‘Imizimba Eminingi Yabangcwele Yavuswa’
“UMHLABA wazamazama, amadwala aqhekezeka; amathuna avuleka, imizimba eminingi yabangcwele ababelele yavuka; (futhi abantu, bephuma phakathi kwamathuna okukhunjulwa emva kokuvuka kwakhe, bangena emzini ongcwele,) yabonakala kwabaningi.” (Mathewu 27:51-53, qhathanisa neNW.) Isazi esingumKatolika uKarl Staab ubiza lesenzakalo esenzeka ekufeni kukaJesu “njengesiyindida kakhulu.” Kwenzekani?
UEpiphanius nabanye oFata beSonto bakuqala bafundisa ukuthi abangcwele baphila ngokoqobo futhi baya ezulwini kanye noJesu ovusiwe. UAugustine, uTheophylactus, noZigabenus bakholelwa ukuthi laba abafileyo bathola uvuko lwesikhashana kodwa kamuva baphindela emathuneni abo. Lombono wakamuva, nokho, “awuzange uthole ukuqashelwa kabanzi,” kuphawula isazi uErich Fascher. Lapho zihumusha uMathewu 27:52, 53, izinguqulo eziningi zeBhayibheli zanamuhla zinikeza umqondo wokuthi uvuko lwenzeka. Akunjalo ngeNew World Translation, ekhomba emiphumeleni yokuzamazama komhlaba. Ngani?
Okokuqala, kungakhathaliseki ukuthi “abangcwele” babengobani, uMathewu akazange asho ukuthi bavuswa. Wathi yimizimba, noma yizidumbu, ezavuswa. Okwesibili, akazange asho ukuthi lemizimba yaphila. Wathi yavuka, futhi igama lesiGreki eliyisenzo elithi e·geiʹro, elisho “ukuvusa,” alibhekiseli ngaso sonke isikhathi ovukweni. Lingasho, phakathi kokunye, “ukukhipha” emgodini noma “ukuvuka” emhlabathini. (Mathewu 12:11; 17:7; Luka 1:69) Ukuzamazama okwenzeka lapho uJesu efa kwavula amathuna, kuphonsa imizimba engaphili ngaphandle obala. Izehlakalo ezinjalo phakathi nokuzamazama komhlaba zabikwa ngekhulu leminyaka lesibili C.E. ngumlobi ongumGreki uAelius Aristides futhi muva kakhulu nje, ngo-1962, eColombia.
Lombono walesehlakalo uyavumelana nezimfundiso zeBhayibheli. Kweyoku-1 Korinte isahluko 15, umphostoli uPawulu unikeza ubufakazi obuqinisekisayo bovuko, kodwa umshaya indiva ngokuphelele uMathewu 27:52, 53. Ngokufanayo nangabanye abalobi beBhayibheli. (IzEnzo 2:32, 34) Izidumbu ezavuka ekufeni kukaJesu akunakwenzeka ukuba zaphila ngendlela uEpiphanius ayecabanga ngayo, ngoba osukwini lwesithathu kamuva, uJesu waba “izibulo kwabafileyo.” (Kolose 1:18) AmaKristu agcotshiwe, nawo abizwa ngokuthi “abangcwele,” athenjiswa ingxenye ovukweni lokuqala phakathi nokuba khona kukaKristu, hhayi ngekhulu lokuqala leminyaka.—1 Thesalonika 3:13; 4:14-17.
Abahlaziyi beBhayibheli abaningi baba nobunzima ekuchazeni ivesi 53, nakuba abaningi babo besikisela ukuthi ivesi 52 lichaza ukuvulwa kwamathuna ukuzamazama komhlaba nokuvela obala kwezidumbu ezazisanda kungcwatshwa. Ngokwesibonelo, isazi esingumJalimane uTheobald Daechsel unikeza ukuhumusha okulandelayo: “Namathuna avuleka, nezidumbu eziningi zosanta ezazilele zaphuma.”
Bangobani labo ‘abangena emzini ongcwele’ esikhathini esijana kamuva, okungukuthi ngemva kokuba uJesu evusiwe? Njengoba kubonakele ngenhla, izidumbu ezidindilizile zazilokhu zingaphili, ngakho uMathewu kumelwe ukuba ubhekisela kubantu abahambela emathuneni futhi baletha izindaba zalesehlakalo eJerusalema. Ngakho, ukuhumusha kweNew World Translation kujulisa ukuqondwa kweBhayibheli futhi akubadidi abafundi ngokuphathelene novuko.