Umbono WeBhayibheli

Kungani Kufanele Ulawule Intukuthelo Yakho?

KWAKUYISIQALO esibi. “Manje njengoba sengiyinhloko lapha ekhaya, ngeke ungiphoxe ngokufika sekwephuzile,” kubhavumula uJohn kumakoti wakhe omusha, uGinger.a Imizuzu engaphezu kwengu-45 wayemkhahla kuyilapho emphoqelela ukuba angasukumi kusofa. Inkulumo exhaphazayo yaba insakavukela emshadweni wabo. Ngokudabukisayo, intukuthelo kaJohn yadlondlobala. Wayegaklaza izivalo, agqule itafula lasekhishini, futhi ashayele njengohlanya kuyilapho eshaya ngamandla isondo lokuqondisa, ngaleyo ndlela ebeka engozini ukuphila kwabanye.

Ngeshwa, njengoba ngokungangabazeki wazi kamhlophe, izimo ezinjalo ziyinsakavukela. Ingabe intukuthelo yalendoda yayifanelekile, noma yayihlulwa ukuzilawula? Ingabe yonke intukuthelo ayilungile? Kunini lapho intukuthelo isuke ingasalawuleki khona? Kunini lapho isiwukweqisa khona?

Intukuthelo elawulwayo ingase ibe efanelekile. Ngokwesibonelo, intukuthelo kaNkulunkulu yavuthela imizi yasendulo, eyayiziphethe kabi yaseSodoma naseGomora. (Genesise 19:24) Ngani? Ngoba izakhamuzi zakuleyo mizi zazihileleke emikhubeni yobulili enobudlova nokuziphatha okubi, njengoba kwakwaziwa kabanzi kuleso sifunda. Ngokwesibonelo, lapho izithunywa eziyizingelosi zivakashele indoda elungile uLoti, isixuku sezinsizwa kanye namadoda amadala sazama ukudlwengula izivakashi zikaLoti. UJehova uNkulunkulu kwakufanele athukuthele ngenxa yokuziphatha kwaso okubi kakhulu.—Genesise 18:20; 19:4, 5, 9.

NjengoYise, umuntu ophelele uJesu Kristu wayethukuthela ngezinye izikhathi. Ithempeli laseJerusalema kwakufanele libe isikhungo sokukhulekela sabantu abakhethiwe bakaNkulunkulu. Kwakufanele libe “indlu yomthandazo,” lapho abantu babenganikela khona imihlatshelo neminikelo yabo kuNkulunkulu nalapho babengafundiswa khona izindlela zakhe futhi bathethelelwe izono zabo. Ethempelini, babengakhuluma noJehova ngendlela engokomfanekiso. Kunalokho, abaholi benkolo bosuku lukaJesu baphendula ithempeli laba “indlu yokuthengisela” ‘nomhume wabaphangi.’ (Mathewu 21:12, 13; Johane 2:14-17) Babezuza bona ngokwabo ngokudayisa izilwane ezazisetshenziswa njengomnikelo. Eqinisweni, babephanga umhlambi. Ngakho, kwakufaneleka ngempela ukuba iNdodana kaNkulunkulu ithukuthele lapho ixosha labo baphangi endlini kaYise. Kwakufanelekile ukuba uJesu athukuthele!

Lapho Abantu Abangaphelele Bethukuthela

Abantu abangaphelele nabo ngezinye izikhathi bangathukuthela ngokufanelekile. Cabangela okwenzeka kuMose. Isizwe sakwa-Israyeli sasisanda kukhululwa ngendlela eyisimangaliso eGibithe. UJehova wayebonise amandla akhe amakhulu konkulunkulu bamanga baseGibithe ngokushaya abantu baseGibithe ngezinhlupho eziyishumi. Khona-ke wavulela ama-Israyeli indlela yokubaleka ngokuhlukanisa uLwandle Olubomvu. Kamuva, aholelwa ngaphansi kweNtaba YaseSinayi, lapho ahlelwa khona njengesizwe. Njengomxhumanisi, uMose wakhuphukela entabeni ukuze ayolanda imithetho kaNkulunkulu. Kanye neminye imithetho, uJehova wanikeza uMose iMiyalo Eyishumi, eyayibhalwe “ngomunwe kaNkulunkulu” ezibhebheni zamatshe ezazenziwe uNkulunkulu ngokwakhe entabeni. Nokho, lapho uMose ehla, watholani? Abantu base bephendukele ekukhulekeleni isithombe sethole legolide! Yeka ukuthi babesheshe kangakanani ukukhohlwa! Kwakusadlule amasonto ambalwa nje. Ngokufanelekile, “ulaka lukaMose lwase luvutha.” Waphula izibhebhe zamatshe wabhubhisa nesithombe sethole.—Eksodusi 31:18; 32:16, 19, 20.

Kamuva, uMose wathukuthela lapho abantu bekhononda ngokuntuleka kwamanzi. Ecasukile, okwesikhashana waphelelwa ukuthobeka, noma umoya wobumnene aziwa ngawo. Lokhu kwaholela ephutheni elingathi sína. Kunokuba aphakamise uJehova njengoMnakekeli ka-Israyeli, uMose wakhuluma nabantu ngesankahlu futhi wadonsela ukunakekela kuye nakumfowabo u-Aroni. Ngakho, uNkulunkulu wabona kufanelekile ukuba amjezise uMose. Wayengenakuvunyelwa ukuba angene ezweni lesithembiso. Ngemva kwalesi senzakalo saseMeriba, akukhulunywa ndawo ngoMose ethukuthele. Ngokusobala, wafunda isifundo.—Numeri 20:1-12; Duteronomi 34:4; IHubo 106:32, 33.

Ngakho, kunomehluko phakathi kukaNkulunkulu nomuntu. UJehova ‘angayilawula intukuthelo yakhe’ futhi uchazwa ngokufanelekile ngokuthi ‘uyephuza ukuthukuthela’ ngoba uthando, hhayi intukuthelo, luyimfanelo yakhe evelele. Intukuthelo yakhe njalo ilungile, ifanelekile, futhi uyayilawula. (Eksodusi 34:6; Isaya 48:9, qhathanisa ne-NW; 1 Johane 4:8.) Umuntu ophelele uJesu Kristu njalo wayekwazi ukulawula indlela ayebonakalisa ngayo intukuthelo yakhe; wayechazwa ngokuthi ‘unomoya omnene.’ (Mathewu 11:29) Ngakolunye uhlangothi, abantu abangaphelele, ngisho nabantu abanokholo njengoMose, baye baba nobunzima ekulawuleni intukuthelo yabo.

Futhi, ngokuvamile abantu bayehluleka ukucabangisisa ngemiphumela. Kungaba nemiphumela engemihle ngenxa yokuthukuthela. Ngokwesibonelo, yimiphi imiphumela esobala eba khona lapho indoda ithukuthelela umkayo kuze kube seqophelweni lokuba ibhodloze udonga ngesibhakela? Impahla iyalimala. Isandla sayo singase silimale. Kodwa ngaphezu kwalokho, yimuphi umphumela intukuthelo yakhe engaba nawo endleleni umkayo ayithanda nayihlonipha ngayo? Udonga lungase lulungiswe ezinsukwini ezimbalwa, futhi nesandla sayo singaphola emasontweni ambalwa; kodwa kuyothatha isikhathi esingakanani ukuba umkayo aphinde ayethembe futhi ayihloniphe?

Eqinisweni, iBhayibheli ligcwele izibonelo zabantu abahluleka ukulawula intukuthelo yabo futhi babhekana nemiphumela yalokho. Cabangela abambalwa. UKayini waxoshwa ngemva kokubulala umfowabo u-Abela. USimeyoni noLevi baqalekiswa uyise ngenxa yokubulala amadoda aseShekemi. UJehova wajezisa u-Uziya ngochoko ngemva kokuba u-Uziya ethukuthelele abapristi ababezama ukumlungisa. Lapho uJona ‘ethukuthela,’ uJehova wamsola. Bonke kwadingeka balandise ngenxa yokuthukuthela kwabo.—Genesise 4:5, 8-16; 34:25-30; 49:5-7; 2 IziKronike 26:19; Jona 4:1-11.

AmaKristu Azolandisa

Ngokufanayo, amaKristu namuhla kumelwe alandise ngezenzo zawo kokubili kuNkulunkulu nakubantu akholwa kanye nabo ngezinga elithile. Lokhu kungabonakala kalula ekusebenziseni kweBhayibheli amagama esiGreki abonisa intukuthelo. Elinye lamagama amabili asetshenziswa kakhulu elithi or·geʹ. Ngokuvamile lihunyushwa ngokuthi “ulaka” futhi linomqondo wokuqaphela ngisho nowokwenza ngamabomu, ngokuvamile ngomqondo wokuphindisela. Ngakho, uPawulu wayala amaKristu aseRoma: “Ningaziphindiseleli, bathandekayo, kodwa qhelelani ulaka [or·geʹ]; ngoba kulotshiwe: ‘Ingeyami impindiselo; ngizobuyisela mina, kusho uJehova.’” Kunokuba abambele abafowabo amagqubu, akhuthazwa ukuba “[anqobe] okubi ngokuhle.”—Roma 12:19, 21.

Elinye igama elivame ukusetshenziswa elithi thy·mosʹ. Igama eliwumsuka “ngokuyinhloko libonisa ukuvunguza ngamandla komoya, amanzi, inhlabathi, izilwane, noma abantu.” Ngakho, leli gama lichazwa ngezindlela ezihlukahlukene ngokuthi “ukuqubuka komuzwa ononya,” “ukuqubuka kwentukuthelo,” noma “ukusuka kothuli lwezichwe, okuphazamisa ukuthula kwengqondo, futhi kubangele isiyaluyalu ekhaya nasezakhamuzini.” Njengentaba-mlilo engase iqhume ngokungazelele futhi ikhiphe umlotha oshisayo, amatshe nodaka olushisayo, okungase kulimaze, kukhubaze, futhi kubulale, injalo nendoda noma owesifazane ongakwazi ukulawula intukuthelo yakhe. Ubuningi begama elithi thy·mosʹ busetshenzisiwe kweyabaseGalathiya 5:20, lapho uPawulu ehlanganisa khona “isifuthefuthe sentukuthelo” neminye “imisebenzi yenyama” (ivesi 19), njengobufebe, ukuziphatha okuxekethile nezikhathi zokudakwa. Ngokuqinisekile, ukuziphatha kukaJohn—okuchazwe ekuqaleni—kusibonisa kahle “isifuthefuthe sentukuthelo.”

Ngakho-ke, ibandla lobuKristu kufanele libabheke kanjani abantu abahlanganyela nalo abaqhubeka behileleka ezenzweni zokuba nobudlova kumuntu noma empahleni yomunye? Intukuthelo engalawulwa iyabhubhisa futhi ingaholela kalula ebudloveni. Khona-ke, ngokunengqondo uJesu wathi: “Ngithi kini wonke umuntu oqhubeka ethukuthelele umfowabo uyolandisa enkantolo yobulungisa.” (Mathewu 5:21, 22) Amadoda ayelulekwa: “Qhubekani nithanda omkenu futhi ningabathukutheleli kakhulu.” Umuntu ‘othambekele olakeni’ akakufanelekeli ukuba umbonisi ebandleni. Ngakho, abantu abangakwazi ukulawula intukuthelo yabo akufanele babhekwe njengesibonelo ebandleni. (Kolose 3:19; Thithu 1:7; 1 Thimothewu 2:8) Eqinisweni, ngemva kokuba sekucatshangelwe isimo sakhe sengqondo, indlela yokuziphatha nezinga lomonakalo awenzile ekuphileni kwabanye abantu, umuntu ongakwazi ukulawula isifuthefuthe sentukuthelo angaxoshwa ebandleni—okuwumphumela omubi kakhulu.

Ingabe uJohn, okukhulunywe ngaye ekuqaleni, wagcina ekwazile ukulawula imizwelo yakhe? Ingabe ekugcineni wakwazi ukugwema inhlekelele ayephokophele kuyo? Ngokudabukisayo, ukubhavumula kwadlondlobala kwaba ukusunduza. Ukukhomba umkakhe ngomunwe kwaholela ekumlimazeni ngokoqobo, kabuhlungu, ngawo umunwe. UJohn wayeqikelela ukuba agweme ukulimaza uGinger ezindaweni ezisobala futhi wazama ukufihla ukuziphatha kwakhe. Nokho, ekugcineni, waphendukela ekumkhahleleni, ekumshayeni ngesibhakela, ekumdonseni ngezinwele nakokubi nakakhulu. Manje uGinger uhlala ngokuhlukana noJohn.

Lokhu kwakungamelwe kwenzeke. Abaningi abasezimweni ezifanayo baye bakwazi ukulawula intukuthelo yabo. Ngakho-ke, yeka ukuthi kubaluleke kangakanani ukulingisa isibonelo esiphelele sikaJesu Kristu. Akazange abe necala ngisho nelilodwa lesifuthefuthe sentukuthelo engalawuleki. Intukuthelo yakhe njalo yayilungile; futhi wayeyilawula. Ngokuhlakanipha, uPawulu waseluleka sonke: “Thukuthelani, kodwa nokho ningoni; ilanga malingashoni nisesimweni sokucasuka.” (Efesu 4:26) Uma sikuqaphela ngokuthobeka ukuthi sinokulinganiselwa njengabantu nokuthi siyokuvuna esikutshalayo, kunesizathu esihle sokuthi silawule intukuthelo.

[Umbhalo waphansi]

[Umthombo Wesithombe ekhasini 18]

Saul Attempts the Life of David/The Doré

Bible Illustrations/Dover Publications, Inc.