UMalaki 3:1-3 uchaza isikhathi—kusukela ngo-1914 kuya ekuqaleni kuka-1919—lapho “amadodana kaLevi” agcotshiwe ayeyongena enkathini yokucwengisiswa. Phakathi naleso sikhathi, uJehova uNkulunkulu, “iNkosi yeqiniso,” ephelezelwa uJesu Kristu, ‘isithunywa sesivumelwano,’ wafika ethempelini elingokomoya ukuze ahlole labo ababekhonza kulo. Ngemva kokuthola isiyalo esasidingeka, abantu bakaJehova abahlanziwe babekulungele ukuthatha esinye isabelo senkonzo. Ngo-1919, “inceku ethembekileyo neqondayo” yamiswa ukuze inikeze abanokholo ukudla okungokomoya. (Math. 24:45) Manje abantu bakaNkulunkulu base bekhululekile ethonyeni leBhabhiloni Elikhulu. Kusukela ngaleso sikhathi, ngomusa kaJehova ongafanelwe, abantu bakhe bebelokhu bekhula olwazini lwentando kaNkulunkulu nasothandweni ngoBaba wabo osezulwini. Yeka ukuthi basazisa kanjani lesi sibusiso esivela kuye! w16.11 5:14

Siyamthanda uJehova “ngoba yena wasithanda kuqala.” (1 Joh. 4:19) Njengenye yezindlela abonisa ngazo uthando lwakhe, uJehova uye wathatha isinyathelo sokubusisa izinceku zakhe eziqotho. Njengoba siqhubeka sithanda uNkulunkulu wethu, ukholo lwethu luya luqina, hhayi nje ekutheni ukhona kodwa nasekutheni uvuza labo abathandayo. (Heb. 11:6) Ukuba umvuzi kuyingxenye eyinhloko yalokho uJehova ayikho nalokho akwenzayo. Ukuze ukholo lwethu luphelele kudingeka siqiniseke ngokuphelele ukuthi uNkulunkulu uyobavuza labo abamfuna ngobuqotho ngoba “ukholo luwukulindelwa okuqinisekisiwe kwezinto ezithenjwayo.” (Heb. 11:1) Yebo, ngokwezinga elithile ukholo luhilela ukulindela ukugcwaliseka kwezibusiso zikaNkulunkulu ezithenjisiwe. Njengoba kubonisiwe emBhalweni wosuku lwanamuhla, uJehova usimema ukuba sifune ukuthola isibusiso sakhe. Sibonisa ukwazisa okujulile lapho samukela isimemo sikaJehova somusa. w16.12 4:1-3

Ngemva kokukhonza uNkulunkulu iminyaka eminingi, umKristu angase aqale ukubeka ingqondo yakhe ezintweni zenyama. Lokho akubhekiseli kumKristu ngezinye izikhathi ocabanga ngokudla, umsebenzi, ezokuzijabulisa noma ngisho nezothando. Lezo yizinto ezijwayelekile encekwini kaNkulunkulu evamile. UJesu wayekujabulela ukudla futhi wondla nabanye. Wayesibona isidingo sokudla. UPawulu wabhala ngokubonisana uthando okufanele noma ukusondelana emshadweni. Igama lesiGreki elasetshenziswa uPawulu lisho “ukubeka ingqondo noma inhliziyo entweni ethile, ukucabangisisa ngayo.” Labo abaphila ngokuvumelana nenyama bavumela ukuphila kwabo ukuba ngokuyisisekelo kulawulwe ukungapheleli. Esinye isazi sithi mayelana nalelo gama elikweyabaseRoma 8:5: “Babeka ingqondo yabo—banesithakazelo esikhulu, bakhuluma njalo ngayo, bazinikela futhi bajule kuyo—ezintweni ezimayelana nenyama.” w16.12 2:5,9, 10