⁹ Lapho ahlulela uSathane, uJehova wembula indlela entsha yokubonakalisa ubukhosi bakhe, ithuluzi ayeyobuyisela ngalo ukuthula nokuhleleka kuyo yonke indawo. UNkulunkulu wathi kuSathane: “Ngizobeka ubutha phakathi kwakho nowesifazane naphakathi kwenzalo yakho nenzalo yakhe. Yona iyokulimaza ekhanda wena uyoyilimaza esithendeni.” (Genesise 3:15) Kanjalo uJehova wembula ukuthi ‘kwakunenzalo’ ayezoyinika amandla okuchoboza uSathane namabutho akhe futhi ibonise ukufaneleka kobukhosi bukaJehova.—IHubo 2:7-9; 110:1, 2.

10. (a) Ngubani owaba ‘inzalo’? (b) UPawulu wathini ngokugcwaliseka kwesiprofetho sokuqala?

¹⁰ Leyo “nzalo” yaba uJesu Kristu kanye neqembu elikhethiwe lababusi abakanye naye. Bebonke bakha uMbuso kaNkulunkulu ophethwe uMesiya. (Daniyeli 7:13, 14, 27; Mathewu 19:28; Luka 12:32; 22:28-30) Nokho, konke lokhu akuzange kwembulwe ngokushesha. Empeleni, ukuthi isiprofetho sokuqala sasiyogcwaliseka kanjani kwahlala ‘kuyimfihlo engcwele eyayigciniwe kungakhulunywa lutho ngayo izikhathi zaphakade.’ (Roma 16:25) Amakhulu eminyaka, amadoda okholo alangazelela isikhathi sokwembulwa kwale “mfihlo engcwele” nokugcwaliseka kwesiprofetho sokuqala, kulwelwe ubukhosi bukaJehova.—Roma 8:19-21.

“Imfihlo Engcwele” Yembulwa Kancane Kancane

11. Yini uJehova ayitshela u-Abrahama?

¹¹ Njengoba isikhathi siqhubeka, uJehova wazembula kancane kancane izici ‘zemfihlo engcwele yombuso waKhe.’ (Marku 4:11) U-Abrahama, indoda eyabizwa ngokuthi “umngane kaJehova,” waba phakathi kwabantu uJehova abembulela le mfihlo. (Jakobe 2:23) Wathembisa u-Abrahama ukuthi ‘wayezokwenza isizwe esikhulu’ ngaye. Kamuva, uNkulunkulu wanikeza u-Abrahama ukwaziswa okwengeziwe: “Kuyophuma amakhosi kuwe” futhi “ngenzalo yakho zonke izizwe zomhlaba ngokuqinisekile ziyobusiswa.”—Genesise 12:2, 3; 17:6; 22:17, 18.

12. Inzalo kaSathane yazibonakalisa kanjani ngemva kukaZamcolo?

¹² Ngesikhathi sika-Abrahama, abantu base beke bazama ukuzibusa. Ngokwesibonelo, nakhu okushiwo iBhayibheli ngoNimrode, isizukulwane sikaNowa: “Yena waqala ukuba ngonamandla emhlabeni. Waba yiphisi elinamandla ngokumelene noJehova.” (Genesise 10:8, 9) Kusobala ukuthi uNimrode nabanye ababusi ababezibekile babelawulwa uSathane. Bona nabasekeli babo baba ingxenye yenzalo kaSathane.—1 Johane 5:19.

13. Yini uJehova ayibikezela esebenzisa uJakobe?

¹³ Injongo kaJehova iqhubekela phambili naphezu kwemizamo kaSathane yokumisa ababusi abangabantu. Ngomzukulu ka-Abrahama, uJakobe, uJehova wembula lokhu: “Intonga yobukhosi ngeke isuke kuJuda, nobhoko lomyali phakathi kwezinyawo zakhe, kuze kufike uShilo; futhi uyolalelwa izizwe zonke.” (Genesise 49:10) Elithi “Shilo” lisho ukuthi “Lowo Okungokwakhe.” Ngakho, la mazwi ayisiprofetho abonisa ukuthi kwakuzofika lowo onelungelo elingokomthetho lokuthola “intonga yobukhosi,” noma ubukhosi, kanye “nobhoko lomyali,” noma amandla okubusa “izizwe zonke” noma sonke isintu. Kwakuzoba ubani Lowo?

“Kuze Kufike UShilo”

14. Isiphi isivumelwano uJehova asenza noDavide?

¹⁴ Enzalweni kaJuda, umuntu wokuqala owakhethwa uJehova ukuba abuse abantu baKhe kwaba umalusi uDavide, indodana kaJese.a (1 Samuweli 16:1-13) Naphezu kokuthi uDavide wenza izono namaphutha, uJehova wambonisa umusa ngenxa yokuthi wayeqotho ebukhosini baKhe. Ekhanyisa isiprofetho sase-Edene ngokwengeziwe, uJehova wenza isivumelwano noDavide: “Ngokuqinisekile ngiyovusa inzalo yakho ngemva kwakho, eyophuma ezibilinini zakho; futhi impela ngiyowumisa uqine umbuso wayo.” Lokho kwakungeke nje kugcine ngoSolomoni, indodana yakhe eyamlandela esihlalweni, ngoba isivumelwano sathi: “Ngokuqinisekile ngiyosimisa siqine isihlalo sobukhosi sombuso wayo kuze kube nini nanini.” Leso sivumelwano sikaDavide sacacisa ukuthi ngokuhamba kwesikhathi “inzalo” yoMbuso ethenjisiwe yayiyovela emndenini kaDavide.—2 Samuweli 7:12, 13.

15. Kungani umbuso wakwaJuda wawungase ubhekwe njengomfuziselo woMbuso kaNkulunkulu?

¹⁵ Uhlanga lwamakhosi ayegcotshwa umpristi ophakeme ngamafutha angcwele lwaqala ngoDavide. Ngakho, la makhosi ayengase abizwe ngokuthi angabagcotshiwe, noma omesiya. (1 Samuweli 16:13; 2 Samuweli 2:4; 5:3; 1 AmaKhosi 1:39) Kwakuthiwa ahlala esihlalweni sobukhosi sikaJehova futhi amelele uJehova eJerusalema. (2 IziKronike 9:8) Ngalowo mqondo, umbuso wakwaJuda wawumelela uMbuso kaNkulunkulu, uwukubonakaliswa kobukhosi bukaJehova.

16. Yaba yini imiphumela yokubusa kwamakhosi akwaJuda?

¹⁶ Lapho inkosi nabantu bezithoba ebukhosini bukaJehova, babethola isivikelo nesibusiso sakhe. Ukubusa kukaSolomoni ikakhulu kwaba yisikhathi sokuthula nokuchuma okungenakuqhathaniswa, kwabonisa amazwibela ayisiprofetho esikhathi sokubusa koMbuso kaNkulunkulu lapho ithonya likaSathane liyobe seliqedwe ngokuphelele futhi ubukhosi bukaJehova sebulwelwe. (1 AmaKhosi 4:20, 25) Ngokudabukisayo, iningi lamakhosi ohlu lukaDavide alizange liphile ngokuvumelana nezimfuneko zikaJehova futhi abantu baqala ukukhulekela izithombe nokuziphatha kabi. Ekugcineni, uJehova wavumela ukuba lo mbuso ubhujiswe abaseBhabhiloni ngo-607 B.C.E. Kwabonakala sengathi uSathane wayephumelele emzamweni wakhe wokuthunaza ubukhosi bukaJehova.

17. Yini ebonisa ukuthi uJehova wayesabusa ngokugcwele naphezu kokugumbuqelwa kombuso wohlu lozalo lukaDavide?

¹⁷ Ukugumbuqelwa kombuso wohlu lozalo lukaDavide—nokugumbuqelwa kwangaphambidlana kombuso wakwa-Israyeli wasenyakatho—kwakungabonisi ukuthi ubukhosi bukaJehova buyasilela noma buyehluleka, kodwa kwakufakazela imiphumela edabukisayo yethonya likaSathane neyokuzibusa kwabantu ngaphandle kukaNkulunkulu. (IzAga 16:25; Jeremiya 10:23) Ukuze abonise ukuthi wayesabusa, uJehova washo lokhu esebenzisa umprofethi uHezekeli: “Susa umshuqulo, ususe umqhele. . . . Ngizokwenza kube incithakalo, incithakalo, incithakalo. Nalokhu futhi, ngeke kube okwamuntu aze afike onelungelo elingokomthetho, ngikunike yena.” (Hezekeli 21:26, 27) La mazwi abonisa ukuthi yayisazofika ‘inzalo’ ethenjisiwe, ‘Lowo owayenelungelo elingokomthetho.’

18. Isiphi isimemezelo esenziwa yingelosi uGabriyeli kuMariya?

¹⁸ Manje masiye onyakeni ka-2 B.C.E. Ingelosi uGabriyeli yathunyelwa kuMariya, incasakazi yaseNazaretha, umuzi waseGalile enyakatho yePalestina. Yathi: “Bheka! uzokhulelwa, ubelethe indodana, kumelwe uyiqambe ngokuthi uJesu. Iyoba umuntu omkhulu ibizwe ngokuthi yiNdodana YoPhezukonke; uJehova uNkulunkulu uyoyinika isihlalo sobukhosi sikaDavide uyise, futhi iyobusa njengenkosi phezu kwendlu kaJakobe kuze kube phakade, nombuso wayo ngeke uphele.”—Luka 1:31-33.

19. Yisikhathi saziphi izenzakalo ezithakazelisayo esase sisondele?

¹⁹ Ekugcineni, sase sisondele isikhathi sokwembula “imfihlo engcwele.” Lowo oyinhloko ‘enzalweni’ ethenjisiwe wayesezovela. (Galathiya 4:4; 1 Thimothewu 3:16) USathane wayezomlimaza esithendeni. Kodwa leyo “nzalo” nayo yayiyolimaza uSathane ekhanda, imbhubhise nazo zonke izikhonzi zakhe. Yayiyofakazela nokuthi ngoMbuso kaNkulunkulu, wonke umonakalo oye wenziwa uSathane uyolungiswa, ubukhosi bukaJehova bulwelwe. (Hebheru 2:14; 1 Johane 3:8)

Ingabe Usekela Ubukhosi Bukajehova?

“Thanini phakathi kwezizwe: ‘UJehova usebé yinkosi.’”—IHUBO 96:10.

1, 2. (a) Isiphi isenzakalo esiphawulekayo esenzeka cishe ngo-October 29 C.E.? (b) Leso senzakalo sasisho ukuthini kuJesu?

CISHE ngo-October 29 C.E., kwenzeka isenzakalo esiphawulekayo esasingakaze sibonwe emhlabeni. Umlobi weVangeli, uMathewu, uyabika: “Ngemva kokubhapathizwa, uJesu wakhuphuka masinyane emanzini; futhi, bheka! amazulu avuleka, [uJohane uMbhapathizi] wabona umoya kaNkulunkulu wehla njengejuba uza phezu [kukaJesu]. Bheka! Kwaba khona nezwi livela emazulwini elathi: ‘Lo yiNdodana yami ethandekayo, engiyamukele.’” Lesi esinye sezenzakalo ezimbalwa ezalotshwa yibo bobane abalobi bamaVangeli.—Mathewu 3:16, 17; Marku 1:9-11; Luka 3:21, 22; Johane 1:32-34.

² Ukuthululwa komoya ongcwele ngokubonakalayo phezu kukaJesu kwambonakalisa engoGcotshiwe, okusho ukuthi uMesiya, noma uKristu. (Johane 1:33) Ekugcineni yayisivelile ‘inzalo’ eyayithenjisiwe! Phambi kukaJohane uMbhapathizi kwakumi lowo owayezolinyazwa uSathane esithendeni, yena asilimaze ekhanda leso sitha esikhulu sikaJehova nobukhosi baKhe. (Genesise 3:15) Kusukela ngaleso sikhathi, uJesu waqaphela ngokugcwele ukuthi kwakumelwe alwele ukufeza injongo kaJehova mayelana nobukhosi noMbuso waKhe.

 3. UJesu wazilungiselela kanjani indima ayezoyifeza ekusekeleni ubukhosi bukaJehova?

³ Ukuze alungele umsebenzi owawumhlalele, “uJesu, egcwele umoya ongcwele, wamuka eJordani, umoya wamholela ehlane.” (Luka 4:1; Marku 1:12) Elapho, waba nesikhathi sokuzindla ngokujulile izinsuku ezingu-40 ngempikiswano yobukhosi eyaphakanyiswa uSathane nangenkambo okwakudingeka ayithathe ukuze asekele ubukhosi bukaJehova. Leyo mpikiswano ihilela zonke izidalwa ezihlakaniphile—ezulwini nasemhlabeni. Ngakho senza kahle ngokuhlola inkambo kaJesu yokwethembeka, sibone lokho okumelwe sikwenze ukuze sibonise ukuthi nathi sifisa ukusekela ubukhosi bukaJehova.—Jobe 1:6-12; 2:2-6.

Impikiswano Yobukhosi Iba Sobala

 4. Yini uSathane ayenza eyabangela ukuba impikiswano yobukhosi ibe sobala?

⁴ Yiqiniso, uSathane wayezibona zonke lezi zenzakalo ezisanda kushiwo. Ngaphandle kokuchitha isikhathi, wahlasela ‘inzalo’ eyinhloko ‘yowesifazane’ kaNkulunkulu. (Genesise 3:15) USathane walinga uJesu kathathu, ethi makenze okwakubonakala kuzuzisa yena kunokwenza lokho uYise ayefuna ukuba akwenze. Impikiswano yobukhosi yaba sobala ikakhulu esilingweni sesithathu. USathane wabonisa uJesu “yonke imibuso yezwe nenkazimulo yayo.” Engenamahloni, wathi kuJesu: “Zonke lezi zinto ngizokunika zona uma uwa phansi wenze isenzo sokukhuleka kimi.” Azi kahle ukuthi “yonke imibuso yezwe” yayilawulwa uDeveli ngempela, uJesu wabonisa ukuthi wayemiphi empikiswaneni yobukhosi ngokuphendula: “Hamba, Sathane! Ngoba kulotshiwe ukuthi, ‘NguJehova uNkulunkulu wakho okumelwe umkhulekele, futhi nguye yedwa okumelwe unikele kuye inkonzo engcwele.’”—Mathewu 4:8-10.

 5. Isiphi isabelo esiyinselele okwakudingeka uJesu asifeze?

⁵ Ukuphila kukaJesu kwabonisa ngokucacile ukuthi umgomo wakhe oyinhloko kwakuwukusekela ubukhosi bukaJehova. UJesu wayazi kahle ukuthi kwakumelwe ahlale ethembekile kuze kube sekufeni, ebulawa nguSathane—isenzakalo esabikezelwa esiprofethweni njengokulinyazwa esithendeni ‘kwenzalo’ yowesifazane—ukuze afakazele ukufaneleka kobukhosi bukaNkulunkulu. (Mathewu 16:21; 17:12) Kwakudingeka afakazele nokuthi uMbuso kaNkulunkulu uyithuluzi eligunyazwe uJehova lokunqoba isihlubuki esinguSathane nokubuyisela ukuthula nokuhleleka kuyo yonke indalo. (Mathewu 6:9, 10) Yini uJesu ayenza ukuze afeze lesi sabelo esiyinselele?

“Umbuso KaNkulunkulu Ususondele”

 6. UJesu wakwenza kanjani kwaziwa ukuthi uMbuso uyithuluzi uNkulunkulu ‘azobhidliza ngalo imisebenzi kaDeveli’?

⁶ Okokuqala, “uJesu waya eGalile, eshumayela izindaba ezinhle zikaNkulunkulu ethi: ‘Isikhathi esimisiwe sesigcwalisekile, umbuso kaNkulunkulu ususondele.’” (Marku 1:14, 15) Empeleni wathi: “Kumelwe ngishumayele izindaba ezinhle zombuso kaNkulunkulu, ngoba yilokhu engathunyelwa kona.” (Luka 4:18-21, 43) UJesu walidabula lonke izwe, “eshumayela futhi ememezela izindaba ezinhle zombuso kaNkulunkulu.” (Luka 8:1) UJesu wenza nemisebenzi eminingi yamandla—wanika izixuku ukudla, wathulisa izivunguvungu, waphulukisa abagulayo, wavusa nabafileyo. Ngalezi zimangaliso, uJesu wabonisa ukuthi uNkulunkulu angawulungisa wonke umonakalo nokuhlupheka okwabangelwa ukuhlubuka kwase-Edene, ngaleyo ndlela ‘abhidlize imisebenzi kaDeveli.’—1 Johane 3:8.

 7. Yini uJesu ayala abalandeli bakhe ukuba bayenze, futhi kwaba namuphi umphumela?

⁷ Ukuze izindaba ezinhle zoMbuso zimenyezelwe ngezinga elikhulu ngangokunokwenzeka, uJesu wakha iqembu labalandeli abathembekile waliqeqeshela lo msebenzi. Waqale wathuma abaphostoli bakhe abangu-12 “ukuba bashumayele umbuso kaNkulunkulu.” (Luka 9:1, 2) Wabe esethuma abanye abangu-70 ukuba bamemezele lesi sigijimi: “Umbuso kaNkulunkulu usondele kini.” (Luka 10:1, 8, 9) Lapho laba bafundi bebuya futhi bebikela uJesu ngempumelelo yabo emsebenzini wokushumayela ngoMbuso, wathi: “Ngaqala ukubona uSathane esewile kakade njengombani uvela ezulwini.”—Luka 10:17, 18.

 8. Yini ukuphila kukaJesu okwayibonisa ngokucacile?

⁸ UJesu wazikhandla futhi wasebenzisa wonke amathuba okufakaza ngoMbuso. Wasebenza engaphezi, eshikashikeka ubusuku nemini, wadela ngisho nezinto ezivamile ezenza ukuphila kunethezeke. Wathi: “Izimpungushe zinemiphandu nezinyoni zezulu zinezidleke, kodwa iNdodana yomuntu yona ayinandawo yokubeka ikhanda.” (Luka 9:58; Marku 6:31; Johane 4:31-34) Ngaphambi nje kokufa kwakhe, uJesu wakhuluma ngesibindi phambi kukaPontiyu Pilatu: “Ngizele lokhu ezweni, ukuba ngifakazele iqiniso.” (Johane 18:37) Konke ukuphila kukaJesu kwabonisa ukuthi wayengezelanga nje ukuba umfundisi omkhulu noma umenzi wezimangaliso noma ngisho nje ukuba uMsindisi ozidelayo, kodwa wayezele ukuzosekela intando yeNkosi enguJehova nokuzofakazela amandla ayo okufeza leyo ntando ngoMbuso.—Johane 14:6.

“Kufeziwe!”

 9. USathane wagcina ephumelele kanjani ukulimaza isithende ‘senzalo’ yowesifazane kaNkulunkulu?

⁹ Konke lokho uJesu ayekwenza ngokuphathelene noMbuso akusiphathanga kahle iSitha, uSathane uDeveli. USathane wazama ngokuphindaphindiwe ukuthulisa ‘inzalo’ yowesifazane kaNkulunkulu ngokusebenzisa ingxenye esemhlabeni ‘yenzalo’ yakhe—ezombangazwe nenkolo. Kusukela ekuzalweni kwakhe kuze kube sekupheleni kokuphila kwakhe kwasemhlabeni, uJesu wahlaselwa ngokukhethekile nguSathane nezikhonzi zakhe. Ekugcineni, entwasahlobo ka-33 C.E., sase sifikile isikhathi sokuba iNdodana yomuntu inikelwe ezandleni zeSitha ukuze siyilimaze esithendeni. (Mathewu 20:18, 19; Luka 18:31-33) Ukulandisa kwamaVangeli kuyibonisa ngokucacile indlela abantu abasetshenziswa ngayo uSathane ukuba balahle uJesu ngecala futhi bambulale kabuhlungu esigxotsheni sokuhlushwa—kusukela kuJuda Iskariyothe kuya kubapristi abakhulu, ababhali, abaFarisi namaRoma.—IzEnzo 2:22, 23.

10. Ngokuyinhloko, yini uJesu ayifeza ngokufa kwakhe esigxotsheni sokuhlushwa?

¹⁰ Yini efika engqondweni yakho lapho ucabanga ngoJesu esesigxotsheni sokuhlushwa efa kancane kancane kabuhlungu? Mhlawumbe ukhumbula umhlatshelo wesihlengo uJesu awenza ngokungenabugovu ngenxa yesintu esinesono. (Mathewu 20:28; Johane 15:13) Kungenzeka ukuthi luyakumangaza uthando olukhulu uJehova alubonisa ngokulungiselela lowo mhlatshelo. (Johane 3:16) Mhlawumbe uzizwa njengesikhulu sebutho esingumRoma esashukumiseleka ukuba sithi: “Ngokuqinisekile lo ubeyiNdodana kaNkulunkulu.” (Mathewu 27:54) Ngokuqinisekile, kufanelekile ukuzizwa ngalezi zindlela. Ngakolunye uhlangothi, khumbula ukuthi amazwi okugcina uJesu awasho esigxotsheni sokuhlushwa athi: “Kufeziwe!” (Johane 19:30) Yini eyayifeziwe? Nakuba afeza izinto eziningi ngokuphila nangokufa kwakhe, injongo eyinhloko yokuza kukaJesu emhlabeni kwakungekhona yini ukuxazululwa kwempikiswano yobukhosi bukaJehova? Futhi kwakungabikezelwanga yini ukuthi ‘njengenzalo’ wayeyobhekana novivinyo olunzima ngokwedlulele olwaluzobangelwa uSathane, ukuze asuse sonke isihlamba egameni likaJehova? (Isaya 53:3-7) Lena kwakuyimithwalo yemfanelo emikhulu, kodwa uJesu wayifeza yonke ngokugcwele. Impela, wayefeze lukhulu!

11. UJesu uyokwenzani ukuze asigcwalise ngokuphelele isiprofetho esashiwo e-Edene?

¹¹ Ngenxa yokwethembeka nobuqotho bakhe, uJesu wavuswa ‘njengomoya onika ukuphila,’ hhayi njengomuntu. (1 Korinte 15:45; 1 Petru 3:18) Nasi isithembiso uJehova asenza eNdodaneni yakhe ekhazinyulisiwe: “Hlala ngakwesokunene sami ngize ngibeke izitha zakho zibe yisenabelo sezinyawo zakho.” (IHubo 110:1) “Izitha” zihlanganisa isoni esikhulu, uSathane, nabo bonke abakha ‘inzalo’ yaso. Njengoba eyiNkosi enguMesiya yoMbuso kaJehova, uJesu Kristu uyohola ekubhubhiseni zonke izihlubuki, endaweni yomoya nasemhlabeni. (IsAmbulo 12:7-9; 19:11-16; 20:1-3, 10) Siyobe sesigcwaliseka ngokuphelele isiprofetho esikuGenesise 3:15 kanye nomthandazo uJesu awufundisa abalandeli bakhe: “Umbuso wakho mawuze. Intando yakho mayenzeke nasemhlabeni, njengasezulwini.”—Mathewu 6:10; Filipi 2:8-11.