Isibonakaliso Sezingxenye Eziningi Esiyinhlanganisela

Ukuphela Kwezwe—Kuseduze Kangakanani?

INGANEKWANE yaseNdiya ikhuluma ngamadoda ayisithupha ayizimpumputhe ase-Indostan ahamba eyobona indlovu. Eyokuqala yathinta uhlangothi lwayo futhi yathi: “Hawu! kodwa indlovu ifana ncamashí nodonga!” Eyesibili yathinta uphondo lwayo yayisithi: “Indlovu ifana nsé nomkhonto!” Eyesithathu yathinta isikhumba sayo futhi yathi: “Indlovu ifana ncamashí nenyoka!” Eyesine yasondela futhi yathinta idolo layo yayisithi: “Kusobala ngokwanele ukuthi indlovu ifana ncamashí nesihlahla!” Eyesihlanu yathinta indlebe yayo futhi yathi: “Lesimangaliso sendlovu sifana nsé nento yokuphephetha umoya!” Eyesithupha yabamba umsila wayo futhi yathi: “Ngiyabona ukuthi indlovu ifana ncamashí nentambo!” Lamadoda ayisithupha ayizimpumputhe aphikisana isikhathi eside ebanga umsindo ngokuthi indlovu yayinjani, kodwa akukho noyedwa owanikeza incazelo eqondile. Ukwaziswa okungaphelele akuzange kunikeze umfanekiso ophelele.

Kuphakama inkinga efanayo lapho kuziwa ekukhombeni isibonakaliso sokubuya kukaKristu. Esabela embuzweni wabafundi bakhe othi: “Lokhu kuyakuba-nini, nesibonakaliso sokuza kwakho nesokuphela kwezwe siyakuba-yini na?” uJesu waphendula: “Isizwe siyakuvukela isizwe, nombuso uvukele umbuso; kuyakuba-khona ukuzamazama okukhulu komhlaba nobici nendlala izindawo ngezindawo.” (Mathewu 24:3; Luka 21:10, 11) Kodwa lapho kukhonjwa lezinto kuphela njengobufakazi bokuthi uKristu wabuya ngo-1914, abantu bayaphikisa: “Oh, bezilokhu zikhona izimpi, indlala, izifo eziwubhadane, nokuzamazama komhlaba!” Futhi baqinisile.

Lezinto ezimbalwa—nakuba zidala usizi olukhulu kakhulu kuze kube manje—azanele kubantu abaningi ukuba ziphawule ukubuya kukaKristu; kusadingeka okwengeziwe ukuze kupheleliswe lesibonakaliso, sibe sobala. Lapho kwenziwa izimemezelo zokuthi ukuphela kwezwe kuseduze ngobufakazi obunganele, kusetshenziswa ingxenye eyodwa nje noma ezimbalwa ezibonwayo zesibonakaliso, kuvela izixwayiso zamanga. Okudingekayo yizo zonke izici uJesu azinikeza ezihlobene nokubuya kwakhe, hhayi esisodwa nje noma ezimbalwa. Akunikeza ukuze kuphawule ukuba-khona kwakhe kwakuyisibonakaliso esiyinhlanganisela, leso esakhiwa izici ezanele ukuze ziqinisekise lesibonakaliso, inhlanganisela yezingxenye eziningana ezihlukahlukene okuthi lapho zihlanganiswe ndawonye, zisenze sibe sobala.

Njengesibonelo sesibonakaliso esiyinhlanganisela, cabangela leso esinikezwe eBhayibhelini ukuze siphawule uJesu njengoMesiya ngesikhathi sokuza kwakhe kokuqala. Sasihlanganisa izenzakalo eziningi ngokuphathelene noMesiya ezanikezwa emiBhalweni yesiHeberu. UJesu wayetshele abafundi bakhe ngeminye yalemibhalo, kodwa babengakakuqondi ukubaluleka kwayo. Labafundi, njengeningi lamaJuda, babefuna uMesiya owayeyoketula iRoma futhi abuse izwe kanye nabo njengabangane. Ngakho lapho efa, babekhungathekile futhi bedumele. Ngemva kokuba uJesu esevusiwe, wahlangana nabo futhi wathi: “Yiwo lawomazwi ami engawakhuluma kini ngisenani okuthi: Kumelwe ukugcwaliseka konke okulotshwé ngami emthethweni kaMose, nakubaprofethi, nasemaHutsheni. Khona wayesevula ingqondo yabo, ukuze baqonde imibhalo.”—Luka 24:44, 45.

Ngendlela ivesi 45 elihunyushwe ngayo kuyi-Kingdom Interlinear, uJesu wakwenza lokhu ngokuthi “ahlanganise imiBhalo” evela engxenyeni yeBhayibheli yesiHeberu eyabikezela izenzakalo nezimo zokuphila zikaMesiya othenjisiwe owayezofika, futhi wayiqhathanisa nezenzakalo zokuphila kukaJesu ezaziyigcwalisile. Kamuva, umphostoli uPawulu wasebenzisa lendlela efanayo lapho ‘evula, echasisa’ ukuthi uJesu wayenguMesiya. (IzEnzo 17:3) Futhi, yi-Kingdom Interlinear ecacisa lenqubo ngokusho ukuthi lokhu wakwenza “ngokuphenyisisa nangokuqhathanisa” iziprofetho zobuMesiya ezisemiBhalweni yesiHeberu nezenzakalo zokuphila kukaJesu ezazikugcwalisa. Ibhokisi elihambisana nalesihloko linikeza umongo weziningi zaleziprofetho zemibhalo yesiHeberu ezagcwaliswa yizenzakalo zokuphila kukaJesu nezabonisa ukuthi wayenguMesiya obikezelwe. Linikeza isibonelo salokho okwakha isibonakaliso esiyinhlanganisela.

Isibonakaliso Esiyinhlanganisela Sokuba-khona KukaKristu

Yisibonakaliso esinjalo kuphela esiyinhlanganisela esiphawula isikhathi sokubuya kukaJesu, noma ngokunembe kakhulu, ukuba-khona kwakhe. Igama lesiGreki elithi pa·rou·siʹa izinguqulo eziningi ezilihumusha ngokuthi “ukuza” kuMathewu 24:3 alisho isikhathi ayeyokuza noma afike ngaso kodwa lisho ukuthi usefikile kakade futhi usekhona. Endabeni kaJesu lisho ukuthi ukhona ngokungabonakali njengeNkosi kaJehova ebekwe esihlalweni sobukhosi futhi uyabusa esezulwini. Lokhu kuvumelana namazwi kaJesu akuJohane 14:19: “Kuseyisikhashana izwe lingasangiboni.” Njengoba ayengenakubonakala ngokwenyama, wanikeza isibonakaliso esasiyophawula ukubuya nokuba-khona kwakhe okungabonakali njengeNkosi kaJehova ebusayo.

Isibonakaliso asinikeza sasingenaso isici esisodwa noma ezimbalwa nje kuphela. Sasinezici eziningi okwakumelwe zihlanganiswe ndawonye njengesibonakaliso esiyinhlanganisela, njengoba kwakunjalo ngesibonakaliso esiyinhlanganisela ngesikhathi sokuza kwakhe kokuqala njengoMesiya. Ngakho, ngezici noma izenzakalo eziningi, ubonakalisa ukuba-khona kwakhe okungabonakali ngendlela ecacile kulesikhathi njengeNkosi kaJehova ebusayo ebekwe esihlalweni sobukhosi ezulwini kodwa eyelulela amandla nethonya layo ezindabeni zomhlaba. Kungase kuvele izixwayiso zamanga lapho kugcizelelwa esisodwa noma ezimbili kuphela zalezici, kunokuba kugcizelelwe izici eziningi ezakha lesibonakaliso esiyinhlanganisela. Kunjengalamadoda ayisithupha ayizimpumputhe ase-Indostan, ngayinye eyenza isiphetho esiyiphutha ngaphambi kwesikhathi ngenxa yokuthinta ingxenye eyodwa kuphela yomzimba wendlovu.

Ukugcwaliseka kwalesibonakaliso esiyinhlanganisela esanikezwa uJesu, kanye nezinye izimo ezengeziwe ezanikezwa abathathu babaphostoli, kwaqala ngendlela ephawulekayo kusukela ngo-1914 kuqhubeke. Ukufingqwa kwalezici ezihlukahlukene kanye nokugcwaliseka kwazo kuyalandela.

“Isizwe siyakuvukela isizwe, nombuso uvukele umbuso.” (Mathewu 24:7) IMpi Yezwe I yaqala ngo-1914 inamazwe angu-28 ayehilelekile, kwabulawa abantu abayizigidi ezingu-14. Kwalandela iMpi Yezwe II eyayinamazwe angu-59 ayehilelekile, kwabulawa abantu abayizigidi ezingu-50.

‘Ubici izindawo ngezindawo.’ (Luka 21:11) Njengoba kwakuphela iMpi Yezwe I, abantu abangaba yizigidi ezingu-21 babulawa umkhuhlane waseSpain. Kusukela ngalesosikhathi, isifo senhliziyo, umdlavuza, ingculaza, nolunye ubhadane lwezifo kuye kwabulala amakhulu ezigidi.

“Kube-khona indlala.” (Mathewu 24:7) Indlala enkulu kunazo zonke kuwo wonke umlando yagadla ngemva kweMpi Yezwe I. Enye futhi embi kakhulu yalandela iMpi Yezwe II, futhi manje ukuntuleka kokudla okunomsoco kuthinta ingxenye eyodwa kwezinhlanu zomphakathi womhlaba. Minyaka yonke, izingane ezingaba yizigidi ezingu-14 zibulawa ukuntuleka kokudla okunomsoco.

“Kuyakuba-khona ukuzamazama okukhulu komhlaba.” (Luka 21:11) Ukuzamazama komhlaba ngemva kuka-1914—cabangela okumbalwa okukhulu. Ngo-1915, e-Italy, kwafa imiphefumulo engu-32 610; ngo-1920, eChina, kwafa abangu-200 000; ngo-1923, eJapane, kwafa abangu-143- 000; ngo-1939, eTurkey, kwafa abangu-32 700; ngo-1970, ePeru, kwafa abangu-66 800; ngo-1976, eChina, kwafa abangu-240 000 (abanye bathi abangu-800 000); ngo-1988, e-Armenia, kwafa abangu-25 000.

‘Ukwanda kokubi.’ (Mathewu 24:12) Ukungabi-namthetho kuye kwadlanga kusukela ngo-1914; namuhla kugcwala yonke indawo ngokushesha. Ukubulala, ukudlwengula, ukuphanga, izimpi zamaqembu ezigelekeqe—kuphambili ezihlokweni zamaphephandaba futhi kugcwele ezindabeni. Abaholi bezombangazwe baqola umphakathi, intsha iphatha izibhamu futhi iyabulala, izingane zesikole ziyahlukumezana. Ezindaweni eziningi akulondekile ukuhamba emigwaqweni ngisho nasemini.

“Usizi luyakwehlela izizwe, zixakeke . . . abantu baphele amandla ngokwesaba nangokubheka okuvelela umhlaba.” (Luka 21:25, 26) Ubugebengu, ubudlova, ukuba imilutha yezidakamizwa, ukuhlukana kwemikhaya, ukuntengantenga kwezomnotho, ukuntuleka kwemisebenzi—loluhlu lude futhi luyakhula. Omunye usosayensi owaziwayo wabhala: “Sizodla ngokwesaba, silale ngokwesaba, siphile ngokwesaba futhi sife ngokwesaba.”

“Ezinsukwini zokugcina . . . izikhathi ezinzima.” (2 Thimothewu 3:1) Umphostoli uPawulu wakhuluma ngabantu ‘ababuthuntu.’ (Efesu 4:19) Nokho, waningiliza ngokuwohloka kokuziphatha akubikezelela ‘izinsuku zokugcina.’ Kuzwakala njengezindaba zanamuhla ezisakazwayo: “Yazi lokhu ukuthi ezinsukwini zokugcina kuzakuvela izikhathi ezinzima; ngokuba abantu bazakuba-ngabazithandayo, nabathandimali, nabazigabisayo, nabazidlayo, nabahlambalazayo, nabangalaleli abazali, nabangabongiyo, nabahlazisayo, nabangenaluthando, nabahlebi, nabangazithibi, nabangenabumnene, nabangathandi okuhle, nabakhapheli, nabanamawala, nabakhukhumele, nabathanda injabulo kunokuthanda uNkulunkulu, nabanesimo sokumesaba uNkulunkulu, kepha amandla akho bewaphika; labo-ke wobagwema.”—2 Thimothewu 3:1-5.

“Ngezinsuku zokugcina kuyakufika abahleki abahleka usulu.” (2 Petru 3:3) Amaphephandaba, imithombo yezindaba, omagazini, izincwadi, nezithombe zamabhayisikobho ngokweyisa kuyalenqaba iBhayibheli futhi kubeka esikhundleni salo imibono yako yenkulumo-ze yokuzicabangela, kuthi njengoba uPetru abikezela: “Siphi isithembiso sokufika kwakhe na? Ngokuba kuselokhu obaba balala, konke kumi kunjalo njengakwasekuqaleni kokudalwa.”—2 Petru 3:4.

“Bayakunibamba, banizingele.” (Luka 21:12) Kusukela ngo-1914 kuze kuzofika kulonyaka, oFakazi BakaJehova baye baboshwa ngonya, bamangalelwa ngamanga, bahlaselwa yizixuku futhi izinkulungwane zafakwa emakamu okuhlushwa kaHitler, lapho babehlushwa khona, abaningi babulawa, abanye ngonya ngokunqunywa amakhanda ngesihluku. Kwamanye amazwe, abuswa kokubili ngomashiqela nangentando yeningi, umsebenzi wabo wokufakaza ngoJehova noMbuso wakhe uye wavinjelwa futhi laboFakazi bafakwa ejele. Konke lokhu kugcwalisa amazwi kaJesu ngezinsuku zokugcina.—Mathewu 5:11, 12; 24:9; Luka 21:12; 1 Petru 4:12, 13.

“Lezindaba ezinhle zombuso ziyakushunyayelwa ezweni lonke elakhiwe.” (Mathewu 24:14, NW) Ziphi izindaba ezinhle? Izindaba ezinhle zoMbuso kaKristu obusa usezulwini, ngoba yilowo umbuzo owabuzwa uJesu owaveza isiprofetho sakhe sesibonakaliso esiyinhlanganisela salesosenzakalo. Ziye zashunyayelwa oFakazi BakaJehova kusukela ngo-1914. Bayizinkulungwane ezine ababekwenza ngo-1919, abangaphezu kwezigidi ezine ngo-1990, futhi ngo-1992 kwenye inyanga bafinyelela ku-4 472 787. Kwasakazwa izincwadi zeBhayibheli ngezilimi ezingaba ngu-200 emazweni angu-229. Lesici sesibonakaliso esiyinhlanganisela asikaze nanini sigcwaliseke ngaphambili.

‘Ukubhubhisa ababhubhisa umhlaba.’ (IsAmbulo 11:18) Abantu abahahayo bebezimisele ngaso sonke isikhathi ukubhubhisa umhlaba ngenxa yenzuzo yobugovu, kodwa ngaphambi kwalesizukulwane abakaze nanini babe namandla okwenza kanjalo. Manje, kusukela ngo-1914, ubuchwepheshe banamuhla buye babanikeza lawomandla, futhi bawasebenzisa kabi. Babhubhisa umhlaba.

Nansi imiphumela embalwa eyingozi kakhulu: imvula ye-acid, ukushisa ngokweqile kwembulunga, izimbobo ongwengwesini lwe-ozone, imithi eyingozi yokubulala izinambuzane ezidla izitshalo, imfucumfucu enoshevu, ukunqwabelana kwemfucumfucu, ukungcola kwenuzi, ukungcola okubangelwa ukuchitheka kukawoyela, ukulahlwa kwendle obala, amachibi afile, amahlathi aqothuliwe, amanzi avela phansi emhlabathini angcolisiwe, izinhlobo zezinto eziphilayo ezisongelwayo, impilo yabantu elimele.

Usosayensi uBarry Commoner uthi: “Ngikholelwa ukuthi ukungcoliswa komhlaba okuqhubekayo, uma kunganakiwe, ekugcineni kuyobhubhisa ukufaneleka kwaleplanethi njengendawo yokuphila komuntu. . . . Ubunzima abubangelwa ukunganaki okungokwesayensi, kodwa ukuhaha kwangamabomu.” I-State of the World 1987 ithi: “Isilinganiso sezenzo zabantu sesiqale ukusongela ukuhlaleka komhlaba ngokwawo.” Uhlelo oluwuchungechunge lwethelevishini olwakhishwa emoyeni ngo-1990 ngokuphawulekayo lwalunikezwe isihloko esithi “Umjaho Wokusindisa Iplanethi.”

Lezizenzakalo eziningi ezihlanganiswa ndawonye njengesibonakaliso esisodwa phakathi nesizukulwane esisodwa azinakuchithwa ngokuthi ziyizenzakalo ezenzeke ngengozi. Izinga ezenzeka ngalo nalo liyanezela. Futhi kunezinye zalezenzakalo, njengokushunyayelwa embulungeni yonke kwalesigijimi sezindaba ezinhle nokubhujiswa komhlaba, ezingakaze zenzeke kusukela ekuqaleni kwendalo. Isibonakaliso esiyinhlanganisela sokuba-khona kukaKristu Jesu sivusa amadlingozi.

“Uma ekhona onezindlebe zokuzwa, makezwe.”—Marku 4:23.

[Ibhokisi ekhasini 7]

Ubufakazi Obuyinhlanganisela Bokufika KukaJesu Kokuqala Njengomesiya

WAZALELWA esizweni sakwaJuda (Genesise 49:10); wayezozondwa, akhashelwe ngomunye wabaphostoli bakhe; kwenziwe inkatho ngezambatho zakhe; aphuziswe uviniga nenyongo; aklolodelwe esigxotsheni; kungaphulwa mathambo akhe; akazange abone ukubola; wavuswa kwabafileyo (IHubo 69:4; 41:9; 22:18; 69:21; 22:7, 8; 34:20; 16:10); wazalwa incasakazi; ungowomkhaya kaDavide; uyitshe lokukhubekisa; wenqatshwa; wathula phambi kwabamangaleli; wathwala izifo; wabalwa kanye nezoni; wafa ukufa okuwumhlatshelo; wagwazwa ohlangothini; wangcwatshwa nezicebi (Isaya 7:14; 11:10; 8:14, 15; 53:3; 53:7; 53:4; 53:12; 53:5; 53:9); wabizwa ukuba aphume eGibithe (Hoseya 11:1); wazalelwa eBetlehema (Mika 5:2); wavela njengenkosi; ekhwele imbongolo; wakhashelwa ngezinhlamvu ezingu-30 zesiliva; abalandeli bahlakazeka.—Zakariya 9:9; 11:12; 13:7.

[Ibhokisi ekhasini 8]

Isibonakaliso Esiyinhlanganisela Sokuba-khona KukaJesu Emandleni Okubusa Ekubuyeni Kwakhe

IMPI yezwe; ukuntuleka kokudla; izifo eziwubhadane; ukuzamazama komhlaba (Mathewu 24:7; Luka 21:10, 11; IsAmbulo 6:1-8); ukwanda kokungabi-namthetho; ukukhaphelana nokuzondana; ukungalaleli abazali; ukungabi naluthando olungokwemvelo; ukungazithibi; abanenkani; abathandi bemali; abathanda injabulo ngaphezu kukaNkulunkulu; abanesimo sokuzinikela kokwesaba uNkulunkulu kodwa abawaphikayo amandla ako; abahlambalazayo; abanolaka; abashushisa abalandeli bakaKristu; abamangalela abalandeli bakaKristu, futhi bababulale (Mathewu 24:9, 10, 12; Luka 21:12; 2 Thimothewu 3:1-5); abahleki bosulu bokuba-khona kukaJesu; abathi zonke izinto ziqhubeka njengasekuqaleni kwendalo (2 Petru 3:3, 4); ababhubhisi bendawo yomhlaba ezungezile.—IsAmbulo 11:18.