Eyesibili YamaKhosi

9 U-Elisha umprofethi wabiza enye yamadodana abaprofethi wathi kuyo: “Zilungiselele, uthathe la mafutha ngokushesha uhambe uye eRamoti-gileyadi. + 2 Lapho ufika khona, funa uJehu + indodana kaJehoshafati indodana kaNimishi; ungene umsukumise phakathi kwabafowabo uye naye ekamelweni. 3 Uthathe amafutha uwathele ekhanda lakhe uthi, ‘Yilokhu uJehova akushoyo: “Ngiyakugcoba ukuba ube yinkosi phezu kuka-Israyeli.’ ” + Ngemva kwalokho uvule umnyango ubaleke ungalindi.”

4 Ngakho isikhonzi somprofethi sahamba saya eRamoti-gileyadi. 5 Lapho sifika, izinduna zebutho lempi zazihlezi lapho. Sathi: “Nduna, nginomyalezo wakho.” UJehu wathi: “Okabani phakathi kwethu?” Sona sathi: “Owakho, nduna.” 6 Ngakho uJehu wasukuma wangena endlini; isikhonzi sathela amafutha ekhanda lakhe sathi kuye, “Yilokhu uJehova uNkulunkulu ka-Israyeli akushoyo, ‘Ngiyakugcoba ukuba ube yinkosi phezu kwabantu bakaJehova, phezu kuka-Israyeli. + 7 Kumele uqothule indlu ka-Ahabi inkosi yakho, ngizophindiselela igazi lezinceku zami abaprofethi nelazo zonke ezinye izinceku zikaJehova ezabulawa uJezebeli. + 8 Yonke indlu ka-Ahabi izoshabalala; ngizobaqothula bonke abesilisa* endlini ka-Ahabi, nawo wonke umuntu ongakwazi ukuzisiza nophansi kwa-Israyeli. + 9 Ngizokwenza indlu ka-Ahabi ibe njengendlu kaJerobowamu + indodana kaNebhati nanjengendlu kaBhahasha + indodana ka-Ahiya. 10 UJezebeli yena uyodliwa yizinja eJizreyeli, + akekho oyomngcwaba.’ ” Ngemva kwalokho isikhonzi savula umnyango sabaleka. +

11 Lapho uJehu ebuyela ezincekwini zenkosi yakhe, zathi kuye: “Ingabe konke kuhamba kahle? Ubezofunani kuwe lo muntu osangene?” Yena wathi kuzo: “Nani niyamazi lo muntu nezinto azikhulumayo.” 12 Kodwa zathi: “Unamanga! Sicela usitshele.” Wabe esethi: “Yilokhu akushilo kimi, waphinde wathi, ‘Yilokhu uJehova akushoyo: “Ngiyakugcoba ukuba ube yinkosi phezu kuka-Israyeli.” ’ ” + 13 Lapho zizwa lokhu, ngokushesha ngayinye yathatha ingubo yayo yayibeka phezu kwezitebhisi ukuze ame phezu kwazo, + zase zishaya uphondo zathi: “UJehu useyinkosi!” + 14 UJehu + indodana kaJehoshafati indodana kaNimishi wakhela uJehoramu uzungu.

UJehoramu wayekade eqaphe eRamoti-gileyadi, + yena kanye no-Israyeli wonke, ngenxa kaHazayeli + inkosi yaseSiriya. 15 Kamuva iNkosi uJehoramu yabuyela eJizreyeli + ukuze kuphole amanxeba eyayiwalinyazwe amaSiriya lapho ilwa noHazayeli inkosi yaseSiriya. +

UJehu manje wathi: “Uma ningakimi, ningavumeli muntu ukuba aphunyuke kuleli dolobha ayobika eJizreyeli.” 16 UJehu wagibela inqola yakhe waya eJizreyeli, ngoba uJehoramu wayelele khona elimele, futhi u-Ahaziya inkosi yakwaJuda wayehlile ukuyobona uJehoramu. 17 Njengoba umlindi ayemi embhoshongweni eJizreyeli, wabona kuza iviyo lamadoda kaJehu. Ngaso leso sikhathi wathi: “Ngibona iviyo lamadoda.” UJehoramu wathi: “Thumela umgibeli wehhashi awahlangabeze, afike athi, ‘Ingabe nize ngokuthula?’ ” 18 Ngakho umgibeli wehhashi wahamba eyomhlangabeza wathi kuye: “Yilokhu inkosi ekushoyo, ‘Ingabe uze ngokuthula?’ ” Kodwa uJehu wathi: “Uhlangene ngani wena ‘nokuthula’? Yana emva kwami!”

Umlindi waphinde wabika, wathi: “Isithunywa sifikile kubo, kodwa asibuyanga.” 19 Ngakho wathumela umgibeli wehhashi wesibili, owathi lapho efika kubo, wathi: “Yilokhu inkosi ekushoyo, ‘Ingabe nize ngokuthula?’ ” Kodwa uJehu wathi: “Uhlangene ngani wena ‘nokuthula’? Yana emva kwami!”

20 Umlindi wabika wathi: “Ufikile kubo, kodwa akabuyanga, futhi indlela yokushayela injengokushayela kukaJehu umzukulu* kaNimishi, ngoba ushayela njengohlanya.” 21 UJehoramu wathi: “Bophela!” Ngakho inqola yakhe yempi yaboshelwa futhi uJehoramu inkosi yakwa-Israyeli no-Ahaziya inkosi + yakwaJuda baphuma beyohlangabeza uJehu, yilowo nalowo esenqoleni yakhe yempi. Bahlangana naye ensimini kaNabhoti + umJizreyeli.

22 Ngokushesha nje lapho uJehoramu ebona uJehu, wathi: “Ingabe uze ngokuthula, Jehu?” Kodwa yena wathi: “Kuthula kuni okungaba khona uma kusekhona ubufebe bukaJezebeli + unyoko nobuthakathi bakhe obuningi?” + 23 Khona manjalo uJehoramu wajikisa inqola yakhe ukuze abaleke, wathi ku-Ahaziya: “Uzungu lolu, Ahaziya!” 24 UJehu wathatha umnsalo wacibishela uJehoramu phakathi kwamahlombe, umcibisholo waphumela enhliziyweni yakhe, wawa enqoleni yakhe yempi. 25 Wabe esethi kuBidikari isekela lomlawuli wempi yakhe: “Mphakamise umphonse ensimini kaNabhoti umJizreyeli. + Khumbula ukuthi mina nawe sasigibele ndawonye silandela uyise u-Ahabi, ngesikhathi uJehova ngokwakhe enza lesi simemezelo ngokumelene naye: + 26 ‘ “Njengoba nje ngibone igazi likaNabhoti + negazi lamadodana akhe izolo,” kusho uJehova, “ngizobaphindiselela + kuwe kuyo kanye le nsimu,” kusho uJehova.’ Ngakho manje mphakamise umphonse ensimini ngokwezwi likaJehova.” +

27 Lapho u-Ahaziya + inkosi yakwaJuda ebona lokho okwakwenzeka, wabaleka ngendlela edlula ngasengadini enkulu.* (Kamuva uJehu wamjaha wathi: “Naye mcibeni!” Ngakho bamciba esenqoleni endleleni enyukela eGuri, ngaseJibhileyamu. + Kodwa waqhubeka ebaleka waya eMegido wafike wafela khona. 28 Izinceku zakhe zamthwala ngenqola zamyisa eJerusalema, zamngcwaba ethuneni lakhe kanye nokhokho bakhe eDolobheni LikaDavide. + 29 U-Ahaziya + wayebe inkosi kwaJuda ngonyaka ka-11 wokubusa kukaJehoramu indodana ka-Ahabi.)

30 Lapho uJehu efika eJizreyeli, + uJezebeli + wezwa ngakho. Ngakho wazigcoba phezu kwamehlo* ngesimonyo esimnyama, walungisa kahle ikhanda lakhe wayeselunguza phansi ngefasitela. 31 Lapho uJehu engena ngesango, uJezebeli wathi: “Ucabanga ukuthi kwamhambela kahle yini uZimri, umbulali wenkosi yakhe?” + 32 UJehu wabheka phezulu efasiteleni wathi: “Ngubani ongakimi? Ngubani?” + Masinyane izikhulu ezimbili noma ezintathu zegceke zalunguza phansi kuye. 33 Wathi: “Mphonseni phansi!” Ngakho zamphonsa, elinye igazi lakhe lachaphazeleka odongeni nasemahhashini, wamnyathela ngenqola. 34 Wabe esengena endlini wadla waphuza. Ngemva kwalokho wathi: “Ngicela nithathe lo wesifazane oqalekisiwe nimngcwabe, kwazise uyindodakazi yenkosi.” + 35 Kodwa lapho behamba beyomngcwaba, abatholanga lutho ngaphandle kogebhezi lwekhanda nezandla nezinyawo. + 36 Lapho bebuya bezomtshela, wathi: “Lokhu kuwukugcwaliseka kwezwi likaJehova + alikhuluma ngenceku yakhe u-Eliya umThishibi, wathi, ‘Izinja ziyodla inyama kaJezebeli eJizreyeli. + 37 Isidumbu sikaJezebeli siyoba umquba emhlabathini eJizreyeli, ukuze kungashiwo ukuthi: “Lona uJezebeli.” ’ ”