AmaVangeli—Iqiniso Noma Inganekwane?
SEKUYISIKHATHI eside abaziwa njengabagxeki beBhayibheli behlasela izindaba zamaVangeli okuphila kukaJesu ngezizathu ezihlukahlukene. Bathi lezi zindaba zinokuphikisana okuningi futhi zabhalwa esikhathini eside kakhulu ngemva kwezenzakalo ukuba zingaba umlando oyiqiniso. Baphika izici ezimangalisayo njengamanga nje.
Encwadini yakhe ethi Caesar and Christ, isazi-mlando uWill Durant sazama ukuhtola izindaba zamaVangeli singafaki nakancane imibono yaso−njengemibhalo engokomlando. Sivuma ukuthi kunokuphikisana nezinkinga ezisobala ezindabeni zamaVangeli, nokho saphetha: “Ukuphikisana kusezicini ezincane [imininingwane engenamsebenzi] hhayi umongo; ngokuyisisekelo amavangeli anomqondo ofanayo avumelana kahle ngokuphawulekayo. futhi enza umfanekiso evumelanayo kaKristu.”
Kodwa kuthiwani ngokusho kwabagxeki beBhayibheli ukuthi amaVangeli awahlangabezani nezindinganiso zomlando oyiqiniso? UDurant waqhubeka: “Ekushisekeleni ukuvubukula kwakho ukuGxekwa KweBhayibheli kuye kusebenzisa ngokunamandla izivivinyo zokuba yiqiniso kweTestamente Elisha kangangokuba ngazo amakhulu abantu abadumile basendulo—njengoHammurabi, uDavid, uSocrates—bangaphenduka inganekwane. Ngaphezu kokuphathwa kabi nokucatshangelwa okungokwenkolo kwabavangeli, baloba izehlakalo eziningi lezo abasunguli nje ababengazifihla—ukubanga kwabaphostoli izindawo eziphakeme eMbusweni, ukubaleka kwabo ngemva kokuboshwa kukaJesu, ukuphika kukaPetru . . . Akekho efunda lezizindaba ongangabaza ukuba ngokoqobo kwabantu ezikhuluma ngabo.”
Isazi-mlando uDurant saphetha: “Ukuthi abantu abavamile besizukulwane esisodwa babengasungula ubuntu obunamandla nobuhlaba umxhwele kangaka, izindinganiso eziphakeme kangaka zokuziphatha nombono ovuselela kangaka wobuzalwane besintu, bekungaba isimangaliso esingakholeki kakhulu kunanoma isiphi esilotshwe emaVangelini. Ngemva kweminyaka engamakhulu amabili yokuGxekwa KweBhayibheli izimiso zokuphila. ukuziphatha, nemfundiso kaKristu, kuhlala kusobala ngokunengqondo. futhi kwakha isici esithonya kakhulu emlandweni womuntu waseNtshonalanga.”