Ingabe “ULizwi” WayenguNkulunkulu?
ABANTU abakholelwa ukuthi uNkulunkulu unguZiqu-zintathu, nokuthi uJesu unguNkulunkulu, bakhomba kuJohane 1:1 noJohane 20:28 njengesiqinisekiso salenkolelo.
Ezinguqulweni eziningi uJohane 1:1 uthi: “Ekuqaleni wayekhona uLizwi, uLizwi wayekuNkulunkulu, uLizwi wayenguNkulunkulu.” Nokho, abahumushi abanakekelayo baye bakuthola kudingekile ukuba bavume ukuthi kunomehluko phakathi kokusetshenziswa okubili kwegama elithi “Nkulunkulu” kulelitekisi.
IThe New English Bible ithi, “Lokho uNkulunkulu ayeyikho, noLizwi wayeyikho.” IToday’s English Version ithi, “Wayefana noNkulunkulu.” IAn American Translation ithi, “ULizwi wayengowaphezulu.”
Lapha singawaqonda kangcono amazwi kaJohane uma sihlaziya kahle lokho akusho. Phawula futhi ukuthi wabhala: “Ekuqaleni wayekhona uLizwi.” Empeleni lokhu kwakungasho isiqalo sikaNkulunkulu, ngoba uNkulunkulu wayengenasiqalo. (IHubo 90:1, 2) Kwakuyisiqalo sezinto uJohane ayekhuluma ngazo lapho, kuhlanganise nokudalwa kwazo zonke ezinye izinto zidalwa “uLizwi.” Khona-ke uJohane wathi: “ULizwi wayekuNkulunkulu.” Umuntu onomunye ngokusobala akayena lowomuntu anaye.
Eqinisweni iphuzu elisemqoka, yilelo uJohane ayeliqondile lapho ebhala lelivesi. Ingabe lokho kudala inkinga? Kuyayidala uma ufuna ukuthi lithi uJesu “UNGUNKULUNKULU,” ngoba kusobala ngokwamazwi kaJohane ukuthi akazange abheke uJesu “njengoNkulunkulu” ngokomqondo uYise anguNkulunkulu ngawo. Ngokwesibonelo, kuleso sahluko esifanayo, uJohane wabhala: “Akakho oké wabona uNkulunkulu; iNdodana ezelwe yodwa esesifubeni sikaYise yiyona embonakalisile.” (Johane 1:18) Ukhona yini oké wabona uNkulunkulu? Cha. Ukhona yini oke wabona ujesu? Yebo!
Isivumo sokholo seLobukholwa sika-Athanasius, esichaza uZiqu-zintathu, sithi “akekho omkhulu noma omncane kunomunye.” Nokho ngokuphindaphindiwe uJohane ubhala amazwi kaJesu siqu abonisa ukuzithoba kwakhe kuYise. ‘Wathunywa’ uYise, wabelwa imisebenzi uYise, watshelwa afanele ukukwenza nokukusho uYise, futhi wathi akezelanga ukwenza intando yakhe “kodwa ukuba enze intando [yongithumileyo].”—Johane 6:38; 3:17; 5:36; 8:28; 12:49, 50.
UJohane wabhala futhi amazwi kaJesu siqu okuthi uYise ‘uNkulunkulu yedwa oqinisileyo,’ nokuthi “uBaba mkhulu kunami.” (Johane 17:3; 14:28) Wabhala izikhathi eziyisithupha lapho uJesu abiza uYise ngokuthi “Nkulunkulu wami.” Izikhathi ezinhlanu zokukhuluma kukaJesu “ngoNkulunkulu wami” zingemva kakhulu kokuba uJesu esevusiwe futhi enyukele ezulwini. (Johane 20:17; IsAmbulo 3:2, 12) Okungenani izikhathi ezinhlanu ezengeziwe, uJohane wabhala ngokucophelela umehluko hhayi nje phakathi kukaYise neWundlu kodwa phakathi kukaNkulunkulu kanye neWundlu uJesu Kristu. (IsAmbulo 1:1; 7:10; 21:22; 22:1-3) UJohane uthi wabhala, hhayi ukuze abonise ukuthi uJesu unguNkulunkulu, noma ngisho ukuthi “uNkulunkulu iNdodana,” kodwa “ukuba nikholwe ukuthi uJesu unguKristu, iNdodana kaNkulunkulu.”—Johane 20:31.
Lawamazwi abonisa lokho uJohane ayekwazi njengobuhlobo phakathi kukaJesu nalowo uJohane asitshela ukuthi uJesu wambiza ngokuthi “uNkulunkulu.” UJohane 1:1 akawaphikisi. Inguqulelo yakhe eqondile yilena: “Ekuqaleni wayekhona uLizwi, uLizwi wayekuNkulunkulu, uLizwi wayengunkulunkulu.” Lona umqondo ofanayo ozowuthola kuzEnzo 28:6, lapho abantu baseMelitha bacabanga ukuthi uPawulu “ungunkulunkulu.”
Khona-ke, kuthiwani ngamazwi kaTomase okumangala lapho ebona uJesu ovusiwe: “Nkosi yami, Nkulunkulu wami!” (Johane 20:24-29) UTomase washukunyiswa ukubona okuyingqayizivele kokuthi ngempela uJesu Kristu wayevukile, nokuthi wayebhekene naye ubuso nobuso. Nokho, akukho lutho kulendaba okubonisa ukuthi uTomase wacabanga ukuthi uJesu wayelingana noYise. UJohane, owabhala amazwi kaTomase, wayecaphune amazwi kaJesu athi ngisho nabantu babebizwa ngokuthi “onkulunkulu.” Ngokuqinisekile, iNkosi evusiwe uJesu Kristu inkulu kunanoma ubani. (Johane 10:34, 35) Futhi kuso kanye isahluko esifunda kuso amazwi kaTomase, uJohane wabhala amazwi kaJesu okuthi uYise uNkulunkulu kaJesu.—Johane 20:17.
UPawulu wabonisa ukuthi amaKristu ekhulu lokuqala ayebuqonda kahle kanjani ubuhlobo phakathi kukaJesu noYise wasezulwini lapho ebhala ukuthi “nokho kithina kukhona uNkulunkulu munye, uYise, . . . nenkosi inye, uJesu Kristu.”—1 Korinte 8:6.