutini rogo gayo raka yo. Ho du mo ni na papara sunge ti regbo dunguratise, si naida mo tingidi gupai nga, si ima rengba ka undo aboro kisusi wai mo abihe. Sidu, ho i afu sunge ni foro tipa mo mangihe ti regbo dunguratise, mo berẽpa wai rengbe agu aberãpai du kusende re ka undoro mo da ni wene bayugupai. Agi aberãpai re tipa ka undo agu aboro gbe namanga agumbapai gbaiga, ono si ima rengba ka undo ai gu boro a du na gumbapai watadu papara sunge ti regbo dunguratise.—2 Tim. 4:2; Tito 1:9.

9. Ginipai rengbe mo ka mangaha tipa gupai nga gamo gumbapai du taata fu aboro i rugutiyo na ni?

⁹ Mo mbakadihe ti genehe. Ho mo amanga gumbapai ni, si naida mo saha taata fu agu aboro nadegatuyo foro tipa i rugutiyo na gupai mo agumbaha, na wai mo aguari ti gu kura berãpai ka gbiso kuti kuraha. Agu aboro du pati dunguratise ima rengba kadu ni fudifudiyo be gamo gumbapai ka si dunga agu apai mo agumbaha ni kpakarakpakaraha ka giarogoyo. Ginipai rengbe mo ka mangaha tipa ka manga gu gumbapai du ni wene mbakadimbakadihe ti genehe? Gu kura agene gere: (1) Ti tonatona gamo gumbapai, mo gumbapa gu memeapai du rogo gamo gumbapai gbaiga. (2) Mo ima rengba ka onga tooni bangbanda memeapai nibasasa tipa agu aboro nadegatuyo foro inihe nga mo nandu kuti gu kura berãpai. (3) Mo fugu memeapai ti digido gamo gumbapai.

10. Tipagine duhe ti ni ni nyanyakipa pai mo kpinyemu agu apai du rogo gamo gumbapai?

¹⁰ Mo kpinyemu gu memeapai si aida mo yuguhe rogo gamo gumbapai. Ho mo naima kpinyemupai ni, mo naida aida ka fura tipaha, na si nika zio kpoto agu aboro yo nadegatuyo foro. (Snz. 2:​4, 5; Amo. 4:20) Tipa ka undo ro mo kpinyemu gu memeapai gamo gumbapai ayugoho, mo berẽ dudunguro kuriipa agu aberãpai na averesi mo nika sakapai tipaha rogo gamo gumbapai. Sosono wirina ni kumba nga gu ko naraka Amerika yo natingidapa gu gumbapai ko agihe ho ko adu ni ni paranga. Ko aya: “Mi natingidapa wai kindi bagumbapai angarasi rani tipa ani berẽ dudunguro ho ani ageda fugo Mbori ni. Ko asakipa wai gbaiga si aida ani mangihe, na mi abi gupai nga si angia gupai nadu na nyanyakipaha gbe fu ko. Gu gumbapai re aima aria gimi raka; si aundo re mi wiriki dungu apai ho mi ageda Baibiri ni na kidu na mbedimbedi pabakure na Yekova.”

11. Ginipai si aida bagumbapai mangihe tipa ka undo agu aboro nadegatuyo fuko i gbia undo ti gako gumbapai? (1 Timoteo 4:​13-16)

¹¹ Mo berãpa gupai nika undo agu aboro nadegatuyo foro na ki fuku aberãpai tipa wai rengbe yo ka mangapai kuti gupai mo ayugoho. Kuba gupai nga kaa fura tipa agu apai dungu aboro niima inopai tipaha, si naida mo mangisunge na averesi rogo Baibiri yo tipa ka ngarasa agu aboro nadegatuyo foro na ki undo yo i bi wai rengbe yo ka mangapai kuti gupai Baibiri apehe rogo gayo raka yo. Ni kpiapai, Pauro ape gupai fu Timoteo si aida ko mangihe ka nye mbedimbedi na Yekova tigu regbo ko aamangasunge nyanyaki ka undo awirina. (Oni gedi 1 Timoteo 4:​13-16.) Mo berẽkurii gupai nzunzu nika undo agu aboro nadegatuyo foro, na ki undo yo i bi gupai si aida i mangihe rogo gayo raka yo nibipa agu aberãpai du rogo gamo gumbapai.

12. Tipagine duhe ti ni ni wenepai kaa fura kina wai mo naafura ho mo amanga gumbapai ni?

¹² Ho mo ambakada gamo gumbapai ni, mo mangihe bara dunguhe na fugoro kuari tipa wa ka mo afura kina boro kpotoroyo. Kuba gupai nga ka ke afugo gamo gumbapai rogo waraga na kini gedihe, mo asadi kaa fura kina wai mo naafura fu agu aboro nadegatuyo foro, na si nika du taata fuyo tipa i degetuyo na ki rugutiyo na gamo gumbapai. Gu burosua nga Mo Fu Tiro Sa Gedapai Na Yugopai naya: “Mo fura kina wai mo naafura na ngba wene gene, tipa ka yugo gu bipai du mo na ni tipa gamo riipai na agu aboro mo afura fuyo.” Ho mo afura ni kina boro kpotoroyo, agu aboro nadegatuyo foro nika gbeberãyo wenengai, kidu na nyemu gu memeapai mo nikaa yugoho, na i nika ida ka mangapai kuti ni rogo gayo raka yo.

13. Ho mo ambakada gumbapai ni, tipagine si aida mo sana wirina ti ni tipa undo nga gu ni du ni wene bagumbapai na naaima digo nimangi agumbapai tipa gbanga regbo? (Oni bi sura a.)

¹³ Mo sana gu wirina naaima digo nimangi agumbapai tipa gbanga regbo tipa undo. Ni kpiapai, mbata fu mo mangi gamo gumbapai, mo ima rengba ka yugo wai mo nambakadihe fu gu wirina re na ki asadi ka mangasunge na agu aberãpai ko nika fuhe tipa ka sa gamo gumbapai si du wenengai. Berewe a, mo sanako ko degetuko kuti gamo gumbapai na mo ki mangihe ku barabangiriko na fugoro kuari tipa wa ka ko pepa agu apai foro rengbe mo ka mangaha wenengai. (Snz. 1:5) Ani naainongo gu bangiri aba dedede si aida ani mangi ariapai rogoho te. Sidu, gu wirina re ima rengba ka pepa wai rengbe mo ka sa agu aberãpai du rogo gu gumbapai re si du taata fu aboro i rugutiyo na ni na i kidu na rengba ka mangapai kuti ni. Ani naida ka da ni wene abayugupai tipa wa ka ani undo kura aboro i rugutiyo wenengai na gu bawene arengo du rogo Baibiri yo na kini mangipai kuti ni.a

WAIGU RENGBE MO KA DEGATURO WENENGAI TI REGBO ADUNGURATISE.

14. Waigu si aida ani naabi ga Mbori atingidapai? (Atambuahe 119:​24, 111, 167)

¹⁴ Ani rengbe ka degaturani wenengai ti regbo adunguratise ka si du nga ani natingida gupai nga ga Yekova atingidapai na nyanyakipaha gbe. Ani naida na ga Mbori atingidapai tipa si undo rani rogo agu akpakarapai ani asusa rogoho ti gi ‘gbegberẽ aregbo du ni kpakarakpakaraha ka mangapai sani re.’(2 Tim. 3:1) Sidu, ka si vura du nga ani nawirikapai tipa gupai ani naima giaha bara dunguhe, ani naasada kadu na kina gu bangisa bipai bake Atambuahe 119 adu na ni tipa ga Mbori atingidapai.—Oni gedi Atambuahe 119:​24, 111, 167.

15. Ginipai rengbe ka undo rani tipa ani naabi agu apai kindi ani awirikaha ti regbo adunguratise ni gupai du na nyanyakipaha gbe?

¹⁵ Si ni nyanyakipa pai ani naandu kindi kumbatayo kaa bi agu ayugopai ani agbiaha ba gaani adunguratise yo ni gamahe be Yekova. Ani ima rengba ka wirikapai ti gupai namangi aYisaraere ngbakungba yo ho Yekova afu Manu ni fuyo. (Gate. 16:​15, 31) Ti bambataha, Manu aima ngbatiyo. Si aye be Yekova, si adu ni bawenehe ngba yo, na si aasongoda raka yo asongoda. Ono tifuo bete regbo, nyemuhe aima tona kaa gbandaka ti kura aboro mbiko gupai nga i aidanga ka ri kina gu bangisa riahe re na aˈuru dunduko te. (Geda. 21:5) Ginipai ani awirikaha? Areme a, gu kura ayugupai ani agiaha ti regbo adunguratise nga kina agu apai ani aima giaha bara dunguhe kusayo. Ono si aidanga ani naabi agi atingidapai re ni gupai anyakanga paha ya te. Ono kuba gure, si naida ani tingidi gupai nga Yekova du nga mburuhe. Berewe a, si naida ani tingidi gupai nga ruru kangara moyambu du nasia agu apai na rubangirise si aida i yuguhe ti regbo adunguratise. Gupai ani awirikaha ima rengba ka undo rani tipa ani mangi agu adiaberã nga ga tatamana na ki raki nyeanye kindi.—Snz. 3:​13, 16-18; Yo. 17:3.

16. Ginipai undo agu awirina naima iriso Yekova tipa gbanga regbo tipa i naadegatuyo wenengai pati adunguratise? Oni bi gu sanduki a nga (Aberãpai Tipa Kaa Degatue Wenengai)

¹⁶ Ani rengbe ka degaturani wenengai ti regbo adunguratise ka ani mangipai kuti agu aberãpai du kusende re. Ginipai undo kura awirina nga aguyo naima iriso Yekova tipa gbanga regbo tipa i naandu kindi kumbatayo kaa degatuyo wenengai ti regbo adunguratise? Ashley, nga gu wirina naaima digo ni irisi Yekova tipa agarã naima susa 30, aya: “Wisigo gupai i nika fura tipaha ba dunguratise yo mbata fu regbo naundo re tipa mi degeture wenengai. Ka mi ambakadanga gupai ani nika wisigoho ba dunguratise yo ya, si nadu ni kpakarakpakaraha fere tipa mi fu karagapai ba dunguratise yo na mi natona ka berãpa kura apai ti regbo adunguratise.” József, nga gu wirina naima iriso Yekova tipa agarã 52 aya: “Mi ima kpinyemu kaa degature kuti bangisapai sa ba adunguratise yo. Ho mi agia agumbapai ni ni bakiakia tipa riipai na ga kura aboro akaragapai tipaha, si nasa re mi naawirika dungu vovo apai dedede tipa gu riipai re.” Na ko agbia kurapai kuti ni nga: “Ka si du nga Yekova namangasunge na gu wirina adunga ni wene bagumbapai ya, mi naasada ka gbeberã re kuti gupai ko ayugoho rogo fugo Mbori yo, angianga kuti gu gene ko afura ngbaha ya. Bambiko gupai ko apehe si rogo Baibiri yo, na si naye be Yekova”

17. Gini kurapai rengbe ka undo ro tipa mo degeturo wenengai ti regbo adunguratise? (Oni bi sura a.)

¹⁷ Kura apai gere nga gu naima rengba ka undo ro tipa mo naadegaturo wenengai ti regbo adunguratise. (1) Ka mo ringa riahe ni bakerehe mbata fu dunguratise ya, tipa gupai nga ka rame tonanga ro pati dunguratise ya. (2) Mo ndu tipa dunguratise mbata fu regbo na ki gbia ga basungo mbata fu mbakadapai tona. (3) Mo moi gamo terefuni ti gu woroho du kusende na ka mo mbunga ha si gbeberã ro kusayo pati dunguratise ya. (4) Mo berẽpa gu memeapai rengbe bagumbapai ka fura tipaha. (5) Mo asadi kaa bi kina bagumbapai angianga agu apai namanga pati ro ya. (6) Mo nikeke memeapai rogo waraga watadu ka ke suraha. (7) Mo nigbeberã ro kuriipa agu averesi du rogo Baibiri yo na ki asadi ka berãkurii wai duhe na ngbanya dagbaha. (8) Mo sananga tiro nga, ‘Waigu rengbe mi ka mangasunge na gipai re tipa ka undo boro rogo dungurati watadu gene tungusapai yo?’ (9) Mbata fu gu bakere dunguratise nga ga uru sa na ga aˈuru biata, mo di regbo ka ngera rii mbakadapai na ki gedi gu riipai nga ga gu uru re, rii agumbapai, na agu averesi du tipa agumbapai ni basasa. (10) Mo sungu zezeredi na kini degeturo kuti manzigo na kini bi avidio, tipa gupai nga ho mbakadapai nika tona ni, mo kidu regerege tipa Yekova yugupai foro.

MO NAANDU KINDI KUMBATAYO KAA DEGETURO HO YEKOVA AYUGOPAI NI FORO

18. Tipagine du si aida ani naandu ti ni kindi kumbatayo kaa degaturani ba adunguratise yo?

¹⁸ Si naida ani naandu kindi kumbatayo kaa degaturani ti regbo adunguratise bambiko yo du Yekova ayugo wai ni furani rengbe ani ka sa ngbarago tiko. (Tam. 23:3; 31:3) Na ani naida Yekova naayugopai furani wa ka ani aandu kindi kumbatayo kaa manga gupai du niruru he. Sidu, ‘oni degeturoni wenengai’ na kini mangipai kuti agu apai oni awirikaha ba adunguratise yo rogo gaoni raka yo. (Rk. 8:18) Agu aboro nadegatuyo fu Yekova nika du na ngbarago awere na ki gbia nyenye unga kumbatayo.—Tam. 119:​2, 14.