Wasimba, wasusa amatshe, watshala kuso umvini obomvu wekhethelo, wakha umbhoshongo maphakathi naso. Kwaba khona futhi nesikhamo sewayini asigweda kuso. Wayelokhu ethemba ukuthi sizothela amagilebhisi, kodwa kancane kancane sathela amagilebhisi asendle.”—Isaya 5:1, 2;

⁴ Kuwumsebenzi onzima ukwenza isivini sikhiqize. U-Isaya uchaza umnini-sivini ngokuthi ‘uyasimba, asuse amatshe’—umsebenzi oyisicefe nokhathazayo! Cishe usebenzisa amatshe amakhudlwana ukuze ‘akhe umbhoshongo.’ Ezikhathini zasendulo, imibhoshongo enjalo yayisetshenziswa njengendawo yabalindi ababeqapha izitshalo zingantshontshwa amasela nezilwane.a Wakha nodonga lwamatshe lokubiyela izindawo okutshalwe kuzo isivini. (Isaya 5:5) Lokhu ngokuvamile kwakwenzelwa ukunqanda umhlabathi obalulekile ukuba ungaguguleki.

5. Umnini-sivini kufanele alindeleni esivinini sakhe, kodwa utholani?

⁵ Esesebenze kanzima kangaka ukuze avikele isivini sakhe, umnini-sivini kufanele alindele ukuba siveze izithelo. Esalindele lokho, ugweda isikhamo sewayini. Kodwa ingabe isivuno esilindelekile siyabonakala? Cha, isivini sikhiqiza amagilebhisi asendle.