Isahluko 125
Usizi Esigxotsheni
KANYE noJesu kuqhutshwa izelelesi ezimbili ziyobulawa. Ebangeni elingekude nomuzi, udwendwe luma endaweni ebizwa ngokuthi iGolgotha, noma iNdawo Yekhanda.
Leziboshwa zikhunyulwa izingubo zazo. Khona-ke zinikezwa iwayini elixutshwe nenyongo. Ngokusobala lilungiselelwa abesifazane baseJerusalema, futhi amaRoma awawenqabi lomuthi odambisa izinhlungu kulabo ababethelwayo. Nokho, lapho uJesu ewunambitha, uyenqaba ukuwuphuza. Ngani? Ngokusobala ufuna ukuba osanguluke ngokuphelele phakathi naloluvivinyo olukhulu lokholo lwakhe.
Manje uJesu ulaliswa esigxotsheni izandla zakhe zibekwé ngenhla kwekhanda lakhe. Khona-ke amasosha abethela izipikili ezinde ezandleni nasezinyaweni zakhe. Uyapaquza ezwa ubuhlungu njengoba izipikili zibhoboza inyama nemisipha. Lapho isigxobo simiswa siqonde, ubuhlungu bukhula ngokwedlulele, ngoba isisindo somzimba sivula amanxeba ezipikili. Nokho, kunokuba asongele, uJesu uthandazela amasosha aseRoma: “Baba, bathethelele, ngokuba abakwazi abakwenzayo.”
UPilatu uyala ukuba kuxhonywe esigxotsheni uphawu olufundeka kanje: “UJESU WASENAZARETHA, INKOSI YABAJUDA.” Ngokusobala, akabhali lokhu ngenxa nje yokuthi uhlonipha uJesu kodwa ngoba wenyanya abapristi bamaJuda ngokumphoqelela ukuba akhiphe isigwebo sokufa kukaJesu. Ukuze bonke balufunde loluphawu, uPilatu uyala ukuba lubhalwe ngezilimi ezintathu—ngesiHeberu, ngesiLatini esingokomthetho, nangesiGreki esivamile.
Abapristi abakhulu, kuhlanganise uKayafase noAnase, bakhathazekile. Lesimemezelo esitusayo sonakalisa ihora labo lokunqoba. Ngakho-ke bayenqaba: “Ungalobi ukuthi: Inkosi yabaJuda, kepha ukuba yena wathi: NgiyiNkosi yabaJuda.” Ecasulwe ukusetshenziswa abapristi njengethuluzi labo, uPilatu uphendula ngokugomela okuwujuqu: “Engikulobile ngikulobile.”
Abapristi, kanye nesixuku esikhulu, manje bahlangana endaweni yokubulala, futhi abapristi baphikisa ubufakazi bophawu. Baphinda ubufakazi bamanga ababunikeze ngaphambidlana ekuqulweni kwamacala kweSanhedrin. Ngakho-ke, akumangalisi ukuthi abadlulayo baqala ukuhlambalaza, benqekuzisa amakhanda abo ngokuhleka usulu bethi: “Wena odiliza ithempeli, ubuye ulakhe ngezinsuku ezintathu, zisindise, uma uyiNdodana kaNkulunkulu, wehle [esigxotsheni sokuhlushwa, NW].”
“Wasindisa abanye, angezisindise yena,” kungenela abapristi abakhulu nabangane babo benkolo. “Uyinkosi yakwaIsrayeli; akehle manje [esigxotsheni sokuhlushwa, NW] , sikholwe nguye. Wethembile uNkulunkulu; makamkhulule manje, uma emthanda, ngokuba wathi: NgiyiNdodana kaNkulunkulu.”
Ethathekile, amasosha nawo enza uJesu inhlekisa. Ngokuhlekisa ngaye amnika iwayini elibabayo, ngokusobala elimisa ngaphansana nje kwezindebe zakhe ezomile. “Uma uyinkosi yabaJuda,” egcona, “zisindise.” Ngisho nezelelesi—esinye sibethelwe ngakwesokudla sikaJesu, nesinye kwesobunxele sakhe—zimhleka usulu. Ake ucabange ngakho! Umuntu omkhulu kunabo bonke abake baphila, yebo, lowo owahlanganyela noJehova uNkulunkulu ekudaleni zonke izinto, ngesibindi ubhekana nakho konke lokhu kuphathwa kabi!
Amasosha athatha izingubo zikaJesu zangaphandle futhi azihlukanisa izingxenye ezine. Enza inkatho ukuze abone ukuthi kuzoba ezikabani. Nokho, ingubo yangaphakathi ayinamthungo, ingeyohlobo oluphambili. Ngakho amasosha athi lwelinye nelinye: “Asingalidabuli, kodwa asilenzele inkatho yokuthi liyakuba-ngelikabani.” Ngaleyondlela, engazi, agcwalisa umbhalo othi: “Babelana izingubo zami, benzelana inkatho ngesambatho sami.”
Ngemva kwesikhathi, esinye sezelelesi siyaqaphela ukuthi ngempela kumelwe ukuba uJesu uyinkosi. Ngakho-ke, sikhuza esinye, sithi: “Na-we awumesabi uNkulunkulu, ingani ukulokhukulahlwa nawe na? thina kambe ngokufaneleyo, ngokuba samukela okulingene nesikwenzile; kepha lo akenzanga-lutho olubi.” Khona-ke sikhuluma noJesu, sinxusa: “Ngikhumbule, nxa usufiké embusweni wakho.”
“Ngiqinisile ngithi kuwe namuhla,” kuphendula uJesu, “Uyokuba nami ePharadesi.” (NW) Lesithembiso siyogcwaliseka lapho uJesu ebusa njengeNkosi ezulwini futhi evusela lomenzi wobubi ophendukile ekuphileni emhlabeni ePharadesi lelo abasinde eArmagedoni nabangane babo abayoba nelungelo lokulilima. Mathewu 27:33-44; Marku 15:22-32; Luka 23:27, 32-43; Johane 19:17-24.
▪ Kungani uJesu enqaba ukuphuza iwayini elixutshwe nenyongo?
▪ Ngokusobala, kungani kuxhonywa uphawu esigxotsheni sikaJesu, futhi kubangela kuphi ukuphikisana phakathi kukaPilatu nabapristi abakhulu?
▪ Ikuphi okunye ukuphathwa kabi uJesu akutholayo esigxotsheni, futhi ngokusobala kubangelwa yini?
▪ Isiprofetho sigcwaliseka kanjani ngalokho okwenziwa ngezingubo zikaJesu?
▪ Iluphi ushintsho olwenziwa esinye sezelelesi, futhi uJesu uyosigcwalisa kanjani isicelo saso?